Proverbios 5 - El Nuevo Testamento Salmos y Proverbios

Titekakuenhña ti chojnichjin nduáhya ixri

¹ Xje̱eni, tihín ti kjuaxrexinkaon jína. Chrokjuakꞌe chrókuihín ti nkehe jína tsondáxrja̱n.

² Kixin tso̱noha chji̱ñéhña tsonixja; la tso̱noha jína ti nkehe tsondáchrua.

³ Ti chojnichjin nduáhya ixri la ti nkehe nixja sin la éxi itsje̱n kotsje̱nta xi̱kaha, la ko éxi aceite ti nkehe ndáchro tjan,

⁴ kjánchó ti ó tsjixixín la éxi ijnko nkehe imá itsjá o̱ éxi ijnko espada imá taté.

⁵ La ti nkexro chréhe̱ nti̱e tjan la tuénxín itsꞌen sin, kixin ti chréhe̱ sin ti sátsji tjan la tsjiji sin ti tóye̱ tsoxravá chojni.

⁶ Jehe tjan la tahya tjan kuentá ti nti̱a tjajon kjuachón, ti nti̱a ixri tjan la nduáhya, kjánchó noehña tjan.

⁷ Méxra̱, xje̱eni, chrókuihín ti nkehe ndáxrja̱n la ko chrókui̱toéhya ti nkehe tjákohá.

⁸ Chrokui̱to̱hé ti chojnichjin nduáhya ixri la ni chrókóchjinehña ti ndo̱e tjan.

⁹ Kixin chróchje̱éhya ókjé nkexro ti kjuasàya chonta la ko ti nánó chrókjuakꞌe, chrókuakitsjahya ti chojni jie̱he.

¹⁰ La jehya ókjé chojni chrókuákja ti chichaon kuèntá la ko chrókókje̱he chrókjonie ti nkehe chrókꞌuaxrjexín ti ixra̱ kjui̱chꞌe.

¹¹ Landá ti xi̱kaha chrókóhen, ndá chrꞌéxi̱n tso̱tsja̱nka kixin ti cuerpo kuèntá la ó tsinkákjeje̱.

¹² La tsondáchrua: “¿Nkexrín kixin kuiteka̱konhña ti ó kjuenduéhe sin ti janhan? La, ¿nkekuènté kjuanoá ti nkehe níxja sin?

¹³ La kjui̱ntaxiteyáhya ti nkehe kjuako ti nkexro chrónkaxín la ko kóxrína̱hña kui̱ha̱n ti nkehe ndáchro sin.

¹⁴ La ndá ó ikui ti nkehe náxrjónhña la chjina chrókꞌuitjáña kaín nkehe, ndá imá tósuàna kixin kaín chojni kónohe.”

¹⁵ Chroxraxinkaoan jehó ti ichjián la éxi ti chrókꞌia ìnta̱ tꞌaxrjexín jehó ti pozo chonta ndo̱a.

¹⁶ Chrokꞌui̱to̱ehya kixin chrókꞌuitjí ti ìnta̱ kuèntá ndója; chrókjui̱nchexenhña ti ìnta̱ sáchrokjui nti̱a.

¹⁷ Kixin ti ìnta̱ la jahuá kuèntá la jehya kixin chrókóxika̱ye̱hé chrókuákja ókjé chojni.

¹⁸ Itꞌéni Díos chrókjuincheñao ti pozo tꞌaxrjexín ti ìnta̱ kuèntá; méxra̱ kjuaxróxin chrókjuakꞌeko̱a ti nkexro kóta̱ha ti na̱xa̱ kꞌuéndasoá.

¹⁹ Jehe tjan la náxrjón éxi ijnko koxi̱jna̱hnte̱, la chrókócháha kixin tjua̱ha tjan la nkochríxín chrótjue̱hé kichuara.

²⁰ Xje̱eni, ¿nkekuènté chrókꞌuájiko̱a íjnko chojnichjin chóntahya kjuasáye? La ko, ¿nkekuènté chrókjoá ijnko chojnichjin jehya kuèntá?

²¹ Itꞌéni Díos la ó nohe kaín nkehe tjejóchꞌeni. Jehe chꞌan mé tjetsjehe chꞌan ti nti̱a ixrini.

²² Ti nkexro nduáhya ixri la tsjasótexín ti nkehe nduáhya ichꞌe. Ti ijie̱ kjuasin sin la xrokjuahya tsꞌatjánta ti jehe sin kixin éxi tjejóchruéxin sin.

²³ Itsꞌen sin kixin kjuachahya sin kꞌue̱tue̱hen a̱sén sin, kixin ti kjualo̱nti̱ kjuíchꞌe sin mé tsꞌitjáñaxín sin.