Proverbios 4 - El Nuevo Testamento Salmos y Proverbios

Chrokui̱toéhya ti nti̱a jína

¹ Xje̱eni, chrókuihín ti nkehe tjako ti itꞌá. Chrokjuakꞌe chrókuihín la chrókꞌuitjá ti kjuaxrexinkaon jína.

² Kaín nkehe tjàkua janhan la jína; méxra̱ chrókꞌuitjáñahña ti nkehe a.

³ Kja̱xin janhan kꞌuéchájan la ko kꞌuekjakꞌéki̱a̱n tꞌaná la ko janhan ti nkoko̱axón ixjan kꞌuéchónta ti na̱ná imá kótjue̱he.

⁴ Landá tꞌaná mé kꞌuékjako, kꞌuéndáchro: “Chrokꞌuitja ti nkehe nixja̱ha la chrókjui̱nchexiteyá ti nkehe kuétua̱han la jína tsjakꞌe.

⁵ Méxra̱ chrókꞌuitjá chrókónoha jína; chrókꞌuitjáñahña la ko chrókuíto̱ehya ti nkehe kuétua̱han.

⁶ Chrókóxríhan ti nkehe nixja̱ha; chrókuíto̱ehya tíha kixin tíha mé tsjinki̱tsa la ko tsꞌayakohen ti jaha.

⁷ Ti kjuaxrexinkaon jína la a̱ntsí tjetoan; méxra̱ tjéyá ti kjuaxrexinkaon. Kjónté chrókjui̱nchekjia kaín nkehe tjete chonta la tjéyá kixin chrókiénxian jína.

⁸ Chrokjuíkosáyehé ti kjuaxrexinkaon la tíha tsjinki̱tsa kixin tsondáchro chojni kixin jína jaha, chrótjue̱hé la tíha tsjajon kjuasàya.

⁹ Éxi chróchónta ijnko nkehe náxrjón chrókjuakꞌenkáya ikjá éxi ijnko corona náxrjón.”

¹⁰ Xje̱eni, tihín ti nkehe tétua̱han la tíha tsjinki̱tsa kixin nchónhña nánó tsjakꞌe.

¹¹ Janhan mé kjuákohá ti nti̱a chónta kjuaxrexinkaon jína, la ko janhan kjuínki̱tsa kꞌuájia ti nti̱a ndoá.

¹² A̱ndá ti ó tsꞌájia la kohya nkehe tsꞌinkákohe̱n, la kjónté xritinká la kohya nkehe tsóténki̱xian.

¹³ Nchexiteyá ti nkehe kuétua̱han la ti̱toéhya. Chrokꞌuitjáñahña tíha kixin tsotjahá kjuachaxin náxrjón tsjakꞌe.

¹⁴ La sáchrokjuihya nti̱e ti sin tjenka̱yáxinhña jína la chrókuankíhya ti nkehe jínahña tjenka̱yáxin sin.

¹⁵ Chrokui̱to̱hé nti̱e ti sin nduáhya ixri; chrókꞌuaxrjekjanxian ntiha, sáchrokjuia nti̱a ndoí.

¹⁶ Ti sin tjenka̱yáxinhña jína la jehó tjinkaon sin sichꞌe sin ti nkehe jínahña la xitjahya tꞌajua sin ti na̱xa̱ kjuachahya sin kjuachròe sin ijnko chojni.

¹⁷ Ti nkehe jínahña la ko ti kjuatjoté la mé éxi ijnko nkehe náxrjón chrókjonie sin la ko chrókꞌui sin.

¹⁸ A̱ndá nti̱e ti sin jína la tꞌinkaséña éxi ti na̱ndá tji̱to̱n ña̱o; la tsinkákójié ti tꞌinkaséña hasta tsꞌinkaséña nkuíxín.

¹⁹ A̱ndá nti̱e ti sin tjenka̱yáxin ti nkehe jínahña la sítie la tꞌikonhña sin nkehe tótenki̱xin sin.

²⁰ Xje̱eni, tihín ti nkehe ndáxrja̱n; tjakꞌe tihín jína.

²¹ Méxra̱, chrókui̱toéhya ti nkehe ndáxrja̱n; nkochríxín chróxraxinkaoan.

²² Kixin tíha mé tsjajon kjuachón tsꞌáyéhe̱ ti nkexro tsꞌitja. Tíha mé éxi ijnko xro̱a̱n tsito̱exín jína kuenté ti cuerpo kuèntá.

²³ Chrokóxakohan kixin a̱ntsí jína chrókjuénka̱yáxian kixin tíha tjejóchónxin chojni.

²⁴ Chróndáchrohya ti nkehe náxrjónhña la ko chrókui̱to̱hé ti kjuachꞌia.

²⁵ Chrotsjehé jína ti ixria, la ko chrótsjehé jína ti nti̱a sátsjia.

²⁶ *Tsjehé jína nketí tsaké ti to̱tá, ndá nkochríxín nti̱a jína tsꞌájia.

²⁷ Sáchrokjuihya ti nti̱a chjina la o̱ ti nti̱a ikjon; chrókꞌuájihya ti nti̱a jínahña.