Proverbios 31 - El Nuevo Testamento Salmos y Proverbios

Ti nkehe kjuako ti Rey Lemuel

¹ Tíhi ti nkehe kjuako ti chꞌin rey Lemuel, mé ti nkehe kuíhin chꞌan tsíchronka ti ìñé chꞌan:

² Xje̱eni, jaha kꞌuaxrjeníxian ti janhan kixin Díos kjuáte̱he ti nkehe xrja̱noáha̱ chꞌan, la ko jaha ti ixjan tjínka̱oan. ¿Xá nkehe íjnko kjuaxrexinkaon chrótja̱ha?

³ Jehya chrókólóko̱xian ijnko chojnichjin, kixin xi̱kaha kꞌuitjáñaxín itsjé ti sin rey.

⁴ Lemuel, jehya jína chrókꞌui ixran vino la ko ixran sóa ti sin tꞌe̱to̱an kixin chrókókoan sin;

⁵ kixin ti itsꞌi sin la kjá tsꞌitjáñehen sin ti nkehe tjako ley landá tjinki̱tsahya sin ti sin nóa.

⁶ Ti ixran la chróchje̱hé chrókꞌui ti chojni ó tjejótꞌen, la ko ti chojni nkochríxín tꞌává

⁷ kixin ti ó itsꞌi sin la tsꞌitjáñehen sin kixin nóa sin, la ko í tsoxraxinkakonhña sin ti kjuaxikaon.

⁸ Tjínki̱tsa nixjayákohén ti sin noehña nixja la ko kja̱xin ti sin nóa chóntahya nkexro tsjinki̱tsa.

⁹ Taki̱tjehé irꞌua, la tjéyá nkexrín jína tsito̱exín iji̱é sin la ko tjínki̱tsa ti sin nóa la ko ti sin chaxín chóntahya.

Ti chojnichjin jína

¹⁰ Ijnko chojnichjin jína la imá ixra̱ tónoxín kixin imá tjete sínkí sin ke ti ixro̱ imá náxrjón tsjehe.

¹¹ Ti xìi tjan la titekaon kixin jína ichꞌe tjan ixra̱, la jína tjinki̱tsa tjan kixin tsochónta sin chichaon.

¹² Kaín ti ixra̱ ichꞌe tjan la ndoá, kaín tíha la chaxín jína.

¹³ Sátji tjan tꞌe̱na tjan ti ichjo̱én kolélo la ko ti ika lino la chéhe̱ tjan chꞌénaxín itja tjan ti ika.

¹⁴ Jehe tjan la ikjín sátjikꞌe̱na tjan ti nkehe tsicháxi̱n mé xi̱kaha ti ntabarco tji̱xi̱n ikjín tji̱ka̱o nkehe tso̱xi.

¹⁵ Nchítjen tꞌàya tjan la nchechján tjan nkehe sinie ti xje̱en tjan la ko tꞌe̱to̱an tjan nke ixra̱ sichꞌe ti sin chꞌexín ixra̱ ti ndo̱e tjan.

¹⁶ Tjanchankí tjan nkekja̱ín sínkí ijnko nonte la ndá tꞌe̱na tjan la ko ti chichaon tjacha tjan la tꞌe̱naxín tjan inta uva la tje̱nka̱xin tjan.

¹⁷ Jehe tjan la imá ichꞌe tjan ixra̱ la tꞌóxrjéhya ti itja tjan.

¹⁸ Chéhe̱ tjan kixin nchekji tjan nkehe, la kjónté imá tie la na̱xa̱ tjeche ti xrohi tsjexín tjan ichꞌe tjan ixra̱.

¹⁹ Jehe tjan chꞌénaxín itja tjan kaín ti ika tsꞌinkáya tjan.

²⁰ Tjinki̱tsa tjan ti sin nóa la ko ti sin ticháxi̱hin nkehe.

²¹ Tóxakuenhña tjan kjónté imá tókin, kixin kaín ti sin ndo̱e tjan la chónta sin ika itjín tsꞌinkáya sin.

²² Jehe tjan chꞌéna tjan ti nóxre̱e tjan la ko tꞌinkáya tjan ti ika náxrjón tsíkꞌónaxín ika lino la kjátsetié.

²³ Kaín ti sin chjasin la chóxin sin ti xìi tjan la jehe chꞌan tjejóko chꞌan ti sin tꞌe̱to̱an ti chjasin.

²⁴ Chꞌéna tjan ika la ko nkehe tꞌinkatꞌóxin chojni la nchekjihi tjan ti sin nchekji nkehe.

²⁵ Jehe tjan la ijnko chojni jína tsjacha tjan ichꞌe tjan ixra̱ la íso chojni tjikosáyehe ti jehe tjan, méxra̱ tóxakuenhña tjan ti ña̱o tsinkáki.

²⁶ Ti ó nixja tjan la nixja tjan kjuaxrexinkaon jína la nkojína nixje̱he̱ tjan xje̱en tjan.

²⁷ Nkochríxín tsjehe tjan ti ixra̱ ndo̱e tjan la ko ti ixra̱ ichꞌe tjan mé tꞌaxrjeníxin ti nkehe inie sin.

²⁸ Ti xje̱en tjan la ko ti xìi tjan la tjikosáyehe ti jehe tjan, la ndáchro sin:

²⁹ “Ti chojnichjin jína la itsjé siín, kjánchó jaha la a̱ntsí jína ke kaín sin.”

³⁰ Ti náxrjón tsjehe ijnko chojni la jehó kjuachꞌia tíha la ó chónkó tíha; a̱ndá ti chojnichjin chóntehe kjuasàya Itꞌéni Díos la tíha ti tsjikosáyehe chojni.

³¹ Chrokjuíkosáyehéra tjan kixin ti ixra̱ ichꞌe tjan la ko kaín chojni chjasin chrókjuikosáyehe sin ti jehe tjan.