Proverbios 3 - El Nuevo Testamento Salmos y Proverbios

Imá sínkí ti kjuaxrexinkaon jína

¹ Xje̱eni, chrókꞌuitjáñahña ti nkehe kjuákohá, la ko nkochríxín xráxinkaoan ti nkehe kuétua̱han.

² La ti xi̱kaha la isé tsjakꞌe kjuaxróxin la ko náxrjón.

³ Nkochríxín chrótjue̱hé chojni la ko chrókjui̱chꞌiyehya ti chojni choxián. Éxi ijnko nkehe chrókjuakꞌenkí isian, la chrókꞌuitjáñahña tíhi.

⁴ *A̱ndá ti xi̱kaha la tso̱xríhi̱n Díos, la ko kja̱xin chojni tsondáchro kixin ndoá itjen.

⁵ Chrokuinkachónkia Itꞌéni Díos kaín a̱sán la chróndáchrohya kixin jahuá mé noha.

⁶ Chrokjuaké sa̱o Díos kaín ti ixra̱ ichꞌe, ndá jehe chꞌan la tsjendoá chꞌan ti nti̱a kuèntá.

⁷ *Méxra̱ chróndáchrohya kixin jahuá imá noha; ícha jína chrókjuíkosáyehé Itꞌéni Díos; chrókui̱to̱hé ti nkehe jínahña tjénka̱yáxian.

⁸ Tíha mé ijnko xro̱a̱n jína tsjinki̱tsa ti cuerpo kuèntá.

⁹ Chrokjuíkosáyexián Itꞌéni Díos ti nkehe tjete chonta la ko chróchje̱hé chꞌan kaín ti nkehe sa̱oxín tꞌónaha.

¹⁰ Landá ti xi̱kaha, la tso̱kaón ti nchia tꞌenkachjinañá noa la ko tso̱kaón ti nkehe tikia vino.

¹¹ *Méxra̱, xje̱eni, chrókónínkakonhña ti chrókjuinchekjasóte Itꞌéni Díos ti jaha la ko chrókónínkakonhña ti chrókjuenduáha chꞌan.

¹² *Kixin Itꞌéni Díos tjue̱he chꞌan ti nkexro tjenduéhe chꞌan éxi ijnko itꞌé xjan tjenduéhe ti xje̱en kixin tjue̱he.

¹³ Náxrjón tsjakꞌe ti nkexro tsíkꞌitja ti kjuaxrexinkaon jína la ko ti nkexro tsꞌitja tso̱nohe jína

¹⁴ kixin tíha a̱ntsí tjete ke ti plata la ko ti nkehe tsꞌitja chojni mé a̱ntsí sínkí ke ti oro.

¹⁵ Mé a̱ntsí sínkí tíha ke ti ixro̱ imá náxrjón tsjehe, la kohya íjnko nkehe tjenka̱yáxini tsochóntani tsjacha tso̱yóhe̱ ti kjuaxrexinkaon jína.

¹⁶ Ti kjuaxrexinkaon jína mé tsjinki̱tsa kixin isé tsjakꞌe la ko tsjajon kaín ti nkehe imá tjete siín la ko ti kjuasàya.

¹⁷ Ti chróchréhé ti nti̱a kuènté ti kjuaxrexinkaon jína, la tíha chrókjuinchecháha la ko chrótjáha kjuaxróxin.

¹⁸ Ti kjuaxrexinkaon jína mé tjajon kjuachón tsꞌáyéhe̱ ti nkexro tjeyá la ko náxrjón chéhe̱ ti nkexro tꞌitja tíha.

¹⁹ A̱ndá ti kjuaxrexinkaon jína mé kjuíchꞌénaxín Itꞌéni Díos ti chjasintajni la ti imá nohe chꞌan mé kjuíchꞌénaxín chꞌan ti nka̱jní.

²⁰ Ti kjuaxrexinkaon jína mé kꞌóchrítꞌo̱exín chꞌan ti ìnta̱ la ko kjuakꞌe chꞌan ti itji̱ kixin tsꞌaniá ichrin.

²¹ Méxra̱ xje̱eni, chrókui̱toéhya ti kjuaxrexinkaon jína la ko chrókjuénka̱yáxian jína kaín ti nkehe si̱chꞌe

²² kixin tíha mé tsjajon ti kjuachón; tíha mé chróchónta éxi ijnko nkehe náxrjón tsjehe chrókjuakꞌenkí isian.

²³ Landá ti xi̱kaha, la kjuaxróxin tsꞌájia ti nti̱a jína la í tsóténki̱xinhña.

²⁴ La ti ó tso̱kꞌáha, la ninkehó tsochrakuenhña, la ko ti ó tsjakꞌechrian, la kjuaxróxin tsjakꞌe.

²⁵ La tsochrakonhña ti xrína̱hña chrókui ijnko kjuaxikaon o̱ ti itsi nkojín nkehe tsꞌitjáñaxín ti sin tjasin ijie̱,

²⁶ kixin Itꞌéni Díos la tsꞌayakohen ti jaha la ko tsjinki̱tsa chꞌan kixin kohya nkehe tso̱han.

²⁷ Ti nkojín nkexro tjanchia kixin chrókjuinki̱tsa la chróndáchrohya náhí ti noha kixin jína tsjínki̱tsa.

²⁸ Chróndáchrohya kixin ndóye tsjínki̱tsa ti noha kixin jína tsjínki̱tsa ijie.

²⁹ Chrokjuénka̱yáxinhña chrókjui̱chꞌehé nkojín nkehe jínahña ti nkexro choxián, itjen chjinaxón la ko titekakohen ti jaha.

³⁰ Chrokjuéyéhya kjuanínkaon ijnko nkexro ti ninkehó nkehe jínahña kjuítꞌaha sin.

³¹ Chrokjuakéhya a̱sán ti nkehe kjuacha ti sin jínahña la ko chrókuankíehya ti nkehe ichꞌe sin

³² kixin Itꞌéni Díos la tóxrìe̱nhña ti chojni jínahña a̱ndá ti chojni ndoá tjejó la tjinki̱tsa chꞌan.

³³ Itꞌéni Díos la nínkakohen ndo̱e ti sin tjenka̱yáxinhña ti nkehe jína, a̱ndá ndo̱e ti sin ndoá tjejó la ncheñao chꞌan.

³⁴ *Itꞌéni Díos la tóxrìe̱nhña ti sin nchehnke tjanoá iso chojni, a̱ndá tjikosayéhe chꞌan ti sin nchenkehya.

³⁵ Ti sin nohe la tsꞌáyéhe̱ sin kjuasàya; a̱ndá ti sin lo̱nti̱ la jehó kjuatosuéhe̱ tsꞌáyéhe̱ sin.