Proverbios 2 - El Nuevo Testamento Salmos y Proverbios

Ti nkehe tjajon ti kjuaxrexinkaon jína

¹ Xje̱eni, tihín ti nkehe tsondáxrja̱n la ko tꞌitjáñahña ti nkehe kuétua̱han.

² Chrokjuakꞌe chrókuihín ti kjuaxrexinkaon tjákohá; chrókꞌuitjá jína kaín nkehe.

³ Chrokjuanchia kixin chrókꞌuitjá jína la ko chrókjuéyá ti kjuaxrexinkaon jína.

⁴ Chrokjuéyá chrókónoha jína éxi chrókjuéyá ti plata o̱ éxi chrókjuéyá ichrén nkehe tjete.

⁵ Landá ti xi̱kaha, ndá chrókiénxian nkexrín chrókjuíkosáyehé Itꞌéni Díos, la ko chrókꞌuitjá nkexrín chrókóchoxian Díos.

⁶ Kixin Itꞌéni Díos mé tjajon ti kjuachaxin tso̱nohe chojni jína, la ko ti irꞌua chꞌan mé tꞌaxrjexín ti kjuaxrexinkaon jína la ko tsjajon chꞌan kjuachaxin tsienxín chojni kaín ti nkehe imá ixra̱.

⁷ Díos mé tjinki̱tsa ti sin jína tjejó, tjasinhña ijie̱ la ko tꞌayakohen chꞌan ti sin titekaon ti jehe chꞌan.

⁸ Tjinki̱tsa chꞌan ti nkexro jína tjejó la ko tꞌayakohen chꞌan ti sin jína nchexiteyá.

⁹ Ti tihínra jína ndá xi̱kaha tso̱nohara ti nkehe jína la ko ti nkehe ndoá la ko tsꞌitjára ti nti̱a ndoá.

¹⁰ Mé xi̱kaha chróchontara ti kjuaxrexinkaon jína ndá chrókócháhara kixin jína nohara.

¹¹ Chrokónohara jína la tsꞌitjára ti nkehe ndoá kixin tíha mé tsjinki̱tsa ti jahara la ko tsꞌayakohanra,

¹² kixin chrókꞌuájihyara nti̱e ti sin nduáhya ixri, la ko nti̱e ti chojni nixja kjuachꞌia.

¹³ Ti sin a mé kuito̱he sin ti nti̱a jína la sákjuí sin ti nti̱a sítie.

¹⁴ Jehe sin chéhe̱ sin ichꞌe sin ti nkehe jínahña la ko tóxríhi̱n sin sichꞌe sin nchónhña nkehe náxrjónhña.

¹⁵ Ti nti̱a ixri sin la nduáhya la tsíkito̱he sin ti nti̱a ndoá.

¹⁶ Ti kjuaxrexinkaon jína mé tsjinki̱tsa kixin tsjachròehya ti chojnichjin nduáhya ixri, kjónté náxrjón tsonixja̱ha sin.

¹⁷ Ti chojnichjin xi̱kaha ichꞌe mé tsíkito̱he tjan ti nkexro tsíkóte̱he tjan ti na̱xa̱ tjarisoá tjan, la ko ó kꞌuitjáñehen tjan ti nkehe tsíndáche tjan Díos.

¹⁸ Ndá ti sin tsákja ti nti̱a sátsji ndo̱e ti tjan a la ó kuákja sin ijnko nti̱a sítie tsꞌenxín sin.

¹⁹ A̱ndá ti nkexro sátsji ntiha la í tsokjanhña, la ko í tsꞌitjahya ti nti̱a tjajon kjuachón ínaá.

²⁰ Méxra̱ ícha jína chrókꞌuájia ti nti̱a jína; la ko chróchréhé nti̱e ti nkexro ndoá itjen.

²¹ Kixin ti chojni chaxín jína tjejó, tjasinhña ijie̱ la náxrjón tsꞌejó sin ti chjasintajni; la ko tsꞌejó sin itsjé nánó.

²² A̱ndá ti chojni tjenka̱yáxin ti nkehe jínahña la tsꞌaxrjexín sin chjasintajni la ko ti chojni chꞌia la tsꞌitjáña sin.