Proverbios 11 - El Nuevo Testamento Salmos y Proverbios

¹ Itꞌéni Díos tóxrìe̱nhña ti nkexro nduáhya nchekjìinxín nkehe, a̱ndá tóxríhi̱n chꞌan ti nkexro ndoá nchekjìinxín ti nkehe nchekji.

² Ti kjuahnke mé tji̱ka̱o kjuatosuéhe̱, a̱ndá ti sin nkehya la tja̱ko̱xi̱n kixin jína nohe sin.

³ Ti tjenka̱yáxin chojni jína la tjinki̱tsa kixin jína tsꞌejó sin, a̱ndá ti chojni chꞌiyehe kícho mé tsꞌitjáñaxín sin ti chꞌia sin.

⁴ Ninkehó sínkíhya ti nkehe tjete chónta chojni ti ña̱o sinchekito̱exín Díos, a̱ndá ti chojni ndoá tja̱ko̱xi̱n mé tsaá sin.

⁵ Ti ndoá tjenka̱yáxin ti chojni jína la tíha mé tjéndo̱a ti nti̱e sin. A̱ndá ti chojni tjasin ijie̱ la tsꞌitjáñaxín sin ti nti̱a jínahña ixri sin.

⁶ Ti nkehe ndoá tjenka̱yáxin ti chojni jína la tíha tsaáxin sin. A̱ndá ti sin chꞌia la ti nkehe tjinkaon sin tsochónta sin itsjé nkehe la éxi tjejóchjinaxín sin tíha.

⁷ Ti itsꞌen ti chojni tjenka̱yáxin ti nkehe jínahña la kja̱xin itsꞌen ti nkehe tjenka̱yáxin sin la ko ti nkehe tjenka̱yáxin sin tsochónta sin mé tsꞌitjáña kja̱xin.

⁸ Díos tsjinki̱tsa ti chojni jína kixin jína tsꞌaxrjexín sin kaín nkehe náxrjónhña tso̱hen sin. A̱ndá ti chojni tjenka̱yáxin ti nkehe jínahña la tsꞌatsínka sin itsjé nkehe náxrjónhña.

⁹ Ti nkehe nixja ti sin tjenka̱yáxin ti nkehe jínahña la nchekꞌitjáñaxín sin íso chojni; a̱ndá ti kjuaxrexinkaon kuènté ti sin jína la tjinki̱tsa kixin tsꞌaxrjexín sin jína.

¹⁰ Ti tsjacha sichꞌe ixra̱ ti chojni jína la tso̱chéhe̱ ti chjasin, a̱ndá tso̱chéhe̱ chojni ti ó itsꞌen ijnko chojni tjenka̱yáxin ti nkehe jínahña.

¹¹ Ti ijnko chjasin tjejó chojni jína kjuíncheñao Díos la a̱ntsí jína tsjakꞌe ti chjasin. A̱ndá ti nkehe ndáchro ti chojni jínahña la tsꞌitjáñaxín ti chjasin.

¹² Ti nkexro chóntahya kjuaxrexinkaon jína la titekakuenhña kícho. A̱ndá ti nkexro chónta kjuaxrexinkaon jína la chji̱ñéhña nixja.

¹³ Ti chojni xriko kjuachꞌia la chronka kaín ti nkehe ómó sítóhen. A̱ndá ti nkexro jína, la kjónté nohe ichrén nkehe sítóhen, la táníkoá.

¹⁴ Ti kohya nkexro nohe tsꞌe̱to̱an ti chjasin la tso̱kohya kjuaxróxin. A̱ndá ti siín itsjé ti nkexro jína tjenka̱yáxin la jína chrókjuákꞌe ti chjasin.

¹⁵ Jehya jína chróndáchrua kixin chrókjuènka ti nkehe síká íjnko chojni chóxinhña, ícha jína chrókjuínki̱tsahya sin kixin ndá jína chrókjuakꞌe.

¹⁶ Ti chojnichjin jína a̱sén la tsꞌáyéhe̱ kjuasàya. A̱ndá ti chojnindoa xra̱hya tónínkaon la chichaon ó tsjacha sin.

¹⁷ Ti nkexro tjinki̱tsa íjnko chojni la kjuaxróxin tsjakꞌe; a̱ndá ti chojni jie̱he la jehó nchekjasótexín a̱sén.

¹⁸ Ti nkehe tsjacha ti chojni tjenka̱yáxin ti nkehe jínahña la jehó kjuachꞌia, a̱ndá ti nkexro ichꞌe ti nkehe jína la éxi chrókꞌue̱nka̱ sin ti nkehe jína la tsotjá sin kaín ti nkehe jína, tsjeje̱hya.

¹⁹ Ti nkexro ndoá ixri, jína la isé tsjakꞌe; a̱ndá ti nkexro tjenka̱yáxin ti nkehe jínahña la xritjeyá ti nkehe tsꞌenxín.

²⁰ Itꞌéni Díos nínkakohen ti chojni ichꞌe nkehe jínahña; a̱ndá ti sin ndoá ixri la tóxríhi̱n chꞌan.

²¹ Ijnko nkehe la chaxín, ti nkexro tjenka̱yáxin ti nkehe jínahña la tsjasóte sin. A̱ndá ti chojni ndoá tjejó la kjuaxróxin sátsji sin, tsjasótehya sin.

²² Éxi ijnko kochꞌa̱ninko oro tjenta xrito ijnko kochíno mé xi̱kaha ti chojnichjin náxrjón tsjehe ndá chóntahya kjuaxrexinkaon jína.

²³ Ti nkehe tjinkaon ti chojni ndoá ixri la tsꞌaxrje jína; a̱ndá ti nkehe tjinkaon ti chojni tjenka̱yáxin ti nkehe jínahña la jehó tsꞌitjáñaxín.

²⁴ Ti sin tóxika̱ye̱he ti nkehe chónta la a̱ntsí itsjé tsochónta sin; a̱ndá ti chojni tjekohen la tso̱nóa sin.

²⁵ Ti chojni ncheki̱to̱nhe̱n ti sin nóa ti nkehe chónta la jína tsꞌejó, la ko ti nkexro sincheki̱to̱nhe̱n jnko vaso ìnta̱ ijnko chojni la kja̱xin íso chojni tsjajon sin ìnta̱ itsꞌi ti nkexro kjuajon.

²⁶ Ti nkexro jehó tꞌe̱nka̱chji̱na ti noa la sincheno̱to̱n chojni ti nkexro a; a̱ndá ti nkexro sinchekji ti noa la tjikosáyehe ti sin tꞌe̱na.

²⁷ Ti tsjéyá ti nkehe jína la tsꞌayéhé kjuasàya; a̱ndá ti tsjéyá ti nkehe jínahña la tíha tsꞌitjáñaxián.

²⁸ Ti nkexro imá tsotjinkaon ti nkehe chónta la tíha tsjasótexín; a̱ndá ti nkexro jína la tsochónta ni̱xién fuerza la tso̱yóhe̱ sin éxi ijnko inta yoa.

²⁹ Ti nkexro tꞌayakuenhña ndo̱e la ko ti nkehe chónta la tsꞌitjáña kaín; la ko ti nkexro lo̱nti̱ la ticháxi̱n sichꞌehe ixra̱ ijnko chojni nohe.

³⁰ Ti chojni jína la mé yóhe̱ éxi ijnko inta tꞌóna ito tsjajon kjuachón; a̱ndá ti nkexro jína tja̱ko̱he̱ íso chojni la chónta sin kjuaxrexinkaon jína.

³¹ *Ti chojni ndoá tjejó la tsjacha nkehe jína ntihi chjasintajni; a̱ndá ti sin tjasin ijie̱ la jehó ti nkehe jínahña tsjacha sin.