Proverbios 10 - El Nuevo Testamento Salmos y Proverbios

¹ Ti kjuaxrexinkaon jína chrónka Salomón: Ti ixjan chónta kjuaxrexinkaon jína la nchechéhe̱ ti itꞌé, a̱ndá ti ixjan lo̱nti̱ la nchekꞌává ti ìñé.

² Ti nkehe imá tjete kjuacha sin kixin ti nkehe nduáhya kjuíchꞌe sin la ó chónkó, la ti nkexro jína tjejó la si̱chꞌiyéhya sin chojni la xi̱kaha isé tsꞌejó sin.

³ Itꞌéni Díos la títo̱ehya tsꞌenxín kjinta ti nkexro ndoá itjen; kjánchó tsjajonhña chꞌan ti nkehe tjinkaon ti chojni jínahña.

⁴ Ti nkexro chꞌehya ixra̱ la tso̱nóa, a̱ndá ti nkexro tóxakohen sichꞌe ixra̱ la tso̱rico.

⁵ Ti nkexro itjá ti ña̱o tꞌóna nkehe la ijnko chojni nohe jína, a̱ndá ti nkexro tꞌajua ti ña̱o tꞌóna la imá tso̱suéhe̱.

⁶ Itꞌéni Díos la ncheñao ti nkexro jína tjejó, a̱ndá ti nkexro nduáhya tjenka̱yáxin la nchemá ti nkehe jínahña ichꞌe.

⁷ Ti nkexro ndoá itjen la nkochríxín tsoxraxinkaon chojni, a̱ndá ti nkexro nduáhya tjenka̱yáxin la náhí.

⁸ Ti nkexro nohe la kaín a̱sén sinchexiteyá ti nkehe tsíkꞌituehen, a̱ndá ti chojni chji̱ñé nixja mé tsꞌitjáña.

⁹ Ti chojni jína ixri ti nti̱a ndoá la tsochrakonhña, a̱ndá ti chojni ixri ti nti̱a nduáhya la tso̱noxín ti ijie̱ chónta sin.

¹⁰ Ti chojni tjanka xrakon chꞌiyehe kícho mé tíha la tsji̱ka̱o kjuatꞌává la ko ti chojni chji̱ñé nixja la tsꞌitjáña.

¹¹ Éxi ti tꞌaxrje ìnta̱ tjajon kjuachón mé xi̱kaha ti nkehe nixja ti nkexro ndoá itjen, a̱ndá ti chojni jínahña la nchemá ti nkehe jínahña ichꞌe.

¹² *Ti kjuachji̱no̱xíhin la tji̱ka̱o ti tjajo̱n chojni; a̱ndá ti tso̱tjue̱heni kíchóni la tsꞌitjáña kaín ti ijie̱.

¹³ Ti nkehe nixja ti chojni nohe la chónta ti kjuaxrexinkaon jína; a̱ndá ti sin lo̱nti̱ la tsjasótexín ti nkehe chji̱ñé nixja.

¹⁴ Ti chojni nohe la tjenka̱yáxin kixin imá sínkí ti kjuaxrexinkaon jína; a̱ndá ti chojni lo̱nti̱ la ti nkehe nixja mé tsji̱ka̱o kjuaxikaon tsꞌitjáñaxín sin.

¹⁵ Ti sin rico la ti nkehe chónta sin la tꞌayakohen ti jehe sin éxi ijnko tja̱tꞌo̱ tse̱he̱; a̱ndá ti sin nóa la tsjasótexín sin ti nóa sin.

¹⁶ Ti ixra̱ ichꞌe ti sin ndoá tjejó la mé tsjacha kixin kjuaxróxin tsꞌejó sin, a̱ndá ti nkehe tsjacha ti sin nduáhya tjenka̱yáxin la mé ti ijie̱.

¹⁷ Ti nkexro titekaon ti ó xrjenduehe la tsꞌaji ti nti̱a tjajon kjuachón. A̱ndá ti sin titekakonhña la tsjichròe sin.

¹⁸ Ti nkexro chꞌia la nchemá ti kjuanínkaon kuènté la ti nkexro imá xritjonta iso chojni la mé ijnko chojni lo̱nti̱.

¹⁹ Ti chojni chji̱ñé nixjé la tjasin ijie̱; a̱ndá ti nkexro jína tjenka̱yáxin la chji̱ñéhña nixja.

²⁰ Éxi ti plata náxrjón, tjete sínkí ti nkehe nixja ti chojni jína, a̱ndá ti chojni tjenka̱yáxinhña jína la ninkehó sínkíhya ti nkehe nixja sin.

²¹ Ti nkehe nixja ti chojni jína la tjinki̱tsa nchónhña chojni; a̱ndá ti chojni lo̱nti̱ la táhó tꞌitjáñaxín sin kixin tjenka̱yáxinhña sin jína.

²² Ti ó Itꞌéni Díos sincheñao ijnko chojni la a̱ntsí jína tsꞌejó sin, kjánchó ti nkexro tóxakohen sichꞌe ixra̱ la ninkehó tsjachahya sin.

²³ Ti nkexro lo̱nti̱ la tóxríhi̱n tsakítsje kjuasáye; a̱ndá ti nkexro nohe la tóxríhi̱n ti kjuaxrexinkaon jína.

²⁴ Ti nkehe chráko̱nhe̱n ti nkexro tjenka̱yáxinhña jína la táha tsi̱hi̱ sin; a̱ndá ti sin jína la tsꞌáyéhe̱ sin ti nkehe jína tjinkaon sin.

²⁵ Éxi chrókꞌuatsínka ijnko xri̱nto̱xejnki mé xi̱kaha chrókꞌuitjáña ti sin tjenka̱yáxin ti nkehe jínahña; a̱ndá ti sin tjenka̱yáxin jína la jína tsꞌejó sin nkochríxín.

²⁶ Éxi vinagre nchekjote ñeno chojni o̱ éxi ihnchi tjiankí ikon chojni, mé xi̱kaha ti chojni séhe nchekoninkaon sin ti lamoé sin.

²⁷ Ti sin tjikosáyehe Itꞌéni Díos la itsjé ña̱o tsꞌejó sin, kjánchó ti sin tjenka̱yáxin ti nkehe jínahña la séhya tsꞌejó sin.

²⁸ Ti nkehe tjejóchóhen ti sin jína la mé tsjajon kjuachéhe̱ a̱ndá ti nkehe tjejóchóhen ti sin tjenka̱yáxin ti nkehe jínahña la ó chónkó.

²⁹ Itꞌéni Díos la tꞌayakohen ti sin tꞌaji ti nti̱e chꞌan, a̱ndá ti sin ichꞌe nkehe jínahña la sinchekꞌitjáña chꞌan.

³⁰ Ti sin jína la tsꞌitsínkahya sin, a̱ndá ti sin tjenka̱yáxin ti nkehe jínahña la í tsꞌejóhya sin chjasintajni.

³¹ Irꞌua ti chojni jína la tꞌaxrjexín kjuaxrexinkaon jína, a̱ndá ti chojni nixja ti nkehe náxrjónhña la tsꞌitjáña sin.

³² Ti chojni jína la nixja sin nkehe jína tsjinki̱tsa íjnko chojni; a̱ndá ti sin tjenka̱yáxin ti nkehe jínahña la jehó nkehe náxrjónhña nixja sin.