Proverbios 1 - El Nuevo Testamento Salmos y Proverbios

Ti Kjuaxrexinkaon jína

¹ *Ti kjuaxrexinkaon jína níxja Salomón, xje̱en David, rey kuènté ti sin Israel

² la tjinki̱tsa kixin tsochónta chojni ti kjuaxrexinkaon jína la ko tsꞌitja chojni tsienxín kaín ti nkehe imá ixra̱,

³ la ko ti nkehe jína chrókjuénka̱yáxin sin la ko jína ko ndoá chrókꞌuejó sin.

⁴ Ti itan i, la tsjinki̱tsa ti sin kanhñó nohe la tsꞌitja sin ti nkehe jína, la tíhi chrókjuinki̱tsa ti sin ndasoá kixin tsienxín sin la ko tso̱nohe sin nkexrín jína sichꞌe sin kaín nkehe.

⁵ Ti chojni imá nohe la chrókuihin sin jína ti itan i, ndá a̱ntsí chrókónohe sin la ko ti chojni tienxín, la a̱ntsí jína chrókꞌuitja,

⁶ ndá chrókienxín sin ti kjuaxrexinkaon jína la ko chrókienxín sin ti itan imá ixra̱ chrónka ti sin nohe.

⁷ *Ti tjinkaon chojni kixin chaxín tso̱nohe sin la ticháxi̱n tsjikosáyehe sin Itꞌéni Díos. A̱ndá ti chojni lo̱nti̱ la tóxríe̱nhña sin chrókuihin sin ninkehó kjuaxrexinkaon jína xráko̱he̱ sin.

Ti kjuaxrexinkaon tsꞌáyéhe̱ ti sin ndasoá

⁸ Tihín, xje̱eni, chrókuitekaoan ti nkehe tꞌe̱to̱an itꞌá la ko chrókjuíkosáyehé ti nkehe tjako ìná.

⁹ Kixin tíha la éxi ijnko corona náxrjón chrókjuakꞌenkáya ikjá la ko éxi ijnko nkehe náxrjón chrókjuakꞌenkí isian.

¹⁰ Xje̱eni, ti tjinkaon ti sin chónta ijie̱ chrókjuachròe ti jaha la chrókuitekákonhña ti nkehe ndáchro sin.

¹¹ A̱ndá ti chróndáchro sin: “Xrákira tsꞌitoni. Tsꞌinkákonhe̱ni ti chojni tsꞌatsínka ntihi la tsꞌóñáni sin, kjónté chóntahya sin ijie̱.

¹² Sinchekꞌitjáñani sin kjónté jína tjejó sin, éxi chrókꞌuitsínkayá sin ijnko tòye̱ ni̱nka.

¹³ Ndá tsji̱ka̱oni ndo̱eni kaín ti nkehe tseéni la tsochóntani itsjé nkehe tjete.

¹⁴ Xrákira tsꞌitoni la tseéni, a̱ndá nkokón tsakjani ti nkehe tseéni.”

¹⁵ Xje̱eni, kjónté xi̱kaha tsondáchro sin, la chrókꞌuitonhña sin; ti̱to̱hé ti nti̱e sin.

¹⁶ Kixin jehe sin xritinká sin kixin tjinkaon sin chrókjuíchꞌe sin nkehe jínahña la ko tjinkaon sin chrókꞌóñá sin chojni.

¹⁷ Ó chónkó chrókjuasini ijnko trampa chrótsé koxroxe ti tjejótsjehe va kixin ti xi̱kaha la ókjé sátsji va.

¹⁸ A̱ndá ti chojni tjenka̱yáxin nkehe jínahña la tjasin sin trampa, kjánchó jehe sin tsꞌitjáñaxín sin ti trampa kjuasin sin.

¹⁹ Mé xi̱kaha ti nti̱e ti sin imá tjinkaon tsochónta itsjé nkehe, a̱ndá ti nkehe tjenka̱yáxin sin tsochónta sin mé tíha tsꞌenxín sin.

Tóxakohanra chrókui̱to̱éhyara ti kjuaxrexinkaon jína

²⁰ *Ti kjuaxrexinkaon jína la éxi ijnko nkexro itjen nti̱a la ko ndasin, la tjetꞌèya.

²¹ Tjetꞌèya ti tónkotsé nchónhña chojni la ko ti ndója puerta tꞌixenxín chojni mé xi̱kihi ndáchro:

²² “Jahara ndasoá, ¿xá hasta nkesá nduáhya tsjenka̱yáxinra la ko chrókjuanoára ti nkehe jína? Jahara lo̱nti̱ra titekákonhñara ti nkehe jína chrókꞌuitjára.

²³ Chrokuihínra ti nkehe tso̱xrja̱nka; janhan mé tso̱xrja̱nka ti nkehe nona la ko tsjánjua kjuachaxin tsiénxinra ti itan jína níxja janhan.

²⁴ Janhan kꞌuéya̱hára, kjánchó jahara tjinkákonhñara chrókuihínra; jahara kuitekákonhñara ti nkehe ndáxrja̱n,

²⁵ la ícha kuitekákonhñara ti nkehe jína ndáxrja̱n la ko tóxríanhñara ti nkehe níxjahára.

²⁶ Méxra̱ ijie la janhan tsjanoá ti ichrén nkehe tso̱hanra la ko tsjanoá janhan ti itsi ichrén kjuachrakon tsꞌatsínkara,

²⁷ la ko ti ó tsꞌatsínkara ichrén nkehe náxrjónhña ndá tsochrakonra la ko tso̱tsja̱nkara, kixin éxi tꞌatsínka ijnko xri̱nto̱xenjnki la kaín nkehe tsjakáko tsꞌitjáña, mé xi̱kaha tso̱hanra.

²⁸ A̱ndá tsꞌeye̱héra ti janhan, kjánchó janhan tsjáta̱hya; tsjéyára ti janhan, kjánchó tsꞌitjáhyara,

²⁹ kixin kuitekákonhñara ti kjuaxrexinkaon jína la ko kjuikosáyehyara Itꞌéni Díos.

³⁰ Jahara tjinkákonhñara ti nkehe jína níxja janhan la ko tóxríanhñara ti ó kjuénduáhára.

³¹ A̱ndá ijie la tsjasótexínra ti nkehe jínahña kjui̱chꞌera, méxra̱ kjuaxróxinhña tsꞌejora kixin ti nkehe jínahña kjuénka̱yáxinra.

³² Kixin ti nkexro tienxínhña jína la tjichròe landá xi̱kaha tsꞌenxín, ndáchro sin kixin ó jína tjejó sin, kjánchó tíha tsꞌitjáñaxín sin.

³³ A̱ndá ti nkexro tsihin ti nkehe ndáxrja̱n la jína la ko kjuaxróxin tsꞌejó sin, la tsochrakuenhña sin ninkehó, kjónté ichrén nkehe náxrjónhña tso̱hen sin.”