Mateo 1 - El Nuevo Testamento Salmos y Proverbios

Ti sin kꞌuaxrjeníxin Jesucristo

¹ Tíhi mé chrónka nkexro kꞌuaxrjeníxin Jesucristo. Jesucristo mé kꞌuaxrjeníxin David la ko Abraham.

² Abraham mé itꞌé Isaac la ko Isaac mé itꞌé Jacob la Jacob mé itꞌé Judá la ko kaín ti kícho Judá.

³ Judá mé itꞌé Fares la ko Zara la ti ìñé sin mé itꞌin Tamar. Fares mé itꞌé ti Esrom la Esrom mé itꞌé Aram.

⁴ Aram mé itꞌé Aminadab la jehe mé itꞌé Naasón la jehe mé Salmón.

⁵ Salmón mé itꞌé Booz la ìñé mé tjan Rahab. Booz mé itꞌé ti Obed la ìñé ti Obed mé tjan Rut. Obed mé itꞌé Isaí.

⁶ *Isaí mé itꞌé ti rey David la jehe la ko ti tjan kꞌuéchjién Urías mé táha itꞌé la ko ìñé Salomón.

⁷ Salomón mé itꞌé Roboam la Roboam mé itꞌé Abías la Abías mé itꞌé Asa.

⁸ Asa mé itꞌé Josafat la Josafat mé itꞌé Joram la Joram mé itꞌé Uzías.

⁹ Uzías mé itꞌé Jotam la Jotam mé itꞌé Acaz la Acaz mé itꞌé Ezequías.

¹⁰ Ezequías mé itꞌé Manasés la Manasés mé itꞌé Amón la Amón mé itꞌé Josías.

¹¹ Josías mé itꞌé Jeconías la ko ti sin kícho. Ti ña̱o ikui ti sin Babilonia sákjuíko ti sin israelita kixin tsꞌejóchjina sin ti chjasin Babilonia.

¹² Ndá kjuixin sákjuí sin mé Jeconías mé itꞌé Salatiel mé itꞌé ti Zorobabel.

¹³ Zorobabel mé itꞌé Abiud la Abiud mé itꞌé Eliaquim la ko Eliaquim mé itꞌé Azor.

¹⁴ Azor mé itꞌé Sadoc la ko Sadoc mé itꞌé Aquim la ko Aquim mé itꞌé Eliud.

¹⁵ Eliud mé itꞌé Eleazar la Eleazar mé itꞌé Matán la Matán mé itꞌé Jacob.

¹⁶ Jacob mé itꞌé José la José mé kꞌóna xìi tjan María la tjan María mé ìñé Jesús nchekꞌin sin Cristo.

¹⁷ Mé xi̱kaha catorce tꞌáchri̱i kꞌuaxrjeníxin chꞌin Abraham ndá kjuákꞌe chꞌin David la íjnko catorce tꞌáchri̱i kꞌuaxrjeníxin chꞌin David, landá ti sin Babilonia sákjuíko ti sin israelita chjasén sin, landá íjnko catorce tꞌáchri̱i kꞌuejó landá kokjíhi Cristo.

Ti kokjíhi Jesucristo

¹⁸ *Ti kꞌokjíhi Jesucristo mé xi̱kihi kóhen. Ti tjan María, ìñé Jesús, mé tsíkjate̱he tjan tso̱te̱he tjan chꞌin José. Ndá na̱xa̱ kuákjahya kícho sin, ndá kónoxín kixin jehe tjan la í jóhya tjan kixin kjuachaxíen Ncha̱kuén Díos.

¹⁹ Chꞌin José, ti nkexro tsꞌóna xìi tjan María, mé ijnko chojni jína, la kjuénka̱yáxin chꞌan imó chrókjuáke̱he̱ chꞌan tjan kixin tjinkakonhña chꞌan kixin ninkexró tso̱noehña.

²⁰ Ndá na̱xa̱ tjenka̱yáxin chꞌin José nkexrín chrókóhen, ndá kotáchrién chꞌan chrónkaxín kixin kꞌuíkon chꞌan ikui ijnko ángel kuènté Ìnchéni, la ndáchro: ―José, jaha kꞌuaxrjeníxian David. Tóxakuanhña la ko chrakonhña chrókuákjá tjan María tsꞌóna ichjián kixin ti ixjan tsochónta tjan la kjuachaxíen Ncha̱kuén Díos kꞌónaxín ti ixjan.

²¹ *Ti tjan María mé sinchekꞌokjíhi ijnko xjan ndoa la itsꞌin xjan Jesús; kixin jehe xjan tsakjìin iji̱é kaín chojni ―ichro ti ángel.

²² Kaín tíhi kóhen kixin xiteyá ti nkehe tsíndáchro Díos kꞌuénixja ti sin kꞌuéchronka itén Díos ósé. Mé ndáchro:

²³ *Ijnko tjan na̱xa̱ chóntahya chojnindoa mé tsjakꞌeyá tjan la tsochónta tjan ijnko xjan, la sinchekꞌin sin xjan Emanuel, mé tíha tꞌaxrjexín Díos tjejókoni.

²⁴ Ndá ti ó kꞌuàya chꞌin José la kjuíchꞌe éxi ti nkehe kꞌue̱to̱an ti ángel kuènté Ìnchéni, la kuákja chꞌan tjan María, kꞌóna ichjién chꞌan.

²⁵ *Ndá kjónté xi̱kaha, la na̱xa̱ kónkojiéhya sin hasta kꞌokjíejia ti xjan sa̱o, la kjuínchekꞌin sin xjan Jesús.