Efesios 5 - El Nuevo Testamento Salmos y Proverbios

Chrokꞌuejora éxi ijnko xrohi tꞌinkaséñaxín

¹ Jahara mé ó kꞌónara xje̱en Díos la tjua̱hára Díos. Méxra̱ chrókjuáko̱xinra éxi kjua̱ko̱xi̱n chꞌan.

² *Chrotjue̱héra kichuara éxi Cristo tjue̱he ti jeheni la ko kjuenka̱yákohe̱n chꞌan ti iji̱éni, éxi ijnko kolélo kꞌóñá sin la kjuínchechján sin, la kꞌuáyéhe̱ Díos ti xraxé náxrjón.

³ A̱ndá jahara ó tinkachónkira Díos la í chji̱ñéhña tsonixjara nkojín nkehe nduáhya kuènté chojnichjin kixin kaín tíha la ijie̱, la ko ninkehó nkehe náxrjónhña chrókjuénka̱yáxinra la chrókjuénka̱yáxinhñara kixin tsochontara itsjé nkehe tjete.

⁴ La ko chji̱ñéhña chrónixjara ijnko nkehe kjuatosuéhe̱, la ko chrókjóhyara kjuachjanta la ko chrókóno̱nto̱nhñara kixin kaín tíha mé nduáhya. Ícha jína chrókꞌuitjára chróchje̱héra Díos kjuasáya.

⁵ A̱ndá jahara la ó nohara kixin ti nkexro chrókjuasinko ijie̱ ijnko chojnichjin jehya ichjién, ti nkexro ichꞌe nkehe jínahña, ti nkexro tjakꞌe a̱sén tsochónta itsjé nkehe (tíha mé yóhe̱ éxi chrókuinkáchónki sin ti nkehe tsíkjano̱ña), la ti nkexro a la xrokjuahya tsꞌixehen ti tꞌe̱to̱axín Cristo la ko Díos.

⁶ Méxra̱ jahara chrókui̱to̱éhyara chrókjuitꞌayahara nkojín nkexro nixja nkehe ninkehó sínkíhya, kixin ti nkehe jínahña mé tsi̱xi̱n ti kjuanínkaon kuènté Díos la sinchekjasóte chꞌan kaín ti sin titekakonhña ti jehe chꞌan.

⁷ Méxra̱ í tꞌitonhñara ti chojni xi̱kaha tjenka̱yáxin.

⁸ Jahara la ósé la kuékꞌájira ti sítie. A̱ndá ijie la tjejora ti tꞌinkaséña kixin tinkachónkira Ìnchéni. Méxra̱ chrókjuáko̱xinra kixin ó tjejora ti itjen ti xrohi tꞌinkaséña kuènté Díos.

⁹ Kixin ti xrohi tꞌinkaséñaxín la mé tjinki̱tsa kixin tsja̱ko̱xi̱ni jína la ko tsonixjani ti nkehe chaxín la ko ndoá tsꞌejóni.

¹⁰ Méxra̱ chrókóxakohanra chrókjuéyára ti nkehe tóxríhi̱n Ìnchéni.

¹¹ Chrokuankíehyara ti sin tjenka̱yáxin nkehe nduáhya, kixin jehe sin mé tjejó sin ti sítie. Ticháxi̱n chróndáchera sin kixin ti nkehe tjenka̱yáxin sin la nduáhya.

¹² Kixin kjónté chrókjoni kuènté ti nkehe ómó ichꞌe sin la ijnko kjuatosuéhe̱ tíha.

¹³ Méxra̱ kaín nkehe la tso̱noxín kixin ti xrohi la sinchenoxín kaín ti nkehe siín, á nkehe jína o̱ náhí.

¹⁴ Mé xi̱kaha ndáchro sin: Xráxèxian jaha tjéchrian; tꞌaxrjékjanxian ti siín ti sin tsíkꞌen, kixin Cristo mé tjetjoka ti xrohi tsꞌinkaséñaxián.

¹⁵ Méxra̱ ijnko nkehe jína chrókjuénka̱yáxinra; jehya éxi ti sin lo̱nti̱ chóntahya kjuaxrexinkaon jína, náhí. Chrokꞌuejora éxi ijnko chojni nohe, chónta kjuaxrexinkaon jína.

¹⁶ *Chrokóxakohanra chrókjui̱chꞌera ixra̱ éxi tjinkaon Ìnchéni kixin ijie la imá siín nkehe jínahña.

¹⁷ Méxra̱ chrókꞌónahñara ijnko chojni lo̱nti̱. Chrokóxakohanra chrókiénxinra ti nkehe tóxríhi̱n Ìnchéni.

¹⁸ Chrokókoanhñara kixin tíha la tsꞌitjáñaxínra nkochríxín. Ícha jína chrókjuájonra kjuachaxin kixin Ncha̱kuén Díos chrókꞌue̱tue̱hen ti jahara.

¹⁹ *Chrotsjera salmo la ko himno, la ko kaín a̱sánra chrókjuíkosáyehéra Ìnchéni.

²⁰ Nkochríxín chróchje̱héra kjuasáya Itꞌéni Díos kixin kaín ti nkehe kjuajon chꞌan, chróchje̱éxinra kjuasáya ti ihni̱é Ìnchéni Jesucristo.

Jína chrókꞌuejóni kixin tinkáchónkini Ìnchéni

²¹ Chrokjuinchexiteyéhe kichuara kixin ó tinkachónkira Ìnchéni.

²² *Méxra̱ ti chojnichjin ó tsíkóte̱he la chrókjuinchexiteyéhe ti xìi éxi nchexiteyéhe sin Ìnchéni.

²³ Kixin ti chojnindoa mé chónta kjuachaxin tsꞌe̱tue̱hen ti ichjién éxi Cristo mé ikja ti ni̱nko. Mé xi̱kaha Cristo mé kjuínchekaá ti ni̱nko, kixin ti ni̱nko la cuerpo kuènté chꞌan.

²⁴ Méxra̱ éxi ti ni̱nko nchexiteyéhe Cristo, la xi̱kaha ti chojnichjin tsíkóte̱he la chrókjuinchexiteyéhe ti xìi.

²⁵ *La ko kja̱xin ti chojnindoa chrótjue̱hé ti ichjién éxi Cristo tjue̱he ti ni̱nko la ko kꞌuenyákohe̱n.

²⁶ Ikꞌuén Cristo kixin sinchetjóá chꞌan ti sin ni̱nko, kjuínchetjuáxin chꞌan ti ìnta̱ kuikitexín sin kixin kuitekaon sin ti itén chꞌan.

²⁷ Mé xi̱kaha jína tsꞌáyéhe̱ Cristo ti jeheni kixin jeheni mé ijnko ni̱nko náxrjón chóntahya ninkehó kji̱ta̱, ijnko ni̱nko tjóá la ko ndoá.

²⁸ Mé xi̱kaha ti chojnindoa tso̱tjue̱he ti ichjién éxi tju̱éxin a̱sén. Ti nkexro chaxín tjue̱he ti ichjién mé kja̱xin tjue̱he a̱sén.

²⁹ Méxra̱ kjá nijnko chojni chrókónínkakohen ti cuerpo kuènté. Náhí. Kjá chrókjonie sin jína la chrókꞌuayakohen sin ti cuerpo kuènté sin la xi̱kaha Cristo tꞌayakohen ti ni̱nko.

³⁰ Kixin ti cuerpo kuènté Cristo mé jeheni, kixin jeheni mé kꞌóna ti cuerpo kuènté chꞌan la ko ti huéso̱e chꞌan.

³¹ *Mé xi̱kaha ndáchro: “Ti chojnindoa la tsíto̱he ti itꞌé la ko ìñé la tso̱nkojié ti ichjién la yóí sin mé tsꞌóna sin éxi nkoko̱a chojni.”

³² Tíhi la ijnko nkehe imá ijié la ko imá ixra̱ la tsjachahya chojni tsienxín. Méxra̱ janhan xrja̱nká kuènté Cristo la ko ti ni̱nkué chꞌan.

³³ Méxra̱ nkojnko ti chojnindoa la ticháxi̱n tso̱tjue̱he ti ichjién éxi tju̱éxin a̱sén, la ko kja̱xin ti chojnichjin chróchóntehe kjuasàya ti xìi.