Titus 3 - Pinyin

Ndwuumə̀ nɨ ɨ̀poonə̀ pɨ Kristù gerə̀nə a nɨ chyə̂

¹ Kẅempə̀ ɨ̀poonə̀ pɨ Kristù lo pobə tə ndzuʼnə̀, nkɨ nguʼtə̀ ɨ̀twuə̀ ɨ̀laʼà ɨ̀pobə, farə pànə̀ nɨ pobə twuʼtə̀nə ɨ̀tɨ̀ŋnə̀ àtwuə̀ àlaʼà. Kò pobə tə ntɨ̀ŋnə̀ àtwuə̀, nkɨ nchwuʼtə̀ mbɨ̀ŋmə̀ ɨ̀zobə a nɨ fàʼà àfàʼà ɨ̀shìʼnə̀ àtsùmə̀.

² Tiitə̀ a ghobə lo kò pobə tə nshwəŋə̀ a tɨ̀pòŋə̀ aŋunə ŋònə̀ ɨ̀tse; kò pobə tə nsaʼnə̀ a ghobə, nshwuʼkə̀ mbɨ̀ŋmə̀ ɨ̀zobə nkɨ nchyə̂ nɨ àporə̀porə̀ pobə pɨ pə̀ənə̀ nkwùə̀ ɨ̀tsùmə̀.

³ Mbə̀ʼnə pəə àtwuə̀ ɨ̀pɨ̀ŋmə̀ àzəə lə̀ pə nkwùə̀ ɨ̀tse la mbuukə̀, ka mə zuʼnə̀ a wəə a Nẅùə̀. Pànə̀ lə̀ mə nfɨ̀kə̀ a wəə pəə ghɨ̀rə̀ a tɨ̀pòŋə̀, pəə tyiʼə̀ mbə ɨ̀pùʼù aŋunə àzwuumə̀ za àtsùmə̀ nɨ mbɨ̀ŋmə̀ tàʼnə nkɨ nkòŋə̀ la. Pəə lə̀ tsə̀ŋə̀ nkwùə̀ ɨzəə pə a nɨ ghɨ̀rə̀ tɨ̀pòŋə̀ farə a nɨ ghə̀ʼnə̀ pə̀ənə̀. Pəə lə̀ ghɨ̀rə̀ mɨ̀nwùə̀ nɨ pànə̌ pàanə̀ a wəə, pəə kɨ mmə mbàanə̀ pə̀ənə̀.

⁴ La Nẅùə̀ ngàŋə̀ nchwarə̀ ɨ̀wəənə̀ à lə̀ nèrə̀ a wəənə̀ nɨ àpòŋə̀ ntɨŋmə̀ e, nkɨ nnèrə̀ lo à kòŋə̀ a wəənə̀,

⁵ nchwarə̀ a wəənə̀. Ka à lə̀ chwarə̀ e a wəənə̀ la ntii mɨ̀nwùə̀ ɨ̀məənə̀ mɨ təəmə̀nə. À lə̀ chwarə̀ a wəənə̀ pə ntiinə à lə̀ koorə̀nə mɨ̀lɨŋə̀ ɨ̀məənə̀, nsùu mɨ̀ntɨŋmə̀ ɨ̀məənə̀, nkẅirə̀ mbyə̂ a wə̀ənə̀ shwuə̀ shwuə̀, ŋŋâ a nɨ̀chyə̂mbyə̂ yɨ̀ shwuə̀ ambo pə̀ənə̀ ndàŋə̀ a ndzùmə̀ Àzhwùə̀ e,

⁶ nɨ à lə̀ kẅìrə̀nə aŋunə pə̀ənə̀ yè noʼnə ndàŋə̀ a ndzùmə̀ Yěsû Kristù ngàŋə̀ nchwarə̀ ɨ̀wə̀ənə̀.

⁷ A lə̀ ghɨ̀rə̀ a lenə la lo mɨ̀nwùə̀ ɨ̀məənə̀ təəmə̀ a ɨ̀myə̂ ze ntii àpòŋə̀ ntɨŋmə̀ e, ntyiʼə̀ mmə mbyabə̀ a nɨ̀chyə̂mbyə̂ nɨ a lə̀ kàʼnə nɨ a ghoŋə̀nə nɨ nkuŋə̀ la.

⁸ Àshwəŋnə̀ zə̀ la nkǔŋə nkuŋə. Ntàʼà lo wə̀ shwəŋə̀ mɨ̀nwùə̀ mèrə mə nkẅirə̀ nshwəŋə̀, mbə̀ʼə pànə̀ nɨ pɨ nùŋə̀nə mɨ̀ntɨŋmə̀ ɨ̀mobə aŋunə Nẅùə̀ la pobə ŋâ mbɨ̀ŋmə̀ ɨ̀zobə a nɨ ghɨ̀rə̀ mɨ̀nwùə̀ mɨ ɨ̀shìʼnə̀. Ɨ̀nwùə̀ pèrə pə kùʼnə̀ nkɨ mbòŋə̀ ambo ŋwùə̀ ntsùmə̀.

⁹ La kò wə̀ chyâ àpô amwuə ɨ̀kɨ̀ghə̀ ɨ̀tànkə̀ mɨ̀nwùə̀, kə̀ a nɨ shankə̀ ɨ̀waanə̀ pɨ̀tǎ pɨ̀tǎ, pobə nɨ̀zòŋnə̀, kə̀ àsaʼnə̀ mbə̀ʼə mbòomə Mǔsî, ntiinə mɨ̀nwùə̀ mèrə mə àfǐfǐ mɨ̀nwùə̀ ka pə yèmpə̀ e.

¹⁰ Ŋwùə̀ a nɨ nɨ mbə a tɨ̀tɨ̀rə̀ àshwatə̀ ɨ̀poonə̀ pɨ Kristù ntàʼà pə a nɨ tô nɨ àghàpə̀, wə̀ kwàtə̀ e mbyàa nkwùə̀ ɨpaa. A ka zuʼù e, kò wə̀ chi mbə o nɨ ànwùə̀ àtse a nɨ ghɨ̀rə̀ pɨghə ze.

¹¹ Mbə̀ʼnə wə̀ zhyə̂nə lo mbuurə̀ ŋònə̀ zə̀ à noʼò nɨ ɨ̀nwùə̀ tɨ̀pòŋə̀; lenəla, ngɨ̀rə̀ ɨ̀nwùə̀ tɨ̀pòŋə̀ ɨ̀ze nèrə̀ lo ka à kùʼnə̀ e.

Ndẅùə̀ndzùmə̀ àtəətə̀ Pàolò

¹² Ntə pəla ntwuumə̀ a Atemàsə̀ kə̀ a Takikùsə̀ ambo ghò, wə̀ fàʼà ntô ntsirə̀ a mə̀ a Nikopolìsə̀ ntiinə ǹnùŋə̀ mə a ntɨŋmə̀ mɨ̀ŋə̀ lo chyə̂ ghu nkwùə̀ ghɨɨmə.

¹³ Ghɨ̀rə̀ ànwùə̀ àtsùmə̀ a nɨ zəənə̀ lo wə̀ yèmpə̀ a Zenàsə̀ ngàŋə̀ nsaʼà mɨ̀sàʼa pobə Àpolòsə̀ aŋunə àkwùə̀ nɨ̀yìinə̀ àzobə. Ŋâ a ghobə nɨ àzwuumə̀ àtsùmə̀ nɨ pobə tàʼnə.

¹⁴ Kɨ ndzəənə̀ lo pə̀ənə̀ ɨ̀pə̀ənə̀ ŋâ mbɨ̀ŋmə̀ ɨ̀zobə a nɨ ghɨ̀rə̀ mɨ̀nwùə̀ mɨ ɨ̀shìʼnə̀ mbə̀ʼə yèmpə̀ pànə̀ nɨ pobə puŋə̀nə; kò ŋwùə̀ ghobə a tsə̀ŋə̀ e nkwùə̀ e àfǐfǐ.

¹⁵ Ŋwùə̀ ntsùmə̀ nɨ a wə̀ pəə pɨ pobə a wə̀ nchàʼtə̀ o. Chàʼtə̀ a ŋwùə̀ wa ntsùmə̀ nɨ a kòŋə̀nə a wə̀ənə̀ nkɨ nùŋə̀ mɨ̀ntɨŋmə̀ ɨ̀mobə aŋunə Kristù la. Àpòŋə̀ ntɨŋmə̀ Nẅùə̀ a tyiʼə̀ ngoŋə̀ pɨghə pɨ pobə pɨ̀tsùmə̀.