Mark 13 - Pinyin

Yěsû a shwəŋə̀ tsaʼnə pɨ ghǎ shàʼtə̀ Ndâ Mɨ̀shwàʼà Nẅùə̀

¹ Tsaʼnə Yěsû pobə ɨ̀zùŋə̀ ndzùmə̀ ɨ̀pe lə̀ pənə nfurə̀ amwuə Ndâ Mɨ̀shwàʼà Nẅùə̀, taʼà àzùŋə̀ ndzùmə̀ e ghùtse a shwəŋə̀ ambo ze lo, “Ɨ̀nèrə̀, naŋə̀ tsaʼnə mɨ̀ghòorə mə pòŋə̀nə pɨ kɨ ndòo mèrə nkorə̀ mɨ̀ndâ mɨ pòŋə̀!”

² Yěsû a kẅùə̀ ambo ze lo, “Wə̀ zəənə̀ mɨ̀ndâ mɨ̀ẅùunə mə? Ka taʼà nɨ̀ghòorə wə̀ ɨ̀tse a pə ghǎ nwuunə̀ e àtwuə̀ tsɨ̀tse nɨ̀ghòorə. Pɨ ghǎ shàʼtə̀ mèrə tyìʼə̀ mɨ̀tsùmə̀ kẅìrə̀ a ɨ̀shyə̂.”

Ngəʼə̀ ghobə nɨ̀nyàŋə̀ ɨ̀poonə̀ pɨ Kristù

³ Yěsû à lə̀ koʼò ngə̀ nnwuunə̀ àtwuə̀ Mbarə̀ Olìvə̀ amwuə ẅùə̀ pàa nɨ à naŋə̀nə Ndâ Mɨ̀shwàʼà Nẅùə̀; Pità, Jemə̀, nɨ Jònə pobə Andrù pyiitə̀ ambo ze nkwùə̀ nɨ pobə lə̀ tyiʼnə nnwuunə̀ pobə nɨ pobə lo,

⁴ “Tsùŋə̀ ntiitə̀ a wəə, nɨ nkwùə̀ nɨ mɨ̀nwùə̀ mə mɨ̀tsùmə̀ ghǎ ghɨ̀rə̀. Àlènə̀ nɨ a ghǎ nèrə̀ lo nkwùə̀ ɨ̀ kùʼù lo mɨ̀nwùə̀ mèrə mə ghɨ̀rə̀ la àkə?”

⁵ Yěsû a pìʼnə̀ a nɨ shwəŋə̀ ambo pobə lo, “Nɨ̀ zhìʼtə̀ mbə̀ʼə ŋònə̀ ɨ̀tse a ghɨ̀rə̀ nɨ waʼà àlàŋə àzɨghə.

⁶ Pànə̀ pɨ̀noʼnə ghǎ tô aŋunə nɨ̀linə̀ ɨ̀tsâ nshwəŋə̀ lo, ‘Mɨ̀ŋə̌ ze!’ Lenəla, fɨ̀kə̀ pànə̀ pɨ̀noʼnə.

⁷ Nkwùə̀ nɨ nɨ̀ zuʼnə lo pɨ pə mmàʼà mɨ̀ntsòo, kə̀ ndzuʼù pànə̀ mə nshwəŋnə̀ mbə̀ʼə mɨ̀ntsòo, kò nɨ̀ pô a wɨghə. Pèrə pa ɨ̀nwùə̀ chyə̂ a nɨ furə̀ la ka a pə e lo ndẅùutə àtwuə̀ ɨ̀shyə̂ ɨ tô mə.

⁸ Mbə̀ʼnə àlaʼà a ghǎ zòŋnə̀ a zhyə̀ àlaʼà, ɨ̀fò pobə pə̀ənə̀ ɨ̀pe a lòo ndzòŋnə̀ a ẅùə̀ ɨ̀fò pobə pə̀ənə̀ ɨ̀pe, ɨ̀shyə̂ nə̀ʼnə̀ ɨlyiʼə pɨ̀noʼnə, lenəla, ndzàŋə̀ kwuunə̀ amwuə ɨ̀laʼà. Mèrə mə mɨ̀nwùə̀ ghǎ pə lə tsaʼa mbìʼnə àndzaŋə nkwùə̀ nɨ mə̀ngyə̌ à kòonə a moonə̀.

⁹ “Nɨ̀ zhìʼtə̀ a wɨghə ntiinə pɨ tô kô a wɨghə ŋŋâ ambo pɨ̀saʼà mɨ̀sàʼa pobə tə nkəʼə̀ a wɨghə amwuə mɨ̀ndâ mɨ àshwatə̀ ɨ̀mobə. Nɨ̌ ghə̀ təəmə̀ a mbyə̀ pɨ̀govɨnò pobə pɨ̀fò mbə̀ʼə mə̀ a nɨ tiitə̀ ntwuumə̀ ghù ɨ̀shìʼnə̀ wa ambo pobə.

¹⁰ Lenəla, pɨ̂ zàamə̀ nchwìitə̀ ntwuumə̀ ghù ɨ̀shìʼnə̀ wa ambo ɨ̀laʼà ɨ̀tsùmə̀.

¹¹ La nkwùə̀ ɨ̀tsùmə̀ nɨ pɨ kônə a wɨghə ndòo ntô amwuə korə̀, kò nɨ̀ pô a wɨghə lo nɨ̌ shwəŋə̀ lə̀ lo àkə apə̀. Nɨ̀ shwəŋə̀ ànwùə̀ nɨ Nẅùə̌ ŋâ ambo pɨghə nkwùə̀ ghu, ntiinə la ka a mə nshwəŋnə̀ e pɨghə, la a wə̀ nshwəŋnə̀ Àzhwùə̀ Nẅùə̀.

¹² Ŋwùə̀ à ghǎ ŋâ a momaa e lo pɨ zhwuutə̀, tǎ a ŋâ a moonə̀ e lo pɨ zhwuutə̀, ɨ̀poonə̀ pə̀ŋə̀ a ndzùmə̀ pɨ̀tǎ pobə pɨ̀mǎ ɨ̀pobə, ŋŋâ a ghobə lo pɨ zhwuutə̀.

¹³ Ŋwùə̀ ntsùmə̀ a ghǎ pàanə̀ a wɨghə mbə̀ʼə mə̀. La ŋònə̀ nɨ à təəmə̀nə ntɨ̀ŋnə̀ tə ngə̀ ndẅùunə̀ à ghǎ chwarə̀.”

Àzwuumə̀ nɨ a fèrə̀nə ka mɨ̀zùŋə

¹⁴ “La nkwùə̀ nɨ nɨ̀ zəənə̀nə àzwuumə̀ nɨ a fèrə̀nə ka mɨ̀zùŋə, mmə ntsə̀ŋə̀ ɨlyiʼə, a təəmə̀ a alyiʼə nɨ ka à tə mbə təəmə̀ e amwuə Ndâ Mɨ̀shwàʼà Nẅùə̀, (a pòŋə̀ lo ŋònə̀ nɨ à mənə nfuŋə̀ a tsùŋə̀ nzhyə̂ ànwùə̀ zə), nɨ̀ ghɨ̀rə̀ pànə̀ nɨ pɨ pənə àlaʼà Judyà furə̀ nkɨ̀ɨrə̀ nkoʼò ndèrə̀ àtwuə̀ mɨ̀mbarə̀.

¹⁵ Kò ŋònə̀ nɨ à pənə a àtwuə̀ ndâ ze a chi nshwuʼə̀ a ɨ̀shyə̂ lo kwuunə̀ amwuə ndâ lo lòo àzwuumə̀ àtse.

¹⁶ Lenəla, kò ŋònə̀ nɨ à pənə e a atwurə a chi nkwə̂ a nɨ piinə̀ a kutə̀ e.

¹⁷ A gha pə pəla ambo pə̀ngyə̌ pɨ̀sùŋə̀nə, farə pɨ̀məpwùrə̀ amwuə mɨ̀njyə̂ mɨ̀ghu!

¹⁸ Nɨ̀ tə nchàʼtə̀ a Nẅùə̀ lo kò mɨ̀nwùə̀ mèrə mə gha nfurə̀ e amwuə nkwùə̀ ghɨɨmə.

¹⁹ Mbə̀ʼnə ngəʼə̀ nɨ ɨ̀ ghǎ pə amwuə mɨ̀njyə̂ mɨ̀ghu, ɨ̀ ghǎ tsàarə̀ a zhyə̀ nɨ ɨ̀ laʼa mbyə̀ mbə e ghu apə̀ a nɨ furə̀ tsaʼnə Nẅùə̀ à lə̀ tsùŋə̀nə àtwuə̀ ɨ̀shyə̂ tə mbyàa tɨ̀tsòŋə̀. Ka ngəʼə̀ ɨ̀tse ɨ pə ghǎ chi pə e ghu tsaʼa zə.

²⁰ Nẅùə̀ à lə̀ pə la ngoŋə̀ e tɨ shwùʼtə̀ ndùnə̀ mɨ̀njyə̂, yi mbə̀ʼə ŋwùə̀ mɨsoŋə moʼo a chwarə̀ e apə̀. La Nẅùə̀ à kùmə̀ nshwùʼtə̀ mɨ̀njyə̂ ntii pànə̀ nɨ à lə̀ tsoʼnə a ghobə la.

²¹ “Ŋwùə̀ a tə mbəla nshwəŋə̀ ambo pɨghə lo, ‘Zəənə̀, Ghù Ndzoʼnə wa à wə̀ a nɨ̀ghə̂, Kə̀ à ẅùə̀ a nɨ̀yî!’ Kò nɨ̀ pyiimə̀.

²² Mbə̀ʼnə pɨ̀Kristù pɨ pɨ̀chwìrə̀ ghobə ngàŋə ntwuumə̀ Nẅùə̀ pɨ pɨ̀chwìrə̀ ghǎ furə̀, lenəla, nnèrə̀ ɨ̀lènə̀ ɨ̀nwùə̀ ghobə mɨ̀nwùə̀ mɨ kə̀ʼnə̀nə a nɨ ghɨ̀rə̀ pyə̀ pa nɨ Nẅùə̀ a tsoʼnə la lo pobə fàntə̀ àlàŋə.

²³ Nɨ̀ zhìʼtə̀ a wɨghə, ntiinə mbyə̀ mə ntiitə̀ a wɨghə nɨ mɨ̀nwùə̀ mə mɨ̀tsùmə̀ zaʼà nkwùə̀ ɨ pòŋə̀ kùʼù.”

Nkwùə̀ nɨ Moonə̀ Ŋwùə̀ à ghǎ kẅirə̀ tô

²⁴ “La, a gha pə amwuə mɨ̀njyə̂ mɨ̀ghu, nkwùə̀ nɨ ngəʼə̀ ghu ɨ làŋə̀ mə, ndzùmə ɨ̀ ghǎ nàanə̀ a nẅùumə̀, lenəla, ŋwɨgrə̀ a chi ntâ e apə̀,

²⁵ Pɨsaŋə tyiʼə̀ nfurə̀ a nɨ̀pwuurə̀ nkẅìnə̀ a ɨ̀shyə̂, Ɨ̀tɨ̀ŋnə̀ wa ɨ̀tsùmə̀ nɨ ɨ pənə a nɨ̀pwuurə̀ la ɨ nə̀ʼnə̀.

²⁶ “Nkwùə̀ ghu, pànə̌ zəənə̀ a Moonə̀ Ŋwùə̀ tsaʼnə à mənə ntô amwuə mbàʼà nɨ mɨ̀tɨ̀ŋnə̀ mɨ̀ẅùunə pobə àghuʼtə̀.

²⁷ À ghǎ twuumə̀ pəngèrə̀ ɨ̀pe amwuə pɨ̀pàa pɨ àtwuə̀ ɨ̀shyə̂ pə̀ nɨ̀kwàa lo pobə̂ shwatə̀ pànə̀ pɨ Nẅùə̀ pa nɨ à lə̀ tsoʼnə amwuə ɨlyiʼə ɨ̀tsùmə̀ a àtwuə̀ ɨ̀shyə̂ a nɨ furə̀ amwuə taʼà pàa ngə̀ mbyàa amwuə ẅùə̀.”

Nɨ̀ lanə̀ a taʼà ànwùə̀ aŋunə àtɨ̀ghə figə̀

²⁸ “Nɨ̀ lanə̀ a taʼà ànwùə̀ aŋunə àtɨ̀ghə figə̀. Nkwùə̀ nɨ a fuukə̀nə mɨfuə mɨ̀shwuə̀, nɨ̀ zhyə̂ lo ɨ̀tsirə̀ ɨ tyiʼə̀ a mbô.

²⁹ A kɨ mbə tyìʼə̀ ndəŋə ndəŋə lo, nkwùə̀ nɨ nɨ̀ zəənə̀nə mɨ̀nwùə̀ mèrə mə ndòo alyiʼə, nɨ̀ zhyə̂ lo nkwùə̀ ɨ̀ paatə̀ ntyiʼə̀ a ntswùə̀ nkaʼà.

³⁰ Ǹshwəŋə̀ tyìʼə̀ nkǔŋə nkuŋə ambo pɨghə lo, mɨ̀nwùə̀ mə mɨ̀tsùmə̀ ghǎ ghɨ̀rə̀ zaʼà ɨ̀waanə̀ pànə̀ pɨ tɨ̀tsòŋə̀ wə̀ ɨ pòŋə̀ kwɨkə̀.

³¹ Lenəla, nɨ̀pwuurə̀ ghobə àtwuə̀ ɨ̀shyə̂ ghǎ lẅùutə̀, la ɨ̀shwəŋnə̀ ɨ̀pâ lẅùutə̀ e apə̀.”

Ka ŋònə̀ ɨ̀tse a zhyə̂ e njyə̂ kə̀ nkwùə̀

³² “Ka ŋònə̀ ɨ̀tse tə farə pəngèrə̀ a nɨ̀pwuurə̀ pobə pɨ Moonə̀ Nẅùə̀ zhyə̂ a ghobə njyə̂ ghu kə̀ nkwùə̀ ghu, ndàŋə̀ e Tǎ nɨ a zhyə̂nə.

³³ Nɨ̀ nwuunə̀ a nɨ̀lyìinə̀ ntə mbyabə̀, mbə̀ʼnə ka nɨ̀ zhyə̂ a wɨghə nkwùə̀ ghu.

³⁴ A chyə̂ la tsaʼa ŋwùə̀ a pə nfurə̀ ndèrə̀ a àkarə̀: nkwùə̀ nɨ à mənə ndèrə̀, a fuŋə̀ ngàŋə àfàʼà ɨ̀ze, ngàpə̀ ɨ̀fàʼà ambo pobə àtwuə̀ àtwuə̀, ntyiʼə̀ nshwəŋə̀ ambo mbyabə̀ ɨlyiʼə lo, â nwuunə̀ a nɨ̀lyìinə̀ mbyabə̀ ɨlyiʼə, nkɨ mmə nnaŋə̀ ngàŋə àfàʼà za.

³⁵ Nɨ̀ nwuunə̀ a nɨ̀lyìinə̀ mbyabə̀, ntiinə ka nɨ̀ zhyə̂ a wɨghə nkwùə̀ nɨ ngàŋə̀ ndâ à ghǎ kwə̂. A chyə̂ pə nkwùə̀ nkwə̌ kə̀ a ntɨ̀ŋnə̀ ɨ̀twuʼə̀, kə̀ a nkòʼò njyə̂, kə̀ a ngẅùʼə,

³⁶ mbə̀ʼə a pə la ngwùutə̀ ntô kò a tsirə̀ e a ghò wə̀ pə ndyə̂.

³⁷ Ànwùə̀ nɨ ngwə̀ nshwəŋə̀ ambo pɨghə la, ǹshwəŋə̀ la ambo ŋwùə̀ ntsùmə̀. Njiilo nɨ̀ nwuunə̀ a nɨ̀lyìinə̀.”