2 Timotì 3 - Pinyin

Ndwuumə̀ nɨ pànə̀ ghǎ pə amwuə mɨ̀njyə̂ mɨ ndẅùutə

¹ Kɨ nkẅempə̀ lo ngəʼə̀ ɨ̀ ghǎ pə ghu amwuə mɨ̀njyə̂ mɨ ndẅùutə.

² Pànə̀ ghǎ taŋnə̀ pə a nɨ kòŋə̀ mbɨ̀ŋmə̀ ɨ̀zobə kɨ kòŋə̀ nkabə̀. Pobə ghǎ koʼò mbɨ̀ŋmə̀, nnèrə̀ mbɨ̀ŋmə̀, kɨ zòomə̀ pɨ̀tse pə̀ənə̀. Pobə ghǎ tɨ̀ŋnə̀ àtwuə̀ ambo pɨ̀tǎ ɨ̀pobə pobə pɨ̀mǎ ɨ̀pobə, ŋŋâ a ghobə a mɨyàa aŋunə ànwùə̀ ɨ̀shìʼnə̀ nɨ pɨ ghɨ̀rə̀nə ambo pobə apə̀, kɨ ghuʼtə̀ a ghobə a Nẅùə̀ apə̀.

³ Ka pobə pə ghǎ mə kòŋə̀ a ghobə pə̀ənə̀ kɨ mə lə̀ənə̀ a ghobə ɨ̀fàntə̀ ɨ̀nwùə̀ ɨ̀pobə apə̀. Pobə ghǎ kwə̀əmə̀ pə̀ənə̀, kɨ zhyə̂ ẅìimə̀ a ghobə mbɨ̀ŋmə̀ ɨ̀zobə apə̀. Mɨ̀nwùə̀ ɨ̀mobə ghǎ tɨ̀ŋnə̀ pobə kɨ mbàanə̀ ànwùə̀ ɨ̀shìʼnə̀.

⁴ Ka pobə pə ghǎ pə ghobə pànə̀ nɨ mbə̀ʼə ŋwùə̀ a zəʼnə̀ aŋunə pobə, kɨ pə ghobə pànə̀ nɨ mbə̀ʼə ŋwùə̀ a tiitə̀ a ghobə nɨ ànwùə̀ nɨ pobə ghɨ̀rə̀ apə̀. Pobə ghǎ lẅenə̀ nɨ àkoʼò mbɨ̀ŋmə̀, kɨ pə pànə̀ nɨ pɨ ghǎ kòŋə̀ pə a nɨ zuʼù ɨ̀shìʼnə̀ ɨ̀ghobə tsàarə̀ a nɨ kòŋə̀ Nẅùə̀.

⁵ Pobə ghǎ nèrə̀ nèrə̀nə lo pobə pə nguʼtə̀ a Nẅùə̀ tsaʼa pə̀ənə̀, la mə twuunə̀ a ghobə ngotə mɨ̀tɨ̀ŋnə̀ nɨ Nẅùə̀ a pənə nɨ mèrə. Kɨ̀ɨrə̀ o mbuurə̀ pànə̀ zə̀.

⁶ Lə̌ mbuurə̀ pànə̀ za nɨ pobə pa ntaŋnə̀ a nɨ kwuunə̀ amwuə mɨ̀ndâ lo tyiʼə̀ pə àtwuə̀ pə̀ngyə̌ nɨ pobə porə̀nə, tɨ̀pòŋə̀ a kɨ noʼò amwuə pobə, pobə tyiʼə̀ mbə nɨ ntoŋə a nɨ ghɨ̀rə̀ mbuurə̀ tɨ̀pòŋə̀ ntsùmə̀.

⁷ Pə̀ngyə̌ pə kɨ nkòŋə̀ a ghobə pə a nɨ lanə̀ mɨ̀nwùə̀ mɨ shwuə̀, la mbə laʼa zhyə̂ a ghobə a nkǔŋə nkuŋə nɨ a pənə amwuə àshwəŋnə̀ Nẅùə̀ apə̀.

⁸ Tsaʼnə Janèsə̀ pobə Jambrèsə̀ lə̀ zòŋnə̀nə a nɨ tsə̀ŋə̀ ànwùə̀ nɨ Mǔsî à lə̀ shwəŋə̀nə, lə kɨ mbə tsaʼnə pànə̀ pə̀ pə ndzòŋə̀ a nɨ ghɨ̀rə̀ lo kò pànə̀ zhyə̂ a nkǔŋə nkuŋə. Ka ɨ̀zhìʼtə̀ mbuurə̀ pànə̀ zə̀ mə nfàʼà e, ka pobə kɨ ndanə nnùŋə̀ a ghobə ntɨŋmə̀ ɨ̀ghobə aŋunə Kristù.

⁹ La mbə̀ʼə pobə lèrə̀ a ghobə a ntyə̌ sàa nɨ mbuurə̀ mbòomə ɨ̀zobə zə̀ apə̀, ntiinə ŋwùə̀ ntsùmə̀ ǎ zhyə̂ lo pobə chyə̂ mbə la ɨ̀puukə̀ pə̀ənə̀. Lə̌ mbuurə̀ ànwùə̀ nɨ a lə̀ ghɨ̀rə̀nə a Janèsə̀ pobə Jambrèsə̀.

Ndẅùə̀ndzùmə̀ àtəətə̀ Pàolò ambo Timotì

¹⁰ La ngə̀ aŋunə ghò Timotì, wə̀ zùŋə̀ mɨ̀nwùə̀ nɨ ngwa nnèrə̀ nɨ myə̀ nɨ ngwa ngɨ̀rə̀, pobə myə̀ nɨ ǹtàʼnə amwuə nɨ̀chyə̂mbyə̂. Wə̀ zəənə̀ tsaʼnə ǹnùŋə̀nə ntɨŋmə̀ aŋunə Nẅùə̀, ndzəənə̀ tsaʼnə ngwə̀ nkorə̀ ntɨŋmə̀, ndzəənə̀ tsaʼnə ngwə̀ nkòŋə̀ a pɨ̀tse pə̀ənə̀, nkɨ ndzəənə̀ tsaʼnə ngwə̀ ntəəmə̀ ntɨ̀ŋnə̀.

¹¹ Wə̀ kɨ ndzəənə̀ tsaʼnə pɨ pə nnyàŋə̀ mə̀, farə tsaʼnə ngwə̀ ndzəənə̀ ngəʼə̀. Wə̀ zhyə̂ mɨ̀nwùə̀ mɨ̀tsùmə̀ nɨ mɨ lə̀ tsirə̀nə mə̀ a Antyòkə̀ pobə Ikonẅùmə̀, farə Lystra, nkɨ nzhyə̂ tsaʼnə pɨ lə̀ nyàŋə̀nə mə̀ ghu tyìʼə̀ ɨ̀shìʼnə̀, la Ndòʼnə̀mbyə̂ a yèmpə̀ mə̀ nfurə̀ amwuə ngəʼə̀ zèrə zə̀.

¹² Pɨ nyàŋə̀ a ŋwùə̀ wa ntsùmə̀ nɨ à tàʼnə a nɨ chyə̂ amwuə àlàŋə nɨ Nẅùə̀ à kòŋə̀nə nkɨ nnùŋə̀ ntɨŋmə̀ e aŋunə Kristù Yěsû,

¹³ la ngàŋə̀ ngɨ̀rə̀ ɨ̀nwùə̀ tɨ̀pòŋə̀ pobə ngàŋə̀ àfɨ̀ghə̀ ghǎ lèrə̀ nɨ mbyə̀ nɨ tɨ̀pòŋə̀ ɨ̀ghobə, fɨ̀kə̀ pə̀ənə̀, kɨ mə fɨ̀kə̀ mbɨ̀ŋmə̀ ɨ̀zobə.

¹⁴ La ngə̀ aŋunə ghò, lèrə̀ nɨ mbyə̀ a nɨ ghɨ̀rə̀ mɨ̀nwùə̀ ma nɨ wə̀ lə̀ lanə̀nə nkɨ nnùŋə̀ ntɨŋmə̀ aŋunə la. Mbə̀ʼnə wə̀ zhyə̂nə pànə̀ nɨ pɨ lə̀ nèrə̀nə o nɨ mɨ̀nwùə̀ mə.

¹⁵ Wə̀ kɨ nzhyə̂ lo a nɨ furə̀ tsaʼnə wə̀ lə̀ pirə̀nə mɨnkɨ̂, wə̀ lə̀ zhyə̂ àshwəŋnə̀ Nẅùə̀, nɨ a lə̀ ŋânə o nɨ àzhìʼtə̀ wə̀ pə nɨ nɨ̀chwarə̀ ndàŋə̀ a ndzùmə̀ àpyiimə̀ ntɨŋmə̀ o aŋunə Kristù Yěsû.

¹⁶ Ànwùə̀ àtsùmə̀ nɨ pɨ ŋwàʼnə̀nə amwuə àŋwàʼnə̀ Nẅùə̀ a furə̀ ambo Nẅùə̀, mbòŋə̀ a nɨ lòo nnèrə̀ a nkǔŋə nkuŋə ambo pə̀ənə̀, nsaʼà pə̀ənə̀ ntii mɨ̀nwùə̀ nɨ ka mèrə təəmə̀ e, nshìitə̀ ɨ̀fàntə̀ mɨ̀nwùə̀, nkɨ nnèrə̀ pə̀ənə̀ a nɨ ghɨ̀rə̀ mɨ̀nwùə̀ nɨ mɨ təəmə̀nə,

¹⁷ njiilo ngàŋə̀ àfàʼà Nẅùə̀ à kùʼnə̀ a nɨ fàʼà mbuurə̀ ɨ̀fàʼà ɨ̀shìʼnə̀ ɨ̀tsùmə̀ ambo Nẅùə̀.