2 Timotì 2 - Pinyin

Soyì Kristù Yěsû ghù ɨ̀shìʼnə̀

¹ Ngə̀ aŋunə ghò moonə̀ mə̀, təəmə̀ ntɨ̀ŋnə̀ aŋunə àpòŋə̀ ntɨŋmə̀ nɨ Kristù Yěsû à wə̀ nnèrə̀ ambo pə̀ənə̀ tsaʼnə pə̀ənə̀ chyə̂nə mbə taʼà ŋwùə̀ pə̀ənə̀ pɨ pobə la.

² Ànwùə̀ nɨ wə̀ lə̀ zuʼnə ambo mɨ̀ŋə̀ a mbyə̀ pɨ̀ndzəənə̀ zəənə̀nə pɨ̀noʼnə la, wə̀ nèrə̀ a zèrə ambo pànə̀ nɨ mbə̀ʼə pobə nùŋə̀ ntɨŋmə̀ aŋunə, nkɨ nnèrə̀ a zèrə ambo pɨ̀tse pə̀ənə̀.

³ Kɨ mmə ndzəənə̀ ɨ̀zò ngəʼə̀ tsaʼa soyì Kristù Yěsû ghù ɨ̀shìʼnə̀.

⁴ Ka soyì ɨ̀tse a pə e ghu nɨ mbə̀ʼə a chyâ àpô e amwuə mɨ̀nwùə̀ mɨ ngàŋə àlaʼà, ntiinə àze chyə̂ pə a nɨ ghɨ̀rə̀ ànwùə̀ nɨ ŋònə̀ ngẅùunə e a tàʼnə.

⁵ Nɨ ndwuumə̀ wə̀, ambo ŋònə̀ nɨ à wa nkɨ̀ɨrə̀ mɨ̀ndəənə̀, mbə̀ʼə ka pɨ tuŋə̀ e ngùʼu e tɨghu à kɨ̀ɨrə̀ ndzùŋə̀ pɨ̀mbòomə pɨ mɨ̀ndəənə̀ mɨ̀ghu.

⁶ Ŋònə̀ nɨ à fàʼnə ɨ̀shìʼnə̀ amwuə ɨ̀swùumə e à chyə̂ mbə la ntsàambyə̀ ŋwùə̀ a nɨ pə nɨ àzwuumə̀ nɨ pɨ fùʼnə amwuə ɨ̀swùumə e yɨ̀ghu.

⁷ Mə nkwàŋə̀ mɨ̀nwùə̀ nɨ ngwə̀ nshwəŋə̀ lə, ntiinə Ndòʼnə̀mbyə̂ à pɨ ŋâ o nɨ àzhìʼtə̀ a nɨ zhyə̂ mɨ̀nwùə̀ mə ɨ̀shìʼnə̀.

⁸ Mə nkẅempə̀ a Yěsû Kristù nɨ Nẅùə̀ a lə̀ zhwuumə̀nə e aŋunə nɨ̀wɨghə̀, nɨ à pənə ŋwùə̀ ngẅàrə̀ Dàfirə̀, tsaʼnə a pənə amwuə ntwuumə̀ ghù ɨ̀shìʼnə̀ nɨ ngwə̀ nchwìitə̀.

⁹ Ngwə̀ ndzəənə̀ ngəʼə̀ ntiinə ngwə̀ nchwìitə̀ ntwuumə̀ ghù ɨ̀shìʼnə̀ wa. Pɨ kɨ mə nkorə̀ mə̀ nɨ ɨ̀tsaŋə̀ tsaʼa ŋònə̀ nɨ à wɨ̀ghə̀nə a mbòomə, la mbə̀ʼə pɨ laʼa nkorə̀ e àshwəŋnə̀ Nẅùə̀ nɨ ɨ̀tsaŋə̀ tyìʼə̀ pɨ̀mɨlyiʼə apə̀.

¹⁰ Lə̌ ɨ̀sùmə nɨ ngwə̀ ngẅìimə̀ ntɨŋmə̀ aŋunə ɨ̀nwùə̀ ɨ̀tsùmə̀ ntii pànə̀ nɨ Nẅùə̀ a tsoʼnə, njiilo pobə kɨ mbə nɨ nɨ̀chwarə̀ ndàŋə̀ a ndzùmə̀ Kristù Yěsû, nkɨ mbə nɨ àghuʼtə̀ nɨ a ghoŋə̀nə nɨ nkuŋə̀.

¹¹ Pɨ pa nshwəŋə̀ ànwùə̀ àtse nɨ a pənə nkǔŋə nkuŋə lo: “Pə̀ənə̀ tə pəla nkwɨghə̀ pə̀ənə̀ pɨ pobə, yi pə̀ənə̌ kɨ chyə̂ pə̀ənə̀ pɨ pobə.

¹² Pə̀ənə̀ tə ẅìimə̀ ntɨŋmə̀ a nɨ zəənə̀ ngəʼə̀, yi pə̀ənə̌ kɨ mə puʼtə̀ pə̀ənə̀ pɨ pobə. Pə̀ənə̀ tə twuunə̀ e, yi ǎ kɨ twuunə̀ a wəənə̀.

¹³ Pə̀ənə̀ tə pəla ka mə nùŋə̀ a wəənə̀ ntɨŋmə̀ aŋunə ze, yi ǎ kɨ nùŋə̀ e ntɨŋmə̀ pə aŋunə mɨ̀nwùə̀ ɨ̀me, ntiinə mbə̀ʼə ka à twuunə̀ e ɨ̀pɨ̀ŋmə̀ e.”

Ngàŋə̀ Àfàʼà ghù ɨ̀shìʼnə̀

¹⁴ Yèmpə̀ pə̀ənə̀ ɨ̀pô a nɨ kẅempə̀ mɨ̀nwùə̀ mə, nkɨ ntsùŋə̀ nkwàtə̀ a ghobə aŋunə nɨ̀linə̀ nɨ Nẅùə̀, njiilo kò pobə tə ntànkə̀ a ghobə aŋunə mɨ̀nwùə̀ nɨ ka mɨ pə yèmpə̀ e, la mbə ntsə̀ŋə̀ e pə pànə̀ nɨ pobə pə nzhwiʼtə̀.

¹⁵ Taŋnə̀ a nɨ ghɨ̀rə̀ Nẅùə̀ a zəənə̀ o tsaʼa ngàŋə̀ àfàʼà e ghù ɨ̀shìʼnə̀ nɨ ka à pə e nɨ ɨ̀sɨŋnə̀, nnèrə̀ a nkǔŋə nkuŋə nɨ à pənə amwuə ntwuumə̀ e ghù ɨ̀shìʼnə̀ wa.

¹⁶ Kò wə̀ chyâ o ntswùə̀ o amwuə àkɨ̀ghə̀ àshwəŋnə̀ nɨ a za ngɨ̀rə̀ lo kò pànə̀ tsùŋə̀ nzhyə̂ a ghobə a Nẅùə̀.

¹⁷ Pànə̀ pə̀ pɨ̀tse nɨ pobə lə̀ nèrə̀nə mbuurə̀ àshwəŋnə̀ zə̀ lə̀ pə Hymenaeus pobə Filetùsə̀. Àshwəŋnə̀ àzobə a lə̀ pə tsaʼa àlǎ nɨ a za ndzɨghə̀ mbòbə̀ mbɨ̀ŋmə̀ ŋwùə̀ ka myə̀ e.

¹⁸ Pobə myàʼtə̀ a nkǔŋə nkuŋə ntyiʼə̀ nnèrə̀ lo Nẅùə̀ à lə̀ zhwuumə̀ mə pə̀ənə̀ aŋunə nɨ̀wɨghə̀. Lenəla, ntyiʼə̀ ntsə̀ŋə̀ àpyiimə̀ ntɨŋmə̀ pànə̀ pɨ̀tse.

¹⁹ La àtsirə̀ ndâ Nẅùə̀ a təəmə̀ ntɨ̀ŋnə̀, pɨ ŋwàʼnə̀ aŋunə lo “Ndòʼnə̀mbyə̂ à zhyə̂ pə̀ənə̀ ɨ̀pe,” nkɨ nchi ŋŋwàʼnə̀ lo, “Ŋònə̀ wa ntsùmə̀ nɨ à shwəŋə̀nə lo ze ŋwùə̀ Ndòʼnə̀mbyə̂ à chyə̂ a nɨ waʼà ɨ̀nwùə̀ tɨ̀pòŋə̀ ɨ̀pe.”

²⁰ Ɨ̀pwuumə̀ chyə̂ amwuə ndâ ŋònə̀ ngẅùunə a mbuurə̀ mbuurə̀. Pɨ̀tse pə ghu nɨ pɨ tsùŋə̀nə nɨ goldə̀ ghobə silbà; pɨ̀tse pə ghu nɨ pɨ tsùŋə̀nə nɨ àtɨ̀ghə ghobə àpòomə. Pɨ̀tsə̂nə chyə̂ ghu nɨ pɨ pa nfàʼà nɨ pèrə pə a nkwùə̀ nkwùə̀, pɨ̀fînə pə ghu nɨ pɨ pa nfàʼà nɨ pèrə nkwùə̀ ɨ̀tsùmə̀.

²¹ Ŋwùə̀ à tə pəla nsùu ntɨŋmə̀ e ɨ laanə̀ aŋunə mɨ̀nwùə̀ mɨ tɨ̀pòŋə̀ mèrə ma, yi ǎ pə la àzwuumə̀ tə̀chwìi nɨ pɨ tsùŋə̀nə nnùŋə̀ ambo masàa e a nɨ lòo nfàʼà mbuurə̀ ɨ̀fàʼà ɨ̀shìʼnə̀ ɨ̀tsùmə̀ ghu.

²² Kɨ̀ɨrə̀ mɨ̀nwùə̀ ma nɨ mɨ ma ŋŋâ ngəʼə̀ ambo nkàŋə̀ mɨŋwùə̀, ntyiʼə̀ ntaŋnə̀ a nɨ ghɨ̀rə̀ mɨ̀nwùə̀ mɨ təəmə̀nə, mmə nnùŋə̀ ntɨŋmə̀ aŋunə Kristù, mmə nkòŋə̀ pə̀ənə̀, nkɨ mmə nchyə̂ nɨ àporə̀porə̀. Ghɨ̀rə̀ mɨ̀nwùə̀ mə mɨ̀tsùmə̀ pɨghə pɨ pànə̀ nɨ pobə pa nguʼtə̀ a Nẅùə̀ nɨ ntɨŋmə̀ ghu laanə̀nə.

²³ Kò wə̀ kɨ nzhwiʼtə̀ o ɨ̀kɨ̀ghə̀ ɨ̀shwəŋnə̀ nɨ ka pèrə mə ngyèmpə̀ e ànwùə̀ àtse. Zhyə̂ lo ɨ̀shwəŋnə̀ pə̀ lòo e la ɨ̀sàʼa ndòo ntô.

²⁴ Kò ngàŋə̀ àfàʼà Ndòʼnə̀mbyə̂ a pə e ŋònə̀ nɨ à wa ndòo ɨ̀sàʼa ntô. À chyə̂ a nɨ pə ŋònə̀ nɨ à wa ngɨ̀rə̀ ɨ̀pòŋə̀ ambo pə̀ənə̀, mbə ŋònə̀ nɨ mbə̀ʼə a nèrə̀ pə̀ənə̀, nkɨ ngẅìimə̀ ntɨŋmə̀,

²⁵ à chyə̂ a nɨ zhyə̂ tsaʼnə mbə̀ʼə a shìitə̀ pə̀ənə̀ nɨ pobə ghɨ̀rə̀nə ànwùə̀ tɨ̀pòŋə̀ ambo ze amwuə àlàŋə ɨ̀shìʼnə̀, ntiinə Nẅùə̀ à chyə̂ ŋâ a ghobə nɨ ɨ̀sàanə̀ lo pobə pə̀ŋə̀ mɨ̀ntɨŋmə̀ ɨ̀mobə aŋunə ɨ̀nwùə̀ tɨ̀pòŋə̀ nzhyə̂ a nkǔŋə nkuŋə.

²⁶ Lenəla, ɨ̀zhìʼtə̀ ɨ̀pobə kẅirə̀ kwə̂ pobə kɨ̀ɨrə̀ àzə̀ʼə̀ Satàanə̀ nɨ à kô mə a ghobə ntyiʼə̀ ngɨ̀rə̀ lo pobə ghɨ̀rə̀ mɨ̀nwùə̀ nɨ à tàʼnə.