San Mateo 8 - Porciones Lacandon-Naha

IV. YA'P BA' TU META A JESÚS ( 8.1—9.38 ) Jesús ku ch'ensik junturi' xi'ra a yʌn ti' u ya'ji a bex ku ts'uku ot'e

¹ Kaj emi a Jesús yok'o wits, tura ten ne pim winik.

² Y tari junturi' xi'ra yʌnti' a ya'ji a bex a ku ts'uku ot'e y tu xonkitubʌj ti Jesús y tu ya'ti': —Ts'uri, wo a k'at a luk'sik in ya'ji, luk'seten.

³ Jesús tu tʌk'a u k'ʌ' ti', tu ya'ti': —In k'at. ¡Kin toj ch'ensik a ya'ji beje'! Y a ya'ji a bex ku ts'uku ot'e toj yayaj ch'eni ti'.

⁴ Pachi a Jesús tu ya'ti': —Ch'exte a wue in wei'k tech, ma' bin a wae ti' mix mok, toj jai' xen e'se' a bʌj ti' a mok ku meaj yok'o u yatoch K'uj, ka ch'eik a siji tuj ch'enech a bex tu ye'sa' Moisés uchik, ti' u yiriko' tu jach ch'enech.

A Jesús ku ch'ensik u k'ʌni' a u ts'uri a ba' kʌy u winiko' romano

⁵ Kaj oki a Jesús, ix u kʌjta Capernaum, xok'i u ts'uri a ba'kʌi u winiko' romano, ti' u p'iskubʌj k'atik ti'.

⁶ Y tu ya'a: —Ts'uri, in k'ʌni' tiʌ ix nʌj ne mo' uts y muj xima y ne yaj ba' ku yui'k.

⁷ Y a Jesús tu ya'a ti': —Je'e in bin in ch'ense.

⁸ U ts'uri a ba' kʌy u winiko' romano tu nuka: —Ts'uri, a ten ne mo' tsoyen ti' a woko tin watoch, toj jai' li'se a t'ʌn y jeu' ch'ene y k'ʌni'.

⁹ Bexi' yʌn y ka ts'uri a mok yʌnti' in wui'k u t'ʌn, a bex ten yʌn in ba'kʌi kin li'sik in t'ʌn ti', wa ki wei'k ti' junturi': Xen, ku bin; wa ti'a juntu ki wei'k ti': Ko'ten, ku tar; y a mok la' in k'ʌni' wa ki wei'k ti' mete a je', ku metik.

¹⁰ Jesús ka tu yua bex ku yei'k u ts'uri a ba'kʌi, nej tsoyji u yor y tu ya'ti' a winik a tʌn u tar tu pach: —Jach toj tu jay kin wei'k teche'x, mix in wirmʌ ix Israel a mok ku jach ki' aksik tu yor in t'ʌn a bex a je' a xi'ra.

¹¹ Binukaj tar winik yok'o u nu'ku tuku tichi k'in, bexi' tuku bi k'in y ku bij kuto' yete a Abraham, a Isaac y a Jacob tuku wesintik K'uj.

¹² Chen a moko' ku bij oko ka'chik tuku wesintik K'uj, a layo' ku bij jara pich'inta' jaknʌki tu ts'uak'ʌ, tuba tita ku bin u yak'to' u bʌjo' y ku bin u k'uxo' u kojo' yok'o u yʌyi.

¹³ Jesús tu ya'a ti' u ts'uri a ba' kʌy u winiko' romano: —Xen yok'o a watoch, y a bex ta tukra, bex u metchʌ. Y toj yayaj u k'ʌni' toj se'p' ch'eni.

A Jesús ku ch'ensik u yixkit a Pedro

¹⁴ Bini a Jesús tu yatoch a Pedro, y tu yira u yixkit a Pedro mo' uts y ix ch'ak charik y ne yʌn u chʌkbi.

¹⁵ Y tu tʌra u k'ʌ' y a chʌkbi se'p' ch'eni ti'; kaj se'p' lik'i ij chu'mpʌ u ts'ek u yo'ch a mok tio' tita.

Jesús ku ch'ensik ne pim a mok mo' utso'

¹⁶ Y tuk'in a tʌn u yak'ʌchʌ, tasa' ti' Jesús tu woro a mok akʌ' kisin tu yok'o, y yete u t'ʌn tu laj jara a kisin, y bexi' tu laj ch'ensa a mok mo' utso'.

¹⁷ Ti u laj metchʌ a ba' tu ya'a a profeta Isaías, a tu ya'a: «A ti' tu laj kucha u yaji a ba' kʌk kuik y tu woro ak ya'ji»

A mok pocho' u t'urik a Jesús

¹⁸ Ka tu yira a Jesús ne pim winik sutbʌktik, bein tu li'sa u t'ʌn ka' u ch'ʌkto' u pach a peta'.

¹⁹ Ij tari a ku kʌ'sik u t'ʌn K'uj a toj u ts'ibtamʌ a Moisés uchik, y tu ya'a: —Ts'uri, jei in t'urkech ch'ik tu ka bin.

²⁰ Jesús tu nuka ti': —A u pek'i k'ax yʌn u jor tu ku wene bexi' a ch'ich' yʌn u k'u' tu ku wene, chen u Ti'a Xi'ra mʌnʌ' tu ku chata u je'se u bʌj.

²¹ Y juntu u kʌ'sa winik a Jesús tu ya'a: —Ts'uri, cha'e in yʌ bin in mukej in tet.

²² Jesús tu nuka ti': —T'u'ren, y cha'e a mok kimen u mukik a mok kim ti'.

A Jesús ku xurik a chʌk ik'

²³ Jesús oki yok'o a chem, ij bini yete u kʌ'sa winik.

²⁴ Ij lik'i ix petaj ne k'ʌ'm u yik'i, lik'i ne nuk yʌ'mi a petaj y tʌn u laj oko ichi. Chen a Jesús wenuka'.

²⁵ Y u kʌ'sa winik a Jesús tu yira y tu yʌso' y tu yao': —¡Ts'uri, ʌnto'! ¡Tʌn ak juru!

²⁶ A Jesús tu ya'tio': ¿Biken jach k'ux sajake'x? ¿Maj ki akse'x ta wor ti' ten? Kaj ts'ok u yei'k a je', lik'i y tu li'sa u t'ʌn ti' a ik' y a peta' y laj xu'ri tu woro ij p'ati ne tsoy.

²⁷ Y a tio' nej peknʌ u yoro', tʌn u yei'ko': —¿Moki a je' a xi'ra, ku yua u t'ʌn ti' a ik' y a peta'?

U winko' Gadara a yʌn kisin tu yok'o'

²⁸ Kaj k'ucho' tu pach a peta', yok'o u lu'mi a Gadara, tari se'p' kato' xi'ra akʌ' kisin tu yok'o, a je' a xi'ro' tij jok'i tuku muka' winik, y tij xok'o ti' Jesús. A layo' a xi'ro' ne choko' y ku kʌxmetiko' a winiko' a mok ku mʌn tita bein mix mok ku mʌno' tita yok'o a lay a bej.

²⁹ Y k'ʌ'm abotnʌjo' kaj u ya'o': ―¿Jesús u Ti'a K'uj baij ka k'at ti' teno'? ¿Toj tarech a yʌ kʌxmeto' y mu k'uchuk u k'ini?

³⁰ Mo' ne nʌch ti' nikʌ' tu jʌno' ne ya'p kayk'ek'en.

³¹ A kisin a akʌ' ix a xi'ro' tu p'isubʌjo' u k'ato' ti' a Jesús: ―Wo ka jarkeno' ti' a je' a xi'ra, cha'e in woko' ix a lay a nika' a kayk'ek'eno'.

³² Jesús tu ya'a: —Xene'x. Lʌji' kaj jok'o a kisin tu yok'o a xi'ro', kaj oko' tu yok'o a kayk'ek'eno' y tu woro a kayk'ek'eno' tu k'ʌnaj u yako' tu ch'ika'n a wits, kaj u laj puro' u bʌjo' yok'o a peta', tu laj jʌk'to' ja' y laj kimo'.

³³ A winiko' a mok ku kʌnʌntik a kayk'ek'en puts'o', ij bino' u ya'o' tu woro a ba' mʌni yok'o u kʌjta y bexi' a ba' mʌni yete a akʌ' kisin tu yok'o.

³⁴ Y tu woro u kʌjta jok'i u yire tu tiʌ a Jesús y ka tu yiro', tu p'isubʌjo' u k'ato' ti' u jok'o yok'o u lu'mo'.