San Mateo 4 - Porciones Lacandon-Naha

Kaj tunta u yor a Jesús ten a kisin

¹ Jesús pura' ten u Pixʌn K'uj, yok'o u lu'mi tu mʌnʌ' nukuch che' woro tikin lu'm yʌn, tiu tunta' u yor ten a kisin.

² Kaj mʌni cuarenta u k'ini y bexi' cuarenta ak'ʌ' u muk'tik u jʌnʌ ti' K'uj, wij'chʌji.

³ A kisin xok'i ti' a Jesús ti' u tuntik u yor y lʌji' ka tu ya'ti': —Wa jach u Ti'ech K'uj, a'ti' a je' a tunich u waysubʌj aj pʌn.

⁴ Jesús tu nuka ti': —Toj ts'ibʌ' yok'o u t'ʌn K'uj: “Mo' che jari pʌn ku ts'ek u kuxta a winik. Jari u t'ʌn K'uj, lʌji' ku jach ts'ek u kuxta a winik.”

⁵ Y pachi a kisin tu bisa' a Jesús ix Jerusalén a kʌjta a toj lʌji' K'uj yʌni, tu nʌ'sa tu ne kʌ'nʌ u jo' u yatoch K'uj,

⁶ Y tu ya'ti': —Wa jach u Ti'ech K'uj, purabʌj kaba; toj ts'ibʌ' yok'o u t'ʌn K'uj: “Ku bin u tuchi'te ti' tech a ángeles, ti' u kʌnʌntikech; y yete u k'ʌo' ku bin u li'sech, ti' ma' k'ʌrʌ'che'tik tunich yete a wok.”

⁷ A Jesús tu nuka ti': —Ts'ibʌ' bexi' yok'o u t'ʌn K'uj: “Mʌnʌ' a tuntik u yor ak Ts'uri a K'uj.”

⁸ Ij ka' bisa' a Jesús ten a kisin yok'o wits tu jach ne kʌ'nʌ, y tu laj e'sa'ti' tu woro u kʌjtai a lu'm a ne ts'uriukʌ' y u muk'o.

⁹ Y a kisin tu ya'ti' a Jesús: —Tu woro a je' a ba' ka wirik ki bin ts'atech, wa ka wuts'ik a pix ti' ten y ka k'ujintiken.

¹⁰ A Jesús tu nuka ti': —Xen, Satanás, toj ts'ibʌ' yok'o u t'ʌn K'uj: “Jari ak Ts'uri a K'uj ka bin a k'ujintik y jari ka meaj ti'.”

¹¹ Lʌji' tuk'in a kisin tu p'ʌta a Jesús; ij taro' a ángeles ti' u meajo' ti' a Jesús.

Jesús ku chu'sik u tsikbʌtik u t'ʌn K'uj ix u lu'm Galilea

¹² Ka tu yua a Jesús mʌka a Juan, suti ix Galilea.

¹³ Chen moj p'ati ix Nazaret, toj jari bini tu kʌjta ix Capernaum u xur u petai a Galilea a to'o tita u lu'm a Zabulón y Neftalí.

¹⁴ A je' a ba' mʌni lʌji' ti' u nup'u a ba' ts'ibʌ' yok'o u ju'ni a profeta Isaías a ku yei'k:

¹⁵ «U lu'm a Zabulón a tiʌ tu xur a peta', y u lu'm a Neftalí, a tiʌ tʌtʌjʌn ti Jordán: Y Galilea, to'o tu laj kʌjo' tu woro a moko' mo' judíos.

¹⁶ A winiko' a ku mʌno' ix ts'uak'ʌ tu yira jump'e kip' ne sasi, ti' a mok tio' yok'o u ts'uak'ʌ tu yʌn kimi.»

¹⁷ La'kin kaj chu'mpʌ a Jesús u tsikbʌtik u t'ʌn a K'uj y bex tu ya'a: «Sute'x a t'ʌne'x ti' K'uj, ka wirke'x ya xok'i a tu ku wesintik K'uj a tiʌ kʌ'.»

Jesús ku t'ʌnik laj tu nup xi'ra au nʌj meaj lʌji' luts kʌy

¹⁸ Tʌn u mʌn Jesús yok'o u xur u peta' a Galilea, tu yira a Simón yete Andrés u yits'in a Simón, tʌn u purko' a ba'i tuku chuka' kʌy ix peta', y lʌji' u nʌj meajo', a luts kʌy.

¹⁹ Y Jesús tu ya'tio': —T'ure'x in pach, y ten kin bin in wayse'x a meaj, a ku lutsik winik.

²⁰ Toj se'p' tu p'ʌto' a ba'i tuku chuka' kʌy ij bino' tu pach a Jesús.

²¹ Chen bini más tataj Jesús, tu yira a Jacobo yete Juan u yits'in a Jacobo, lʌji' u ti'o' Zebedeo, ti' yʌno' yok'o chem tʌn u ki utskintiko' a ba'i tuku chuka' kʌy. Jesús tu pʌyo'.

²² Y toj se'p' tu p'ato' u tet y u chemo' ij bino' tu pach a Jesús

Jesús ku kʌ'sik ne pim winik

²³ Jesús mʌni yok'o tu woro u lu'mi Galilea y yok'o u nʌji tuku much'ik u bʌjo' a judíos u xake u t'ʌn K'uj, tij mʌni tu kʌ'sa. Tʌn u tsikbʌtik u jach tsoyi u t'ʌn K'uj tu ku wesintik K'uj y bexi' tu ts'ʌka a winiko' a mok mo utso' y to'o yʌn ba' ku yui'ko'.

²⁴ Y laj ch'ikibini u tsikbʌta' ch'ik tu woro Siria, tu woro a ba' tu meta a Jesús y chu'mpʌ u tasa ti' a mok mo' utso' y yʌj ba' ku yui'k y bexi' a mok akʌ' kisin tu yok'o y mok ku p'uju u yaji y bexi' a mok muj xima y muj pek. Y a Jesús tu laj ch'ensa tu woro'.

²⁵ Y ne pim u winki Galilea, y Decápolis, y Jerusalén y Judea y u winki tʌtʌjʌn ti' a Jordán tʌn u t'urik u pach a Jesús.