San Mateo 27 - Porciones Lacandon-Naha

Jesús ku bisa' ti Pilato

¹ Kaj sasi, tu woro u t'ojio' a moko' ku meajo' yok'o u yatoch K'uj y tu woro a jak'ʌ u kucho' ti' u winik a Judíos tu ka'to' u yoro' ti' u kʌxtiko' bik u kinsiko' a Jesús.

² Jesús k'ʌxʌ' kaj bisa' y tu ts'ao' ti' a poncio Pilato, a lʌji' u wesi a Roma.

Judas ku kimi

³ A Judas a to'o tu k'uba' a Jesús, ka tu yira binukaj kinsa' a Jesús, tu jach ka tukrubʌj y tu ka sutaj a treinta chixtak'in a menʌ' plata ti' u t'ojio' a moko' ku meajo' yok'o u yatoch K'uj y ti jak'ʌ u kucho' ti' u winik a Judíos,

⁴ Tu ya'tio': —Tin kʌxta in si'pi a tu tij k'uba' junturi' xi'ra a mix k'ʌs mʌnʌ' u si'pi. Chen tio' tu nuko': —¿Ba'wi kin tukrik a teno'? ¡A lay tech a wue!

⁵ A Judas tu pura aj chixtak'in a menʌ' plata ix u yatoch K'uj ij bini y tu jich'a u k'o'ch.

⁶ U t'ojio' a moko' ku meajo' yok'o u yatoch K'uj tu much'o' a chixtak'in a menʌ' plata y tu yao': —A je' a tak'in lʌji' u bo'ri u kuxta jump'eri' xi'ra, mo tsoy ak but'ik yok'o u k'uchi tuku ts'abati' K'uj.

⁷ Pachi chen ts'o'ki u katko' u yoro', tu mʌno' yete a lay a tak'in jump'eri' lu'm u k'aba', u lu'm a ku pʌtk'ʌt, lʌji' tuku bin u mukik a mok u tar u jer u kʌjto' wa ku kimi.

⁸ Ben a lay a lu'm tak beje' u k'ini u k'aba' a lu'm: u lu'mi k'ik'.

⁹ Bex metchʌ a bex tu ya'a a Jeremías uchik a lʌji' profeta, a tu ya'a: «Tu ch'ao' treinta chixtak'in a menʌ' plata a lʌji' u bo'ri a tu yao' u winik Israel,

¹⁰ y yete a lay tak'in tu k'ʌno' ti u mʌnik u lu'm a ku pʌtk'ʌt, a bex tu li'sa' u t'ʌn ak Ts'uri u meta'.»

A Pilato ku chich k'atik ti' Jesús

¹¹ Jesús bisa' tu tiʌ aj wes, kaj k'ata ti' Jesús: —¿A tech lʌji' u wesiech a judíos? Jesús tu nuka: —Techi ta wa'a.

¹² Jesús muj naj nuka ka tʌn u payta' teno' u t'ojio' a moko' ku meajo' yok'o u yatoch K'uj y a mok jak'ʌ u kucho' ti' u winik a Judíos.

¹³ Ben Pilato tu k'ata ti' Jesús: —¿Maj wui'k baij ku ya'ba tech?

¹⁴ Chen Jesús mu naj nuka mix ts'ets'i', y aj wes peknʌ u yor a tu tu yira muj p'isik u bʌj a Jesús.

Jesús ku li'sa' u t'ʌni u kinsa'

¹⁵ U k'ini tuk'in tʌn u metko' u yo'cho' a lʌji' u k'ini Pascua, t'ʌrʌ' u siptiko' a mok chuka mʌkʌ' a to'o u k'ato' a winiko'.

¹⁶ Y tiʌ junturi' xi'ra mʌkʌ' u k'aba' Barrabás, a lay ne ya'p t'ʌn ti' tuku yakraba'.

¹⁷ U much'mu u bʌjo' a winiko', a Pilato tu k'ato' ti': —¿Moki a k'ate'x in siptik: a Barrabás o a Jesús a ku ya'bati' Cristo?

¹⁸ A Pilato toj u yue k'uba' ti' a Jesús, tu k'ex u yoro' ti' Jesús.

¹⁹ Kurukba Pilato yok'o u k'ʌnche' wes tuku li'sik t'ʌn baij ku bij meta', u lak' a Pilato tu tuchi'ta u t'ʌn ti' lak' y bex tu ya'a: «Ma' tʌkik a bʌj yete a je' a xi'ra a mix k'ʌs yʌn u si'pi, ka wirik a beje' aj mʌni a ak'ʌ' ne mo' tsoy wek'nen yok'o ti'.»

²⁰ Chen u t'ojio' a moko' ku meajo' yok'o u yatoch K'uj y a jak'ʌ u kuch ti' u winik a Judíos tu kuna u jo'o a winik tiu k'atik u sipta' a Barrabás y ka u yao' u kinsa' a Jesús.

²¹ Aj wes tu ka' k'ata ti' a winiko': —¿A je' a ka'to' to' poch a wirke'x in siptik? A tio' tu nu'ku: —¡A Barrabás!

²² Pilato tu k'ata tio': —¿Baij ki bin in mete ti' a Jesús, a ku ya'ba ti' Cristo? Tu woro tu nuko': —¡Bʌje yok'o cruz!

²³ A Pilato tu ya'a: —A'e'x ten ¿baiki mo' tsoy ba' tu meta teche'x? Chen a winiko' más k'ʌ'm abotno' y bex tu yao': —¡Bʌje yok'o cruz!

²⁴ Ka tu yira a Pilato mʌnʌ' ba' u mete, chen jai' más tʌn u k'ʌ'm jumo' a winiko', tu tuchi'ta tasa ja' ti' y ti' tu p'o'a u kʌ' y tu ya'a ti' a winiko' a nikʌ' tita: —Ten mʌnʌ' in si'pi tuku bij kinsa' a je' a xi'ra, ti' teche'x ku bij p'ata a si'pie'x.

²⁵ Tu woro a winiko' tu nuko': —Ti to'o ku p'ata a lay a si'pi y ti ak ti'o'.

²⁶ Tu sipto' a Barrabás y chen ts'o'k u jʌts'a' a Jesús yete sum, pachi tu ts'a u bʌja' ix cruz.

²⁷ Y u ba'kʌyo' aj wes, tu biso' a Jesús tu ku nikto' tu woro a ba'kʌi y tu laj much'a tu woro u bojo'.

²⁸ Tu jito' u nok' y tu tap'o' yete jump'e chʌk nok',

²⁹ y tu tʌko' yok'o u jo' a Jesús a bex ku tʌke tij wes a u k'aba' corona chen a lay menʌ' yete k'i'x y bexi' ts'abti' jump'e che' y tus tu woro tu wuts'o' u pix ti Jesús jai' ti u p'astiko' y tʌn u yei'ko': —¡Ka' kuxtak uj Wesi a judíos!

³⁰ Bexi' tup'a u wich y jʌts'a' u jo' yete a che' a ts'abu u chuke.

³¹ Kaj kʌ'no' u kʌxmetko', jita'ti' a u nok' a tu tʌko' ti' y tu ka' ts'ao' a u nok'i, pachi tu biso' u bʌjo' yok'o cruz.

Kaj bʌja' a Jesús ich cruz

³² Ka tʌn u bino', ira' junturi' xi'ra u winik Cirene u k'aba' Simón, a lay a xi'ra, ts'ʌra' u pach u cheik a cruz.

³³ Kaj k'ucho' yok'o u lu'mi u k'aba' Golgota, u nu'ku ku ya'bati': «U lu'mi Calavera.»

³⁴ Ts'abu u yuk'e a Jesús au ya'ri vinagre xak'ʌ' yete u ya'ri a che' a ne k'aj, chen ka tu tunta', ya mu' k'at u yuk'e.

³⁵ Kaj ts'o'ki u bʌja', chu'mpʌjo' u yʌrʌk'tiko' u nok' a Jesús ti u yik mok ku ch'eik, ti' u metchʌ a tu ya'a uchik a profeta y bex tu ya'a: Tu yʌk'to' in nok' ti' u yirik mok ku ch'eik.

³⁶ Y tita kuro' a ba'kʌyo' u kʌnʌnto'.

³⁷ Yok'o u jo' tuj bʌja' a Jesús, nich'kunta' jump'e ba' tu ts'ibʌ' bex: «A JE' A JESÚS, LɅJI' U WESI A JUDÍOS.»

³⁸ Bexi' bʌja' yete kato' xi'ra a ku yakraba', junxet' bʌja' a juntu y junxet' a juntu.

³⁹ A winiko' a ku mʌn xok'o tita, ku p'astiko' a Jesús y ku pesiko' u jo'o,

⁴⁰ ku yei'ko': —A ta wa'a a jubik u yatoch K'uj y oxp'e k'in ka ka' laj metik u jer tumen, wa jach a tech u Ti'ech K'uj, takabʌj y emen tuj bʌjech yok'o cruz.

⁴¹ Bexi' a mok u t'ojio' a moko' ku meajo' yok'o u yatoch K'uj yete a ku kʌ'sko' u t'ʌn K'uj a toj u ts'ibtamʌ a Moisés uchik bexi' yete a winik a judíos a ku ya'bati' fariseos, tʌn u yei'ko':

⁴² —U jer tu taka' y u bʌji' muj tajkubʌj, wa jach u Wesi a Israel, ka u yensubʌj tu tiʌ ix cruz y bex je'e ak ch'eik u t'ʌn.

⁴³ Tu ch'a u t'ʌn K'uj: ¡Ka' takak ti' K'uj beje' wa jach otsi u yira'! ¿Mu' ya'e to', a ti' jach lʌji' u Ti'a K'uj?

⁴⁴ Bexi' laj p'asta' a mok ku yakrabao' aj bʌja' yete a Jesús.

Kaj kimi a Jesús

⁴⁵ Kaj k'uchi k'ak' chuk'in, laj ak'ʌ'chʌ tu woro u lu'm, ka' sasichʌ hasta ka tʌn ts'arkubʌ k'in (tres de la tarde).

⁴⁶ Tʌn u bin k'uchu u ne ts'arkubʌj k'in (tres de la tarde) Jesús abotnʌj y bex tu ya'a: «Elí, Elí, ¿lama sabactani?» A je' u nu'ku ku yei'k: «In K'uj, In K'uj, ¿biken ta p'ʌten?»

⁴⁷ Ka tu yuo' u t'ʌn a Jesús a mok tio' tita, tu yao': —Tʌn u t'ʌnik a Elías.

⁴⁸ Toj se'p' junturi' tu ch'a nok' be tʌmʌn y tu ch'ura yete u ya'ri a vinagre a pʌj y tu tʌka yok'o che, ka tu nʌsa' ti' u ts'ek u yuk'e a Jesús.

⁴⁹ Chen a yʌno' tʌn u yei'ko': —P'ʌte, kak ire wa a Elías ku tar u take.

⁵⁰ Y Jesús ka' abotnʌj, y pachi tu ts'a u pixʌn ti K'uj.

⁵¹ Lʌji' kaj jati ka' xot' ch'ik kʌ'nʌ y kaba u yaj nok'i au yatoch K'uj y bexi' tu woro a lu'm laj peknʌ y laj bujchʌ a tunicho',

⁵² y laj je'chʌ tu woro u mukra a winik y ne pim winik a kimen a u yaksʌmʌ tu yor ti' K'uj ka' laj lik'i kuxta.

⁵³ A mok ka' laj lik'o kuxta, jok'o tu mukra a winik, chen ts'o'ki u ka' lik'i kuxta a Jesús, taro' yok'o u kʌjta u k'aba' Jerusalén y tio' ne pim winik tu ye'sa u bʌjo'.

⁵⁴ U ts'urio' a ba'kʌi yete u ba'kʌyo' a tʌn u kʌnʌntik a Jesús, ka tu yiro' u pek a lu'm y a tu woro a ba' mʌni, ne jak'o' u yoro' y tu yao': —¡A je' a xi'ra jach lʌji' ka'chik u Ti'a K'uj!

⁵⁵ Tio' tita ne pim ch'upra tʌn u chʌntko' baij ku mʌn, a lʌjio' tu t'u'ro' u pach a Jesús, a tij ch'ik lik'o Galilea, a to'o tu yʌnto' a Jesús.

⁵⁶ Tita ti'ʌ a María Magdalena, a María u nʌ' a Jacobo y a José y bexi' u nʌ' u ti'aro' a Zebedeo.

Kaj muka' a Jesús

⁵⁷ Kaj ak'ʌ'chʌ, tari junturi' xi'ra a ne yʌn u tak'in u k'aba' José, a lʌji' u winki Arimatea, a bexi' laj lʌiti' u kʌ'sa winik a Jesús.

⁵⁸ A je' a xi'ra bini tu tiʌ a Pilato y tu k'ata u bʌk'e a Jesús y a Pilato tu cha'a u ch'eik.

⁵⁹ Ka tu ch'a a José u bʌk'e a Jesús, tu tap'a yete jump'eri' a ne ki' a nok',

⁶⁰ y tu but'a u bʌk'e yok'o jump'e u jor u mukra winik, a toj menʌ' ne tumen, a tu meta yete ne tsoy tunich, pachi tu bʌk'ʌsta yok'o u jor ti' u mʌkik tuku muka' winik yete ne nukuch tunich y pachi bini.

⁶¹ Y tita tiʌ a María Magdalena y bexi' a juntu a María, ti' kurukbʌjo' yok'o tuku mukra winik.

A mok ku kʌnʌntik tuj muka' a Jesús

⁶² Kaj k'uchi u jer k'in, a lʌji' u k'ini a ku je'sik u bʌjo' a judíos, tu much'a u bʌjo' u t'ojio' a moko' ku meajo' yok'o u yatoch K'uj y u winiko' a judíos a ku ya'batio' fariseos, bino' u yiro' a Pilato,

⁶³ ti u yei'ko' ti': —Ts'uri, k'ajito' a baij tu ya'a a lay a xi'ra a tu tusa' a winik a tu ya'a tuk'in kuxʌ' ka'chik: Chen u mʌn oxp'e kin binikaj ka' lik'i kuxta.

⁶⁴ Ben kin k'atko' tech, ka' tuchi'te u ki kʌnʌnta' u jor tu muka' a lay a xi'ra turu u laj mʌn oxp'e k'in, ti' mu' taro' u kʌ'sa winik u yakre u bʌk'e a Jesús y ku bin u yao', ka' lik'i tu kuxta, wa bex ku mʌn, más binukaj aʌ' ne ch'ikyʌn tus y mu bin ne k'uchu bix ka'chik aʌ'.

⁶⁵ Y a Pilato tu ya'tio': Tiʌ a lay a ba'kʌi y bise'x ti u ki kʌnʌnta' a bex a k'ate'x.

⁶⁶ Y tio' tu ki' mʌka u jor tu muka' u bʌk'e a Jesús y bexi' tu p'ʌto' tita ba'kʌyo' ti u ki kʌnʌnta u jor.