San Mateo 26 - Porciones Lacandon-Naha

XII. U MUK'YAJ, U KIMI Y U KA' LIK'I TU KA' KUXTA ( 26.1—28.20 ) U tunta' u chuka' a Jesús

¹ Kaj ts'o'ki u kʌ'sa' a Jesús tu woro a je' a ba', Jesús tu ya'ti' u kʌ'sa winiko':

² —A teche'x a we'ex p'atʌ' ka'p'e k'in ti' u meta a o'chi u k'aba' Pascua, y u Ti'a Xi'ra binukaj k'uba' ti' u bʌja' ix cruz.

³ U t'ojio' a moko' ku meajo' yok'o u yatoch K'uj yete a ku kʌ'sa u t'ʌn K'uj a toj u ts'ibtamʌ a Moisés uchik y yete a to'o jak'ʌ u kucho' a winiko' a judíos, tu much'a u bʌjo' ix u xur u palacio a u jach t'oji a mok ku meaj yok'o u yatoch K'uj u k'aba' Caifás,

⁴ tu kato' u yoro' tiu kʌxtiko' bik payo', ti' u chujko' y ti' u kinsiko' a Jesús.

⁵ Chen tʌn u yei'ko': —Mʌnʌ' ak chukik tuk'in tʌn u jʌno', ti' muj lik'o ts'ikta a winiko'.

Junturi' ch'upra ku bʌkik perfume ti' a Jesús

⁶ Tuk'in tiʌ Jesús ix Betania, yok'o u yatoch a Simón, a ku ya'bati' a mo' uts a ku pok'o u yot'e,

⁷ Tari ti' junturi' ch'upra, u tasmʌ perfume a bex a ne ko'o u bo'ri, y tu bʌka yok'o u jo' a Jesús, tu kura' yok'o pojche' a Jesús.

⁸ Ka tu yiro' u kʌ'sa winiko' a Jesús, ts'ikcho' ij chu'mpʌjo' u yei'ko': —¿Biken ka kʌxmetik a je' perfume a ne ko'o u bo'ri?

⁹ A je' a perfume, ja' kanik ka'chik ne ko'o u bo'ri y u bo'ri ja' k'ʌnik ti' a wʌntik a mok mʌnʌ' u tak'in.

¹⁰ Jesús tu yua y tu nuka tio': —¿Biken ka kʌxmetik a je' ch'upra? Ti' ne tsoy ba' tu meta ten.

¹¹ Tu woro a mok mʌnʌ' u tak'in bi a wire'x tu woro k'in, chen a ten mʌnʌ' a woro iken wo ti'en yete te'x.

¹² Tuk'in ka tu bʌka a perfume a ne ko'o u bo'ri yok'o ten, lʌji' tu meta ti' u ye'sik tuku bij cho'a tin bʌk'e kae mukaken.

¹³ Jach taj kin wei'k teche'x, tuku tsikbʌta' u jach tsoyi u t'ʌn K'uj ch'ik tu woro a lu'm, bexi' je'e u tsikbʌta baij tu meta a je' a ch'upra, ti' u k'asa'.

A Judas ku k'ubik a Jesús

¹⁴ Lʌiti' u k'ini, junturi' u apóstol a Jesús, a u k'aba' Judas Iscariote, bini yok'o u t'ojio' a moko' ku meajo' yok'o u yatoch K'uj,

¹⁵ y tu ya'tio': —¿Bon ka' botken y je'e in k'ubik teche'x a Jesús? A tio' tu bo'to' treinta chixtak'in a menʌ' plata.

¹⁶ Toj lʌji' u k'ini kaj chu'mpʌ u kʌxtik u k'ini tuk'in tsoy u k'ubik a Jesús.

U jʌnta' u yo'ch ak Ts'uri

¹⁷ U yʌj chuni u k'ini ka chu'mpʌ u jʌno' u yo'cho' a judíos a u k'aba' Pascua, taro' u kʌ'sa winik a Jesús u k'ato' ti' Jesús, tu yao': —¿Tuba a k'at in metko' a o'chi ti ak jʌnʌ a lʌji' u k'ini a Pascua?

¹⁸ Jesús nuka tio': —Xene'x a lay u kʌjta y a'exti' ti' a lay a xi'ra: “Ak wʌjkʌ'si ku yei'k: xok'o u k'uchu in k'ini, y ix a watoch kin bij jʌno' a o'chi a lʌji' ti' u k'ini a Pascua yete in kʌ'sa winiko'.”

¹⁹ U kʌ'sa winiko' a Jesús bino' u meto' a o'chi a bex a'bitio' ten a Jesús.

²⁰ Kaj ak'ʌ'chʌ, Jesús kuraji tu jʌnʌ yete a doce u apóstoles ix pojche'.

²¹ Y tuk'in tʌn u jʌno', Jesús tu ya'tio': —Jach taj kin wei'k teche'x, tiʌ junturi' yok'o teche'x bi u k'uben.

²² Y nej tu tukrubʌjo', y chu'mpʌjo' u k'atko' ti' Jesús: —¿Ts'uri, yʌ ten kin bin u k'ubech?

²³ Jesús tu nuka tio': —A mok ket ku chuk'ik uj pʌn yok'o a lʌk tu ki jʌnʌ, lʌji' a lay a ku bin u k'uben.

²⁴ U t'ʌn a K'uj ku ki ei'k baij ku bin meta' ti'u Ti'a Xi'ra, chen ¡jach yaj ba' ku bin u yue a lay a xi'ra a ku bin u k'ube u Ti'a Xi'ra! Más tsoy ti' wo mo' naj sijik ka'chik.

²⁵ Tu nuka Judas a mok lʌji' ku bin u k'ube a Jesús: —¿Wʌjkʌ'si, lʌji' ten? —Jesús tu nuka: Techi ta wa'a.

²⁶ Tuk'in tʌn u jʌno', Jesús tu mʌcha jump'eri' pʌn y tu ya'a: “Baij tech K'uj.” Pachi tu p'uya tio' u kʌ'sa winiko', y tu ya'tio': —Chuke'x y jʌnte'x, a je' lʌji' in bʌk'e.

²⁷ Pachi tu mʌcha jump'eri' luch yete u yʌki a menʌ' u ya'ri nukuch ts'us y tu ya'a: “Baij tech K'uj,” pachi tu mʌsa ti u kʌ'sa winik y tu ya'a: Uk'e'x te'x tu woro a je' u ya'ri a nukuch ts'us,

²⁸ a je' lʌji' in k'ik'e a ti' u ts'ek tumen u kataor ti' u t'ʌn a K'uj, a je' a k'ik'e lʌji' ti u sa'sik ne ya'p u si'pi a winik.

²⁹ Kin toj ei'k teche'x, mʌnʌ' in yaj uk'ik a u ya'ri a ts'us beje', bin in ka uk'e a tumen u ya'ri ts'us tuk'in ket tio' yok'o a tuku wesintik in Tet.

Jesús ku yei'k ku bin ya'e a Pedro mu k'omʌ a Jesús

³⁰ Chen ts'o'k u k'ʌyko' jump'eri' u k'ay K'uj, bino' ix u witsi a tu ne yʌn a che'i a Olivos.

³¹ Jesús tu ya'tio': —Tu woro a teche'x bi a p'ʌtene'x beje' ak'bi. Bex ts'ibʌ' yok'o u t'ʌn K'uj: “Bin in kinse a pastor, y uj me' bi u laj k'itkubʌj.”

³² Chen ka lik'ken tin ka' kuxta, bi in ka much'e'x ix Galilea.

³³ Pedro tu nuka: —Tak tu woro ku p'ʌtikech, ten mʌnʌ' in p'ʌtikech.

³⁴ Jesús tu ya'ti': —Jach taj kin wei'k tech, a beje' a ak'ʌ' tuk'in mo toj k'ainak aj t'er, oxwʌts' ka bin a wae ma' a k'o'muen.

³⁵ A Pedro tu ya'a: —Tak yʌnti' in kimi yete tech, mʌnʌ' in wei'k mi' in k'o'muech. Y tu woro a yʌno' u kʌ'sa winiko' bexi' nuko'.

Jesús ku t'ʌnik K'uj ix Getsemaní

³⁶ Pachi Jesús bini yete u kʌ'sa winik ix jump'e lu'm u k'aba' Getsemaní y Jesús tu ya'ti' u kʌ'sa winiko': —Kurene'x wai y ten binikaj in t'ʌne K'uj.

³⁷ Tu pʌya a Pedro yete tu kato' u ti'a a Zebedeo, Jesús chu'mpʌ u ne tukrik u bʌj.

³⁸ Jesús tu ya'tio' a mok tu pʌya: —Ne mo' tsoy in wor, ki wui'k in bʌj binikaj kimi. P'atene'x way yete ten y ma' wene'x.

³⁹ Bini Jesús más tataj y tu xonkitubʌj y tu t'ʌna K'uj, bex tu ya'a: «Tet, wa yʌn bik ma' cheik in mʌsik a je' a ba' ne yaj ki wui'k, mete, chen ma' metik a baiki in k'at a ten, lʌji' a metik a to'o a tech a k'at.»

⁴⁰ Pachi suti tu p'atij a oxto' u kʌ'sa winik, y tu yira wenukao'. Tu ya'ti' a Pedro: —¿Mix ta naj muk'te'x a wene'x k'ʌs jump'e hora yete ten?

⁴¹ Ma' wene'x y ki' p'ire a wiche'x, ti ma' chere'x ka tak u tunta' a wore'x. A teche'x a k'ate'x a metke'x tsoy ba', chen a bʌk'e'x mo' chich u muk'.

⁴² Ka' bini Jesús u ka' t'ʌne K'uj, bex tu ya'a: «Tet, wo mo' bik a luk'sik ten a je' a ba' ne yaj kin wui'k, mete a baij tech a k'at a metik.»

⁴³ Kaj ka' sut Jesús tuj p'atij a oxto' u kʌ'sa winik, tu ka' iraj wenukao', tu nej tak u weno'.

⁴⁴ Y Jesús tu p'ʌto', y u yoxwʌts' ka' bini u ka' t'ʌne K'uj, lʌiti' tu ya'a a bex tu yʌ a'a.

⁴⁵ Pachi ka' sut tu tio' a oxto' u kʌ'sa winik y tu ya'tio': —¿Xuy a wene'x y a je'sik a bʌje'x? Beje' yaj k'uchi u k'ini a ku bin k'uba' u Ti'a Xi'ra ti' a mok ne yʌn u si'pi.

⁴⁶ Lik'ene'x, ko'xe'x, tʌn u xok'o a mok ku bin u k'uben.

Jesús ku chuka'

⁴⁷ Tʌn u yʌj t'ʌn a Jesús, tari a Judas a lʌji' laj ket xaka a yʌn doce u apóstoles a Jesús, u yet tar yete ne pim winik yete u maska' y che'. A lʌjio' tuchibi ti' u t'ojio' a moko' ku meajo' yok'o u yatoch K'uj y a mok jak'ʌ u kuch ti' u winik a judíos.

⁴⁸ A Judas a mok ku bin u k'ubik a Jesús, tu toj ki a'a tio' a winik bik ku bin u k'oo'tik mok ku bin chuko', tu ya'tio': «A mok ka wirke'x in ts'uts'ik u p'uk', lʌji' ka chuke'x.»

⁴⁹ Judas xok'i ti Jesús y tu ya'ti': ¡Yaj k'uchen, wʌjkʌ'si! Y tu ts'u'ts'a u p'uk'.

⁵⁰ Y Jesús tu ya'ti': Bojo', toj mete a bay tarech a mete. Lʌji' tuk'in a winiko' xok'o y tu chuko' a Jesús.

⁵¹ Chen junturi' a mok u yet mʌn a Jesús, tu jara u maska' y tu ch'ʌka u xikin junturi' u k'ʌni' a u jach t'oji a mok ku meaj yok'o u yatoch K'uj.

⁵² Jesús tu ya'ti': —Li'se a maska', tu woro a mok ku kinsa' yete maska' yete maska' ku bin kinsa'.

⁵³ ¿Yʌn maj tukrik, wa in k'at toj je'e in t'ʌnik in Tet y ti' ku bin u tuchi'tik ten jach k'ux ne ya'p ángeles ti' u tajken?

⁵⁴ Wa bex kin metik ¿Chen bik ku bin metchʌ a bex ts'ibʌ' yok'o u t'ʌn K'uj, a yʌnti' u jach metchʌ?

⁵⁵ Tita tu k'ata Jesús ti' a winiko': —¿Biken tare'x yete maska' y yete che' ti' a chujkene'x, p'is ta wiren a bex a mok ne ku yakraba'? Tu woro k'in ki kuta tin kʌ'sa ix u yatoch K'uj y maj chukene'x.

⁵⁶ Tu woro a je' ba' ku mʌn lʌji' ti' u metchʌ a bex ts'ibʌ' yok'o u t'ʌn K'uj a bex tu ya'a profeta. Tu woro u kʌ'sa winiko' a Jesús puts'o' y tu p'ʌto' tu juni' a Jesús.

Jesús ku bisa' tuku much'ik u bʌjo' tu woro u ts'urio' a Judíos

⁵⁷ A mok tu chuko' a Jesús, tu biso' a Jesús ix u yatoch a Caifás a mok lʌji' u jach t'oji a mok ku meaj yok'o u yatoch K'uj, bexi' tu tio' a mok ku kʌ'sa u t'ʌn K'uj a toj u ts'ibtamʌ a Moisés uchik y yete a mok jak'ʌ u kuch ti' u winiko' a judíos.

⁵⁸ Chen a Pedro nʌch tʌn u t'u'rik u pach a Jesús yok'o u xur u palacio a u jach t'oji a mok ku meaj yok'o u yatoch K'uj, okij yok'o a nʌj y bij kuta tu tiʌ a mok ku kʌnʌntik a nʌj ti' u yirik bik ku bij ts'oko ti' Jesús.

⁵⁹ U t'ojio' a moko' ku meajo' yok'o u yatoch K'uj yete a jak'ʌ u kuch ti' u winik a judíos y tu woro a mok ku much'ik u bʌjo' yok'o a nʌj tʌn kʌxko' bik u paytiko' u pach a Jesús, ti' u li'sa' t'ʌni ti' u kinsa',

⁶⁰ Y mo' tu yiro' ba' ti u pʌk'ik u pach a Jesús tak ne pim tu pʌyo' u bojo' ti' u tus ei'ko' ba' ti Jesús. Ya u ts'ok taro' kato' xi'ra ti' u yei'k ba' ti' u pʌk'ik u pach a Jesús,

⁶¹ y bex tu yao': —A je' a xi'ra tu ya'a: “Ten je'e in laj jubik a u yatoch K'uj, y oxp'e k'in kin ka laj metik.”

⁶² Ij lik'i ch'ikta a u jach t'oji a mok ku meaj yok'o u yatoch K'uj, y tu k'ata ti Jesús: —¿Biken mix ba' ka nukik? ¿Baiki a je' a ba' ku ya'ba tech?

⁶³ Chen a Jesús mu naj nuka. U jach t'oji a mok ku meaj yok'o u yatoch K'uj, tu ya'ti' Jesús: —Yok'o u k'aba' K'uj a ne chich muk' a'e ti' to'ne'x u jach taji, wa tech lʌji' a Cristo a u Ti'a K'uj.

⁶⁴ Jesús nuka ti': —Techi ta wa'a, y ten ki wei'k teche'x bi a wire'x u Ti'a Xi'ra kurukba yok'o u xax a K'uj a ne chich u muk', tʌn u tar yok'o u muyaj ix kʌ'.

⁶⁵ U jach t'oji a mok ku meaj yok'o u yatoch K'uj tu jʌta u nok' tiu ye'sik ne mo tsoy tu yua baij tu ya'a Jesús y tu ya'a: —¡Tu pach'a K'uj! ¿Ba'wi kaj kʌxtik u jer mok ku yei'k baij mo' tsoy tu meta a je' xi'ra? Teche'x ta wue'x baiki mo' tsoy ba' tu ya'a.

⁶⁶ ¿Bik a wike'x teche'x? Tu woro tu nuko': —¡Yʌn u si'pi y yʌnti' u kimi!

⁶⁷ Lʌji' ka chu'mpʌjo' u tup'ik u wich a Jesús, u jʌts'ko' y tax jujuntu tu jʌts'a' u wich a Jesús,

⁶⁸ tu yao' ti' Jesús: —¡Wa jach lʌjiech a Cristo a'e mok tu jʌts'ech!

Pedro ku yei'k mu' k'o'mʌ a Jesús

⁶⁹ Kurukba Pedro tu xur a palacio, xok'i ti' junturi' ch'upra a ku k'ʌna' ix a lay a nʌj, a lay a ch'upra tu ya'ti' a Pedro: —Tech bexi' a wet mʌn a Jesús a lʌji' u tar Galilea.

⁷⁰ Chen a Pedro tu ya'a tu pimai a mok nika' tita: —Mo jach to jay, ¡mi' we baij ka wei'k tech!

⁷¹ Pachi bini yok'o u jor u nʌji, tuba u jer ch'upra tu yira y tu ya'ti' a mok nikʌ' tita: —A je' a xi'ra bexi' u yet mʌn a Jesús a lʌji' ti' u tar ix Jerusalén.

⁷² Chen a Pedro tu ka a'a mo jach to jai' y tu ts'a u jach t'ʌn y bex tu ya'a: —¡Ten mi' in k'o'mʌ a je' a xi'ra!

⁷³ Mojsʌji, ka' xok'o u jero' ti' a Pedro y tu yao' ti': —A tech jach lʌji' a mok u yet mʌn a Jesús, y ne chʌkʌ' bij ka t'ʌn.

⁷⁴ Pedro chu'mpʌ u chich ei'k y ku yei'k mo tsoy tiu bʌji' y bex tu ya'a: —¡Ten mi' k'omʌ a je' a xi'ra! Lʌji' kaj ka'ynʌ junturi' t'er,

⁷⁵ Y Pedro k'ajti a tu ya'a Jesús: «Toj mo' yʌ k'aynʌk aj t'er a tech ox wʌts' bi a wae ma' k'o'muen.» Lʌji' kaj Jok'i a Pedro y ne tu yak'tubʌj.