San Mateo 24 - Porciones Lacandon-Naha

XI. U TSIKBɅTA YOK'O U XU' T'ɅN ( 24.1—25.46 ) Jesús ku toj ei'k bik ku bin juba' u yatoch K'uj

¹ Kaj jok'i Jesús yok'o u yatoch K'uj y tʌn u bin, xok'o' u kʌ'sa winiko' ti' Jesús y Jesús tu ye'sa' tio' tu woro u yatoch K'uj.

² Jesús tu ya'tio': —¿Ka wike'x tu woro a je' a nʌj? Jach taj kin wei'k teche'x, mʌnʌ' u nʌj pataj kuta jump'e tunich, toj tu woro binukaj laj juba'.

Jesús ku tsikbʌtik baij ku bij yʌ mʌn tuk'in ne tak u xu' t'ʌn

³ Pachi bini Jesús yete u kʌ'sa winiko' ix a yaj wits u k'aba' Olivos, ka k'ucho', a Jesús kuraj y u kʌ'sa winko' a Jesús xok'o' u k'ato' ti' a Jesús: —Wʌjkʌ'si ¿tuk'in ku bin mʌn a je' ka wei'k? ¿Y baij ku bij e'sa ba' tuk'in ka' xok'ok a ka' sut y ka xu'ruk t'ʌn?

⁴ Jesús tu nuka: —Kʌnʌnta bʌje'x ti ma' tuxae'x.

⁵ Binukaj tar ne pim ku bin u k'ʌne in k'aba', ku bin u yao': “A ten lʌjien a Cristo”, y jach ne pim winik ku bin u tuse.

⁶ Ka bin a wue'x ne ya'p ts'iki ch'ik u jer kʌjta y bexi' ka bin a wue'x ku jumintiko' tʌn u bin u chu'so' u ts'iko'; chen ma' sʌjtike'x, yʌnti' u laj mʌn tu woro a je' ba', chen mo' lʌji' ti' u xu' t'ʌn.

⁷ Binukaj lik'i tu ts'iki kʌjta yete u jer kʌjta, binukaj tar wi'ji, ne ya'p ya'ji y ne pim kʌjta ku bij pek a lu'm.

⁸ Chen tu woro a je' ba' ku bin mʌn, lʌji' u yʌj chuni ku bin yue winiko' ne yaj.

⁹ »Tuka wui'ke'x in t'ʌn, binukaj chuke'x mʌkae'x y ku bin bise'x yok'o aj wes ti' u kʌxmete'x y ti' a kinsae'x.

¹⁰ Ne pim a mok ku yui'k in t'ʌn biu p'ʌte u metik in t'ʌn; tax jujuntu biu k'ube u yet bojo' ti' aj wes y biu p'akte u bojo'.

¹¹ Ne pim ku bin lik'i a mok ku tus yei'k lʌji' profeta y ne pim winik ku bin u tuse.

¹² Tu nej t'ari u metik k'as ba' a winik, ne pim ku bin u p'ʌte u yakuntik u bojo'.

¹³ Chen a mok muj p'ʌtik u t'ʌn a K'uj hasta tuku laj ts'oko tu woro a ba', lʌji' ku bij bin ix kʌ'.

¹⁴ Y yʌnti' u yʌ tsikbʌta' u jach tsoyi u t'ʌn K'uj ti' tu woro a lu'm, ti u k'oo'tik tu woro a kʌjta a tiʌ yok'o a lu'm, y pachi binukaj xu' t'ʌn.

¹⁵ »A mok ku xakik a je' a t'ʌn, u ki ue baij tu ts'ibta uchik a profeta a lʌji' a Daniel, ti' tu ya'a. Tuk'in ka' wire'x u meta ne mo tsoy ba' yok'o u yatoch K'uj,

¹⁶ a mok tiʌ ix Judea, ka puts'uk ix a wits.

¹⁷ A mok tiʌ ix u jo' u yatoch, mu yeme u ch'ae u ba' a tiʌ ichi ix u yatoch;

¹⁸ y a mok tiʌ tu meaj ix u kor, mu sut u ch'ae u nok' ix yatoch.

¹⁹ ¡Jach otsi a ch'uprao' a mok mo uts'k'inti' y a mok yʌnti' u ti'a tʌn u yʌ chu'chʌntʌ a lay u k'ini!

²⁰ T'ʌne'x K'uj ti' a lay u k'ini, ka puts'ke'x mo u k'ini sisi y mo' la' u k'ini ku je'sik u bʌjo' a judíos,

²¹ a lay u k'ini, jach ne ya'p yaj ba' ku bin u yue a winiko', ku bij mʌn a bex mo' nʌj monʌ toj ka meta a lu'm hasta beje' y mʌnʌ' u yʌ mʌn pachi.

²² Wa K'uj muj komkintik a lay u k'ini, mix mok ku bin ix kʌ', chen yok'o a tu otsi u yirik u winik a to' tu tejta, lʌji' ben tu komkita a lay u k'ini.

²³ »Wa mok ku yei'k teche'x: “Ire'x way tiʌ a Cristo”, o “Ire'x tiʌ te'”, ma' ch'eike'x u t'ʌn.

²⁴ Binukaj lik'i a winik a mok ku tus ei'k lʌji' a Cristo, y juntu ku yei'k lʌjio' profetas, bi u ye'so' ne ya'p ba' ix kʌ' y bi u meto' ne ya'p tsoy ba', to jai' ti' u tusik a winik, bexi' bi u tunte u tusik a mok toj ya tejta ten K'uj.

²⁵ Toj in waba uchik teche'x.

²⁶ Ben wa ku yei'k teche'x: “Ire'x, tiʌ yok'o u lu'mi tu mʌnʌ' nukuch che' woro tikin lu'm”, ma' bin a wire'x, o ku yei'k teche'x: “Tiʌ yok'o nʌj”, ma' ch'eike'x u t'ʌno'.

²⁷ A bex ka wike'x u jajapk'uj, ku laj sasichʌ tu woro a kʌ', bex ka ba wire'x u sut u Ti'a Xi'ra.

²⁸ Tu cha' u bʌk'e a kimen a winik, ti' ku bin u much'e u bʌj aj ch'om.

U sut u ti'a a xi'ra

²⁹ »Toj ka' ts'o'kok u yui'k yaj ba' a winik a lay u k'ini, a k'in binukaj ak'ʌ'chʌ. A aknʌ' binukaj ts'oko u tichk'a', a ba'kʌo' binukaj laj juto', binuka' laj pek tu woro a yʌn muk' a ba' a tiʌ ix kʌ'.

³⁰ Pachi, bi u yiro' u ye'sa ba' ix kʌ' yok'o u Ti'a Xi'ra, y tu woro u kʌjta a winiko' a tiʌ ix lu'm bi u yak'te u bʌjo', bi u yiro' u Ti'a Xi'ra u tar ix k'ʌ' yok'o muyaj, yete tu woro u muk' y yete tu woro u jach tsoyi.

³¹ Bi u tuchi'te u ángeles ch'ik tu woro a lu'm y bi u yuste a u k'aba' trompeta, ti u laj much'ik tu woro a winik a to' toj u tejtamʌ.

³² »Ki kʌne'x a bex a je' a kʌ'sa a yʌn u jer u nu'ku yok'o a che' u k'aba' higuera: Tuk'in ka' wire'x u jok'o u muni u k'ʌ' y ku chu'mpʌ u jok'o u le', ka wike'x ya ne taki u yoko u chʌkʌri k'in.

³³ Bexi' ka' wire'x u mʌn tu woro a ba' a ti tsikbʌta, ete'x nej taki u ka' sut u Ti'a Xi'ra.

³⁴ Jach taj kin wei'k teche'x, yʌnti' u yʌ mʌn pʌti a je' ba' a tin tsikbʌta, ti' a je' a winiko' kuxʌ' beje'.

³⁵ Tu woro a kʌ' y tu woro a lu'm ku bin ts'oko', chen in t'ʌn mʌnʌ' u ts'oko u mʌn.

³⁶ »Chen a lay u k'ini mix mok u yej tuk'in ku bij mʌn, mix a ángeles a tiʌ kʌ', mix u Ti'a K'uj to jari in Tet K'uj u yue.

³⁷ »A bex u k'ini kaj mʌni ti' a Noé uchik, bex ku bij sut u Ti'a Xi'ra.

³⁸ Tuk'in a lay u k'inio' mo' yʌ tak a ne k'ʌ'm a ja' a ku bin burik a lu'm, a winiko' tʌn u jʌno', tʌn u yuk'o', tʌn u ch'eik u bʌjo', y tʌn u ch'ei'ko' u lak' u tio', hasta kaj k'uchi u k'ini a Noé oki ix a nukuch chem,

³⁹ Chen a winiko' mu' u yeo' baij ku bin tar, lʌji' kaj tari ne k'ʌ'm a ja' y laj buri a lu'm, tu woro laj kimo'. Bex ku bij mʌn tuk'in ka' sutuk u Ti'a Xi'ra.

⁴⁰ A lay u k'ini ka' mʌnʌk, ka'to' xi'ra tʌn u meaj ix u kor; junturi' ku bij pʌya' y a juntu ku bij p'ʌta'.

⁴¹ Ka'to' ch'upra tʌn u juch'o' yok'o jump'eri' kuch juch, junturi' ku bin pʌya y a juntu ku bin p'ʌta'.

⁴² »Ki ch'ukte'x tu woro k'in, tu ma' a we'x u k'ini tuk'in ku bin sut a Ts'uri.

⁴³ Ue'x a je' a ba' kin wei'ke'x teche'x, wo u winki jump'e nʌj u yej tok'in ku yoko a ku yakraba ix yatoch, bi u ch'ukte y muj bin u cha'e u yoko akra' u ba'.

⁴⁴ Bexi' teche'x ki' ch'ukte'x u sut u Ti'a Xi'ra: ka wirik, a ti' ku bij sut tuk'in mix mok u yue.

A mok ku ki' meaj ti' u ts'uri y a mok muj ki' meaj ti' u ts'uri

⁴⁵ »¿To' baij a ku nej k'ʌna' ne tsoy u meaj y ne t'aa? La' a toj ku li'sa t'ʌni ti' ten u ts'uri, u ts'ek u yo'ch a mok tiʌ tu yatoch yete u naj p'is u hora u jʌno'.

⁴⁶ Binukaj tsoyta u yor a lay a u nej k'ʌni', tuk'in ka ira'k ten u ts'uri tʌn u metik a baij a'bti' u metik.

⁴⁷ Jach taj kin wei'k teche'x, a u ts'uri a nʌj bi u laj ts'ati' u kʌnʌntik tu woro u ba' ti' u nej k'ʌni'.

⁴⁸ Chen wo a lay u ne k'ʌni' mo pataj y ku yei'k yok'o u tuku: Ne xʌnta ku bin sut in ts'uri,

⁴⁹ y ku chu'sik u laj kʌxmetik u ka' k'ʌni' ti' y ku much'ik u bojo' ti' u tu jʌno', ku yuk'uba' yete u bojo',

⁵⁰ Chen u ts'uri binukaj sut u tuk'in mʌnʌ' u ch'uktik y mu' yej,

⁵¹ y u ts'uri bi u ts'ae u bo'tik u si'pi, y ku bin u pure yoko tu tio' a ku metko' u bʌjo' ne tsoy a tuko' chen tusukao'. Tita ku bij ok'o y ku laj bin u k'uxe u koj yete u yʌyi tuku bu yue a ba'.