San Mateo 22 - Porciones Lacandon-Naha

A kʌ'sa a yʌn u jer u nu'ku yok'o a tuk'in ku metko' u yo'cho' a bex ku ch'eik u lak'o'

¹ Jesús ka' chu'mpʌ u kʌ'sko' yete a kʌ'sa a yʌn u jer u nu'ku, kaj u ya'tio':

² «Tu ku wesintik K'uj a tiʌ kʌ', bex bix tiʌ junturi' wes, tu meta u yo'ch u ti'a ti u ch'eik u lak'.

³ Ka tu tuchi'ta u winik ti' u pʌyik a mok tu ya'a u tar tu jʌnʌ; chen a layo' moj taro' tu' mu' k'ato'.

⁴ Tu ka tuchi'ta u jer u winik ti' u yei'k tio' a mok tu pʌya tu jʌnʌ: “A o'chi ya menʌ', ya tin tuchi'ta kinsa' in wakʌx y a to'o a bʌk' ne bu't'o', tu woro ya laj menʌ', ko'tene'x ta jʌne'x.”

⁵ Chen a tio' toj mo tu yuo' u t'ʌn aj wes, tax jujuntu bini ix u lu'mi u meaj, a juntu bini tuku kanik u ba';

⁶ a yʌno' tu chuko' u winik aj wes y tu kʌxmeto' turaj ka tu kinso'.

⁷ Ka tu yua aj wes, nej ts'ikchʌ; y lʌji' ka tu tuchi'ta u ba'kʌi ti' u laj kinsik a mok tu kinsa' u winik y tu laj toka u kʌjto'.

⁸ Pachi tu ya'ti' u k'ʌnio': “A o'chi ya laj menʌ', chen a layo' a moj taro' toj mo' tsoyo' ti u jʌntik in wo'ch.

⁹ Xene'x yok'o u beri a tuku ne mʌn winik y tu woro a mok ka wirik laj a'e'x u tar tu jʌnʌ.”

¹⁰ U winik a mok ku ne k'ʌnik jok'o yok'o bej y tu laj pʌya a mok tu yiro' tak a mok mo' tsoyo' u tuko', y bex u nʌji tu ku bij jʌno' laj turi ti' winik.

¹¹ »Kaj oki aj wes tu nikʌ' a mok tu pʌya tu jʌnʌ, tu yira tiʌ junturi' xi'ra mu' bukimʌ u nok'i a bex ku tʌka tuku ch'ei'ko' u lak'o a winik.

¹² Tu ya'ti': “Bojo', ¿bik ojkech way, a tech mʌnʌ' a nok' a bex ku tʌka' tuku cheik u lak'o a winik?” Chen a lay a xi'ra mo' tu nuka.

¹³ Ka tu ya'a aj wes ti' u winik mok ku mʌsik o'chi: “Chuke'x a je' xi'ra y k'axe u yok yete u k'ʌ', y ka purke'x jaknʌki tu ts'uakbi; tita ku bij ok'o y ku bin u k'uxe u koj yete u yʌyi tuku bu yue a ba'.”

¹⁴ Ka wirik jach pim a mok ku pʌya' chen mo pim a mok ku jach tejta.»

Ku k'ata ti' a Jesús yok'o tuku bo'ta u bo'ri a lu'm a ku k'atik aj wes

¹⁵ Chen ts'o'ki u tsikbʌtik a Jesús a jump'e ba', a u winiko' a judíos a ku ya'batio' fariseos tu ka'to' u yoro' yete u bojo' ti u k'atko' ba' ti' a Jesús tiu yei'k mo tsoy ba' y bex tsoy u payta'.

¹⁶ A fariseos tu tuchi'ta u kʌ'sa winiko' yete u winiko' a Herodes, ti u k'atko' ti Jesús ba', kaj yao' ti' a Jesús: —Wʌjkʌ'si, in weo' a tech tu woro a ba' ka wei'k jach tu jay, jach u t'ʌn K'uj ka kʌ'sik, maj tukrik baij ku ya'ba tech, ma' wei'k ti' a winik baij poch u yui'k.

¹⁷ A'e teno' bik a wik tech: ¿Tsoy in bo'tik ti' in lu'm ti' u wesi Roma a César o mo' tsoy in bo'tik?

¹⁸ Chen Jesús toj u k'o'mʌ mo' taj ku tukriko', y tu ya'tio': —¿Biken ka tuntke'x in wor, a teche'x ka metke'x a bʌje'x ne tsoy a tuke'x chen tusaka'e'x?

¹⁹ E'seten a chixtak'in a tuka bo'tik a lu'm ti' a wes. Ij tasa ti' jump'eri' a tak'in au k'aba' denario.

²⁰ Jesús tu k'ata tio': —¿Moki u yochi tʌk'ʌ y moki u k'aba' ts'ibʌ' yok'o a je' a chixtak'in?

²¹ Tu nuko' ti': —A César u wesi a Roma Jesús tu ya'a: —Ts'ae'x ti' a César a toj lʌji' yʌni a César u wesi Roma, y ts'ae'x ti' K'uj a toj lʌji' yʌni K'uj.

²² Ka tu yuo' u nukik Jesús bex, laj peknʌ u yoro', y tu p'ʌto', ij bino'.

Ku tar u k'ata' ti Jesús bik taba a mok ku ka lik'i kuxta

²³ Lʌiti' u k'ini taro' u winik a judío a ku ya'ba tio' saduceos, a lʌjio' a tio' muj ch'ei'ko' u t'ʌn a Jesús a ku yei'k a mok ku kimi je'e laj lik'i kuxta, y lʌji' ka tu yao' ti' a Jesús:

²⁴ —Wʌjkʌ'si, Moisés tu ya'a: Wa yʌn mok ku kimi y moj nʌj ti'ʌnʌj yete u lak', u ka' xi'ra u bojo' ku bin u ch'eik u lak' u suku' tiu yʌnta u ti'a u suku'.

²⁵ Yok'o to' ti kʌjʌ' ka'chik siete xi'ra laj lʌiti' u bojo'; a suku'ubi tu yʌ ch'a u lak' ij kimi y ma' nʌj ti'ʌnʌj yete u lak', y a ch'upra p'atij ti' u yits'in a xi'ra aj kimi.

²⁶ Bexi' u yits'in kimi y mo nʌj ti'ʌnʌj, bexi' a yʌno' tura laj kimo' tu woro u bojo' y moj nʌj ti'ano' yete a ch'upra.

²⁷ Pachi bexi' kimi a ch'upra.

²⁸ Che ka' k'uchuk u k'ini, K'uj ku ka li'sik tu ka' kuxta a mok kimen, ¿mok ku ka bin u cha'e a ch'upra, ka wirik tu woro a siete xi'ra laj mʌni u ch'eik?

²⁹ Ka tu nuka Jesús: —Mo' taj ka wei'ke'x a teche'x, tu mo' a ki' k'o'mue'x u t'ʌn K'uj y mix u muk' K'uj.

³⁰ Tuk'in K'uj ku ka' li'sik tu ka' kuxta a mok kimi, mʌnʌ' u yʌ ch'eik u lak'o' a winik, ku bin wayso' p'is bex u ángeles K'uj a tiʌ kʌ'.

³¹ Chen yok'o a mok ku bij lik'i tu ka' kuxta, ¿yʌn ma' xakbe'x tu ts'ibʌ' tuku yei'k K'uj:

³² “A Ten Lʌjien u K'ujen a Abraham, a Isaac y a Jacob”? K'uj mo' lʌji' u K'uj a kimen winik, K'uj lʌji' u K'uj a mok kuxʌ'.

³³ Ka tu yuo' a winik bex u tsikba a Jesús, laj peknʌ u yoro' yok'o u kʌ'sa a Jesús.

U t'ʌn K'uj a to'o lʌji' u yʌj chuni yʌnti' u jach meta'

³⁴ Tu much'a u bʌjo' u winiko' a judíos a ku ya'batio' fariseos, tu tu yuo' muj naj ts'atio' u nujko' a u winik a judío a ku ya'ba tio' saduceos.

³⁵ Junturi' a lʌji' ku kʌ'sik a ts'ibʌ' tea Moisés uchik, tiu kʌxtik u si'pi a Jesús tu k'ata ti' a Jesús:

³⁶ —Wʌjkʌ'si, ¿to' baij a tu li'sa u t'ʌn K'uj a ts'ibʌ' tea Moisés uchik lʌji' u yaj chuni a yʌnti' u jach meta'?

³⁷ Jesús tu ya'ti': —“Yakunte a Ts'uri a K'uj yete tu woro a pixʌn, y yete tu woro a baij ka tukrik y yete tu woro a kuxta.”

³⁸ A je' lʌji' a toj u yʌj chuni yʌnti' a jach metik a tu li'sa u t'ʌn K'uj.

³⁹ Chen a juntu jach bexi' lʌiti' a ku yei'k: “Jach yakunte a bojo' bix tech ka yʌkuntik a bʌj.”

⁴⁰ A je' a ka'p'e a t'ʌn a tu li'sa u t'ʌn K'uj u meta', lʌji' u jach yʌ chuni a t'ʌn tu woro a ts'ibtamʌ a Moisés uchik y tu woro a tu ts'ibto' profetas.

¿Moki u ti'a a Cristo?

⁴¹ Xuy tiʌ u much'e u bʌjo' u winiko' a judíos a ku ya'batio' fariseos, a Jesús tu k'ata tio':

⁴² —¿Baij ka tukrike'x ti' a Cristo? ¿Moki u ti'a? Y tio' tu nuko': —Ti' u tar ti' a David.

⁴³ Jesús tu ya'tio': —¿Y biken a David kaj tʌra' ti' u Pixʌn K'uj tu t'ʌna a Cristo, Ts'uri? Ka wirik a David tu ya'a:

⁴⁴ “Tu ya'a ak Ts'uri K'uj ti' ak Ts'uri Cristo, kuren tin wiknʌ, hasta tuk'in ku k'uchu tu k'ini tu woro a mok ku p'aktikech in laj ts'ek u xonkintik u bʌjo' ti tech.”

⁴⁵ Wa a David ku t'ʌnik Ts'uri a Cristo ¿biken ka wei'ke'x lʌji' u ti'a a David?

⁴⁶ Mix mok tu ts'ati' u nukik k'ʌs chichin ti' a Jesús y a lay u k'ini mix mok tu yʌ tunto' u k'atko' u jer ba' ti' a Jesús.