San Marcos 9 - Porciones Lacandon-Naha

¹ Jesús bexi' tu ya'tio': ―Jach taj kin wei'k teche'x, a mok tiʌ way, yʌn tax jujuntu mʌnʌ' u kimi hasta ku yirik u tar tu ku wesintik K'uj a tiʌ kʌ' yete u muk'.

Jesús ku waysik u bʌj

² Kaj mʌni seis u k'ini, Jesús tu pʌya a Pedro yete Juan y a Jacobo, ij bino' ja'ri' tio' ix u jo' wits tu ne kʌ'nʌ. Y tita tu wich u kʌ'sa winiko' tu waysa' u bʌj a Jesús.

³ U nok' wayi jach k'ux sʌk y ne cha'a, y tak ne ya'p ku p'o'a jump'e nok', mʌnʌ' u ne k'uchu sʌkta a bex u sʌki u nok'.

⁴ Y tu yoxto' u kʌ'sa winik a Jesús tu yiro' u ye'sik u bʌj a Elías yete a Moisés tʌn u tsikbo' yete Jesús.

⁵ Pedro kaj u ya'ti' a Jesús: ―Wʌjkʌ'si, ¡boj tsoyi ti teno' tu tio' way! Bi meto' oxp'e pʌsa, jump'e ti tech, jump'e ti a Moisés y jump'e ti' a Elías.

⁶ Tu ne jak'i u yoro' u kʌ'sa winik a Jesús, ben a Pedro ya muj yej baij ku yei'k,

⁷ Lʌji' kaj tari jump'e muya y toj ti xu'ri tu tio', y toj yok'o a muya jok' jump'e t'ʌn tʌn u yei'k: «A je' lʌji' in ti'a a jach otsi wirik, ue'x u t'ʌn.»

⁸ Toj yayaj ka tu pʌkto', ya mix mok tu yiro' tiʌ yete tio' toj jari a Jesús tu juni'.

⁹ Pachi ka tʌn u yensko' u witsi, Jesús tu ya'tio' u kʌ'sa winiko' mu' bin u yao' ti mix mok a ba' tu yiro', hasta ka lik'ik tu ka kuxta u Ti'a Xi'ra.

¹⁰ Ben tu mukro' a ba' tu yiro', tak tʌn u k'atko' yete u bojo', baiki u k'at yei'k a Jesús ka tu ya'a u ka' lik'i tu kuxta.

¹¹ Y tu k'ato' ti' Jesús: ―¿Biken ku yei'ko' a ku kʌ'sko' u t'ʌn K'uj a toj u ts'ibtamʌ a Moisés uchik lʌji' pʌti ku bi yʌ tar a Elías?

¹² Jesús tu nuka tio': ―Jax to jʌy, a Elías lʌji' ku bin ya tar pʌti y lʌji' ku laj bin u ki uts'kintik a ba', ¿chen biken ku yei'k a tu ts'ibʌ' u t'ʌn a K'uj, a u Ti'a Xi'ra yʌnti' u mʌsik ne yaj ba' y ku bij p'akta'?

¹³ Chen a ten ki wei'k teche'x, a Elías to yaj tari, ij meta' ti' tu woro a ba' u k'at meta' ti' a bex toj ts'ibʌ' yok'o u t'ʌn K'uj bik ku bin mʌn ti'.

Jesús ku jarik a kisin a akʌ' ti junturi' xi'ra

¹⁴ Kaj u'ro' Jesús tu tio' a yʌno' u kʌ'sa winiko', tu yira ne pim winik tiʌ yete tio' y bexi' tio', a ku kʌ'sko' u t'ʌn K'uj a toj u ts'ibtamʌ a Moisés uchik tʌn u ts'iko' yete u kʌ'sa winiko'.

¹⁵ Y kaj i'ri a Jesús ten a winiko', ne tsoyji u yoro' a winik y se'p' tu k'ʌna u yako' u t'ʌno'.

¹⁶ Y Jesús tu k'ata ti' u kʌ'sa winiko': ―¿Baiki u yok'o tu ka ts'ike'x yete a ku kʌ'sko' u t'ʌn K'uj a toj u ts'ibtamʌ a Moisés uchik?

¹⁷ Kaj u nuka junturi' a mok tiʌ tu pimai: ―Wʌjkʌ'si, tin tasa tech in ti'a, a akʌ' kisin tu yok'o a lʌji' tu p'ʌta mo' jak'ʌ u t'ʌn.

¹⁸ Xik lara tu tiʌ, a kisin ku chukik y ku purik ix lu'm y ku ts'ek u jok'o u yom u chi', ku ts'ek u laj t'ʌn u koj y ku p'ata chichchich in ti'a, ti k'ata' ti' a kʌ'sa winiko' ka u jare ti', chen moj k'uchu u muk'o u jarik.

¹⁹ Jesús tu nuka tio': ―¡A teche'x toj maj ki akse'x wore'x in t'ʌn! ¿Hasta tuk'in yʌnti' in p'ata yete teche'x? ¿Hasta tuk'in yʌnti' in muk'tike'x? Tase'x way a lay a mejen xi'ra.

²⁰ Y tasa' ti' a Jesús y a kisin ka tu yira a Jesús, chu'mpʌ u li'sik ti' a meje xi'ra p'is u p'uju u ya'ji y lubi ix lu'm y tʌn u chich wʌk'ʌstik u bʌj y bexi' tʌn u jok'o u yom u chi'.

²¹ Jesús tu k'ata ti' u tet a xi'ra a ka kisin tu yok'o: ―¿Bon u yuchi bex ku mʌn ti' a ti'a? U tet tu nuka: ―Toj tuk'in ne cho mejentʌ.

²² Ne ya'p wʌts' tu pura ix k'ak' ix ja', ti' u kinsik, ben o yʌn ba' ja' metik, ch'ae otsi to' y ʌnto'.

²³ Jesús tu ya'ti': ―Wa ka ki' aksik ta wor ti' K'uj, je'e u metchʌ, ¡a mok ku ki' aksik tu yor ti', tu woro a ba' je'e u laj metchʌ!

²⁴ Se'p' kaj k'ʌ'm abotnʌj u tet a meje xi'ra,: ―Kin waksik tin wor ti'. ¡Ʌnten in más in ki aksik ti wor ti'!

²⁵ Ka tu yira Jesús tʌn u tar ne pim winik tu tiʌ, lʌji' kaj u k'eya a kisin, tu ya'ti': ―Kisin yaj moj jak'u t'ʌn y bexi' a mʌkʌ' u xikin, ten kin li'sik in t'ʌn ti tech, jok'en ti' a mejen xi'ra y ma' ya sut a woko ti'.

²⁶ Kaj abotnʌj a kisin y tu ka ts'a u ka lik'i ti'a meje xi'ra p'is u p'uju u yaj, pachi jok' ti, chen p'is kimen tu p'ʌta a meje xi'ra y ne pim winik chu'mpʌ u yei'ko': ¡A lay kimi!

²⁷ Chen a Jesús tu mʌcha u k'ʌ' a meje xi'ra, kaj u li'sa ch'ikta.

²⁸ Pachi a Jesús oki yok'o jump'e nʌj y u kʌ'sa winiko' tu k'ato' ti' tuk'in tu juna yʌno': ―¿Biken a teno' moj k'uchi in muk'o in jarik a kisin tu yok'o a lay a meje xi'ra?

²⁹ Jesús tu nuka tio': ―A je' a kisin je'e a jarik jari yete tuk'in chich ka t'ʌnik K'uj y ka muk'tik a jʌne'x.

Jesús ku ka ei'k u kimi

³⁰ Kaj jok'o' tita, mʌno' tu lu'mi Galilea, chen a Jesús mu' k'at ka etak tʌn u mʌn tita.

³¹ To jari u k'at u kʌ'sik u kʌ'sa winiko', bex tʌn u yei'k tio': —U Ti'a Xi'ra binukaj k'uba' ti' a winik y binukaj kinsa' chen ka mʌnʌk oxp'e k'in jeu' ka' lik'i kuxta.

³² Chen u kʌ'sa winiko' a Jesús muj ki' uo' baij u k'at u yei'k a Jesús, y sajako' u k'atko' ti' a Jesús.

¿Mok a jach ne ch'ikyʌn?

³³ K'ucho' tu kʌjta Capernaum. Y tuk'in ya tio' ix nʌj, Jesús tu k'ata tio': ―¿Baij ka jumintiko' a ti wu'a yok'o bej?

³⁴ Chen tio' muj naj nuko', tu u yeo' lʌji' yok'o a tuku u k'at u yetko' moki más ch'ikyʌn o más t'o'o.

³⁵ Lʌji' ka kuraj Jesús y tu pʌya a doce u apóstoles y tu ya'tio': ―Wa mok u k'at lʌji' más pʌti, lʌji' yʌnti' u p'ata ne tu pach u bojo' y lʌji' yʌnti' u meaj ti' u bojo'.

³⁶ Pachi Jesús tu pʌya junturi' cho mejen y tu mʌsa tu chumuki y tu mek'a

³⁷ ―A mok ku yaksik junturi' cho mejen yok'o a ten, ten ku yaksiken y a mok ku yaksiken, mo ja'ri' ten ku yaksiken, lʌji' ku yaksik a mok tu tuchi'ten.

A mok ket u yor yete to'

³⁸ A Juan tu nuka ti' a Jesús: ―Wʌjkʌ'si, in wirbo' junturi' ku jarik kisin tu yok'o a winik yete a k'aba', chen tin wati' muj metiko', a ti' mo' tiʌ yete to'.

³⁹ Jesús tu nuka ti': ―Ma' wei'k mu' metik, ka wirik mʌnʌ' mok ku yei'k mo' tsoy ba' ti ten chen u ts'oko u yirik u ye'sa' ti' u muk' K'uj yok'o y k'aba'.

⁴⁰ A mok muj p'aktiko' lʌji' ket u yor yete to'.

⁴¹ Jach taj kin wei'k teche'x, wa mok ku tich'ik teche'x ja' yok'o luch yok'o ten, a teche'x lʌji' u winik a Cristo, a lay a winik jeu' jach ts'aba ti' u bo'ri ti K'uj.

Ma' cheike'x u ts'ek a kʌxtik a k'ebʌn

⁴² »Wa mok ku ts'ek u kʌxtik u si'pi a bex u yʌj chuniktʌ u yaksik tu yor ti ten, más ne tsoy wa ku jich'a u kar yete nukuch tunich, y ku pura' ix peta'.

⁴³ Wa a k'ʌ' lʌji' ku ts'ek a kʌxtik a k'ebʌn, xat'e, más ne tsoy a woko tuku ts'ek a kuxta tak mʌnʌ' a k'ʌ', chen mix tsoy tak yʌn a k'ʌ' y ka bin ix k'ak' tuba a k'ak' muj naj tu'pu tu woro k'in,

⁴⁴ tuba yʌn a nok'oi a muj kimi y mix a k'ak' muj tu'pu tu woro k'in.

⁴⁵ Wa a wok lʌji' ku ts'ek a kʌxtik a k'ebʌn, xat'e, más ne tsoy a woko tuku ts'ek a kuxta tak mʌnʌ' a wok, y ne mo' tsoy tak yʌn a wok chen ti' ka bin ix k'ak' tuba a k'ak' mo' bik u tupa'.

⁴⁶ Tuba yʌn a nok'oi a muj kimi y mix a k'ak' muj tu'pu tu woro k'in.

⁴⁷ Wa wich ku ts'ek a kʌxtik a k'ebʌn, jare, más tsoy a woko tu ku wesintik K'uj a tiʌ kʌ' tak jai' jump'e a wich, chen mo' tsoy tak yʌn tu ka'p'e wich y ka bin ix k'ak',

⁴⁸ tuba yʌn a nok'oi a muj kimi y mix a k'ak' muj tu'pu tu woro k'in.

⁴⁹ »Tu woro binukaj pura u ch'och'i yete k'ak' y tu woro a ba' ka k'ubik binukaj but'a u ch'och'i.

⁵⁰ A ch'och' ne tsoy, chen wa ku luk'u u ch'och'i. ¿Baij ka bin a mete ti u ka ch'och'ta? Ben, tsoykinta bʌje'x bex a ch'och' tsoy, y tsoy a wore'x a kʌjte'x yete a boje'x