San Marcos 7 - Porciones Lacandon-Naha

A ba' ku ts'ek u kʌxtik u si'pi a winik

¹ Taro' tu tiʌ a Jesús u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik a ti' u taro' ix Jerusalén.

² A layo' kaj u yiro' u kʌ'sa winiko' a Jesús u jʌno' y mix tu p'o'o' u k'ʌo', a bex ti' t'ʌro' u metko', lʌji' kaj u tsu'tsus'to'.

³ A u winiko' a judíos a ku ya'batio' fariseos yete tu woro u winiko' a judíos, ku metko' a bex t'ʌro' u metko' u nukio' uchik, mʌnʌ' u jʌno' wa mu yʌj p'o'iko' u k'ʌo'.

⁴ Tuk'in ku suto' u mʌno' u yo'cho' yok'o tu ku naj mʌniko' yo'cho', mʌnʌ' u jʌno' wa muj yʌj p'o'iko' u k'ʌo'. Y yʌn u jer ya'p ba' tu kʌno' ti' u nukio', a lʌji' yʌnti' u p'o'ik u luchi tu ku yuk'o', u kuchi tuku li'sik u yo'ch ja', u kum y u ch'ak tu ku weno' yʌnti' u laj p'o'iko'.

⁵ Lʌji' a u winiko' a judíos a ku ya'batio' fariseos yete a ku kʌ'sko' u t'ʌn K'uj a toj u ts'ibtamʌ a Moisés uchik tu k'ato' ti Jesús: ―¿Biken a kʌ'sa winiko' muj metiko' a bex tu ye'sa' to' ak nuki uchik? ¿Biken muj p'o'iko' u k'ʌo' tuk'in ku bin tu jʌno'?

⁶ Jesús tu nuka tio': ―A teche'x ka metke'x a bʌje'x ne tsoy a tuke'x chen tusaka'e'x, jach taj tu ya'a a profeta Isaías, a tu ts'ipta' bex: “A je' a winiko' jai' yete u chi' ku yei'k tus ku yui'k in t'ʌn, chen toj mo' ten ku tukriken.

⁷ “Ba'wi ku chen k'ujintiken wa muj yui'ko' in t'ʌn, chen u t'ʌn winik ku ye'sik tia winik.”

⁸ A teche'x maj wui'ke'x a tu li'sa u t'ʌn K'uj ti'u a ki' kʌnʌntike'x, toj jari u t'ʌn winik a to'o su'k u metko' a ku p'o'ik u luchi y kuchi tuka but'ke'x a wo'ch ja'e'x. Y ka metke'x u jer ne ya'p ba' a bex a je'.

⁹ Bexi' Jesús tu ya'tio': ―Tia ki metke'x a t'ʌnex ben ta p'ʌte'x a metke'x a tu li'sa' u t'ʌn K'uj a metke'x.

¹⁰ A Moisés tu ya'a uchik: “Yakunte y ue u t'ʌn a tet yete a nʌ' y a mok ku yei'k mo tsoy ba' ti u tet y ti' u nʌ', yʌnti' u kimi.

¹¹ Chen teche'x ka wei'ke'x: Toj jai' ku yei'k junturi' xi'ra ti' u tet y ti' u nʌ': “Mo' bik in wʌntike'x, tu woro a ba' yʌnten lʌji' Corbán (a u nu'ku ku yei'k: «Ti laj k'uba' ti K'uj»),

¹² y bexi' ka wei'ke'x wa tuk'in a mok ku yei'k bex ti' u tet y ti' u nʌ', ya muj ts'ʌra' u pach u yʌntiko'.

¹³ Y bex ya maj metke'x a tu li'sa u t'ʌn K'uj toj jari a t'ʌne'x a teche'x ka kʌ'sik a winik. Y u jer ne ya'p ba' ka metke'x bex a je'.

¹⁴ Pachi a Jesús tu pʌya tu woro a winik a tio' tita y tu ya'tio': ―Ki ue'x a ba' ki wei'k teche'x.

¹⁵ A ba' a ku yoko ti a winik mo' lʌji' ku ts'ek u kʌxtik u k'ebʌn, chen a ba' ku jok'o ti' lʌji' ku ts'ek u kʌxtik u k'ebʌn.

¹⁶ A mok yʌn u xikin ti' u yui'k, u ki ue baij ki wei'k.

¹⁷ Ka tu p'ʌta Jesús a winik y kaj oki ix nʌj, u kʌ'sa winiko' tu k'ato' ti', baij u k'at u yei'k a lay u kʌ'sa a yʌn u jer u nu'ku.

¹⁸ A Jesús tu ya'tio': ―¿Bexi' teche'x ma' ta ki' ue'x baiki u nu'ku a ta wa'a? ¿Yʌn ma' we'x, a to'o ku ts'ek u waysik a winiko' mo' tsoy ti K'uj, mo' lʌji' a ba' ku yoko ti'.

¹⁹ A lay muj yoko yok'o u tuku, toj jari ku bin tu choche y pachi ku bin ix kuxta'? A je' tu ya'a bex Jesús ti u ye'sik a tu woro a o'chi laj ne tsoy.

²⁰ Bexi' tu ya'a: ―A ba' ku yei'k y ku metik a winik lʌji' ku ts'ek u kʌxtik u k'ebʌn.

²¹ Toj yok'o u tuku ku tukrik mo' tsoy ba' a winik, tita ku tukrik u tusik u lak' yete u jer a mo la' u lak', tita ku tukrik u bin tu nʌta tak mʌnʌ' u lak', tita ku tukrik u kinsik u bojo'.

²² Tu tuku ku tukrik u yakrik ba', toj ja'ri' u ne ts'urchʌ, u metik mo' tsoy ba', u ne tus, u laj metik tu woro ba' tak mo tsoy, u k'exta u yor, u yei'k mo' tsoy ba' ti' u bojo', u yui'k u bʌj ne u yue ba' y mix ku yui'k u t'ʌn u jer winik.

²³ Tu woro a mo' tsoy ba' a ku metik a xi'ra, ti' ku jok'o tu tuku y lʌji' ku ts'ek u kʌxtik u k'ebʌn.

Junturi' ch'upra tu k'ata ti a Jesús u ch'ensik u ti'a

²⁴ Lik'i Jesús tu tiʌ ij bini yok'o u lu'mi Tiro lʌiti' u lu'mi Sidón. Kaj k'uchi oki ix jump'e nʌj, u k'at mix mok u yetik wa to' tu tiʌ, chen a winik se'p' tu yeta to' tu tiʌ.

²⁵ Y junturi' ch'upra a lʌji' yʌn u ch'upra u ti'a akʌ' kisin tu yok'o, tu yeta to' tu tiʌ Jesús, toj se'p' tari tu tiʌ Jesús y ka tu yira tu xonkitubʌj tu yok a Jesús.

²⁶ A ch'upra lʌji' griega y mo' judío lʌji' u winki Sirofenicia, y tu p'isubʌj u k'atik ti Jesús ka u jare a kisin a akʌ' ti' u ch'upra u ti'a.

²⁷ Chen Jesús tu ya'ti': ―Cha'e u yʌj jʌnʌ pʌti u ti'o', ka wirik mo' tsoy a takik u yo'ch u ti'o' ti a ts'ekti' a pe'k'o.

²⁸ A ch'upra tu nuka ti' Jesús: ―Taj a ba' ka wei'k Ts'uri, chen tak a pek'o' bexi' ku marik u p'ap'ai a ku jutu a tu ku jʌno' u ti'o' u winki.

²⁹ Jesús tu ya'ti': ―A tu ta wa bex, beje' tsoy a wor a bin, u ch'upra ti'a jok' a kisin ti'.

³⁰ Kaj u'ri ix u yatoch tu yira u ch'upra u ti'a charakba ix u ch'ak y ya mʌnʌ' kisin tu yok'o.

Jesús ku ch'ensik junturi' xi'ra a mo' jak'ʌ u t'ʌn u muj yui'k ba'

³¹ Jesús ka' jok'i tu ka'ten yok'o u lu'mi Tiro kaj u ch'ʌkta u lu'mi Sidón kaj k'uchi tu peta' a Galilea a lʌji' u lu'mi Decápolis.

³² Tita tasa' ti' junturi' xi'ra, a mo' jak'ʌ u t'ʌn y mix ku yui'k ba', a mok tasik tu p'isubʌjo' u k'ato' ti' Jesús ka u tʌrej a mo' uts ti' u ch'ene.

³³ Y Jesús tu bisa a xi'ra tu mʌnʌ' yaj niktik a winik y tita tu but'a u tuch'u' tu xikin y yete u tup' tu baxta u ya'k' a xi'ra,

³⁴ pachi tu nʌ'sa u wich Jesús ix kʌ' y tu ch'a u yik y ka tu ya'ti' a xi'ra: «¡Efata!» (U k'at yei'k: «Je'abʌj»).

³⁵ Toj yayaj laj je'chʌj u xikin y jok' u t'ʌn a xi'ra.

³⁶ Jesús tu ya'tio' a mok tio' tita mu bin yao' ti' mix mok a ba' tu yiro', chen tuku nʌj ei'k bex más a winko' laj bini u jumintiko'.

³⁷ Tu ne tsoy tu yiro' a ba' tu meta Jesús chu'mpʌjo' u yei'ko': «Jach tsoy tu woro a ba' ku metik. ¡A muj jok'o u t'ʌn ku laj ch'ensik y ku ka' jok'o u t'ʌn, a mok mʌkʌ' u xikin ku laj jei'k ti'.»