San Marcos 16 - Porciones Lacandon-Naha

¹ Kaj mʌn u k'ini ku je'sik u bʌjo' a judíos, María Magdalena, ket yete María u nʌ' a Jacobo y Salomé, tu mʌno' a ts'urusta' a ne ki' u bok ti' u cho'iko' tu bʌk'e a Jesús.

² U k'ini u yʌjchuni semana, jach ne ja'ts'ka' tʌn u yʌj tichitʌ a k'ak' a k'in bino' tu mukra a Jesús.

³ Ka tʌn u bino' chu'mpʌjo' u yei'ko' yete u bojo': ―¿Mok ku bin u bʌk'ʌstik ti' to' a tunich a ti' yʌn tu jor a tu muka' a Jesús?

⁴ Chen kaj k'ucho' y ka' tu chʌ'to', tu yiro' ya k'uya' a tunich, y a lay a tunich jach ne nuk.

⁵ Kaj oko' tu but'a u bake Jesús, tu yiro' junturi' xi'ra chijʌntʌ kurukba tu xax a lay a mukra winik y ne sʌk u nok' u tʌkmʌ y chukuch, a kato' ch'upra jak'i u yoro'.

⁶ Chen a xi'ra chijʌntʌ tu ya'tio': ―Mu' jak'a a wore'x, a teche'x tʌn a kʌxtike'x a Jesús a ti' u tar tu kʌjta Nazaret, a mok bʌja' yok'o cruz. A ti' ka lik' tu kuxta, ya mo' tiʌ way, chʌ'te'x a wire tu ta t'ʌkunte'x u bʌk'e.

⁷ Beje' xene'x, a'e'x ti' u kʌ'sa winiko', ket a wei'ke'x ti a Pedro: A Jesús ku bin tu lu'mi Galilea, lʌji' ku bin yʌn pʌti k'uchu, tita ka bin a wire'x a bex tu toj ao' te'x.

⁸ Lʌji' kaj jok'o a ka'to' ch'upra yok'o u mukra winik p'is putsukao', tu ne jak'o u yoro' hasta tʌn u pek u bʌk'eo', y mix mok tu ya'tio' a ba' tu yiro' tu ne jak'o' u yoro'.

Jesús ku ye'sik u bʌj ti' a María Magdalena

⁹ Kaj lik' tu kuxta Jesús, u k'ini u yʌj chuni a semana jach ne ja'ts'ka', A Jesús lʌji' tu yʌj e'subʌj ti' a María Magdalena a mok lʌji' akʌ' ti ka'chik toj siete kisin.

¹⁰ A María bini y tu ya'tio' a mok u yet mʌn uch a Jesús, a lʌjio' tʌn u ne tuko' y ok'ukao'

¹¹ Chen ka tu yuo' u yei'k a María ka' lik' tu kuxta Jesús y lʌji' tu yira, mo' tu ch'ao' u t'ʌn a María.

Jesús ku ye'sik u bʌj ti' ka'to' u kʌ'sa winik

¹² Pachi Jesús tu ye'sa u bʌj ti' ka'to' u kʌ'sa winik a tʌn u bino' tu cho meje kʌjta.

¹³ Y tio' bino' y bexi' tu ya'tio' a yʌno' u bojo', chen bexi' mo' tu ch'ao' u t'ʌno'.

Jesús ku ts'ek u meaj ti' u apóstoles

¹⁴ Pachi, Jesús tu ye'sa u bʌj ti a once u kʌ'sa winiko' tu kurukbʌjo' yok'o u pojche', chen tu k'eyo' tu ne chich u pixʌno' y tu mo' tu ch'ao' u t'ʌno' a mok tu yʌj ao' pʌti tio' a mok tu yʌj ira' a Jesús.

¹⁵ Pachi tu ya'tio': «Xene'x yok'o tu woro u kʌjta a lu'm y tsikbʌte'x u jach tsoyi u t'ʌn K'uj ti' tu woro a winik.

¹⁶ A mok a ku yaksik tu yor y ku but'a ja' ti', jeu taka' ten K'uj, chen a mok muj yaksik tu yor a lay binukaj ts'abati' u bo'tik u si'pi.

¹⁷ A je' ku bij e'sa' ba' ti' a mok ku yaksik tu yor ti' ten: Yok'o in k'aba' ku bin u jaro' kisin a mok akʌ' ti', ku bin t'ʌno' tumen t'ʌn,

¹⁸ yete u k'ʌo' ku bin u chuko' a kʌn y wa ku yuk'iko' yʌk ba' mʌnʌ' u kimo', bexi' binukao' u tʌro' a mok mo' utso' y layo' jeu ch'eno'.»

Jesús ku nʌ'kʌ ix kʌ'

¹⁹ Y ak Ts'uri Jesús, kaj ts'o'k u tsikba yete u kʌ'sa winiko', K'uj tu nʌ'sa ix kʌ' y tij kuraj tu xax.

²⁰ Y tio' jok'o' u tsikbʌto' u t'ʌn K'uj ch'ik tu woro kʌjta, y K'uj tu yʌnto' y bexi' tio' yete tio' tuk'in ne ya'p ba' ne tsoy ku metko' yete u ye'sa' ba' yete u muk' K'uj. Amén.