San Marcos 15 - Porciones Lacandon-Naha

Jesús tiʌ yete a Pilato

¹ Kaj sasi, tu woro u t'ojio' a moko' ku meajo' yok'o u yatoch K'uj y tu woro a jak'ʌ u kucho' ti' u winik Judíos y yete a moko' ku kʌ'sko' u t'ʌn K'uj a to'o u toj ts'ibtamʌ a Moisés uchik y bexi' yete tu woro u ts'urio' a judíos tu biso' k'ʌxʌ' a Jesús y ts'ao' ti' a Pilato.

² A Pilato kaj tu k'ata ti' a Jesús: —¿Tech lʌjiech u Wesi a judíos? Jesús kaj tu nuka ti': —Tech ta wa'a.

³ A u t'ojio' a moko' ku meajo' yok'o u yatoch K'uj tʌn u ne paytiko' a Jesús.

⁴ A Pilato tu ka' k'ata ti' a Jesús: ―¿Mix ba' ka bin a naj nuke? Ka wirik jach pim tʌn u pʌk'ik a pach.

⁵ Chen a Jesús mo' tu naj nuka chichin, lʌji' ka jach u pesa' yor a Pilato.

U ya'ba u kinsa' Jesús ix cruz

⁶ U k'ini tuk'in tʌn u metko' u yo'cho' a lʌji' u k'ini a Pascua, t'ʌrʌ' u siptiko' a to'o u k'ato' a winik junturi' a mok mʌka'.

⁷ Y tiʌ junturi' xi'ra mʌkʌ' u k'aba' Barrabás, mʌkʌ' yete u jero', aj mʌkao' yok'o tuj kinsanʌjo u k'ini tuk'in tʌn u ts'iko' a winik.

⁸ Ij taro' u pimai u kʌjta, chu'mpʌ u k'atko' a bex naj t'ʌrʌ' u yirko' u meta'.

⁹ A Pilato tu nuka tio': ―¿Poch a wirke'x ka in sipte a lʌji' u Wesi a judíos?

¹⁰ A Pilato toj u yue u t'ojio' a moko' ku meajo' yok'o u yatoch K'uj u winiko' judío tu k'uba' Jesús tu k'ex u yoro'.

¹¹ Chen u t'ojio' a moko' ku meajo' yok'o u yatoch K'uj tu kuna u jo'o a winik tiu k'atik u sipta' a Barrabás.

¹² Pilato tu ka' k'ata tio': ¿Baij ka k'ate'x in metik ti' a ka wei'ke'x ti' u Wesi a judíos?

¹³ Tu woro tu nu'ku yete u yaboti ku yei'ko' —¡Bʌje ich cruz!

¹⁴ A Pilato tu ya'a: —A'e'x ten ¿baiki mo' tsoy ba' tu meta? Chen a winiko' más k'ʌ'm abotno' y bex ku yei'ko': —¡Bʌje ich cruz!

¹⁵ A Pilato, poch u tsoykintik u yor a winik bein tu sipta' a Barrabás y chen ts'o'k u jʌts'a' a Jesús yete sum, pachi tu ts'a u bʌja'.

¹⁶ Y u ba'kʌyo' tu biso' a Jesús tu ku nikto' tu woro a ba'kʌi y tu laj much'a tu woro u bojo' a ba'kʌyo'.

¹⁷ Tu tʌko' u nok' bej ts'us, y tu tʌko' yok'o u jo' Jesús a bex ku tʌka tij wes chen a lay menʌ' yete k'i'x.

¹⁸ Chu'mpʌ u yabot tʌn u yei'ko': —¡Ki' kuxrakech u Wesi judíos! Toj jay tʌn u p'astiko'.

¹⁹ Ka u jʌts'o' u jo' Jesús yete che, kaj u tup'a u wich, y tus tu laj xonkunto' u pix ti' Jesús.

²⁰ Kaj ts'ok u kʌxmetko', jita' ti' a u nok' a tu tʌko' ti' y tu ka' ts'a a u nok'i, pachi tu biso' u bʌjo' yok'o a cruz.

Jesús ku bʌja' yok'o cruz

²¹ Ka tʌn u bino', ira' junturi' xi'ra u winki Cirene u k'aba' Simón, a lʌji' u ti'a a Alejandro y a Rufo, a ti' tʌn u sut y tʌn u ka' oko yok'o u kʌjtai, lʌji' ka tʌn u mʌn tita, ts'ʌra' u pach u ch'eik a u che'i a cruz.

²² Bisa' a Jesús yok'o u lu'mi u k'aba' Gólgota, (u nu'ku ku ya'bati': «U lu'mi u Bake Jo'»).

²³ Ts'abti' u yuk'e a Jesús u ya'ri a nukuch ts'us yete mirra, chen Jesús mo' tu yuk'a.

²⁴ Kaj ts'o'ki u bʌja', chu'mpʌjo' u yʌrʌk'tiko' u nok' a Jesús ti u yik mok baij ku bin u ch'ae jujuntu.

²⁵ Kaj bʌja' yok'o cruz a Jesús, nʌ'ki k'in.

²⁶ Yok'o u jo' tu bʌja' a Jesús, nich'kunta' jump'e ba' tu ts'ibʌ' biken bʌja': «A JE' LɅJI' U WESI JUDÍOS.»

²⁷ Bexi' bʌja' yete kato' xi'ra a ku yakra ba', junxet' ti' Jesús bʌja' a juntu y junxet' a juntu.

²⁸ Bex nup'i u k'ini a bex ti' ts'ibʌ' ix u t'ʌn K'uj uch, ku yei'k: “Tij much'a yete a ku yakraba'.

²⁹ A winik a ku mʌn xok'o tita, ku p'astiko' a Jesús y ku pesik u jo'o, ku yei'ko': —¡A ta wa'a a jubik u yaj yatoch K'uj y oxp'e k'in ka kaj laj metik u jer tumen!

³⁰ ¡Takabʌj y emen tuj bʌjech yok'o cruz!

³¹ Bexi' a mok u t'ojio' a moko' ku meajo' yok'o u yatoch K'uj yete a ku kʌ'sko' u t'ʌn K'uj a toj u ts'ibtamʌ a Moisés uchik bexi' yete a winik a judíos a ku ya'bati' fariseos, tʌn p'astiko' a Jesús, bex ku yei'ko': —U jer tu taka' y u bʌji' muj tajkubʌj.

³² ¡A Cristo u Wesi a Israel, ka u ensubʌj tu tiʌ ix cruz y bex je'e ak ch'eik u t'ʌn! Bexi' hasta a mok bʌjao' tu xax laj chu'mpʌjo' u p'astiko' a Jesús.

³³ Kaj k'uchi k'ak' chuk'in, laj ak'ʌ'chʌ tu woro u lu'm, ka' sasichʌ hasta ka tʌn ts'arkubʌ k'in.

³⁴ Ka tʌn u ts'arkubʌj k'in, Jesús abotnʌj y bex tu ya'a: «Eloí, Eloí, ¿lamá sabactani?» (A je' u nu'ku ku yei'k: «In K'uj, in K'uj, ¿biken ta p'ʌten?»)

³⁵ Ka tu yuo' u t'ʌn a Jesús a mok tio' tita, tu yao': A Elías ku t'ʌnik.

³⁶ Toj se'p' junturi' tu k'ʌna u yaka' y tu ch'a nok' y tu ch'ura yete u ya'ri a vinagre y tu tʌka yok'o che, ka tu nʌsa' tiu ts'ek u yuk'e a Jesús, y tʌn u yei'ko': P'ʌte, kak ire wa a Elías ku tar u yense tu tiʌ ix cruz.

³⁷ Chen Jesús ne k'ʌ'm abotnʌj ij lʌji' kaj kimi.

³⁸ Lʌji' kaj jati ka' xot' ch'ik kʌnʌ y kaba y yaj nok'i au yatoch K'uj.

³⁹ U ts'uri a ba'kʌi a tiʌ ʌkʌtʌn tu bʌjʌ' a Jesús, ka tu yira ts'o'k u kimi a ten bik a je', kaj u ya'a: ―A je' a xi'ra jach lʌji' ka'chik u Ti'a K'uj.

⁴⁰ Bexi' tio' tita ne pim ch'upra tʌn u chʌntko' baij ku mʌn, a lʌji' tiʌ a María Magdalena, a María u nʌ' a Jacobo a its'inbi y lʌji' u nʌ' bexi' a José y bexi' tiʌ tita a Salomé.

⁴¹ A je' a ch'uprao' lʌjio' a tu t'u'ro' a Jesús y bexi' tu yʌnto' tuk'in a Jesús tiʌ ix Galilea, y bexi' ch'ik pim winik tio' tita a to'o nʌ'ko' yete ix Jerusalén uchik.

Jesús ku muka' yok'o jabʌn tunich

⁴² Kaj ak'ʌ'chʌ, tʌn u yutskinta' a ba' lʌji' tʌn uj bij oko u k'ini u je'sik u bʌjo' a judíos.

⁴³ Tari junturi' xi'ra a u k'aba' José a lʌji' u ts'urio' u winiko' judío, a lʌji' bexi' ku ch'uktik tu ku wesintik K'uj a tiʌ kʌ', a je' a xi'ra tu jach chichkinta u yor ij bini tu tiʌ a Pilato y tu k'ata u bʌk'e a Jesús.

⁴⁴ A Pilato, jach peknʌ u yor tu tu yua ya kimi a Jesús, lʌji' ka tu tuchi'taj t'ʌn ti u jach ts'uri a ba'kʌi u winiko' romano, kaj u k'ata ti' wa jach to jay kimi a Jesús.

⁴⁵ Kaj yua yei'k a u ts'uri u ba'kʌi jach kimi a Jesús, lʌji' ka tu ts'a u bʌk'e ti' a José.

⁴⁶ Ka tu ch'a a José u bʌk'e a Jesús, tu mʌna jump'eri' nok' a ne tsoy y yete a lay a nok', tu tap'a y tu chakinta u bʌk'e yok'o jump'e u jor u mukra winik a to'o pʌna' yok'o woro tunich, pachi tu bʌk'ʌsta yok'o u jor tuku muka' winik yete ne nukuch tunich.

⁴⁷ Y tita tiʌ a María Magdalena y bexi' a juntu a María a lʌji' u nʌ' a José, tʌn u chʌ'ntko' to' tuku but'a u bʌk'e a Jesús.