San Marcos 14 - Porciones Lacandon-Naha

U muk'yaj, u kimi y u ka' lik'i tu ka' kuxta ( 14.1—16.20 ) U katik u yoro' ti u chujko' a Jesús

¹ Ka'p'e k'in ti u meta u k'ini a Pascua, bexi' aj pʌn a mʌnʌ' u ts'aki ti' u si't'i; y u t'ojio' a moko' ku meajo' yok'o u yatoch K'uj yete a ku kʌ'sa u t'ʌn K'uj a toj u ts'ibtamʌ a Moisés uchik tʌn u kʌxko' bik u chujko' a Jesús yete tus y ti' u kinsik.

² Mʌnʌ' ak chukik tuk'in tʌn u jʌno' ti muj lik'o ts'ikta a winiko'.

Jesús bʌka tia a ba' jabon a ki' u bok ix Betania

³ Ti' yʌn Jesús ix u kʌjta Betania, ti' yʌn tu yatoch Simón a yʌnti' k'ak'i tu yok'o, tari ti' junturi' ch'upra, u tasmʌ perfume a bex a ne ko'o u bo'ri a u k'aba' alabastro, y tu bʌka yok'o u jo' a Jesús a kurukba yok'o pojche'.

⁴ Yʌn jun yʌrʌ' a ti' yʌno', ka tu yao': ―¿Biken ta kʌx meta a lay a perfume?

⁵ A je', ja' a kanik ka'chik ne ko'o u bo'ri trescientos y yete u bo'ri ka k'ʌnik ti'a wʌntik a mok mʌnʌ' u tak'in. Ij chu'mpʌjo' u tsutsustiko' a ch'upra.

⁶ Chen Jesús tu ya'a: —Xure'x a kʌxmetke'x; ¿Biken ka kʌxmetik a je' ch'upra? Ti' ne tsoy ba' tu meta ten.

⁷ Tu woro a mʌnʌ' u tak'in bi a wire'x tu woro k'in, y je'e a metke'x tsoy ba' ti lara u k'ini, chen a ten mʌnʌ' a woro iken ti'en.

⁸ A je' tu meta a baij k'uchʌ' u muk' u metik, tuk'in ka tu bʌka a ba' jabon a ne ki' u bok a bex a ne ko'o u bo'ri yok'o ten, lʌji' tu toj meta tuku bin muken.

⁹ Jach taj kin wei'k teche'x, tuku tsikbʌta' u jach tsoyi u t'ʌn K'uj ch'ik tu woro a lu'm, bexi' je'e u tsikbʌta baij tu meta a je' a ch'upra ti' u k'asa'.

Judas ku k'ubik Jesús

¹⁰ Lʌiti' u apóstol a Jesús, a u k'aba' Judas Iscariote, bini yok'o u t'ojio' a moko' ku meajo' yok'o u yatoch K'uj ti' u k'ubik a Jesús.

¹¹ A tio' ka tu yuo' jach tsoyji u yoro', la'jen tu yao' je' u bo'ta' tu ku k'uba Jesús. Y tu jach ts'a u t'ʌn a Judas, u kʌxtik bik u ts'ek ti'o'.

U ts'ok u jʌnʌ a Jesús yete u kʌ'sa winik

¹² U yʌj chuni u k'ini kaj chu'mpʌ u jʌno' u yo'cho' a judíos a u k'ini a Pascua, a tuk'in ku kinsik aj choj me', taro' u kʌ'sa winik a Jesús u k'ato' ti' Jesús, tu yao': —¿Tuba a k'at in metko' a o'chi ti a lʌji' u k'ini a Pascua?

¹³ Jesús tu tuchi'ta kato' u kʌ'sa winik y tu ya'tio': —Ka bij oke'x ix u kʌjta, je' a wike'x junturi' xi'ra, kuchmʌ u chuji u yo'ch ja' t'ure'x u pach.

¹⁴ Y tu ku yoko a'e ti' u t'oji a nʌj: A wʌjkʌ'si tu ya'a: ¿Ix a watoch to bay ka bin a mʌjʌnte ti' ʌk jʌno' yete in kʌ'sa winiko' ti' u k'ini a Pascua?

¹⁵ Y ku bin ye'sik teche'x junxot' u yatoch, toj ki utskintʌ'; tita ka metke'x tu woro ba'.

¹⁶ Bino' u kʌ'sa winiko' Jesús, kaj tu yiro', a bex Jesús tu ya'tio', ka chu'mpʌ u metko' a o'chi ti' u k'ini a Pascua.

¹⁷ Kaj ak'ʌ'chʌ tari Jesús yete a doce u apóstoles.

¹⁸ Ka kurukbo' yok'o pojche' tʌn u jʌno' Jesús tu ya'tio': Jach taj kin wei'k teche'x, tiʌ junturi' yok'o teche'x bi u k'uben.

¹⁹ Y nej tu tukrubʌjo', y chu'mpʌjo' jujuntu jujuntu u k'atko' ti' Jesús: —¿Ts'uri yʌ ten? Y juntu ku k'atik: —¿Ts'uri yʌ ten?

²⁰ Jesús tu nuka tio': —Lʌji' a tiʌ yok'o a doce apóstoles, a mok ket tu but'a u k'ʌ' yok'o a lʌk tu ki jʌnʌ, lʌji' a lay a ku bin u k'uben.

²¹ U t'ʌn a K'uj ku ki ei'k baij ku bin meta' ti'u Ti'a Xi'ra, chen ¡jach yaj ba' ku bin u yue a lay a xi'ra a ku bin u k'ube u Ti'a Xi'ra! Más tsoy ti' wo mo' naj sijik ka'chik.

²² Tʌn u jʌno', Jesús tu chuka' jump'eri' pʌn y tu ya'a, baij tech K'uj, pachi tu p'uya tio' u kʌ'sa winik, y tu ya'a: —Chuke'x y jʌnte'x, a je' lʌji' in bʌk'e.

²³ Pachi tu mʌcha jump'eri' luch yete u yʌki a menʌ' u ya'ri nukuch ts'us (uva) y tu ya'a: baij tech K'uj, pachi tu mʌsa ti u kʌ'sa winik y tu woro tu laj uk'o'.

²⁴ Y tu ya'a: A je' lʌji' in k'ik'e a ti' u ts'ek tumen u kataor, a je' a k'ik'e lʌji' ti u sa'sa' ne ya'p u si'pi a winik.

²⁵ Jach taj kin wei'k teche'x, mʌnʌ' a yʌn ka uk'ik u k'ʌ' u wich nukuch ts'us hasta u k'ini ki bin u wuk'e u tumen u ya'ri ts'us yok'o tu ku wesintik K'uj a tiʌ kʌ'.

Jesús ku yei'k ti a Pedro bik ku bin u ya'e mu' k'omʌ

²⁶ Kaj ts'o'k u k'ʌyko' jump'eri' himno, jok'o ij bino' ix u witsi Olivos.

²⁷ Jesús tu ya'tio': Tu woro a teche'x bin a p'ʌtene'x a beje' ak'bi, bex ts'ibʌ' yok'o u t'ʌn K'uj ku yei'k: Bin in kinse a pastor, y uj me' bi u laj k'itubʌj.

²⁸ Chen ka lik'ken tin ka' kuxta, bi in ka much'e'x ix Galilea.

²⁹ Pedro tu ya'a: ―Tak tu woro ku laj p'ʌtikech, a ten mʌnʌ'.

³⁰ Jesús tu ya'ti' Pedro: —Jach toj tu jay kin wei'k tech, mo' toj k'ainʌ'k u ka wʌts' aj t'er beje' ak'bi, tech oxp'e wʌts' ka bin a wei'k ma' a k'ʌ'omen.

³¹ Chen a Pedro tu p'isubʌj u yei'k: tak yʌnti' in kimi yete tech, mʌnʌ' in wei'k mi' in k'o'muech. Bexi' tu yao' tu woro a yʌno' u kʌ'sa winik.

Jesús ku t'ʌnik K'uj ix Getsemaní

³² Pachi bini Jesús yete u kʌ'sa winiko' ix jump'e lu'm u k'aba' Getsemaní, ka tu ya'ti' u kʌ'sa winiko': ―Kurene'x wai, y ten binika' in t'ʌne K'uj.

³³ Tu pʌya tu pach a Pedro yete Jacobo yete Juan, y jach chu'mpʌ u ne tukrik u bʌj y yui'k u bʌj ne yaj u pixʌn.

³⁴ Kaj u ya'tio': ―Ne mo' tsoy in wor, ki wui'k in bʌj binikaj kimi, p'atene'x way y muk'te'x wene.

³⁵ Bini Jesús más tataj y tu xonkitubʌj hasta emi u chi' pʌm ix lu'm y tu t'ʌna K'uj, bex tu ya'a: In Tet, wa yʌn bik ma' cheik in mʌsik a je' a ba' a ki bin in mʌse.

³⁶ Jesús tʌn yei'k bex: «In Tetech K'uj, tech k'ucha' a muk' a laj metik tu woro a ba', luk'se a je' in muk'yaj a ku bin tar ten, chen ma' metik a baiki in k'at a ten, lʌji' a metik a to'o a tech a k'at.»

³⁷ Pachi suti tuj p'atij a oxto' u kʌ'sa winik, y tu yira wenukao', tu ya'a ti a Pedro: ¿Tʌn a wene'x? ¿Mix taj naj muk'te'x a wene'x jump'e hora yete ten?

³⁸ Muk'te'x a wene'x y t'ʌnex K'uj, ti' u chixta a muk'e'x ti a muk'tik a baij ku tar ti' teche'x. A pixane'x u k'at, chen a bʌk'e mu chich u muk'.

³⁹ Jesús ka' bini u ka t'ʌne K'uj, tu ka a'a u lʌiti' a ba'.

⁴⁰ Kaj ka sut Jesús tuj p'atij a oxto' u kʌ'sa winik, tu ka' iraj wenukao', tu nej tak u weno' y mu' yeo' bik u nujko'.

⁴¹ Pachi y yox wʌts' ka' sut tu tio' a u kʌ'sa winik y tu ya'a tio': —¿Xuy a wene'x y a je'sik a bʌje'x? ¡Lik'ene'x! Beje' yaj k'uchi u k'ini a ku bin k'uba' u Ti'a Xi'ra ti a mok ne yʌn u k'ebo'.

⁴² Lik'ene'x, ko'xe'x, tʌn u xok'o a mok ku bin u k'uben.

Kaj chuka' a Jesús

⁴³ Tʌn u yʌj t'ʌn a Jesús, tari a Judas a lʌji' laj ket xaka a yʌn doce u apóstoles a Jesús u yet tar yete ne pim winik yete u maska' y che', tuchibi ti' u t'ojio' a moko' ku meajo' yok'o u yatoch K'uj y yete a mok jak'ʌ u kuch ti' u winik a judíos.

⁴⁴ A Judas a mok ku bin u k'ubik a Jesús, tu toj ki a'a tio' a winik bik ku bin u k'oo'tik mok ku bin chuko', tu ya'a tio': A mok a wirke'x in ts'uts'ik u p'uk', lʌji' kaj chujke'x.

⁴⁵ Judas xok'i ti Jesús y tu ya'ti': —¡Wʌjkʌ'si, Wʌjkʌ'si! Y tu ts'u'ts'a u p'uk'.

⁴⁶ Lʌji' ka tu pura u k'ʌo' u chuko' a Jesús.

⁴⁷ Chen junturi' a mok u yet mʌn a Jesús, tu jara u maska' y tu xat'a u xikin junturi' u k'ʌni' a u jach t'oji a mok ku meaj yok'o u yatoch K'uj.

⁴⁸ Jesús tu k'ata tio': —¿Biken tare'x a chuken yete a maska' y yete a che' p'is bex a chujke'x a ku yakra ba'?

⁴⁹ Tu woro k'in ki kuta ti kʌ'sa ix u yaj yatoch K'uj y maj chukene'x, tu woro a je' ba' ku mʌn lʌji' ti' u metchʌ a bex ts'ibʌ' yok'o u t'ʌn K'uj.

⁵⁰ Tu woro u kʌ'sa winik a Jesús puts'o' y tu p'ʌto' a Jesús.

A chijʌntʌ aj puts'i

⁵¹ Junturi' chijʌntʌ xi'ra tʌn u t'urik a Jesús jai' tap'ʌ' yete tep' y chuka.

⁵² Chen a ti tu p'ʌta u tep', ij puts'i mix k'ʌs u nok'.

Jesús ix u jach ts'urio' u winiko' judío

⁵³ A mok tu chuko' a Jesús, tu biso' a Jesús ix u yatoch u jach t'oji a mok ku meaj yok'o u yatoch K'uj tu laj much'a u bʌjo' u t'ojio' a moko' ku meajo' yok'o u yatoch K'uj, bexi' a mok ku kʌ'sa u t'ʌn K'uj a toj u ts'ibtamʌ a Moisés uchik y yete a jak'ʌ u kucho' ti' u winik a judíos.

⁵⁴ Chen Pedro tʌn t'urik u pach Jesús hasta kaj k'uchi yok'o u xur u palacio a u jach t'oji a mok ku meaj yok'o u yatoch K'uj. Tij kuraji tu k'ich tu t'ʌbʌ' a k'ak' yete a ba'kʌi a mok lʌji' kʌnʌntik u yaj yatoch K'uj.

⁵⁵ U t'ojio' a moko' ku meajo' yok'o u yatoch K'uj yete a nuxio' u winik a judíos y tu woro a mok u much'ik u bojo' yok'o a nʌj, tʌn kʌxko' bik u paytiko' a Jesús, ti li'sa' t'ʌn u kinsa' y mo' tu yiro' ba' ti u pʌk'ik u pach a Jesús.

⁵⁶ Tak ne pim tu pʌyo' u bojo' ti u tus ei'ko' ba' ti Jesús, chen toj mo' ket u yoro' a baij ku yei'ko'.

⁵⁷ Ya u ts'ok taro' xi'ra tiu yei'k ba' tiu pʌk'ik u pach a Jesús, ku yei'ko':

⁵⁸ ―Teno' ti wu'a u yei'k a je' a xi'ra bex: Ten je'e in laj jubik a u yatoch K'uj, y oxp'e k'in kin ka laj metik y mo' winik tu meta.

⁵⁹ Chen mʌnʌ' u yiriko' bik u pʌk'ik u pach.

⁶⁰ Y lik'i ch'ikta a u jach t'oji a mok ku meaj yok'o u yatoch K'uj, y tu k'ata ti Jesús: ¿Biken mix ba' ka nukik? ¿Baiki a je' a ba' ku ya'ba tech?

⁶¹ Chen a Jesús mu naj nuka, u jach t'oji a mok ku meaj yok'o u yatoch K'uj, tu k'ata ti' a Jesús: ¿Wa tech lʌji' a Cristo a u Ti'a K'uj a tu woro ku k'ujintiko'?

⁶² Jesús tu nuka: Tenen, bi a wire'x u Ti'a Xi'ra kurukba yok'o u xax a K'uj a ne chich u muk' tʌn u tar yok'o u muyaj ix kʌ'.

⁶³ U jach t'oji a mok ku meaj yok'o u yatoch K'uj tu jʌta u nok' tiu ye'sik ne mo tsoy tu yua baij tu ya'a Jesús y tu ya'a: ¿Ba'wi kaj kʌxtik u jer mok ku yei'k baij mo' tsoy tu meta a je' xi'ra?

⁶⁴ Teche'x ta wue'x baiki mo' tsoy ba' tu ya'a ti K'uj. ¿Bik a wike'x teche'x? Tu woro tu kato' u yoro' lʌji' yʌn u si'pi y yʌnti' u kimi.

⁶⁵ Y tax jujuntu chu'mpʌjo' u tup'ik u wich a Jesús, u jʌts'ik y tax jujuntu tu tap'a u wich a Jesús, y tu yao' ti': —A'e mok tu jʌts'ech. Y a ba'kʌi a ku kʌnʌntik u ya yatoch K'uj tu jʌts'o' ich u wich.

Pedro ku yei'k mu' k'omʌ moki Jesús

⁶⁶ Kurukba Pedro tu xur a palacio, xok'i ti' junturi' ch'upra a ku k'ʌnik u jach t'oji a mok ku meaj yok'o u yatoch K'uj.

⁶⁷ Ka tu yira a Pedro tʌn u k'ich, a lay a ch'upra tu ya'a ti a Pedro: Tech bexi' a wet mʌn a Jesús a lʌji' u winki Nazaret.

⁶⁸ Chen a Pedro tu ya'a: —Mi' in k'o'mo' a Jesús y mix in we baij ka wei'k tech. Pachi bini yok'o u jor u nʌji, y lʌji' kaj k'ainʌ aj t'er.

⁶⁹ Tuba a ch'upra tu ka iraj y tu ya'a ti a mok nikʌ' tita: A je' a xi'ra bexi' u yet mʌn a Jesús.

⁷⁰ Chen a Pedro tu ka a'a mo jach to jai' y jer mo' sʌmʌk a mok tio' tita tu ka' ao' ti a Pedro: A tech jach lʌjiech a mok u yet mʌn a Jesús y tu bexi' tech lʌjiech u winki Galilea y a tech bexi' ka a t'ʌn bex ku t'ʌno' tio'.

⁷¹ Pedro chu'mpʌ u más chich ei'k: —¡Ten mi' k'o'mʌ a je' a xi'ra a mok ka wei'k ten!.

⁷² Aj t'er k'ainʌ ka wʌts', chen a Pedro lʌji' kaj k'aj ti' u t'ʌn a Jesús a ba' tu ya'a ti: «Mo' te' k'ainʌ'k u ka' wʌts' aj t'er, tech ka bin a wae ma' k'o'muen oxp'e wʌts'.» Y lʌji' kaj u tukrubʌj yok'o a je' ij chu'mpʌ u yok'o.