San Marcos 13 - Porciones Lacandon-Naha

Jesús ku yei'k bik ku bij jubu u yatoch K'uj

¹ Kaj jok'i Jesús yok'o u yaj yatoch K'uj, tu ya'a junturi' u kʌ'sa winik: Wʌjkʌ'si, chʌ'te ba' tunichi y ba' nukuch nʌj.

² Jesús tu nuka ti': —¿Ka wike'x tu woro a je' a nukuch nʌj? Jach taj kin wei'k teche'x, mʌnʌ' u nʌj p'ata kuta jump'e tunich, toj tu woro binukaj laj juba'.

U ye'sa ba' tuk'in mo' yʌj k'uchuk tu k'ini u xu' t'ʌn

³ Pachi bini yok'o u wits'i Olivos, Jesús kuraj tita xok'o yok'o u yatoch K'uj. Y a Pedro, Jacobo, Juan y Andrés tu k'ato' ti' a Jesús:

⁴ Aeto' ¿Tuk'in ku bin mʌn a je' ka wei'k? ¿Y baij ku bin e'sa' ba' tuk'in xok'ok mʌn a je' a ba' a ta wa'a?

⁵ Jesús tu nuka tio', chu'mpʌ u yei'k: «ki chʌ'te mix mok u tuske'x.

⁶ Binukaj tar ne pim ku bin u k'ʌne in k'aba', ku bin u yao': A ten lʌjien a Cristo, y jach ne pim winik ku bin u tuse.

⁷ »Tuk'in ka' wue'x ne ya'p ts'iki ch'ik u jer kʌjta y bexi' ka wui'ke'x ku jumintiko' tʌn u bin u chu'so' u ts'iko'; chen ma' sʌjtike'x, yʌn ti' u laj mʌn tu woro a je' ba', chen mo' lʌji' ti' u xu' t'ʌn.

⁸ Binukaj lik'i tu ts'iki kʌjta yete u jer kʌjta, binukaj tar wi'ji, y ne pim kʌjta ku bin pek a lu'm. Chen tu woro a je' ba' ku bin mʌn, lʌji' u yʌj chuni ku bin u yue ne yaj a winiko'.

⁹ »Ki kʌnʌnta bʌje'x, bexi' turu laj k'upke'x ti a jak'o u kuch, y yok'o u nʌji tuku much'ik u bʌjo' a judíos u xake u t'ʌn K'uj, ku bin u jʌts'e'x. Bexi' ku laj bin u pure'x ti u ts'uri a lu'm y bexi' ti u wesi, che yok'o ten ka laj bin pure'x ti y bex ka bin a tsikbʌte a baij ti meta.

¹⁰ A mo' yʌ k'uchuk u xu' t'ʌn, yʌnti' u laj kʌ'sa' u jach tsoyi u t'ʌn K'uj ch'ik tu woro u kʌjta lu'm.

¹¹ Y tuk'in ka' u k'ube'x ti a mok jak'o u kuch, ma' sʌjtike'x a t'ʌnex o baij ka bin a wa'ex ti, chen K'uj ku bin u ts'ate'x a ba' bik u nuko' ka bin a wa'ex ti. Jach taj kin wei'k teche'x, mo teche'x ka bi t'ʌnex, a ku bij tʌn lʌji' u Pixʌn K'uj yok'o teche'x.

¹² Y u bojo' ku bin u ts'ae u kinsa' u ka wʌsʌk' bojo', y a tet u wʌsʌk' ti'a; y u ti'a ku ka' bij lik'i ti' u kʌxmetik u tet y bexi' ku bin u kinse.

¹³ Tura a laj p'akte'x ti tu woro winik, chen yok'o ten; chen a mok ku jach muk'tik u ki metik u t'ʌn a K'uj turu u laj ts'oko tu woro a ba' a lay jeu bin ix kʌ'.

¹⁴ »A mok ku xakik a je' a t'ʌn u ki ue bik taba a baij tu ts'ibta uchik a Daniel a lʌji' profeta, ti' tu ya'a, tuk'in ka wire'x a meta ne mo tsoy ba' yok'o u yaj yatoch K'uj a tu' mo' tsoy u mʌn tita, a mok tiʌ ix u kʌjta Judea, ka puts'uk ix a wits.

¹⁵ A mok tiʌ ix u jo' u yatoch, mu yeme ix u yatoch y mix u ch'ae u ba' a tiʌ ichi ix yatoch.

¹⁶ Y a mok tiʌ tu meaj ix u kor, mu sut u ch'ae u nok' ix yatoch

¹⁷ ¡Jach otsi a ch'uprao' a mok mo uts'k'inti' y a mok yʌnti' u ti'a u yʌj chu'chʌntʌ a lay u k'inio'!

¹⁸ T'ʌne'x K'uj ti a lay u k'ini ka puts'ke'x mo' u k'in sisi.

¹⁹ A lay u k'ini, jach ne ya'p yaj ba' ku bin u yue a winiko' a bex mo' nʌj mʌnʌ' toj ka tu meta a lu'm K'uj hasta beje' y mʌnʌ' u yʌ mʌn pachi.

²⁰ Wa K'uj mu' komkintik a lay u k'inio', mix mok ku bin ix kʌ', chen yok'o u winik a to' tu tejta, lʌji' ben tu komkita a lay u k'ini.

²¹ »Wa mok ku yei'k teche'x: Ire'x way tiʌ a Cristo, o ire'x tiʌ te', ma' ch'eike'x u t'ʌn.

²² Binukaj lik'i a winiko' a mok ku tus ei'ko' lʌji' a Cristo, y juntu ku yei'k lʌjio' a profetas, y bi u ye'so' ne ya'p ba' ix kʌ' y bi u meto' ne ya'p tsoy ba', to jai' ti' u tusik a winik, bexi' bi u tunte u tusik a mok toj ya tejta ten K'uj.

²³ ¡Ki' kʌnʌnte'x a bʌje'x! In toj ki' a'ba teche'x baij ku bin mʌn.

Tuk'in ka' sutuk u Ti'a Xi'ra

²⁴ »Chen a layo' u k'ini ka' ts'o'kok u yui'k yaj ba' a winik a lay u k'ini, a k'in binukaj ak'ʌ'chʌ, y aknʌ' binukaj ts'oko u tichk'a,

²⁵ a ba'kʌo' binukaj laj juto', tu woro a ne nuk ba' a tiʌ ix kʌ' binukaj laj pesa'.

²⁶ Bin a wire'x u Ti'a Xi'ra u tar ix k'ʌ' yok'o muyaj, yete tu woro u muk' y yete jach k'ux tsoy u sasiri.

²⁷ Bi u tuchi'te pim a ángeles a ch'ik tu woro lu'm y ch'ik tu xur a kʌ', ti u laj much'ik tu woro a winik a to' toj u tejtamʌ.

²⁸ »Ki kʌne'x a bex kʌ'sa a yʌn u jer u nu'ku yok'o a che' u k'aba' higuera: tuk'in ka wire'x ku jok'o u muni u k'ʌ' y ku chu'mpʌ u jok'o u le', ka wike'x nej taki u yoko chʌkʌr k'in.

²⁹ Bexi' ka' wire'x u mʌn tu woro a ba' a ti tsikbʌta, ete'x nej taki u ka sut u Ti'a Xi'ra.

³⁰ Jach taj kin wei'k teche'x, yʌnti' u yʌ mʌn pʌten a je' ba' a tin tsikbʌta, tu mo' yaj kimik a je' a winiko' kuxo' beje'.

³¹ Tu woro a kʌ' y tu woro a lu'm ku bin ts'oko', chen in t'ʌn mʌnʌ' u ts'oko.

³² »Chen a lay u k'ini mix mok u yej, mix a ángeles a tiʌ kʌ', mix u Ti'a K'uj, toj jari ak Tet.

³³ »Ki ch'ukte'x tu woro k'in, ma' wene'x, t'ʌne'x K'uj: tu ma' a we'x tuk'in ku bij k'uchu u k'ini.

³⁴ Bex bix a tiʌ junturi' xi'ra binukaj tu jer ne nʌch kʌjta, chen tu yʌj ts'ati' u winik u kʌnʌnta u yatoch u ki irik, y tu woro tu ya'ti' to baij ku bin u mete y a mok ku kʌnʌntik u jor tu ya'ti' u ki kʌnʌntik y a u kʌnʌntik u yatoch.

³⁵ Ki' ch'ukte'x tu woro k'in, ire ma' a we'ex tuk'in ka bin tak u jach Ts'uri a nʌj, wa ojk'in ku yu', wa ix chumuk ak'bi ku yu', wa ix ti' ku yu' tuk'in ku k'ay aj t'er, wo ja'ts'ka' ku yu',

³⁶ ti tuk'in ku yu' muj yirike'x wenaka'e'x.

³⁷ A ba' kin wei'k teche'x, kin wei'k ti' tu woro mok: ¡Ki' p'ire'x a wiche'x!»