San Marcos 10 - Porciones Lacandon-Naha

Jesús ku kʌ'sik mo' tsoy u p'ʌtik u lak'

¹ Lik'i tita ij bini to' u lu'mi Judea y yok'o u lu'mi a tiʌ tʌjʌn ti' Jordán; y ka' chu'mpʌ u much'ik u bʌjo' a winiko' y Jesús ka' kʌ'sʌnʌj bex ku nʌj kʌ'sa.

² Kaj k'ucho' u winiko' a judíos a ku ya'batio' fariseos yiknʌ Jesús, ti' u tuntiko' u yor a Jesús, tu k'ato' ti', si wa tsoy a xi'ra u p'ʌtik u lak'.

³ A Jesús tu nuka tio': —¿Baij tu tuchi'ta a metke'x a Moisés?

⁴ Tio' tu nuko': ―A Moisés tu ch'a u p'ʌtik u lak' a xi'ra toj jai' yʌnti' u ts'ibtik u juni' tuku p'ʌtik.

⁵ Kaj u nuka a Jesús: ―Tu mo' tsoy a pixʌne'x, pixʌne'x ben a Moisés tu li'sa t'ʌn u meta a je'.

⁶ Chen u yʌj chuni kaj meta' tu woro a ba', K'uj tu meta xi'ra y ch'upra.

⁷ “Ben a xi'ra biu p'ʌte u tet yete u nʌ' y binuka' u much'e u bʌj yete u lak'.

⁸ Y tu ka'to' ku bij waya p'is jai' jump'eri' winik, y ya mo' ka'to' bex uchik, toj jai' junturi' winik ku wayo'.

⁹ Ben a to K'uj tu much'a, a winiko' mo' bik u ts'ek u p'ʌtik u bʌjo'.

¹⁰ Kaj u'ro' ix nʌj, u kʌ'sa winiko' a Jesús tu ka' k'ato' ti' a Jesús a lʌiti' a tu tsikbʌta sʌn.

¹¹ Y a Jesús tu ya'tio': ―Wa mok ku p'ʌtik u lak' y ku ka' bin u ch'eik u jer, a lay tu kʌxta u k'ebʌn, tu tu ch'a u jer a lay tʌn u tusik u jach nʌj lak',

¹² Wa la' ch'upra ku p'ʌtik u lak' ti' u bin u ch'eik u jer, a lay tu kʌxta u k'ebʌn.

Jesús ku yei'k tsoy ba' ti'a cho mejeno'

¹³ Tasa' ti' Jesús mo ne pim cho mejen ti u tʌrik, chen u kʌ'sa winiko' a Jesús tu k'eyo' a mok tu tasa a cho mejeno'.

¹⁴ Ts'ikchʌ a Jesús ka tu yira baij ku metko' u kʌ'sa winiko', y tu ya'tio': ―Chae'x u tar a cho mejeno' tin wiknʌ, ma' wei'k tio' mu' taro', ki wei'k teche'x tu ku wesintik K'uj a tiʌ kʌ' lʌji' ku bin oko' a bex a cho mejeno'.

¹⁵ Jach taj kin wei'k teche'x, wa mok muj yui'k u t'ʌn tu ku wesintik K'uj a tiʌ kʌ' a bex a cho mejeno', a lay muj bij oko yok'o tu ku wesintik K'uj a tiʌ kʌ'.

¹⁶ Jesús tu mek'a a cho mejeno' y tu tʌk'a u k'ʌ' tio' y tu k'ata ka ʌntak ti' K'uj.

Junturi' xi'ra ne yʌn u tak'in ku t'ʌn yete Jesús

¹⁷ A lay u k'ini tuk'in tʌn u bin Jesús tu jer lu'm, tari junturi' xi'ra ti Jesús y tu xonkitubʌj ti Jesús y tu k'ata ti': ―Wʌjkʌ'si, a tech ne tsoy a tuku, ¿a'e ten baiki in metik ti' u ts'aba in kuxta y mʌnʌ' y yʌn kimi?

¹⁸ Jesús tu nuka ti': ―¿Biken ka wei'kten a ten ne tsoy in tuku? Mʌnʌ' mok a ne tsoy u tuku, chen jari K'uj jach tsoy u tuku.

¹⁹ Tech a we a tu li'sa u t'ʌn K'uj a tu tsi'bta uch a Moisés ku yei'k: “Ma' tusik a lak' yete u jer; ma' kinsik winik, ma' wakrik ba', ma' paytik a bojo', ma' tusik a bojo', yakunte y ue u t'ʌn a tet yete a nʌ'”

²⁰ A xi'ra tu nuka ti' Jesús: ―Wʌjkʌ'si, tu woro a je' ka wei'k, toj chijʌnten uch ka tin toj chu'sa in metik.

²¹ Jesús tu chʌ'ta a xi'ra y tu yakinta y tu ya'ti': ―Yʌn u jer a ba' ma' a mete: Laj kane tu woro a ba' a yʌntech, y xen laj jʌtse ti' a mok mʌnʌ' u tak'in, y ki wei'k tech, jach ko'o a ba' ku bin u sijik tech K'uj ix kʌ', pachi ka tar tin pach y bexi' ch'ae a cruz.

²² Ka tu yua a xi'ra u ya'bati' bex, bini mo tsoy u yor, tu nen ts'ur y ne yʌn u ba'.

²³ Jesús tu pʌktaj tu woro a mok tio' tita y tu ya'ti' u kʌ'sa winiko': ―Jach ne omo' ku bu yue u yoko a mok ne yʌn u tak'in ix tu ku wesintik K'uj a tiʌ kʌ'!

²⁴ Ne pekno' u yoro' u kʌ'sa winiko' a Jesús ka tu yua u tsikba bex a Jesús, chen a Jesús tu ka' a'a tio': ―In ti'e'x, ¡jach ne omo' ku bij oko yok'o tu ku wesintik K'uj a tiʌ kʌ' a mok jai' ku tukrik u tak'in.

²⁵ Más mo' ya u yoko junturi' camello yok'o u jor a puts', chen a mok ne ts'uro' jach omo' ku bij oko' tu ku wesintik K'uj a tiʌ kʌ'.

²⁶ Ka tu yuo', más nej peknʌ u yoro' y chu'mpʌjo' u yei'ko': —¿Mok ku jach bij k'uchu u muk' u bin ix kʌ'?

²⁷ Jesús tu pʌktaj u kʌ'sa winiko' y tu ya'tio': —Tia winik a je' ki wei'k, ku yui'ko' muj k'uchu u muk' u metko'; chen ti K'uj tu woro a ba' jeu laj metik.

²⁸ Y Pedro tu ya'ti' Jesús: —A teno' ti laj p'ʌto' tu woro in bao' y taro' in t'u're a pach

²⁹ Kaj u nuka Jesús kaj u ya'a: ―Jach taj kin wei'k teche'x, a mok tu p'ʌta u yatoch, u suku' o u yits'in, u ch'upra u bojo', o u tet o u nʌ' o u tio' o u lu'm yok'o ten y yok'o u yui'k u jach tsoyi u t'ʌn K'uj.

³⁰ A lay binukaj ts'abati' a way a kuxta jach más ne ya'p u yatoch, u xi'ra u bojo', u ch'upra u bojo' u nʌ', u ti'a y lu'm, tak ku kʌxmeta' ti' u yʌj p'akti y ka tak u jer kuxta, binukaj ts'abati' u kuxta tu woro k'in y mʌnʌ' y yʌn kimi.

³¹ A mok ku yui'k u bʌj ne to'o a lay u k'ini mix ku yu'e u bʌ ne t'o'o y a mok beje' mo' t'o'o ku yui'k u bʌj a lay u k'ini t'o'o ku bi u yue u bʌj ix K'uj.

Jesús ku ka tsikbʌtik bik ku bij kinsa'

³² Tʌn u bino' ix u beri Jerusalén, y Jesús pʌten tʌn u bin y u kʌ'sa winik tu pach tʌn u taro'. Ne peknʌ u yoro' y a yʌno' ku tar tu pach sajako' tʌn u taro'. Jesús tu ka' pʌya ja'ri' a doce u apóstoles u chu'mpʌ u yei'k tio' baij ku bin mʌn ti':

³³ «Ka wirke'x, beje' binajka'ex ix u kʌjta Jerusalén, tuba tita ku k'uba' u Ti'a Xi'ra ti' u t'ojio' a moko' ku meajo' yok'o u yatoch K'uj y ti' a ku kʌ'sko' u t'ʌn K'uj a toj u ts'ibtamʌ a Moisés uchik, tita ku bij li'sa t'ʌn u kinsa' y binukaj k'uba' ti' a winiko' a moko' mo' judíos,

³⁴ binukaj p'asta', binukaj jʌts'a', u tup'a u wich, binukaj bʌja' ix cruz; chen ka mʌnʌk oxp'e k'in tuj kinsa', jeu' ka lik'i kuxta.»

A Santiago y a Juan ku k'atko' ba' ti Jesús

³⁵ A Jacobo yete a Juan, a lʌjio' u tio' a Zebedeo, xok'o ti Jesús u yao' ti': ―Wʌjkʌ'si, poch in wirko' a metikto' a baij ki bin in k'atko' tech.

³⁶ Jesús tu ya'tio': ―¿Baij ka k'ate'x in metik teche'x?

³⁷ Tu nuko': ―Cha'e in kuto' ta xax, junxet' tʌjʌn y a juntu junxet' ka k'uchuk u k'ini ti'ech a wesinte' tu woro a ba'.

³⁸ Jesús tu nuka tio': ―A teche'x, ma' a we'x baij ka k'atke'x. ¿A'e'x ten wa ja' muk'tik a wuk'ik a ja' a ne k'aj a ki bin in wuk'ik y bexi' je'e u muk'tik a mʌske'x a ba' a ki bin mʌse?

³⁹ Y tio' tu nuko': ―Je'e u k'uchu in muk'o. Jesús tu ya'tio': —Jach kin toj eik teche'x, a teche'x je'e a wuk'ike'x a ja' a k'aj a kin bin in wuk'e y bexi' ja' mʌske'x a ba' a ki bin in mʌse.

⁴⁰ Chen ti'a kute'x tin xax mo ten kin bin in wae, K'uj lʌji' ku bin u ts'ati' a mok toj u meba ti'.

⁴¹ Ka tu yuo' a jumuj k'ʌ' (diez) u kʌ'sa winiko' a Jesús a baij ku k'atko' a Jacobo yete a Juan, ts'ikcho' tio'.

⁴² Chen Jesús tu t'ʌna tu woro u kʌ'sa winik y tu ya'tio': ―A teche'x a we'ex, a moko' mo' judíos a mok akaʌ' tu wesio' o yʌn u kucho', a layo' ku yui'k u bʌjo' ne t'ojo' y a mok ne ts'uro' ne tsoyik u li'sik u t'ʌn ti' u winik u meta baij ku yei'k.

⁴³ Chen a teche'x mo baij ka bin a mete'x, a mok poch u yui'k u bʌj ne t'o'o lʌji' yʌnti' u yʌ meaj ti u bojo',

⁴⁴ A mok poch u yʌ ira' pʌten ti K'uj yʌnti' u yʌ meaj ti u bojo'.

⁴⁵ U Ti'a Xi'ra ti' mo tari ti u meaj winik ti', a ti' tari ti u meaj tia winik y ti' u ts'ekubʌj ti u takik a winik

Jesús ku ch'ensik a Bartimeo a muj yik u ber

⁴⁶ Jesús y u kʌ'sa winik k'ucho' yok'o u kʌjta a Jericó y kaj ka' jok'i yok'o a lay u kʌjta, jach ne pim winik tu t'u'ra a Jesús, junturi' xi'ra u k'aba' Bartimeo ti' kura' tu xax u beri u k'ate tak'in u bexi' muj yirik u ber.

⁴⁷ Ka tu yua tʌn u mʌn tita a Jesús a lʌji' u winki Nazaret, chu'mpʌ u yabot y bex tu ya'a: —¡Jesús, u ti'a a David, k'ʌs ch'ae otsi ten!

⁴⁸ Y ne pim tu k'eyo' a lay a xi'ra ti' u xurik u yabot, chen a ti' más k'ʌ'm chu'mpʌ u yabot: ―¡Jesús, u ti'a a David, k'ʌs ch'ae otsi ten!

⁴⁹ Lʌji' a Jesús kaj xu'rij y tu ya'a: T'ʌne'x a lay a xi'ra, Ij t'ʌna' a lay a xi'ra y a'bti': ―Ma' sʌjtik, lik'en, tʌn u t'ʌnikech a Jesús.

⁵⁰ A xi'ra tu pura u nok' a tuku tap'ik u bʌj ij lik'i se'p' y tari ti' Jesús.

⁵¹ Y Jesús tu k'ata ti': ―¿Baij a k'at in metik tech? A xi'ra tu nuka ti': ―Wʌjkʌ'si, poch in wirik a jei'k in wich ti in ka' irik ba'.

⁵² Jesús tu ya'ti': ―Taka' bin, beje' ch'enech a tu taj ki aksa ta wor ti' ten. Toj yayaj ka je'chʌ u wich a xi'ra y chʌkʌ'pʌj u yik ba' y Jesús ka' chu'mpʌ u xima.