San Lucas 1 - Porciones Lacandon-Naha

A je' ts'ibʌ' ti' a Teófilo

¹ Pim tu che tunto' u ki' ts'ibtik a ba' menʌ' uchik a bex ti' to'ne'x jax toj taj.

² A bex toj e'sa'to' a mok u yʌj chuni tu yiro' yete u wich, y pachi a lʌjio' a'bi tio' u tsikbʌtiko' u t'ʌn K'uj.

³ Bexi' ten ti' ki xaka chen ts'o'ki in ki xakik, ti wira tsoy y ki tajkintik ti' tech a ne otsi u yirech Teófilo.

⁴ Ti' a ki' kʌnik u nu'ku a ba' a toj e'sa' tech.

I. TUK'IN MEJEN A JUAN A KU T'UP'SIK JA' A WINIK Y TUK'IN MEJEN A JESÚS ( 1.5—2.52 ) 1. U mʌsa' t'ʌn 1.5-56 U ya'a u top'o a Juan

⁵ Tuk'in lʌji' u k'ini akʌ' Herodes u lʌji' u t'oji wesi u lu'mi Judea, yʌn junturi' a mok ku meaj yok'o u yatoch K'uj u k'aba' Zacarías, tu ku yet meaj Abías yok'o u yatoch K'uj; u lak' u k'aba' Elisabet y lʌji' u ka ti'a a Aarón u nukio'.

⁶ Tu ka'to' ne tsoy u tuko' ti' K'uj, y ku laj ki metko' u t'ʌn K'uj a tu li'sa u meta'.

⁷ Chen mʌnʌ' u ti'o', tu muj yʌntati' a Elisabet y tu ka'to' nej nʌ'k u yaxk'ino'.

⁸ K'uchu k'ini u yoko' tu meajo' yok'o u yatoch K'uj a Zacarías yete a mok u yet meaj a lʌji' a ku meaj yok'o u yatoch K'uj.

⁹ A bex toj t'ʌrʌ' u metko' a mok ku meajo' yok'o u yatoch K'uj y Zacarías lʌji' tejta' ti' u yoko ti' u tokik pom to u yatoch K'uj.

¹⁰ Y tu woro a winik a kʌjʌ' tita, ti'ʌ jaknʌki u t'ʌno' K'uj a ka tʌn u tojko' pom.

¹¹ Y tu ye'sa' u bʌj ti' Zacarías, junturi' ángel, ti ch'ijikba tu xax a tuku tojko' pom ti' K'uj.

¹² Y Zacarías tu sʌjta ka tu yira, y ne ja'k'i u yor.

¹³ Y a ángel tu ya'ti': —Zacarías, ma' sʌjtik; K'uj tu yua a t'ʌnik, a lak' Elisabet bi u ts'ae junturi' a ti'a, y bi a tʌk'e u k'aba' Juan.

¹⁴ Binukaj tsoy ta wor y ne pimo' ku bij tsoy ta u yoro' tu ku bij top'o a ti'a.

¹⁵ Jach yaja ʌkʌtʌn ti' K'uj. Mʌnʌ' yuk'ik u ya'ri nukuch ts'us y sidra, y binukaj tursa' ten u Pixʌn K'uj toj yok'o u jʌ'mne u nʌ'.

¹⁶ A je' a ti'a bi u ts'ae u yaksik tu yoro' ti K'uj ne pim u winik a israel.

¹⁷ A ti' pʌti ku bij bin yete u pixʌn y u muk' Elías, ti' u tsoykintik u yoro' u teto' yete u ti'o', bi u ts'ae u k'axko' u tuko' ti' u ki metko' tsoy ba' a bex muj yui'k t'ʌno', y bex ku bin u ki uts'kintik u tuko' a winik ti' u ki ch'uktik u k'uchu ak Ts'uri.

¹⁸ Tu ya'a Zacarías ti'a ángel: —¿Bij ki bin wete o jach taj ka wei'k ten? A ten ne ch'ije'n, y bexi' in lak' ne nʌ'ki u yaxk'in.

¹⁹ Tu nuka a ángel, tu ya'ti': —A ten lʌjien a Gabriel, a ku meaj ti' K'uj; ij tuchi'ten tin t'ʌn yete tech, y tin mʌsik tech a je' u jach tsoyi t'ʌn.

²⁰ Chen beje' tu maj ch'a in t'ʌn a ba' ti wa'tech a ku bij tar ti tech, beje' ka bij p'ata mo' jak'ʌ a t'ʌn y mo' bik ka bij t'ʌn, y tuk'in ku k'uchu tu k'ini u metchʌ a je' tin wa'tech, jeu' ka jok'o a t'ʌn.

²¹ A winiko' tʌn u ch'uktik a Zacarías, y tu tukro' u bʌjo', biken tʌn u xʌnta yok'o u yatoch K'uj.

²² Chen tuk'in kaj jok'i, ma' bik u jok'o u t'ʌn; y tu yeto' yʌn ba' e'sa'ti' ten K'uj yok'o u yatoch K'uj. Jai' tʌn u pesik u k'ʌ' ti' u t'ʌn, y p'atij mo' jak'ʌ u t'ʌn.

²³ Ka tu nupsa u k'ini u meaj a Zacarías yok'o u yatoch K'uj, bini tu yatoch.

²⁴ Pachi mʌni u k'ini yʌni u ti'a Elisabet y tu mʌka u bʌj ix yatoch jumuj k'ʌ' aknʌ' (cinco meses) y tu ya'a:

²⁵ «Ak Ts'uri bex tu meta ten, ti' u luk'sik in su'raki ti'a winko', tu muj yʌnta in ti'a.»

U ya'a u top'o Jesús

²⁶ A tajʌm u nʌ' k'ʌ' aknʌ' (seis meses) a ángel u k'aba' Gabriel tuchi'ta' ten K'uj yok'o jump'eri' u meje kʌjta Galilea u k'aba' Nazaret.

²⁷ Junturi' ch'upra ma' wenek ti' xi'ra, k'ata' u k'ʌ' ti' junturi' xi'ra u k'aba' José, ti' u tar ti David a lʌji' u nuki a José y u k'aba' a mejen ch'upra a María.

²⁸ Kaj oki a ángel, tu ti'ʌ a mejen ch'upra, tu ya'ti': —¡Tsoy ki ta wor, jach tsoy ba' ku metik tech K'uj! K'uj ti'ʌ yete tech; mʌnʌ' tu jer ch'upra bex tech ne tsoy ba' ku meta'.

²⁹ Ka tu yira María, jak'i u yor tuj t'ʌna' y tu tukra u bʌj bin bex ku t'ʌnken.

³⁰ U k'ʌni' K'uj a bex a ti'ʌ kʌ' tu ya'ti': —María ma' sʌjtik, K'uj tu yiraj tsoy ba' ti' tech ben tu ts'a u siji ti' tech.

³¹ Y beje', ku bij yʌnta ix a jʌ'mne a ti'a, ku bij top'o junturi' a ti'a xi'ra, u k'aba' ka ba' tʌk'e Jesús.

³² A je' jach nuk ku bin y ku bij t'ʌnʌ' u k'aba' u ti'a a ne chich u muk'; y ak Ts'uri K'uj ku bi u ts'ati' u wesintik tuj okij tu wesi u nukij David u tet.

³³ Y bi u wesinte' yok'o u yatoch Jacob tu woro k'in, y mu bij ts'o'ko u wesintik.

³⁴ María tu ya'ti' a ángel: —¿Bik ku bij mʌn a je' a ba'? A ten mo' naj wenken yete xi'ra.

³⁵ Ka tu nuka a ángel: —U Pixʌn K'uj ku bij tar ti' tech y u muk' a ne chich u muk' bi u bʌrech yete u bo'i; y a cho mejen xi'ra mʌnʌ' u si'pi ku bij top'o, y u k'aba' ku bij a'ba ti' lʌji' u Ti'a K'uj.

³⁶ Ire a wire a bojo' Elisabet, bexi' ti' yʌnji u ti'a yok'o u ch'ijʌnchʌj; y beje' yʌnti' tajʌm u nʌ' k'ʌ' aknʌ' ti'; a to'o ku ya'ba ti' muj yʌnta u ti'a.

³⁷ Mix k'ʌs yʌn ba' ti' K'uj mo' bik u metik.

³⁸ María tu ya'a: —Ten lʌjien u k'ʌnien ak Ts'uri, mete yete ten a bex ta wa'a a t'ʌn, y a ángel jok'i tu tiʌ.

María bini u ch'e'te Elisabet

³⁹ A layo' u k'ini, lik'i María, bini se'p' ix wits, yok'o jump'e kʌjta u lu'mi judá.

⁴⁰ Y okij yok'o u yatoch a Zacarías, y tu t'ʌnʌ a Elisabet.

⁴¹ Y ka tu yua Elisabet u t'ʌn a María, a cho mejen xi'ra chich peknʌ ix u jʌ'mne; y a Elisabet tursa' ten u Pixʌn K'uj.

⁴² Y ne k'ʌ'm t'ʌna, y tu ya'a: —Mʌnʌ' tu jer ch'upra bex tech ne tsoy ba' ku metik K'uj, jach tsoy ba' ku bij meta' ti' a ti'ʌ ix a jʌ'mne.

⁴³ ¿Baij i'ri ti' ten, ti' u tar u ch'eten u nʌ' in Ts'uri?

⁴⁴ Toj ka k'uchi a t'ʌn yok'o in xikin, in cho ti'a chich peknʌ ix in jʌ'mne tu ne tsoyji u yor.

⁴⁵ ¡Ku jach bij tsoy a wor tech tu ta ch'a u t'ʌn, je' u jach nup'u a tu ya'tech ak Ts'uri!

⁴⁶ Y a María tu ya'a: «In pixʌn ku yei'k, jach ne nuk in Ts'uri;

⁴⁷ In pixʌn jach ku tsoyta u yor ti' K'uj in wʌjtaki.

⁴⁸ A tu yiren mix k'ʌs nuken a ten u k'ʌnien: Y beje', ku bij a'baten, a lay a ch'upra ne tsoy u yor tu woro k'in

⁴⁹ Jach ne ya'p ba' tsoy tu meta' ten K'uj a ne chich u muk'; Jach mʌnʌ' k'as ba' yok'o u k'aba',

⁵⁰ Tu woro k'in, K'uj ku ch'eik otsi ti' A mok a ku sʌjtik.

⁵¹ Yete tu woro u muk' tu meta' ba': Tu laj luk'sa' u tuku a bex ku yui'k u bʌj ne yue ba'.

⁵² Tu laj taka' ti' u muk'o a mok akʌ' tu wesi, Y tu ts'a u muk' a mok mu yui'k u bʌj ne nuk.

⁵³ A ne wi'jo', ne ya'p ba' tu ts'ati', y a mok ne ya'p u ba', tu laj taka' ti'.

⁵⁴ Tu yʌnta tu woro u winki Israel a lʌji' u k'ʌni', k'ajti u ch'eik otsi ti'.

⁵⁵ A toj tsikbʌtʌ' ti' ak tete'x, yete Abraham y yete u ka' tio' a ku bij tar.»

⁵⁶ Y p'atij María ix yatoch Elisabet oxp'e ʌk nʌ' (tres meses); pachi sutbʌj ix yatochi'.

U top'o' ( 1.57—2.52 ) U top'o a Juan a ku but'ik ja' a winik

⁵⁷ Kaj k'uchi tu p'is Elisabet u yusta, top'i u ti'a cho mejen xi'ra

⁵⁸ Ka tu yuo' a mok xok'o kʌjtiko' y yete u yet bojo', a jach ne ch'ab otsi ti' Elisabet ti' K'uj, tu jach tsoykinta u yoro' yete Elisabet

⁵⁹ Kaj mʌni ocho u k'ini bisa' a cho mejen xi'ra ti' u circuncidata'; y mok tiʌ tita u k'ato' u jarik u k'aba' Zacarías bex u teti'.

⁶⁰ Chen u nʌ' tu nuka: —¡Mo'o! U k'aba' ki bi jare Juan.

⁶¹ Tu yao' ti' a Elisabet: —¿Biken? Pe si mix mok yʌn bex u k'aba' a wet bojo'.

⁶² Pachi tu ye'so' u k'ʌ' ti' u tet a cho mejen xi'ra, ti' u k'ata' ti' bik u k'at u tʌk'ik u k'aba'.

⁶³ Zacarías tu k'ata u che'i tuku ts'ibo' ti' u ts'ibtik u k'aba' u cho ti'a. Kaj u ts'ipta': “Lʌji' u k'aba' Juan! Y tu woro a winik peknʌ u yoro' ka tu yiro'.”

⁶⁴ Toj yayaj kaj jok' u t'ʌn Zacarías, y chu'mpʌ u yei'k jach ne tsoy ba' ku metik K'uj.

⁶⁵ Laj ja'k'o u yoro' tu woro a mok xok'o kʌjʌ' yete Zacarías; laj ch'ikibini u jumintiko' a ba' mʌni ti' Zacarías ix tu woro u witsi u lu'mi Judea

⁶⁶ Tu woro a mok tu yuo' u jumintiko' a ba' mʌni tu tukra u bʌjo' yok'o u pixʌn, tu ya'a: «¿Baij ku bin u mete a je' a cho mejen xi'ra kʌ' ch'ijik?» Tuku u yirko' jach tiʌ K'uj yete a cho mejen xi'ra.

Zacarías ku yei'k baij ku bin u tar u metik K'uj

⁶⁷ Zacarías u tet a cho mejen xi'ra, tursa' ti' u Pixʌn K'uj y ts'ab ti' u tuku ten K'uj baij ku bin u tar u metik, kaj ya'a:

⁶⁸ «Kaj k'ujinte ak Ts'uri u K'uj Israel, aj tari u ch'e'te y u take u winik

⁶⁹ A tu tuchi'ta ti' to' ak wʌj taki a mok ne jach chich muk' yok'o u yatoch a David u k'ʌni',

⁷⁰ A bex tu toj ao' ti' a mok mʌnʌ' u si'po' a lʌjio' profetas

⁷¹ Ti' u tajko' ti' a mok p'ekyiko' y ti' u tajko' ti' a tu woro a mok ku p'aktiko';

⁷² Ti' u ch'eik otsi ti' ak tete'x y ti' u k'a'ja ti' a ba' tu toj a'a K'uj uchik ka tu kata u yor u jach metik;

⁷³ A tu jach ts'a u t'ʌn ti' ak tete'x Abraham, a tu toj a'a u ts'ek to',

⁷⁴ Ti' u tajko' ti'a mok ku p'aktiko', y mʌnʌ' ba' ak sʌjte ak meaj ti' K'uj

⁷⁵ Ti' ak kuxte'x jai' ti' K'uj, ti' ak metke'x tsoy ba' tu yiknʌ a K'uj, tu woro k'in tuk'in kuxo'

⁷⁶ Y tech in cho ti'ech, ku bin t'ʌnech u profeta a mok lʌji' u winik a K'uj a ne chich u muk', a tech pʌten ka bij bin y pachi ak Ts'uri, ti' a ki metik u beri tuku bij k'uchu;

⁷⁷ Ti' a we'sik ti' a winik, K'uj je' u sa'sik u k'ebo' y je' u takik u winik,

⁷⁸ Jach ne otsi u yiko' K'uj, tu jach ch'a otsi to', Ka tu pʌkto' ix kʌ', bex u tsoyi u tichi a k'in,

⁷⁹ Ti' u ts'ek u sasichʌjʌ a mok ix ak'bi ti'ʌ, y bexi' a mok poch u kinsa', ti' u ye'sik to' u beri tu yʌn jach ne tsoy ba'.»

⁸⁰ Y tʌn u ch'iji a cho mejen xi'ra, tʌn u ki ch'eik u tuku; tij bij ch'iji yok'o u lu'mi tu mʌnʌ' nukuch che' woro tikin lu'm, ka' k'uchuk tu k'ini u ye'sik u bʌj ti' u winik Israel ti' u tsikbʌtik u t'ʌn K'uj.