DANIEL 7 - DAÜLANGPÜ LAIHING (BSI)

Danieli Manghkhang kü Yemha Ali Eepü

¹ Babylon kü Belshazzar ong vaipü shongpü bong kü Danieli mangh hük mangh hatü yanüng manghkhang hük eeteke. Büpai hapa mangh nyangteke:

² Ngei, Danieli yanüng manghkhang kü vangsho jung ali kübü vanglük vamei longpü yungching kü lükei eepeih.

³ Yungching mongeipü yemha longpü ali hüki hük mü laolao vamei ee.

⁴ Shongpü yemhayü mailang leshi shejao alang kü kei yang kohshi shiüteke. Ngei veishi nyushingkü yangthü bhagtük, hatü hangku kei la nyi-i kahdok leipü yaonghüteke, hatü hapa kü hangkulei thentoimongdang shuohteke.

⁵ Shao nyipabü lebü yemha hük ngei touei veiheni sheptao kei vam. Hapayü la phihük noei antü, hapalei julei bha hi bha aa kü haampat jem japtü hapakei eteke, “Yaongtuh, hatü nüngi aokpü thahshi phai moh-ei hahtuh!”

⁶ Hapheikü ngei veishi nyushingkü, lebü yemha hük veiheni shangpi shahnyü kei vamteke; hapa yemha kü dok kü yang ali hatü shangjing ali kohshi nyuteke, hatü vanglem lemhen büpa kü shuohteke.

⁷ Hapheikü yanüng ngei manghkhang kü alipabü yemha hük, nyemshi hatü hanshi, longi wong kohshi ee. Hapa kü nyiambha longpü shiüteke, hatü hapai khih mü shaaitü lühtük shejao aopüthü peü la-i shouptükei ee. Shelei eepü yemhathü peü mü hapa hayaoha shiüteke, hatü hapa kü vaung an kohshi shiüteke.

⁸ Mechem ngei ha vaungthü nang deihhah-ei nyupa, hatü hathü khongkü shao lebü maanpü vaung hük vam, hatü hapa shingvaishi shing linghen shelei nyupü vaung jem bhitük. Hapa vaung kü hangkulei mük kei mükthü kohshi, hatü ngam epü jubenyeijaang kohshi nyuteke.

Manghkhang kü Denden Nyupü Hük Jung Epü

⁹ Mechem ngei veishi nyupa, Aivangpai hapa ong uoshing kü uoteke, Büpalei owhiai shüdao kei, hatü büpalei sho phümphah kei shoshi shiüteke; Büpalei ong uoshing awlom kei, hatü hapa uoshinglathü awyei kei shiüteke.

¹⁰ Büpa toueipü aw yungyen kei yenei vamteke. Haja hajai büpa chongphoteke, hatü haja an dok kü haja an büpa touei yaongteke. Shahphenbüthü shahtap kü uo, hatü laithü apteke.

¹¹ Hapa vaungi changmeipü shah epü kü ngei veishi nyushingkü hapa yemhayü jütük, hatü hapalei büm khih mü dehtü awlom kü shüktükteke.

¹² Lebü yemhathü shingvaishiyü jomphongei vanglem lempü hean aetlang, shejao hepak kansho hük nyuhen hanteke.

¹³ Yanüng manghkhang kü ngei veishi nyushingkü, veiheni shennyak hük leshi phumi ngeihtü vamei Aivangpa touei peiyei yaong.

¹⁴ Hangkuli peüi, jatphüi hatü shahlem laolao epü peüi büpa chongphohen shingvaishi büpa kü vanglem lemhen wong hi ngan, dhüm hatü longhiong hean shuohteke. Büpa vanglem lempü nedohneteni denden nyuhen, hatü büpalei ongching mechemao nemahnechahhen.

Manghkhang Nih-ei Enyüke

¹⁵ Ngei, Daniel, longi mongshanghü, hatü ngei eepü manghkhangi ngei nyemhü.

¹⁶ Ngei halei yaongshi nyupüthü hük touei thah-ei heih-ei hapa lappü meheshang nih-ei eshih shei phe. Hanangkü büpai ngei kü hapa lappü ephüteke.

¹⁷ “Yemha longpü aliyü kahdoknyü kü vamkahen ongching ali nang nyüke.

¹⁸ Shejao Jaipüba Kahvangei nanglakthüi hapa ongching yah-ei den dok kü den jom lompü vailanghen.”

¹⁹ Hahepak kü ngei alipabü yemha, mepa lebü mü hayaoha, nyemshi, hapalei nyiambha-i hatü melangnyiam lakdheni khih mü nihtüknya, hatü aopüthü kemei la-i shouptüknya, ha jung meishi nyinghahhüei nyuteke.

²⁰ Hatü hapalei shangjingei vaung an vampü hatü vaung jem bhagei yaktüktü hapheikü vampü vaungha kü mük hatü ngam epü ju kohpü, hatü hapayü lebüthü mü nyeinya nyemshi eepü ha vaung jung nyinghahhüei nyuteke.

²¹ Ngei veishi nyushingkü, hapa vaungi Kahvangei nanglakthü mü hok hatü neüteke.

²² Hahepak kü Aivangpa peiyei Jaipüba Kahvangei nanglakthü khüambakei shahphenteke, hatü Kahvangei nanglakthüi longhiong hean yahhen hepak ngoiteke.

²³ Büpai ngei kü hapa nihpü ephüteke: Alipabü yemhayü kahdoknyü ongching hük vamkahen hatü hapayü lebü ongchingthü peü mü hayaoha chongkahen hatü hapai kahdoknyü peü la-i shoupei ngümei yaktükhen.

²⁴ Vaung anü hapa ongching kübü vamkahen ongthü nyüke. Jomphong pheikü lebü ong hük vamkahen. Hapayü sheleipü ongthü mü hayaoha nyukahen; büpai ongthü jem neütükhen.

²⁵ Büpai Jaipüba Kahvang khüei ehen hatü Jaipüba Kahvangei nanglakthü kü shüveidoideihen. Büpai jomei shahkungnyüthü hatü daülangpü mohitapthü yeiyatükhen khehen, hatü Kahvangei nanglakthü büpalei vanglem phangkü vangbong jem mü hükkeishing nyuhen.

²⁶ Hahepak kü vangsho shahphenpü uoshing kü shahphenhen uohen, hatü büpalei longhiong hean yahlanghen hatü büpayü chemjalak kü mahtükhen.

²⁷ Vangsho phangkü nyupü ong hean, hatü ongching hean hatü ongching kü lupülongpü hean kemei Jaipüba Kahvangei nanglakthü kü shuohtükhen; jomei ongchingü nedohneteni nyuhen, hatü ongchingthü peüi jomei ven bangei chongphohen.

²⁸ Hammü hapa nang dohnyeih. Ngei dheyao haishi nyempeih, shejao lemphü ngei ngelei mongei jaoei tuhpeih.