ᓭᐣᐟ ᒫᕒᐠ 1 - Plains Cree Scripture Portions

okakēskimiwēwin John osīkahāhtākēw

¹ ēwako ōma omiywācimikowin Jesus Christ, manitowikosisān

² ē‑wī-ispayiyik kā‑kī-wīhtahk okiskiwēhikēw Isaiah ē‑kī-masinahahk ōma, “kisē-manitow itwēw, ‘nika-nīkānisitisahwāw nititwēstamākēm kita-kwayātastamāsk kahkiyaw kīkway ita kita-pē-itohtēyan.

³ awiyak matwē-tēpwēw pakwataskīhk: kwayācihtamāhk kā‑tipēyihcikēt mēskanaw kita-kwayaskwamok ita kita-pē-pimohtēhot.’”

⁴ ēkosi John osīkahāhtākēw takohtēw pakwataskīhk ē‑wīhtamawāt ayisiyiniwa ē‑itāt kita-sīkahāhtāmiht ēkwa kita-kwēskwātisiyit, ēkosi kita-pōnēyihtamāmiht kā‑kī-isi-macātisiyit.

⁵ mihcēt ayisiyiniwak itohtēwak ēsa kita-natohtawācik, Judea askīhk ēkwa Jerusalemihk kihci-ōtēnāhk ohci. wīhtamwak ē‑mihtātahkik ē‑kī-maci-tōtahkik, ēkwa kī‑sīkahāhtawēw John, Jordan sīpīhk.

⁶ John kī‑kikasākēw mīhawēsākay piskwākanēwatimwa ohci, ēkwa napakēyāpiy kī‑pakwahtēhow, ēkwa kī‑omīciwiniw okwāskōcisīsa ēkwa āmow osīhcikan sakāhk ohci.

⁷ ōmisi ēsa itēw ayisiyiniwa, “ana nāpēw mwēstas wiya kā‑wī-pē-takohtēt, nawac wiya ayiwāk itēyihtākosiw ispīhci niya. namōya nitēpakēyihtākosin ahpō kita-nawakīstawak ta‑āpahamwak omaskisinēyāpiya.

⁸ niya kisīkahāhtātināwāw nipiy ohci, māka wiya kika-sīkahāhtākowāw kā‑kanātisiyit ahcāhkwa ohci.”

sīkahāhtawāw Jesus ēkwa ē‑kotēyimiht

⁹ mwēstas nawac Jesus kī‑pē-takohtēw, Nazarethihk Galilee askīhk ē‑ohtohtēt ēsa, ēkwa John kī‑sīkahāhtawēw ēkota Jordan sīpīhk.

¹⁰ mayaw ē‑pē-kapāt Jesus, kī‑wāpahtam kīsik ē‑yohtēpayiyik ēkwa ē‑itāpit kīsikohk wāpamēw ē‑pē-itakociniyit kā‑kanātisiyit ahcāhkwa ē‑twēhototākot tāpiskōc omīmīwa ē‑twēhoyit.

¹¹ ēkwa awiya kihci-kīsikohk ohci ē‑itwēyit, “kiya ōma nikosis kā‑sākihitān. kinahēyihtamihin.”

¹² sēmāk ēsa itisahok kā‑kanātisiyit ahcāhkwa pakwataskīhk.

¹³ ēkotē kī‑ayāw nēwomitanaw kīsikāw, ē‑kotēyimikot macāyisa, ēkota mīna ayāyiwa pakwaci-pisiskiwa, māka okīsikowa kī‑pē-pamihik.

Jesus kā‑wīsāmāt nēwo opakitahwāwa

¹⁴ ē‑kī-kipahomiht Johna, Jesus ēsa kī‑itohtēw Galilee askīhk, ēkotē ē‑wīhtamawāt ayisiyiniwa miywācimowin kisē-manitowa ohci.

¹⁵ ōmisi itēw ēsa, “nahipayiw ēkwa kita-mācipayiyik otipēyihcikēwin kisē-manitow, wēpinamok kimaci-tōtamowiniwāwa ēkwa tāpwēhtamok ōma miywācimowin.”

¹⁶ ē‑mēkwā-pimohtēt Jesus sisonē Galilee sākahikanihk, kī‑wāpamēw nīso ē‑pakitahwāyit, pēyak Simon isiyihkāsow ēkwa ana kotak Andrew, ēwakonik ōki ē‑wīcisānihtocik.

¹⁷ ōmisi itēw Jesus, “āstamik, pē‑wīcēwik, kika-kiskinohamātināwāw kita-isi-māwacihāyēkok ayisiyiniwak tāpiskōc māna kā‑pakitahwāyēk.”

¹⁸ sēmāk ēsa pakitinēwak otayapīwāwa ēkwa ati-wīcēwēwak Jesusa.

¹⁹ ē‑ati-pimohtēt awasicahīs, namōya wāhyaw āsay mīna kā‑wāpamāt nīso nāpēwa, pēyak James itāw ēkwa osīma Johna, ēwakonik ōki Zebedee okosisa. ōsihk ē‑apicik ē‑wiyāpēkinācik ayapiya.

²⁰ sēmāk ēsa kā‑natomāt Jesus kita-wīcēkocik, tāpwē ati-nakatēwak ohtāwīwāwa asici atoskēyākana ēkwa ati-pimitisahwēwak.

pēyak nāpēw pīhciyawēskāk maci-ahcāhkwa

²¹ Jesus ēkwa okiskinohamawākana itohtēwak Capernaum ōtēnāhk; ēkotē ē‑ayācik Jewak otayamihēwi-kīsikanisiwāw, kī‑pīhtikwēw ēsa Jesus otayamihēwikamikoyihk ēkwa kiskinohamākēw.

²² aniki ayisiyiniwak kā‑pēhtawācik ē‑pīkiskwēyit kī‑māmaskātēwak, namōya tāpiskōc kotaka kā‑kiskinohamākēyit kisē-manitowa owiyasiwēwiniyiw, māka wiya ē‑miyikowisit okiskēyihtamowin ē‑āpacihtāt.

²³ mēkwāc ē‑pīkiskwēt, kā‑pīhtikwēt pēyak nāpēw ē‑kī-pīhciyawēskākot maci-ahcāhkwa ē‑misi-tēpwēt ēsa,

²⁴ “Jesus Nazarethihk kā‑ohcīyan, tānēhki kā‑mwēstācihkawiyāhk? ōta cī ē‑pē-misiwanācihiyāhk? kikiskēyimitin awīna kiya, kiya ōma kisē-manitow okanātisīma,” kā‑itikot ēsa.

²⁵ Jesus kī‑kisīkitotēw maci-ahcāhkwa, ē‑itāt, “pōnwēwita ēkwa nakas ana nāpēw.”

²⁶ ana maci-ahcāhk kī‑pēhtākosiw, ē‑ocipitikōskawāt anihi nāpēwa ēkwa pōnihēw ēsa.

²⁷ kahkiyaw ayisiyiniwak kī‑māmaskātamwak ē‑itwēcik, “tānisi ōma? oski-kiskinohamākēwin cī ōma? awa nāpēw miyikowisiwin ē‑ayāt ta‑wiyasiwātāt maci-ahcāhkwa ēkwa ē‑natohtākot.”

²⁸ ēkwa sēmāk piko itē Galilee askīhk Jesus kī‑ācimāw.

Jesus iyinīhkahiwēw

²⁹ Jesus ēkwa okiskinohamawākana asici James ēkwa John kī‑sipwēhtēwak Jewa otayamihēwikamikoyihk ohci, ēkwa sēmāk kī‑nitawi-kiyokēwak Simona ēkwa Andrewa wīkiyihk.

³⁰ ēcika ōma Simon osikosa ē‑āhkosiyit nipēwinihk kī‑pimisiniyiwa ē‑kisisowāspinēyit. sēmāk wīhtamawāw Jesus ē‑isi-ayāyit.

³¹ kī‑nātēw ē‑sakicihcēnāt ēkwa ē‑waniskānāt, sēmāk kā‑pōni-kisisoyit. ana iskwēw kī‑ati-pamihēw ōhi okiyokēwa.

³² ēwako ē‑otākosik ē‑kī-pahkisimohk ayisiyiniwak kī‑pēsiwēwak kahkiyaw kā‑āhkosiyit ēkwa anihi kā‑pīhciyawēskākoyit maci-ahcāhkwa.

³³ kahkiyaw ayisiyiniwak ēkota ōtēnāhk ohci ēsa kī‑nīpawiwak iskwāhtēmihk.

³⁴ ēkwa Jesus kī‑iyinīhkahēw mihcēt nanātohk ē‑itāspinēyit ēkwa mihcēt kī‑wayawītisahwēw maci-ahcāhkwa; namōya ohci-pakitinēw maci-ahcāhkwa kita-pīkiskwēyit, ayisk kī‑nisitawēyimēwak.

Jesus kakēskihkēmow Galilee askīhk

³⁵ wīpac pāmwayēs ē‑ati-wāpahk Jesus kī‑waniskāw ēkwa kī‑sipwēhtēw pīkiskātanohk ē‑nitawi-ayamihāt wayawītim-ōtēnāhk.

³⁶ ēkwa Simon ē‑wīcēwāt owīcēwākana kī‑natonawēwak,

³⁷ ēkwa ispīhk ē‑miskawācik itēwak, “kahkiyaw ayisiyiniwak kinatonākwak.”

³⁸ māka Jesus ōmisi itēw ēsa, “piko kita-itohtēyahk ōtēnawa ōta wāsakām, ēwakonik mīna kita-kakēskimakik, ēwako ohci kā‑pē-itohtēyān.”

³⁹ kī‑itohtēw misiwē Galilee askīhk ē‑wīhtamawāt omiywācimowin ayisiyiniwa otayamihēwikamikoyihk, ēkwa ē‑wayawītisahwāt maci-ahcāhkwa anihi kā‑pīhciyawēskākoyit.

Jesus iyinīhkahēw nāpēwa

⁴⁰ pēyak nāpēw ē‑kakwātakihikot wasakāspinēwin ē‑kostācikātēyik kitimākimostawēw Jesusa, ē‑ocihcihkwanapīstawāt itēw, “kīspin kitēyihtēn, kika-kī-miywāyāhin.”

⁴¹ Jesus kī‑kitimākinawēw ēkwa ē‑sāmināt itēw, “ēkosi nitēyihtēn, miywāyā!”

⁴² sēmāk ēsa kā‑miywāyāyit, ēkosi kī‑kanātisiyiwa ēsa.

⁴³ ēkwa sōhki ē‑kī-kitotāt, sēmāk kī‑sipwēhtisahwēw,

⁴⁴ mīna itēw, “mēyākwām, ēkāya awiyak wīhtamaw. māka nitawāpam otayamihēwiyiniw ēkwa kika-nitawāpēnāk; ēkwa kika-pakitināson kā‑itastēk Moses owiyasiwēwinihk, ēkosi kita-kēhcināhocik ayisiyiniwak ē‑miywāyāyan.”

⁴⁵ māka ana nāpēw piko awiya wīhtamawēw Jesusa ē‑miywāyāhikot. ēkosi namwāc kī‑itohtēw Jesus mēkwānohk ōtēnāhk, pīkiskātanohk piko ē‑kī-ayāt. āhci piko ayisiyiniwa nanānis ohci kī‑pē-nātik.