ᓭᐣᐟ ᓬᐅᐠ 1 - Plains Cree Scripture Portions

kiskēyihtamohiwēwin

¹ ahāw Theophilus: mihcēt ayisiyiniwak ē‑isi-kaskihtācik kī‑kakwē-masinahamwak ē‑ātotahkik ōhi kīkwaya kā‑kī-pē-ispayihikoyāhk.

² kī‑masinahamwak anihi kīkwaya kā‑kī-wīhtamākoyāhkok aniki kā‑kī-wāpahtahkik nistam ohci ēkwa ēwakonik kā‑wīhtahkik ōma miywācimowin.

³ ēkosi māka, nitōkimām, kwayask nikī-nitawāpēnēn ōhi nistam ohci. nikī-itēyihtēn kita-miywāsik kwayask kita-masinahamān ōhi kiya ohci.

⁴ ōma kā‑ohci-tōtamān kita-kiskēyihtaman iyawisk tāpwēwin anima kā‑kī-isi-kiskinohamākawiyan.

wīhcikātēw John osīkahāhtākēw ē‑wī-nihtāwikit

⁵ mēkwāc Herod ē‑kihci-okimāwit Judea askīhk, ēkota kī‑ayāw ayamihēwiyiniw, Zechariah ē‑isiyihkāsot, Abijah ayamihēwiyinīnāhk kī‑wīcihiwēw. owīkimākana Elizabetha mīna ohcīyiwa ayamihēwiyinīnāhk.

⁶ kī‑kwayaskātisiwak ē‑nahēyihtamihācik kisē-manitowa, sōskwāc kwayask ē‑pimitisahahkik kā‑tipēyihcikēyit owiyasiwēwiniyiwa mīna otisīhcikēwiniyiwa.

⁷ namōya awāsisa ohci-ayāwēwak ayisk Elizabeth namōya kī‑ayāwēw awāsisa; ē‑kēhtē-ayiwicik.

⁸ pēyakwāw ēsa Abijah ayamihēwiyiniwak wiyawāw wiyaskotam ēkota ta‑atoskēcik, Zechariah ē‑wīcihtāsot kihci-ayamihēwikamikohk.

⁹ wiyawāw ē‑isīhcikēcik kī‑nawasōnāw ē‑ocipitamoht owīhowin kita-miyāhkasikēt pakitināsowināpiskohk. ēkosi kī‑pīhtikwēw anita kā‑tipēyihcikēt okihci-ayamihēwikamikoyihk.

¹⁰ mihcēt ayisiyiniwak ēsa wiya mawimoscikēwak wayawītimāyihk mēkwāc ē‑miyāhkasikēyit Zechariahwa.

¹¹ okīsikōma kā‑tipēyihcikēt kētahtawē ēkota kā‑nīpawiyit kihciniskihk pakitināsowināpiskohk ita kā‑miyāhkasikēhk māna.

¹² ē‑wāpamāt Zechariah mistahi kī‑kostācipayiw.

¹³ māka okīsikowa itik ēsa, “ēkāya kostāci, Zechariah! kisē-manitow kipēhtāk ē‑ayamihēstawat. kiwīkimākan Elizabeth kita-ayāwēw awāsisa, John kika-isiyihkātāw.

¹⁴ mistahi kika-miyawātēn, ēkwa nihtāwikici mihcēt ayisiyiniwak kita-miywēyihtamwak!

¹⁵ kita-cīhkēyimik kā‑tipēyihcikēyit. piko ēkāya kita-minihkwēt sōmināpoy ahpō iskotēwāpoy. mayaw nihtāwikici kita-pīhciyawēskāk kā‑kanātisiyit ahcāhkwa.

¹⁶ ēkwa mihcēt Israelīwiyiniwa kita-wāyinohtahēw isi kā‑tipēyihcikēyit omanitōmiwāwa.

¹⁷ kita-nīkānohtawēw kā‑tipēyihcikēyit, pēyakwan tāpiskōc Elijah otahcāhkoyihk mīna osōhkātisiwiniyihk. kita-kwēskinēw ohtāwīmāwa kita-sākihāyit otawāsimisiyiwa. kita-kwēskinēw kā‑sasīpihtamiyit ta‑iyinīsiyit pēyakwan tāpiskōc kā‑kwayaskātisiyit. kita-wawēyīhēw anihi kā‑tipēyihcikēt otayisiyinīma.”

¹⁸ Zechariah ōmisi itēw okīsikowa, “tānisi kita-kī-isi-kēhcināhoyān? nikisēyinīwin mīna niwīkimākan nōtikwēwiw.”

¹⁹ okīsikow kī‑naskomēw ē‑itāt, “niya Gabriel, ninīpawin ita kisē-manitow kā‑ayāt, ēkwa nipē-itisahok kita-wīhtamātān ōma miywācimowin.

²⁰ māka namōya kitāpwēhtēn nitācimowin, ēwako tāpwē kā‑wī-ispayik. ēkwa osām ēkāya ē‑tāpwēhtaman, namōya kika-kaskihtān kita-pīkiskwēyan isko ispayiki anima kā‑wīhtamātān,” itik ēsa okīsikowa.

²¹ ayisiyiniwak wiyawāw pēhēwak Zechariahwa wayawītimāyihk, tānēhki kinwēs kā‑tasīhkēyit pīhcāyihk itēyihtamwak ēsa.

²² ispī ē‑pē-wayawīyit, namwāc ēsa kaskihtāyiwa kita-pīkiskwēyit, ēkosi kiskēyihtamwak kīkway ē‑kī-wāpahtihikowisiyit kihci-ayamihēwikamikohk. ēkāya ē‑kaskihtāt ta‑pīkiskwēt kī‑isiniskēstawēw ēsa ayisiyiniwa.

²³ piyisk ēsa ē‑ispayik ē‑kīsihtāt wiya otatoskēwin kihci-ayamihēwikamikohk, Zechariah kī‑kīwēw.

²⁴ namōya kinwēs ē‑ispayik owīkimākana Elizabetha kī‑kikiskawāwasoyiwa, ēkosi namōya ohci-nakatamiyiwa wīkihk niyānan pīsim.

²⁵ “ēkwa piyisk kā‑tipēyihcikēt niwīcihik ē‑miyo-kitāpamit. namōya ēkwa nika-nēpēwisin ayisiyinīnāhk,” itwēw ēsa.

wīhcikātēw Jesus ē‑wī-nihtāwikit

²⁶ nikotwāsik pīsim ē‑kikiskawāwasot Elizabeth, okīsikow Gabriel kī‑isitisahok kisē-manitowa ōtēnāhk Nazarethihk, Galilee askīhk.

²⁷ kīkway ēsa kita-nitawi-wīhtamawāt ōhi pēyak oskinīkiskwēwa, Mary ē‑isiyihkāsoyit. ē‑kī-asotamāht pēyak nāpēw, Joseph ē‑isiyihkāsoyit, Marywa kita-wīkimāt. Joseph kihci-okimāwipana Davida āniskē ē‑ohcīt.

²⁸ ēkwa ēsa awa okīsikow pē‑wīhtamawēw Marywa, “hāw, pēyāhtakēyimowin ayā, kisawēyihtākosin, kā‑tipēyihcikēt kiwīcēk!”

²⁹ mitoni Mary kī‑mikoskātēyihtam ōma ē‑itikot, ēkosi kī‑māmitonēyihtam tānēhki ōma kā‑isi-pīkiskwātikot.

³⁰ ēkwa okīsikowa itik ēsa, “Mary, ēkāya sēkisi, cikēmā kisē-manitow kisawēyimik.

³¹ kika-kikiskawāwason mīna kika-nihtāwikihāw nāpēsis, ēkwa Jesus kika-isiyihkātāw.

³² kita-kihcēyihtākosiw, ēkwa okosisa kā‑māwaci-ispāhkēyihtākosit kita-isi-kiskēyihtākosiw; ēkwa kisē-manitow kā‑tipēyihcikēt kita-miyēw okihci-okimāwiniyiw āniskē ohtāwīmāwa Davida,

³³ ēkwa kita-okimāhkahtawāt Israelīwiyiniwa āniskē kā‑ohcīyit Jacoba. ēkwa kākikē kita-kihci-okimāwiw.”

³⁴ ēkwa Mary ōmisi itēw okīsikowa, “tānisi māka ōma kita-kī-ihkihk, namōya nitohci-kiskēyimāw nāpēw?”

³⁵ ēkwa okīsikowa ōmisi itik, “kā‑kanātisit ahcāhk kika-pē-otihtik, ēkwa kā‑māwaci-ispāhkēyihtākosit omamāhtāwisiwin kika-pē-kikiskākon. ēkota ohci kā‑nihtāwikit kihcihtwāwi-awāsis, manitowikosisān kita-isiyihkātāw.

³⁶ “hāw, kiwāhkōmākan Elizabeth, āta ē‑kēhtē-ayiwit, wīsta wī‑ayāwēw nāpēsisa, ēkwa ē‑nikotwāso-pīsimwēt āta ē‑kī-itiht ēkāya ē‑kī-ayāwāt awāsisa.

³⁷ cikēmā namōya kīkway ihtakwan ēkāya kita-kī-kaskihtāt kisē-manitow.”

³⁸ ēkwa Mary ēsa itwēw, “niya ōma otatoskēyākana kā‑tipēyihcikēt; kiyām nika-ispayihikon anima kā‑itwēyan.” ēkwa ēsa okīsikowa kī‑nakatik.

Mary kiyokawēw Elizabetha

³⁹ ēkospī Mary kī‑kakwēciyāhow ē‑itohtēt ōtēnāhk ē‑ispatināhk itē Judea askīhk.

⁴⁰ ēkwa kī‑itohtēw Zechariahwa wīkiyihk mīna kī‑atamiskawēw Elizabetha.

⁴¹ ēkwa Elizabeth ē‑pēhtawāt Marywa, Elizabeth ocawāsimisa kā‑kikiskawāt kī‑waskawīyiwa, ēkwa kī‑pīhciyawēskākow kā‑kanātisiyit ahcāhkwa,

⁴² ēkwa itwēw ē‑kisīwēt, “kisē-manitow kisawēyimik nawac ispīhci kotakak iskwēwak, mīna sawēyimēw anihi awāsisa kā‑kikiskāmat.

⁴³ namōya ōma ē‑tēpakēyihtākosiyān kihci-kīkway kā‑ispayihikoyān nitipēyihcikēm okāwiya kā‑pē-kiyokawit.

⁴⁴ mayaw ē‑pēhtātān ē‑pē-atamiskawiyan, awa awāsis kā‑kikiskawak waskawīw mitoni ē‑miywēyihtahk.

⁴⁵ ēkwa kimiywēyihtēn ē‑kī-tāpowakēyihtaman ē‑asotamāsk kā‑tipēyihcikēt tāpwē ēkosi ē‑wī-ispayik.”

Mary onikamon

⁴⁶ ēkwa Mary ōmisi itwēw, “nitahcāhk mamihcimēw kā‑tipēyihcikēyit.

⁴⁷ mīna nitahcāhk cīhkēyihtam, ayisk kisē-manitow ē‑pimācihit,

⁴⁸ ēkwa nikī-kiskisitotāk, niya ē‑atoskēyākaniwiyān. anohc ohci kahkiyaw ayisiyiniwak sawēyimikowisiw nika-itikwak.

⁴⁹ ayisk ana kā‑māwaci-sōhkātisit kihci-kīkwaya nikī-tōtamāk mīna kanātaniyiw owīhowin.

⁵⁰ okisēwātotākēwin ayāwak aniki kā‑kihcēyimācik kākikē kā‑pē-pimātisicik.

⁵¹ osōhkisiwin ohci kī‑īkatēyāmohkēw anihi kā‑mistēyimisoyit asici kahkiyaw kā‑kī-itasiwācikēcik.

⁵² anihi onīkānīwa kī‑mēskotahēw otapiwiniyihk ohci ēkwa anihi kā‑tapahtēyimocik kī‑nīkānīhēw.

⁵³ kwayask kī‑asamēw anihi kā‑nōhtēhkatēyit miyo-kīkwaya ohci, ēkwa kā‑wēyōtisiyit kī‑sipwēhtisahwēw ēkāya kīkway ē‑miyāt.

⁵⁴ kī‑wīcihēw otatoskēyākana Israelīwiyiniwa ē‑kiskisit ē‑kī-asotamawāt kita-kisēwātotawāt.

⁵⁵ kī‑asotamawēw kita-kisēwātotawāt kimosōminawa, Abrahamwa ēkwa kahkiyaw ay‑āniskē-otawāsimisiyiwa kākikē!”

⁵⁶ Mary kī‑wīci-ayāmēw Elizabetha nānitaw nisto pīsim ēkosi kī‑kīwēw.

onihtāwikiwin John osīkahāhtākēw

⁵⁷ ispīhk ē‑otihcipayiniyik kita-ocawāsimisit, Elizabeth kī‑ayāwēw nāpēsisa.

⁵⁸ owītapimākana mīna owāhkōmākana ē‑pēhtamiyit iyikohk kā‑tipēyihcikēyit ē‑kitimākēyimikot, kahkiyaw ēsa kī‑cīhkēyihtamiyiwa.

⁵⁹ ispīhk ana awāsis ayinānēw kīsikāw ē‑kī-ispayiniyik, kī‑pē-itohtahēwak kita-wāsakāmēsāwātimiht opaskēsēwinisiyihk ōhi nāpēsisa, ēkwa Zechariah wī‑isiyihkātēwak, ohtāwiyiwa owīhowiniyiw.

⁶⁰ māka Elizabeth ēsa namōya tāpwēhtam. “John ana kita-isiyihkāsot,” itēw ēsa.

⁶¹ ōmisi itēwak ēsa, “māka namōya awiyak kiwāhkōmākanak ēkosi isiyihkāsowak.”

⁶² ēkwa ēsa ay‑itinamawēwak ohtāwiyiwa ē‑kakwēcimācik tānisi kita-isiyihkāsoyit ōhi nāpēsisa.

⁶³ Zechariah natotam napakihcakos ēkwa ēkota masinaham, “John kita-isiyihkāsow,” itastāw ēsa. ōki ayisiyiniwak ēsa koskwēyihtamwak.

⁶⁴ sēmāk ēsa kā‑kaskihtāt Zechariah kita-pīkiskwēt. mistahi ēsa mamihcimēw kisē-manitowa.

⁶⁵ kahkiyaw ōki ayisiyiniwak ēsa koskwēyihtamwak, ēkosi kī‑ācimostawēwak kotaka nētē ispatināw askīhk Judea kā‑ayāyit.

⁶⁶ tahto kā‑pēhtahkik ōma kī‑māmitonēyihtamwak ēkwa kakwēcihkēmowak, “tānisi awa nāpēsis ē‑wī-isi-ohpikit?” itwēwak ēsa. ayisk kī‑nōkwan kā‑tipēyihcikēyit ē‑kistēyimikoyit.

Zechariah kiskiwēhikēw

⁶⁷ Zechariah, ohtāwiya John, kī‑pīhciyawēskākow manitowa otahcāhkoyiwa ēkosi kī‑māci-kiskiwēhikēw ē‑itwēyit,

⁶⁸ “mahti mamihcimātān kā‑tipēyihcikēt, omanitōmiwāwa Israelīwiyiniwak! kī‑pē-itohtēw kita-wīcihāt otiyinīma ēkwa kita-pimācihāt.

⁶⁹ kimiyikonaw ē‑sōhkātisiyit opimācihiwēwa, otatoskēyākana Davida ē‑ohci-wāhkōhtamiyit.

⁷⁰ kayās ohci okiskiwēhikēma ē‑kanātisiyit kī‑itwēyiwa ēkosi ōma ē‑wī-tōtahk,

⁷¹ ē‑wī-pimācihikoyahk ohci anihi ayisiyiniwa kā‑pakwātikoyahkok, osōhkisiwiniwāhk ohci aniki kā‑pakwātikoyahkok.

⁷² kī‑itwēw ē‑wī-kitimākēyimāt kimosōmipaninawa ēkwa kita-kanawēyihtahk anima wīci-isīhcikēhtowin kākikē kā‑kanātēyihtākwaniyik.

⁷³ ē‑kihci-itwēt kī‑asotamawēw kimosōmipaninawa Abraham

⁷⁴ kita-pimācihikoyahk anihi ohci ayisiyiniwa kā‑nōtinikoyahkok, ēkwa kipakitinikonaw ēkāya kita-kostamahk kita-pimitisahwāyahk.

⁷⁵ ēkosi kita-kī-pimitisahwāyahk ēkwa ka‑kanātātisiyahk mīna kwayask kita-tōtamahk wiya ohci, isko iyikohk ka‑pimātisiyahk.

⁷⁶ “ēkwa kiya, nicawāsimis, ‘okiskiwēhikēma kā‑māwaci-ispāhkēyihtākosit’ kika-itikawin. kika-nīkānohtawāw kā‑tipēyihcikēt ē‑kwayācihtamawat mēskanaw.

⁷⁷ kita-wīhtamāmat otiyinīma ē‑wī-pimācihāt, omāyi-tōtamowiniwāwa kita-pōnēyihcikātēyiki.

⁷⁸ kimanitōminaw kisēwātisiw mīna yōskātisiw ka‑pē-isitisahwēw opimācihiwēwa tāpiskōc pīsim kā‑pē-sākāsot,

⁷⁹ ēkwa kita-sākāstēnamawēw ispimihk ohci tahto anihi wanitipiskāk nipiwinihk kā‑ayāyit. kita-kiskinohtahikoyahk anima mēskanaw kā‑itamok pēyāhtakēyimowinihk.”

⁸⁰ ana awāsis ēsa kī‑ati-maskawātisiw mīna otahcāhkohk kī‑ati-sōhkisiw. kī‑ayāw pakwataskīhk isko anima kīsikāw kā‑māci-kakēskimāt Israelīwiyiniwak.