ᓭᐣᐟ ᒑᐣ 1 - Plains Cree Scripture Portions

nistam itwēwin

¹ māwaci nistam, itwēwin kī‑isiyihkāsiw āsay kī‑ihtakow; itwēwin kī‑wīcēwēw kisē-manitowa, ēkwa wiya kisē-manitow itwēwin.

² kī‑wīcēwēw kisē-manitowa māwaci nistam ohci.

³ wiya ohci itwēwin kisē-manitow kā‑kī-osīhtāt kahkiyaw kīkway; namwāc pēyak kīkway ta‑osīhcikātēw kīspin ēkāya wiya ohci.

⁴ pimātisiwin ohcīmakan itwēwinihk, ēkwa ōma pimātisiwin wāstēnamawāwak ayisiyiniwak ohci.

⁵ wāstēw ōma wāstēnam ita kā‑tipiskāk, ēkwa tipiskāw namwāc kī‑āstawēnam.

⁶ kisē-manitow kī‑pē-isitisahwēw otitwēstamākēma John kā‑isiyihkāsoyit,

⁷ ēwako awa nāpēw ē‑kī-pē-itohtēt kita-ātotahk ayisiyinīnāhk ēwako ōma wāstēw, ēkosi kahkiyaw pēhtahkwāwi ōma ācimowin ta‑tāpowakēyihtamwak.

⁸ namōya wiya wāstēw, māka ē‑pē-ātotahk ōma wāstēw.

⁹ ēwako ōma tāpwē wāstēw kā‑pē-wāstēnamākocik kahkiyaw ayisiyiniwak ōta askīhk.

¹⁰ itwēwin kī‑ayāw askīhk, wiya ēkota ohci kā‑kī-osihcikātēk askiy, ēkosi āhci piko namōya nisitawēyimik ayisiyiniwa.

¹¹ kī‑pē-itohtēw ōta otaskīhk, māka namōya ohci-nitawēyimik wīciyiniwa.

¹² wiya āta wiya ātiht namōya ohci-ātawēyimik ēkwa kī‑tāpowakēyimik; ēwakoni kī‑tēpakēyimēw kita-oy-ohtāwīyit kisē-manitowa.

¹³ namōya wiya kita-oy-ohtāwīmācik kisē-manitowa nihtāwikiwinihk ohci, māka kisē-manitow ē‑oy-ohtāwīmāwit.

¹⁴ ēkosi itwēwin kī‑ayisiyinīwiw ēkwa kikī-wīci-ayāmikonaw, ēkwa nikī-wāpahtēnān okistēyihtākosiwin ē‑isi-tēpakēyihtākosit kita-okosisimikot kisē-manitowa ē‑sākaskinēskākot kisēwātisiwin mīna tāpwēwin.

¹⁵ John kī‑ācimēw, ē‑tēpwēt, “ēwako awa kā‑kī-wīhtamātakok ispīhk kā‑itwēyān ‘ē‑wī-pē-takohtēt, māka wiya nawac ayiwāk itēyihtākosiw ispīhci niya, ayisk kī‑ihtāw pāmwayēs ē-nihtāwikiyān.’”

¹⁶ ē‑kisēwātitākoyahk ohci kahkiyaw kikī-miyo-tōtākonaw ēkwa kā‑kīhtwām kikisēwātotākonaw.

¹⁷ Moses ohci kisē-manitow wiyasiwēwin kikī-miyikonaw; māka kikī-wāpahtihikonaw okisēwātisiwin mīna otāpwēwin Jesus Christa ohci.

¹⁸ namōya wīhkāc awiyak wāpamēw kisē-manitowa. pēyakokosisān, ēwako tāpiskōc kisē-manitow, tāpitawi wīcēwēw ohtāwiya, kī‑kiskēyihtamohiwēw.

John osīkahāhtākēw opīkiskwēwin

¹⁹ ēwako ōma otācimowin John ispīhk Jewak kā‑itisahwācik ēsa ayamihēwiyiniwa mīna Leviwiyiniwa, Jerusalemihk ohci, kita-kakwēcimāyit, “awīna ōma kiya?”

²⁰ namwāc ohci ānwēhtam John, māka ōmisi itēw, “namōya ōma niya onawasōnākan.”

²¹ ēkwa kakwēcimik, “awīna māka? kiya cī Elijah?” ōmisi itēw, “namōya niya ēwako.” “kiya cī okiskiwēhikēw?” “namōya,” itēw.

²² “ēkosi māka, wīhtamawinān, awīna kiya?” itik. “piko kita-nitawi-wīhtamawāyāhkok aniki kā‑pē-itisahokoyāhkok. tānisi ē‑isi-itisoyan?”

²³ ōmisi itēw John, ē‑āpacihtāt Isaiahwa okiskiwēhikēwa kā‑kī-itwēyit, “niya kā‑pēhtākosiyān ē‑tēpwēyān pakwataskīhk, ē‑itwēyān, ‘kwayācihtāk omēskanaw kā‑tipēyihcikēt ita kita-pimohtēhot!’ ”

²⁴ ōki otitwēstamākēwak kā‑pē-itisahokocik Phariseewa

²⁵ kī‑kakwēcimēwak, ē‑itācik, “tānēhki māka kā‑sīkahāhtākēyan, kīspin namōya kiya onawasōnākan ahpō Elijah, ahpō ana okiskiwēhikēw?”

²⁶ John naskwēwasimēw ē‑itāt, “nisīkahāhtākān nipiy ohci, māka pēyak ē‑wīcikāpawīstākoyēk ēkāya ē‑kiskēyimāyēk.

²⁷ mwēstas kita-takohtēw. namōya ahpō nitēpakēyihtākosin kita-āpahamwak omaskisina.”

²⁸ ēwako ōma kī‑ay-ihkin Bethanyīhk, akāmihk Jordan sīpīhk, ita John kā‑kī-sīkahāhtākēt.

Jesus omāyatihkoma kisē-manitow

²⁹ ē‑wāpahk John kī‑wāpamēw Jesusa ē‑pē-tāstamohtēyit, ēkwa itwēw, “awīta omāyatihkoma kisē-manitow kā‑asēnamākēt maci-tōtamowina ōta askīhk.

³⁰ ēwako awa kā‑kī-āyimōmak ispī kā‑itwēyān, ‘pēyak ihtāw ē‑wī-takohtēt kita-ati-kiskēyihtākosit ayiwāk ispīhci niya, ayisk kī‑ihtāw pāmwayēs ē‑nihtāwikiyān.’

³¹ namōya ni‑kī-kiskēyimāw awīna ana ayisiyiniw ayiwāk kā‑itēyihtākosit, māka niya nipē-sīkahāhtākān nipiy ohci, ēkota ohci kita-kiskēymācik Israelīwiyiniwak.”

³² ēkwa John kwayask kī‑wīhtam tānisi ē‑kī-pē-ispayiyik, ē‑itwēt, “nikī-wāpamāw kā‑kanātisit ahcāhk ē‑pē-takocihk kīsikohk ohci tāpiskōc omīmīw ēkwa ē‑twēhototawāt.

³³ āhci piko namwāc nikiskēyihtēn ēcika awa ēwako, māka kisē-manitow ē‑pē-itisahot kita-sīkahāhtākēwak nipiy ohci ē‑kī-isit, ‘kika-wāpamāw kā‑kanātisit ahcāhk ē‑pē-nīhtakocihk ēkwa kita-twēhototawāt nāpēwa, ēwako ana kā‑sīkahāhtākēt kā‑kanātisit ahcāhkwa ohci.’

³⁴ nikī-wāpahtēn ōma, ēkwa kiwīhtamātināwāw ēwako ana manitowikosisān,” itēw John.

nistam okiskinohamawākana Jesus

³⁵ awasi-kīsikāw John āsay mīna kī‑nīpawiw asici nīso okiskinohamawākana.

³⁶ ēkwa ē‑kitāpamāt Jesusa ēkota ē‑pimohtēyit itēw, “hāw, ōhi omāyatihkoma kisē-manitow!”

³⁷ ōki nīso kiskinohamawākanak ē‑pēhtahkik ōma ē‑itwēyit, kī‑pimitisahwēwak Jesusa.

³⁸ ē‑āpasāpit mīna ē‑wāpamikocik ē‑pimitisahwācik, ōmisi kā‑itikocik, “kīkwāy ōma kā‑natonamēk?” ōmisi itēwak, “Rabbi,” (okiskinohamākēw itwēmakan), “tānitē ōma kā‑wīkiyan?”

³⁹ ōmisi ēsa kā‑itikocik, “āstamitik, pē‑wāpahtamok.” ēkosi kī‑ati-wīcēwēwak ēkwa kī‑wāpahtamwak ita kā‑wīkiyit ēkwa kī‑kiyokawēwak ē‑kapēsicik, ayisk āsay nānitaw nēwo tipahikan ē‑ispayiniyik.

⁴⁰ ana pēyak kā‑kiyokawāt Andrew, Simon Petera osīma,

⁴¹ sēmāk kī‑nitawi-miskawēw ostēsa, Simona, ēkwa itēw, “nimiskawānān nawasōnākan, (ēwako ana Christ) kā‑itiht.”

⁴² ēkwa itohtahēw Jesusa. Jesus ē‑kitāpamāt ōmisi kā‑itāt, “kiya ōma Simon, okosisa John. Cephas kika-isiyihkāson.” (Peter ē‑itwēhk anima.)

⁴³ ē‑wāpahk Jesus kīsēyihtam Galileehk kita-itohtēt. ēkotē kī‑nakiskawēw Philipa ēkwa itēw, “pē‑wīcēwin!”

⁴⁴ Philip Bethsaida kī‑ohcīw, ēkota ōcēnāsihk kā‑wīkicik Andrew ēkwa Peter.

⁴⁵ Philip kī‑nakiskawēw Nathanaela ēkwa wīhtamawēw, “nikī-miskawānān ana Moses kā‑kī-ācimāt owiyasiwēwi-masinahikanihk, ēkwa okiskiwēhikēwak mīna kī‑ācimēwak omasinahikēwiniwāhk. ēwako ana Jesus Nazarethihk ohci, okosisa Joseph.”

⁴⁶ “kīkway cī ē‑miywāsik kita-kī-ohcipayiw Nazarethihk?” isi-kakwēcihkēmow Nathanael. “pē‑wāpam,” itēw Philip.

⁴⁷ ispī Jesus ē‑wāpamāt Nathanaela ē‑pē-tāstamohtēyit ōmisi itēw, “ēwako nāha kihci-Israelīwiyiniw, namōya wīhkāc awiya kita-kakwē-wiyasihēw.”

⁴⁸ Nathanael ōmisi itēw, “tānitē ē‑ohci-kiskēyimiyan?” Jesus ōmisi kā‑itāt, “kikī-wāpamitin sīpā misi-sōmināhtikohk pāmwayēs Philip natomisk.”

⁴⁹ “okiskinohamākēw,” itēw Nathanael, “kiya ōma manitowikosisān! okihci-ōkimāmiwāwa Israelīwiyiniwak!”

⁵⁰ Jesus itēw, “ē‑tāpwēhtawiyan cī ōma ohci kā‑ititān, ē‑kī-wāpamitān ē‑apiyan sīpā misi-sōmināhtikohk? kika-wāpahtēn nawac mistahi kihci-kīkwaya ispihci ōma!”

⁵¹ ēkwa ōmisi itēw, “ē‑tāpwēyān ōma kā‑itwēyān: kika-wāpahtēnāwāw kihci-kīsik ē‑yōhtēpayik ēkwa kisē-manitow okīsikōma tāpiskōc ē‑pē-nīhtaciwēyit mīna ē‑āmaciwēyit ita ayisiyinīwikosisān ē‑nīpawit.”