ᐃᓯᐦᒋᑫᐃᐧᓂᐋᐧᐊᐧ 1 - Plains Cree Scripture Portions

¹ hāw Theophilus: nistam masinahikan kā‑kī-masinahamān ēkota nikī-ātotēn kahkiyaw kīkway kā‑kī-tōtahk Jesus ēkwa anima kā‑kī-kiskinohamākēt, nistam ohci kā‑māci-atoskēt

² piyisk anima kīsikāw kā‑kī-sipwētahiht kihci-kīsikohk isi. pāmwayēs kā‑sipwētahiht kī‑kiskinohamawēw otisahwākana, ē‑wīcihikot kā‑kanātisiyit ahcāhkwa.

³ nēwomitanaw kīsikāwa aspin okwātakihtāwin kī‑nōkohisōstawēw mihcētwāw, ēkota ohci tā‑tāpwē kita-kiskēyimiht ē‑pimātisit. kī‑wāpamēwak ēkwa kī‑pīkiskwātikwak ohci otipēyihcikēwiniyiw kisē-manitowa.

⁴ ēkwa ispī ē‑māmawopayicik, ōmisi itikwak, “ēkāya nakatamok Jerusalem, māka pēhihk nohtāwiy kita-miyikoyēk anima kā‑kī-asotahk, kā‑kī-māmiskōtamātakok.

⁵ ayisk John kī‑sīkahāhtawēw ayisiyiniwa nipiy ohci, māka namōya mihcēt kīsikāwa ōta ohci kika-sīkahāhtākawināwāw kā‑kanātisit ahcāhk ohci.”

Jesus ohpiskāw

⁶ ispī ē‑māmawopicik mīna, ōmisi itēwak Jesusa, “kā‑tipēyihcikēyan, kika-miyāwak cī ōma anohc Israelīwiyiniwak kita-pimipayihisocik ēkwa?”

⁷ Jesus itēw, “wiya piko nohtāwiy kitāpamikow kita-wiyastāt ispī ēkosi kita-ispayik. ēkosi namōya kiyawāw katāc kita-kiskēyihtamēk tānispīhk ēkosi kita-ispayik.

⁸ māka ispī kā‑kanātisit ahcāhk otihtikoyēko, kika-miyikawināwāw sōhkātisiwin, ēkwa kika-ācimināwāw Jerusalemihk, misiwē Judea askīhk, ēkwa Samaria askīhk, isko ē‑iskwastēk ōma askiy.”

⁹ ēkwa ē‑kīsi-pīkiskwēt Jesus kī‑ohpiskāwīhāw kihci-kīsikohk isi, kī‑tastasāpiwak ōki piyisk waskōhk ē‑ākawāstēskākoyit namōya ayiwāk kī‑wāpamēwak.

¹⁰ ē‑mēkwā-tastasāpicik kīsikohk isi aspin ē‑nakatikocik, kētahtawē nīso nāpēwa ē‑wāpiskisīhoyit kī‑wīcikāpawīstākwak.

¹¹ ēkwa ōmisi itikwak, “Galilīwiyinītik, tānēhki ōma ōta kā‑nīpawiyēk ē‑itāpiyēk kīsikohk? ēwako awa Jesus ē‑otiniht kihci-kīsikohk, ēkwa kita-takohtēw kīhtwām pēyakwan tāpiskōc kā‑isi-wāpamāyēk ē‑ohpiskāt kihci-kīsikohk isi.”

Judas kā‑tāpiskamākot

¹² ēkwa ōki nawasōnākanak kīwēwak Jerusalemihk isi, Olives waciy ohci nānitaw āpihtaw tipahaskān kihci-ōtēnāhk ohci.

¹³ ē‑takohtēcik Jerusalemihk kī‑ati-pīhtikwēwak wāskāhikanihk ispimihk ita ē‑kī-kapēsicik: Peter, John, ēkwa James ēkwa Andrew, ēkwa Philip ēkwa Thomas, ēkwa Bartholomew ēkwa Matthew, James okosisa Alphaeus, Simon ēwako kā‑wīcēhtahk tipēyimisowin otaskīwāhk, ēkwa Judas okosisa James.

¹⁴ ēwakoni ōki kī‑māna-māmawo-ayamihāwak asici iskwēwa ēkwa Marywa okāwiyiwa Jesusa, ēkwa wīcisāniyiwa nāpēwa.

¹⁵ namōya mihcēt kīsikāwa ē‑ispayik, ita kiskinohamawākana ē‑ayāyit, nānitaw mitātahtomitanaw nīsitanaw ē‑ihtasicik, Peter ē‑nīpawit ōmisi itēw,

¹⁶ “niciwāmitik, ohcitaw kihci-masinahikanihk kā‑kī-itastēk kita-ispayik kita-tāpwēmakahk, kā‑kanātisit ahcāhk kā‑kī-itwēhāt Davida tānisi Judasa ē‑wī-tōtamiyit, ēwako ē‑kī-kiskinohtahāt anihi nāpēwa kita-otināyit Jesusa,

¹⁷ Judas kikī-wīcēwikonaw ayisk ēwako ē‑kī-nawasōniht kita-wītatoskēmikoyahk.”

¹⁸ anihi ohci sōniyāwa kā‑kī-miyiht omaci-tōtamowin ohci, kī‑atāwēw askiy, ēkota kā‑kī-nipahisihk. kī‑pāskatayēsin otakisiya ē-kwayakopayiyiki.

¹⁹ kahkiyaw ayisiyiniwak Jerusalemihk ohci kī‑pēhtamwak, ēwako ohci otitowēwiniwāhk Akeldama, askiy kā‑mihkowik kī‑isiyihkātamwak.

²⁰ Peter ati-itwēw, “ayisk masinahikātēw kihci-masinahikan nikamowina, ‘kiyām owāskāhikan kita-pisikwastēyiw ēkwa namōya awiyak ēkota kita-wīkiw.’ asici itastēw, ‘mahti kotak awiyak kita-mēskocīstamāk.’

^21-22 “ēkosi māka kiyām kotak awiyak kika-wīcihikonaw kita-wīhtahk Jesusa kā‑tipēyihcikēyit ē‑kī-āpisisiniyit. wiya pēyak nāpēw ē‑kī-pē-wīcēkoyahk mēkwāc Jesus ē‑papā-wīcēwikoyahk, aspin ohci John kā‑kī-kakēskihkēmot osīkahāhtākēwin isko anima kīsikāw Jesus kā‑kī-ohpiskāwihiht, kihci-kīsikohk isi.”

²³ ēkosi nīso nāpēwa kī‑otinēwak, Joseph āskaw ayisiyiniwak Barsabbas kī‑isiyihkātēwak ēkwa mīna āskaw Justus, ēkwa kotak Matthias.

²⁴ ēkwa kī‑ayamihāwak ē‑itwēcik, “kā‑tipēyihcikēyan, kikiskēyihtēn tānisi nāpēwak ē‑isi-māmitonēyihtahkik, wīhtamawinān tānāna nāpēw kā‑nawasōnat

²⁵ kita-mēskocīstamawāt Judasa kā‑kī-sipwēhtēt ita kā‑kaskihtamāsot.”

²⁶ ēkwa kī‑sīkiwēpinikēwak, ēkosi Matthias ēwako kī‑otināw kita-wīcēwāt pēyakosāp itisahwākana.