RUTH 1 - Pathian Laisiangthou (BSI)

Elimelek Leh A Inkuan Moab Ah A Pem Uh

¹ Vaihawmmite’n vai a hawmlai un hichi ahi. Huai gam ah kial a kia hi. Judah gam a Bethlehem mi khat Moab gam a teng tadih din amah leh a zi leh a tapate nih toh a hoh uhi.

² Huai mi min Elimelek ahi, a zi min Naomi ahi, a tapate nih min Malon leh Kilon ahi. Amau Judah gam a Bethlehem, Ephrath mi ahi uh. Moab gam ah a hoh ua, huai ah a om nilouh uhi.

³ Elimelek, Naomi pasal a si a, amah leh a tapate nih kia ahita uh.

⁴ Amau Moab gam numei zi in a nei ua, a khat pen min Orpah ahi a, a khat pen min Ruth ahi. Huai ah kum sawm a omta uhi.

⁵ Mahlon leh Kilon a si tuaktuak ua; huchi in huai numei a tate nih leh a pasal in a sihsanta uhi.

Naomi Leh Ruth Jerusalem Kiknawnna

⁶ Huchi in a moute toh Moab gam apan kiknawn din a kisa uh. Toupa’n nekding pia a mite a vehdan Moab gam apan a na zak ziak in.

⁷ Huchi in a omna apan a moute nih toh a pawt ua; Judah gam a kiknawn din a paita uhi.

⁸ Naomi in a mou nihte kiang ah,“Na nute uh inn tuak ah pai nawnta un. Misi tung leh ka tung a siamtak a na hih bang un Toupa’n na tung uah hih hen.

⁹ Toupa’n na nih un na pasalte uh inn a khawlna na muh theihna ding un hon hehpih hen” a chi hi. Huchi in a tawp a, aw suah hial in a kapta uhi.

¹⁰ Amau a kiang ah, “Pai kei nung, na chite kiang a na paina ah ka tel sam ding uh” a chi uhi.

¹¹ Naomi in, “Ka tanute aw, pai nawn zaw un. Bangziak a ka kiang a hongpai sam mahmah ding na hi ua? Na pasal ding uh tapate ka pai thei nawn dia hia?

¹² Ka tanute aw, Kisa unla, pai un. Pasal nei din lah ka upa lawta ngal a. Lametna ka nei chimah leng, tuzan mahmah in leng pasal nei in tapate leng neimah leng,

¹³ a pichin tan ua om ding na hi ding uam? Pasal lou in na om nilouh ding ua hia? Hi tellou e, ka tanute aw; nou ziak in ka lungkhamna a uang semsem hi. Toupa khut ka tung a tu eita ve” a chi hi.

¹⁴ A aw uh suah in a kapnawn leuleu uh. Huchi in Orpah in a pi a tawp a; Ruth in bel a len chinten hi.

¹⁵ Aman, “Ngai in, na moupihnu a chite kiang leh a pathian kiang ah a pai kiknawnta. Nang leng na moupihnu delh inla, pai nawnta in aw” a chi hi.

¹⁶ Ruth in, “Nang khen ding leh nang zuilou a kiknawn ding in hon kun ken. Na paina peuh ah ka pai dia; na giahna peuh ah ka giak dia; na chite ka chite ahi ding ua, na Pathian ka Pathian ahi ding.

¹⁷ Na sihna peuh ah ka si dia, huai ah n’on vuisam ding ahi. Nang leh kei sihna loungal thil dang in a honkhen leh Toupa’n a hihhih in honhih henla, hiai sang a thupizaw in leng” a chi hi.

¹⁸ Huchi in a kiang a pai a tum chiltel chih a theih in a daihsanta hi.

¹⁹ Huchi in Bethlehem tan a paikhawmta uh. Hichi ahi a, Bethlehem a tun un, a khozang un a ling ua, numeite’n, “Hiai Naomi ahi maw?” a chi uh.

²⁰ Aman a kiang uah, “Naomi honchi kei un. Marah honchi zaw un.” Bangkim hihtheipa’n lah khatak in a hon hihta ngal a, a chi hi.

²¹ Buchingtak in ka pawt a, Toupa’n a vuak in a honpi nawn hi. Toupa’n ka tung ah a lungkim louhna a hihlang a, Bangkim hihtheipa’n a honhih gentheih dan theigige napi a bangdia Naomi honchi lailai na hi ua?“ a chi hi.

²² Huchi in Naomi a hongkik a, a mounu Moab mi Ruth toh Moab gam apan a hongkik uhi. Barli buh lak pattung lai in Bethlehem a hongtung uhi.