PHILEMON 1 - Pathian Laisiangthou (BSI)

Chibaibukna

¹ Paul, Khrist Jesu hentapa leh i unaupa Timothi in, ka deihtak leh ka sepgimpih uh Philemon kiang leh,

² Ka sanggamnu uh Apphia kiang ah, ka sepaihpih uh Arkipas kiang leh na inn a saptuam kikhawmte kiang ah leng;

³ Pathian i Pa leh Toupa Jesu Khrist kiang a kipan hehpihna leh lemna na kiang uah om hen.

Philemon Itna leh Ginna

⁴ Ka thumnate ah na minlou gige in, ka Pathian kiang ah kipahthu ka gen hi;

⁵ Toupa Jesu lam leh misiangthou tengteng lam a itna leh ginna na neih za in.

⁶ Na ginna ki koppihna, noumau a om thil hoih chiteng theihkimna lam ah Khrist lam a a hong phattuam theihna ding in.

⁷ Unaupa aw, nangmah ziak a misiangthoute lungtang a hong halhtak ziak in na itna ah ka kipakin ka kha a muang mahmah hi.

Onesima Ding a Ngetsakna

⁸ Huaiziak in a kilawm hun hih ding in nang thu honpiak Khrist ah kingap mah leng,

⁹ Itna ziak in, Paul putek hial ka hi a, tun ah Khrist Jesu hentapa ka hita a, a nget in k’on ngenzaw hi:

¹⁰ Ka ta Onesima, kolbun kawm a ka neihkhiak, amah a ding in na kiang ah ka ngetsak hi.

¹¹ Tuma lam in nang ading in a phatuam kei a, tun zaw kei leh nang ading in a phatuamta hi.

¹² Amah, ka lungtang mahmah na kiang ah k’on sawlkik nawn hi.

¹³ Amah Tanchinhoih a ka kolbutna a nangmah sik a nna a hon sepsak theihna ding in ka kiang a omsak nilouh ka ut mahmah hi.

¹⁴ Himahleh na hehpihna hehpihsak teitei bang hilou in, na thu bang ahihtheih zawkna ding in, na thulou in bangmah hih ka ut kei hi.

¹⁵ Sawtloukal nang a honkhen tangtawn a amah na neih tawntungna ding ziak ahikha mai ding hi,

¹⁶ Himahleh sikha bang hi nawnlou a, sikha sang a hoih unau deihtak bang zaw in; kei ading in deihtak a hituama, nang ading ngial in sa leh Toupa ah nak hihna in chia!

¹⁷ Huchi in, lawma n’on sim leh keimah bang in amah na kipahpihin.

¹⁸ Huan na tung a banghiam a hihkhelh a, na thil banghiam a bat leh keimah bat in bawl in.

¹⁹ Kei Paul in keima khut ngei a ka gelh ahi. Keimah in ka ditsak ding hi; ka kiang a nangma’n leng bat na neihsam dan honhilh zaw ka hi kei hi.

²⁰ Ahi, unaupa aw, nangmah ziak in Toupa ah ka kipahna hon neisak inla, Khrist ah leng ka lungtang hihhalh in.

²¹ Ka gen sang a thupizaw tham in na hih ding chih ka theih ziak in, n’on man gingta in na kiang ah ka gelh ahi.

²² Abang abang hileh, huai kia hihlou in, tunna ding hon na suktuah sak in; na thumnate uh ziak in na kiang ua piak ka hi ding chih ka kigingta hi.

Chibaibukna Nanung

²³ Epaphras, Khrist Jesu a ka hentakpih pa’n chibai a honbuk hi:

²⁴ Huchi mah bang in ka seppih Mark, Aristarkhas, Demas, leh Luke te’n leng chibai a honbuk uhi.

²⁵ I Toupa Jesu Khrist hehpihna na kha uah om hen, Amen.