OBADIAH 1 - Pathian Laisiangthou (BSI)

Obadiah Mengmuhna, Toupa’n Edom gawt ding

¹ Obadiah mengmuhna Toupa Pathian in Edom tungtang ah hichi in a chi: Toupa a kipan thu ka thei a, namte lak ah palai sawl ahi, Thou unla, kidouna ah amah dou ding in i kuan ding uh, chi in.

² “Ngai dih, namte lak ah k’on hihneuta hi; nakpi a muhsit in na omta hi.

³ Aw nang, suangpi kitam kal a teng, mun sang luah, kuan ahia lei a hon kesak ding lungsim a chipa? Na lungtang kisaktheihna in nang a hon khemta hi.

⁴ Muvanlai bang in sangpi ah lengtou mahle chin, na bu leng aksi lak a seh in om mah leh, huai a kipan k’on kaikhe suk ding, Toupa’n a chi.

⁵ “Na kiang ah gutate, suamhatte zan in hongpai le uh, hihman nak hih na ni chia, a deihzah un a gukei ding ua hia? Na kiang ah grep lakhawmmite hongpai le uh, grep lak ding khenkhatte a nuse kei ding ua hia?

⁶ Esau thilte zonkhiak ahita a; A goubawm selgukte maikhiak ahita hi:

⁷ Nang lawmte khem in na om a, gamgi pha in hon delhkhe ding ua: na kituahpihte’n nang a hon zouta ua; na tanghou nete’n na nuai ah thang a kam ua; amah ah theihsiamna a omkei hi.

⁸ “Huai ni chiang in Edom a kipan mipilte ka hihmang in, Esau tang a kipan theihsiamna ka hihmang kei dia hia? Toupa’n a chi.

⁹ Aw Teman, Esau tang ah michih thahgam a a omvekna ding ua, na mihatte nakpitak in a lunglel ding uh.

Edom gawt a om ziak

¹⁰ “Na unaupa Jakob tung a na hiamgamna ziak in zumna in nang a honkhuh ding, tangtawn a hihmanthat in na om ding hi.

¹¹ Langkhat a na din ni a, mikhualte’n a sum a lakmang ni ua, namdang mite a kulh kongkhak a a honglut ua, Jerusalem tung a ai a san lai un, nang leng amau lak a tel bang in na om hi.

¹² Himahleh na unaupa a siatlai in awibawl kenla, Judah tate a manthat ni un kipak ken; a haksat ni’n kisatheitak in pau ken.

¹³ Ka mite a vangsiat ni un a kullh kongpi uah lut kenla; a vangsiat ni un a thuakna uh en kenla, a vangsiat ni un a sum leh paite uh tung ah na khutte uh nga sam kei un.

¹⁴ A mi khenkhat taikhete that ding in lamthuam ah ding in haksat ni’n a mi omsunte mansak ken.

Namte tung a thukhenna

¹⁵ “Nam tengteng tung ah Toupa ni lah a nai ngal a: na hihsiat mah bang in na tung ah hih ahi ding; na hihdan nangmah luzang ah hongkik ding hi.

¹⁶ Ka tang siangthou a na dawn bang un, nam tengteng in a dawn gige ding ua, ahi, a dawn ding ua, a valh ding ua, pianglou bang in a om ding uh.

Israelte vualzohna

¹⁷ “Zion tang ah bel taikhete a om ding ua, a siangthou ding uhi; Jakob inkawte’n a goutante uh a tang ding uhi.

¹⁸ Jakob inkawte mei ahi ding ua, Joseph inkawte meikuang ahi ding, Esau inkawte buhpawl ding ahi ding ua, amau lak ah a kuang ding uh, a kang mang ding uh: Esau inkawte a val a omkei ding uh; Toupa’n lah a chita ngal hi.

¹⁹ “Simlam mite’n Esau mual a tang ding a; phaizang mite’n Philistia a tang ding uh: amaute’n Ephraim leh Samaria lou a tang ding uh: Benjamin in Gilead gam a tang ding hi.

²⁰ Kanaan mite lak a hiai Israel suan saltang mipite’n Zarephath gam tan a tang ding ua: Sephrad gam a Jerusalem khomite saltang in Simlam khopite a tang ding uhi.

²¹ Zion tang apan Esau dou ding in a kuantou ding ua, a tung ah vai a hawm ding uhi; huan gam Toupa a ahi ding hi.”