MARK 7 - Pathian Laisiangthou (BSI)

Thugousiah Thu Dotna

¹ Huan Pharisaite leh laigelhmite lak a mi kuate hiam, Jerusalem khua a kipan a kiang ah a hong kikhawm uhi.

² Huaite’n nungzui khenkhatte’n khut ninpi a tanghou a nek uh a mu ua, nin, chih tuh, sillou, chihna ahi.

³ Pharisaite leh Juda tengteng in Upate thugousiah a pom chinten ziak un a khut uh hoihtak a a silkei uleh a ne ngeikei uhi.

⁴ Dawlmun a kipan a a pai un leng a kisil phot kei uleh a ne ngeikei uhi. Huan thugousiah dang tampi a chin uh a om, nou, bel, taubelte sil thute ahi.

⁵ Huchi in Pharisaite leh laigelhmite’n, “Bang achia na nungzuite’n upate thugousiah bang a omlou a, khut ninpi a tanghou ne uhiam” chi in, a dong uhi.

⁶ Aman a kiang uah, “Isai in nou milepchiahte thu a na genkhol dik hilhial ve, ‘Hiai mite’n a muk un a hon zahtak ua, a lungtang un hon gamlat uh’ a chi hi.

⁷ ‘Mihing thupiakte a sinsak lel ziak un a hon biak uh a thawn ahi,’ chih gelh bang in.

⁸ Pathian thupiakte nelhsiah in mihing thugousiah na len chinten ua eive” a chi hi.

⁹ A kiang uah, “Na thugousiah uh na zuih theihna ding ua Pathian thupiakte na deihlouh uzaw, lem na thei hial ve ua.

¹⁰ Mosi in, Na nu leh na pa zahtak in, Kuapeuh a nu hiam a pa hiam gensia si mahmah hen, a chi a;

¹¹ Nou hichibang in na chi ua, min, a nu hiam, a pa hiam kiang ah, n’on phatuampihna ding Korban ahita, a chih leh, huai tuh Pathian kiang a piak, chihna ahi.

¹² A nu ading hiam, a pa ading hiam a bangmah hihsak na phal nawn kei nak uh.

¹³ Na thugousiah uh na piak sawnsawnna un Pathian thu bangmahlou na suah uhi; huai bang thil tampi na hih uh” a chi hi.

Mihing Hihninte

¹⁴ Huan mipite a sam nawn a, a kiang uah, “Na vek un ka thu ngaikhia unla, theisiam un:”

¹⁵ Mihing pawlam a kipan asung a lut amah hihnin thei bangmah a omkei; mihing sung a kipan a hongpawt, huaite mihing hihnin ahizaw hi.

¹⁶ Kuapeuh zakna ding bil nei in, za hen!” a chi hi.

¹⁷ Mipite inn a a lutsan nung in a nungzuite’n gentehna thu amah a dong chian uhi.

¹⁸ Aman a kiang uah, “Nou leng huchitel a theihsiamna neilou na hi u maw? Bangpeuh pawlam a kipan a mihing sung a lut in amah a hihnin theikei chih na theikei ua hia?

¹⁹ A lungtang sung a lutlou a, a gilpi sung a a lut zawk ziak in leh dailenna a pawt khemai a hih ziak in” a chi a. Huai tuh an chiteng a siang, a chihna ahi.

²⁰ Mihing sung apan hongpawt, huai ngeingei in mihing a hihnin nak ahi.

²¹ Mihingte sunglam lungtang a kipan in, ngaihtuahna giloute a hongpawt nak hi:

²² Kingaihna, guktakna, tualthahna, angkawmna leh enna, gitlouhna, khemhatna, bevenna, hazatna gensiatna, kisaktheihna leh, haihuainate ahi.

²³ Hiai thilgiloute tengteng sunglam a kipan a hongpawt a, mihing a hihnin nak hi” a chi hi.

Jentel Numei Hihdamna

²⁴ Huan a thou a, huai a kipan in Tura leh Sidon uk ah a paita hi. Inn ah a lut a, kuamah theih a deihkei a; himahleh a kisel theikei hi.

²⁵ Huchi in numei khat, a tanu naupang chik dawininpai in, a tanchin a naza a, a khebul ah a khupboh hi.

²⁶ Numei Grik mi ahia, Siriaphoinisia gam a piang ahi. Aman a tanu sung a kipan a dawi delhkhe ding in a ngen hi.

²⁷ Aman a kiang ah, “Tate hongvah masa uhen aw; tate tanghou laksak a uite kiang a paih kilawmlou hi” a chi hi.

²⁸ Numei in a kiang ah, “Toupa, hihzaw ahi a, himahleh dohkan nuai a uite’n leng tate tanghou nen a ne zel sam vaw oi” chi in a dawng hi.

²⁹ Aman, a kiang ah, “Na thugen ziak in paita in: dawi na tanu sung a kipan a pawtta hi” a chi hi.

³⁰ Huan a inn ah a paita, a tanu, dawi in a pawt khiaksan, lupna a lum a va muta hi.

Bengngong Pautheilou Hihdamna

³¹ Huan Tura gam a kipan a pawtnawn a, Sidon khua tawn in Dekapolis gam Paikan in Galili dil a tungta hi.

³² Mi khat bengngong, pau leng pau kichian theilou a kiang ah hon tonpih ua, a tung a khut koih ding in a ngen uhi.

³³ Aman mipi lak a kipan in amah kia in a pituam a, a khut zungte in a bilsung a khoih a, chilsia in a lei a khoihsak hi;

³⁴ Vanlam en in a khoisa huthut hi. Huan a kiang ah “Ephatha” a chi a; huai bel, “Kihongta in” chihna ahi.

³⁵ Huchi in a bilte uh a hong kihong a, a leigakna leng a hong kiphel a, chiantak in a pautheita hi.

³⁶ A kiang uah, kuamah hilhlou ding a chi bikbeka; himahleh a nak kham phet in, a nak tangkoupih zawsem uhi.

³⁷ “Aman bangkim hoihtak in a hih a; bengngongte nangawn a pausak zel,” a chi ua, lamdang a sa mahmah uhi.