MARK 6 - Pathian Laisiangthou (BSI)

Nazaret Jesu Deihlouhna

¹ Huan huai a kipan a pawt a, a omna kholam a tungta a; a nungzuite’n a zui uhi.

² Khawlni a honghi a, kikhopnain ah thu a hilh a; mi tampi a thu zate’n, “Hiai min hiai thu koi a kipan a muh ahia? Hiai mi kiang a pilna piak bang pilna ahia? A khut in hichi tel a thillamdang a hih bangchidan ahia?” a na chi uhi.

³ Hiai mi Mari tapa, Jakob, Joses, Juda leh Simon sanggampa, singlem bawlpa ahi ka hia? A sanggamnute leng hiai a i kiang ua om ahi kei ua hia?” a chi ua, lamdang a sa mahmah uhi. Huchi in, a tung ah a lungkim kei uhi.

⁴ Jesu’n a kiang uah, “Zawlnei zaw amah kholam ah, amah inkawte lak ah, amah inn kia loungal ah pahtawi louh in a om ngeikei” a chi hi.

⁵ Huan, midamlou tawmchikte tung a khut koih a a hihdam kia loungal huai ah thil thupi ahihkei hi.

⁶ A gintak louh uh lamdang a sa mahmah hi. Huan, thuhilh kawm in khuate a tawn vialvial hi.

Sawltak Sawmlehnihte Sawlkhiakna

⁷ Huan sawmlehnihte a sam a, nihnih in a sawlkhia a; dawininte tung a thuneihna leng a pia hi.

⁸ A zinna ua ding in chiangkhun kia loungal bangmah tanghou leh kawlzal leng, a kawnggak ua dangka tawilouh ding a chi bikbek hi.

⁹ Khedap bel but ding a chi a; puanak nih silh kei un, a chilai hi.

¹⁰ Huan a kiang uah, “Koipeuh ah leng na tunna inn uah, huai kipan na pawt mateng uh tung kinken un

¹¹ Huan koi khua peuh in a hon kipahpih kei ua, na thu uh a ngaihkhiak kei ua leh huai a kipan na pawt chiang un, amau mawhpaih ding in, na khepek nuai ua leivui kai na tatkhe ding uh” a chi hi.

¹² Huchi in a paikhia ua, mite a kisik ding uh ahi chih a gen uhi

¹³ Dawi tampi leng a delhkhia ua, damlou tampi leng thau a nilh ua, a hihdam uhi.

Baptispa Johan Sihna

¹⁴ Huan kumpipa Herod in a naza a, a min a than ziak in, “Baptispa Johan, misi lak apan thounawn a, huaiziak in huai thilhihtheihnate’n amah a sem ahi, a chi hi.

¹⁵ Midangte’n bel, “Elijah ahi, a chi ua; midangte’n, malai zawlneite bang zawlnei khat ahi” a chi uhi.

¹⁶ Herod in bel a na zak in, “A lutang ka tanpa ngei, hong thounawnta ahi,” a chi hi.

¹⁷ Herod in a unau Philip zi Herodia ziak in mi a sawlkhia a, Johan a mansak a, suangkulh ah hen in a na khumkhinta hi. Herodia zi in a na neita ngal a.

¹⁸ Johan in, Herod kiang ah, “Na unaupa zi na neihsak sianglou ahi” a na chih khit ziak in.

¹⁹ Huaiziak in Herodia in amah a mudah a, hihlup a ut a, himahleh a hih theikei hi.

²⁰ Herod in, Johan midiktat leh siangthou ahi chih a theih ziak in amah a kihta hi, amah a en a, a thu a zak in, thil tampi a hih a, kipaktak in a ngaikhia hi.

²¹ Huan Herod in a pian ni’n a mi thupite, sepaihheutu liante, Galili gam a miliante ading a zana Ankuang a luilai in hunlemtang a hong omta hi.

²² Herodia tanu a honglut a, a lam a, Herod leh a Ankuang umpihte a kipaksakta hi. Kumpipa’n numei naupangnu kiang ah, “Na deihdeih hon ngen in, k’on pe ding” a chi hi.

²³ “Bangpeuh n’on nget phot, ka honpe ding, ka gam kimkhat nangawn leng” chi in a kiang ah a kichiam hial hi.

²⁴ Amah a pawt a, a nu kiang ah, “Bang ka ngen dia?” a vachi hi. A nun, “Baptispa Johan lutang” a na chi hi.

²⁵ Huan amah kintak in kumpipa kiang ah a valut paha, “Kuang in Baptispa Johan lutang n’on piak pah ka ut” chi in, a ngen hi.

²⁶ Huan kumpipa a lungkham mahmahta a; himahleh a kichiamna leh a Ankuang umpihte ziak in a sel nuam kei hi.

²⁷ Huan kumpipa’n amah vengte lak a sepaih khat a lutang vala ding a thupia in a sawlpah hi. Amah suangkulh ah pai in a lutang a vatan kheta hi.

²⁸ Huai lutang kuang in a hontawi a, numei naupang kiang ah a pia a, huan numei naupang in a nu kiang ah a peta hi.

²⁹ Huan a nungzuite’n a zak un, a luangla in, han ah a vuita uhi.

Sawltakte Kikna Leh Mipi Sang Nga Vakna

³⁰ Huan sawltakte Jesu kiang ah a hong kikhawm ua, thil bangkim, a thil hihpeuh uleh a thuhilh peuh uh, a honghilh uhi.

³¹ Aman a kiang uah, “Noumau kia in gamdai mun ah a tuam in hong unla, khawl tadih un” a chi hi. Mipi a tam a, a kuan leh a pai a kiphamat ua, an nangawn leng a ne mankei uhi.

³² Huchi in gamdai mun ah long in a paimangta uhi.

³³ Mite’n a pailai uh a mu ua, mi tampi in amau a thei ua, khochih apat huai ah khe in a taikhawm ua, a na makhelhta uhi.

³⁴ Huchi in amah hong paikhiak in mipi tampitak a muta a, ching ding neilou belamte bang a hih ziak un a lainat mahmah a, thu tampi a hilhta hi.

³⁵ Huan ni a kai mahmahta a, a nungzuite a kiang ah a hong ua, “Hiai gamdai mun ahi a, ni a kaita mahmah hi.

³⁶ I kim a loute leh khuate ah hoh a, a nekding uh banghiam bek a lei theihna ding un amaute paisak ta in” a chi uhi.

³⁷ Aman bel a kiang uah, “Noumau nekding pia un” chi in, a dawng hi. Amau a kiang ah, tanghou makhai za nih man valei in nekding peding ka ding uam?” a chi uhi.

³⁸ Aman a kiang uah, “Tanghou phel bangzah na nei ua? Hon en dih ua” a chi a. Huan a neihzah uh a theihtak un, “Nga leh ngasa nih toh” a chi uhi.

³⁹ Huan aman, avek un, loupa hing tung ah a pawlpawl a tusak ding in a kiang uah thu a pia hi.

⁴⁰ Vual za khat, sawmnga, zel in a tu uhi.

⁴¹ Huan aman tanghou phel nga leh ngasa nih a la a, vanlam en in a vualzawl a, tanghou phelte a balkhama, a ma ua lui ding in a nungzuite kiang ah a pia a; ngasa nih leng huaite tengteng lak ah a hawmzak hi.

⁴² Avek un a ne ua, a kham chiat uhi.

⁴³ Huan tanghou leh ngasa nente bawm sawmlehnih a dim hi.

⁴⁴ Tanghou phel nete pasal piching ngen sang nga ahi uh.

Tui Tung ah Jesu Khe In Pai

⁴⁵ Huan mipi a kikhensak nung in galkhat lam a Bethsaida khua a na pai masa ding in a nungzuite long ah a tuangsak teitei hi.

⁴⁶ Amau a kikhensak nung in thum ding in tang ah a hohta hi,

⁴⁷ Nitaklam a hong hih in, long dil laitak ah a omta a, amah kia in gam ah a om hi.

⁴⁸ Long kalh a mangbang in amaute a mu a, huih in a hilou lam ah a sep hi. Huchi in zanven lina ding kuan in dil tung a khe a pai in amau lam a honzuan a, amau paisuak san a tum hi.

⁴⁹ Himahleh amah dil tung a khe a pai a muh un sikha sa in, a kikou khia uhi.

⁵⁰ Avek un amah a mu ua, a lau mahmah uhi. Himahleh aman amau a houpih paha, a kiang uah, “Khamuangtak in om un, keimah ka hi, lau kei un” a chi hi.

⁵¹ Huan long ah a kiang uah a tuangtou sam a, huih a dai maimah hi. Huan lamdang a sa mahmah uhi.

⁵² A lungtang uh a khauh ziak in tanghou beu thillamdang thu a ngaihtuah ban kei uhi.

Gennesaret A Hihdamna

⁵³ Huan galkhat lam a kai un Gennesaret gam a tung ua, luipiau ah long a khih uhi.

⁵⁴ Long a kipan a pawt nung un mite’n amah a na theipah uhi,

⁵⁵ Huai gamkim tengteng ah a tai ua, a om chih a zakna peuh uah damloute a lupna un a honzawng hial uhi.

⁵⁶ Huan khoneu leh kholian ah khopi leh khota leh koipeuh ah leng a lutna ah damloute, dawlmun ah a lumsak ua, a puanmong bek khoihsak din a ngen ngutngut uhi. Huan amah khoih peuhmah a dam uhi.