MARK 10 - Pathian Laisiangthou (BSI)

Kimak Thu a Dotna

¹ Huan ading a, huai a kipan Judia gam ah leh Jordan gal ah a paita hi. Mipite a kiang ah a hong kikhawm ua; huchi in, a hih ngei dan in amau thu a hih nawn hi.

² Pharisai khenkhat a kiang ah a hong ua, amah ze-etna ding in, “Min zi a mak a siang hia?” chi in, a dong uhi.

³ Aman a kiang uah, “Mosi in bangchi’n thu a honpia a?“ chi in, a dong hi.

⁴ Amau, “Mosi in kimakna laigelh a mak a phal hi” a chi uhi.

⁵ Himahleh Jesu’n a kiang uah, “Na lungtang khauh ziak un ahi huai thupiak nou adia a hon gelhsak.

⁶ Himahleh leitung piantung a kipan, Pathian in amau numei leh pasal a siam hi.

⁷ Huai thu ziak in pasal in a nu leh a pa a paisan ding a, a zi a len chinten ding;

⁸ Huchi in, a nih un sa khat a hong hita ding ua; nih ahi nawn ta kei ua, sa khat a honghi zawta ding uh.

⁹ Huaiziak in Pathian in a gawmsa mihing in khen kei hen” a chi hi.

¹⁰ Huan inn ah a nungzuite’n huai thu amah a dong nawn uhi.

¹¹ Aman a kiang uah, “Kuapeuh a zi ma a, midang nei in a zi ang a kawm san hi;

¹² Aman leng a pasal khen a, midang a neih leh, angkawm ahi” a chi hi.

Jesu’n Naupang Neute A Vualzawl

¹³ Mite’n a khoih ding in naupang neute a honpi ua; himahleh nungzuite’n huai mite a na tai uhi.

¹⁴ Himahleh Jesu’n huai a muh in a lunghi kei mahmah a, nungzuite kiang ah, “Naupang neute ka kiang ah hon paisak unla, kham kei un; Pathian gam hichibang mite a ahi ngal a” a chi hi.

¹⁵ Chihtaktak in k’on hilh ahi, “Kuapeuh Pathian gam naupang neute’n a kipahpih bang a kipahpihlou asung ah a lut kei hial ding” a chi hi.

¹⁶ Huan amau pom in, a tung uah a khut koih in a vualzawlta hi.

Mihausa Leh Hauhna In Lam A Khakna

¹⁷ Huan pai ding a a pawtlai in mi khat amah lam ah a hongtai a, a ma ah a khukdin a, a kiang ah, “Sinsakpa hoih, tangtawn hinna ka tan theihna ding in bang ka hihdia?” chi in, a dong hi.

¹⁸ Jesu’n a kiang ah, “Bangdia hoih honchi? Mi khat kia loungal kuamah hoih a omkei uh, huai Pathian ahi.

¹⁹ Thupiakte na thei vaw oi; tualthat ken, angkawm ken, gu ken, hek ken, khem ken, na nu leh na pa zahtak in, chihte” a chi hi.

²⁰ Aman a kiang ah, “Sinsakpa, huai tengteng ka naupan lai a kipan ka zuita” a chi hi.

²¹ Jesu’n amah a en a, a it ta a, a kiang ah, “Hih ding khat neilai chia; pai inla, na neih peuhmah zuak inla, tagahte kiang ah pia in, huchi in van ah gou na nei ding; huan hongpai inla, honzui in” a chi hi.

²² Himahleh, huai thu ah a mel a hong mual a, lungkhamtak in a paimangta; mi hausa a hih ziak in.

²³ Jesu’n a en vialvial a, a nungzuite kiang ah, “Mi hausate ding in Pathian gam lut haksat tuak na mai e” a chi hi.

²⁴ Nungzuite’n a thugen lamdang a sa mahmah uhi. Jesu’n a kiang uah, “Naute aw, hauhna muangte adin Pathian gam a lut a haksa ngei e.

²⁵ Mihausa Pathian gam a lut sang in sangawngsau phim bilvanga lut paisuak a baihlam zaw” a chi hi.

²⁶ Amau lamdang a naksak mahmah ua, a kiang ah, “Ahihleh, kua hotdam ahi thei dia?” a chi uhi.

²⁷ Jesu’n amau a en a, “Huai zaw mihing adin hihvual ahikeia, Pathian adin bel hih vuallouh ahi kei: Pathian adin bangkim hih theih ahi ngal a” a chi hi.

²⁸ Peter in a kiang ah, “Ngai dih, kou bangkim paisan in k’on zui ua” chi’n a genpan hi.

²⁹ Jesu’n “Chihtaktak in k’onhilh ahi, kuapeuh keimah ziak leh Tanchinhoih ziak a inn, unaupate, unaunute, nu, pa, tate leh gamte paisan,

³⁰ Tu damsung mahmah in, innte, unaupate, sanggamnute, nute, tate, gamte a leh za in, sawinate toh, hun hongtung ding a tangtawn hinna toh mulou ding mahmah omkei hi.

³¹ Himahleh mi tampi masapena omte nanungpen a honghi ding ua, nanungpente leng masapen a honghi ding uh” a chi hi.

Jesu’n A Sih Ding Thumvei Genkholhna

³² Huan Jerusalem khua a hohtou ding in lampi ah a om ua; Jesu’n a ma uh a kai hi; amau lamdang a sa mahmah ua; a honzuite’n a kihta uhi. Aman sawmlehnihte a pituam nawn a, a tung a tung dingte a hilh hi.

³³ “Ngai dih ua, Jerusalem khua a hohtou ding i hi ua; Mihing Tapa siampu liante leh laigelhmite khut a matsak in a om ding; amau si ding in a tung ah thu a hihpuk ding ua, Jentelte kiang ah a pe ding uhi;

³⁴ Amau nuihzabawlna’n a nei ding ua, chil a siatkhum ding ua, a vaw ding ua, a that ding uh; himahleh ni thum nung in a thounawn ding” chi in, a tung a thiltung dingte amaute a hilh hi.

Jakob Leh Johan Ngetna

³⁵ Huan Zebedai tapa Jakob leh Johan in amah a hongnaih ua, a kiang ah, “Sinsakpa na kiang a k’on nget peuh uh n’on hihsak ka ut uh” a chi uhi.

³⁶ Aman a kiang uah, “Nou adin bang hon hihsak leng na ut ua?” a chi hi.

³⁷ Amau a kiang ah, “Na thupina ah na taklam ah khat, na veilam ah khat hon tusak in” a chi uhi.

³⁸ Jesu’n a kiang uah, “Na nget uh na theikei ua ahi. Ka nou dawn ding na dawn thei ding ua hia? Ka baptisma tan ding leng na tang thei ding ua hia?” a chi hi.

³⁹ Amau a kiang ah, “Thei e” a chi uhi. Jesu’n a kiang uah, “Ka nou dawn ding na dawn ding ua, ka baptisma tan ding leng na tang ding uh:

⁴⁰ Himahleh ka taklam leh ka veilam a tut ding thu zaw kei piak ding a hi kei a, a bawlsakte uh ading ahizaw” a chi hi.

⁴¹ Huan sawmte’n huai a zak un, Jakob leh Johan tung ah a lungkimkei uhi.

⁴² Jesu’n amau a sam a, a kiang uah, “Jentelte tung a vaihawm dia a sehte uh a tung uah a lian mahmah ua, a miliante un a tung uah thu a nei mahmah uh chih na thei uhi.

⁴³ Himahleh nou lak ah zaw huchibang ahi kei ding; kuapeuh na lak ua milian hih ut nasemtu in a pang zaw ding ahi.

⁴⁴ Kuapeuh na lak ua masapen hih ut mi tengteng sikha in a pang ding ahi.

⁴⁵ Mihing Tapa hial leng na sepsak a om ding in a hongpai kei a, na sem ding leh mi tampi tatna dia a hinna pe di’n a hongpai ahizaw hi” a chi hi.

Mittaw Bartimai Hihdamna

⁴⁶ Jeriko khua a hongtung uhi; huchi in Jesu Jeriko a kipan a nungzuite leh mipi tampitak toh a pawtlai un khutdoh mittaw, Timai tapa Bartimai lamgei ah a na tu hi.

⁴⁷ Huan Nazaret Jesu ahi chih a zaktak in, “Jesu, David Tapa, ka tung ah zahngai in” chi in, a kikou hi.

⁴⁸ Mi tampi in dai ding in a khou ua; himahleh aman, “David Tapa, ka tung ah zahngai in” chi in, a kinak kou semsem hi.

⁴⁹ Jesu ading a, “Amah honsam dih ua” a chi hi. Huan mittaw a sam ua a kiang ah, “Khamuangtak in om in, thou in; a honsam” a chi uhi.

⁵⁰ Huan a puan paikhia in, ading a, Jesu kiang ah a hohta hi.

⁵¹ Jesu’n amah a houpih a, “Na tung ah bangchi a ka hih na ut a?” a chi hi. Mittaw in a kiang ah, “Heutupa, muh theih ka ut” a chi hi.

⁵² Jesu’n, a kiang ah, “Paita in, na ginna dampih hiteh” a chi a, huchi in, a mu thei pahta a, lampi ah Jesu a zuita hi.