LUKE 1 - Pathian Laisiangthou (BSI)

Laibu In a Tup

¹ Huai thilte i lak ua takpetpet a gintak a om, mi tampi in a thu gelh a na tup uh,

² A tung apat a mute leh thu nasemte’n a honhilh bang un,

³ Theophilus aw, a bul apat bangkim chiantak in ka sui a, kizom zel in nang ading in kigelh leh a hoih ding, ka chi hi.

⁴ Tuma a nang a honhilh uh thu dik ahi chih na theihsemna ding in.

Baptispa Johan Pian Ding Thu

⁵ Judia gam kumpipa Herod a damlai in, Abijah pawl a mi a min Zakariah a om a; huai mi in Aron tanute lak a khat zi in a nei a, a min Elizabeth ahi.

⁶ A nih un Pathian mitmuh in diktat in a om ua, gensiatbei in Toupa thupiak leh a dan tengteng zui in a om zel uhi.

⁷ Himahleh Elizabeth a chin ziak in ta a neikei ua, a nih un upa pitak ahi tuak uhi.

⁸ Huan hichibang ahi a, a pawlte hihdan ngeina bang a Pathian ma a siampu nasem a a omlai in,

⁹ Siampu dan bang in Toupa biakin a lut leh gimlim hal a tan ahi.

¹⁰ Gimlim hal hunlai in mipite avek un inn pua ah a na thum uhi.

¹¹ Toupa angel khat gimlim halna maitam taklam a ding in a kiang ah a kilak hi.

¹² Zakariah in a muhtak in a lungzing a, lau leng a lau hi.

¹³ Himahleh angel in a kiang ah, “Zakariah, lau ken, na ngetna zak a a om ziak in, na zi Elizabeth in tapa hon neihsak dia, a min Johan na sak ding ahi.

¹⁴ Huan nang nuam in na kipak ding a; amah a pian in mi tampi a kipak ding uhi.

¹⁵ Toupa ngaih in mi lian ahi dia, uain leh zu himhim a dawn kei ding; a nu sung apat in Kha Siangthou in a dim ding hi.

¹⁶ Israel suante tampi Toupa a Pathian lam uh a ngasak nawn ding hi.

¹⁷ Pate lungtang tate lam a ngasak ding, mi chihmawhte mi diktat pilna lam ngasak ding, Toupa adia mipite mansa a omsak ding a bawlkhol ding in Elijah lungsim leh thilhihtheihna pu in Toupa ma ah a pai ding” a chi hi.

¹⁸ Huan Zakariah in angel kiang ah, “Huai bangchi’n ka thei dia? Kei putek hi ing a, ka zi leng pitek ahi ngal a” a chi hi.

¹⁹ Angel in a dawng a, a kiang ah, “Gabriel, Pathian ma ading zel ka hi; nang houpih ding leh hiai thu hoih honhilh ding a sawl ka hi.

²⁰ Ngai in ka thugente a huntak a hongtung ding, na gintak louh ziak in huai thilte a hongtun masiah na daidide dia, pau leng na pau theikei ding” a chi hi.

²¹ Huan mipite’n Zakariah a na ngak ua, Pathian biakin sung a a om sawt ziak in lamdang a sa mahmah uhi.

²² Huan a hongpawt in a kiang uah thu a gen theita kei hi; huchi in, biakin ah kha kilak a mu ahi chih a theita ua; a kiang uah chiamtehna te a bawl a, pautheilou in a om hi.

²³ Huan hichi ahi a, a nasepna ni a kimtak in a inn ah a paita hi.

²⁴ Tua nite nung in, a zi Elizabeth a gaita a, kha nga a kisel zoh in,

²⁵ “Mi lak a ka minse khuhna ding in, Toupa’n a honmuh in, hichibang in ka tung ah a hihta” a chi hi.

Jesu Pian Ding Thu

²⁶ Huan a kha gukna ah Pathian in Galili gam a khua khat Nazaret a chih uah, angel Gabriel,

²⁷ Nungak siangthou khat kiang ah a sawl a, huai nungak tuh David suan mi khat a min Joseph toh kikham ahi ua; nungak min Mari ahi.

²⁸ Huan angel a kiang ah a lut a, “Chibai, nang nakpitak a deihtuam: Toupa na kiang ah a om” a chi hi.

²⁹ Huai thu ziak in a lunghimawh mahmah a, bangchidan a chibai honbuk a diam aw? chi in, a kingaihtuah hi.

³⁰ Angel in a kiang ah, “Mari, lau ken; Pathian apan deihsakna na tang hi.

³¹ Ngai in, na gai dia, tapa na nei dia, a min Jesu na sa ding hi.

³² Amah mi lian a honghi ding a, Tungnungpen Tapa a chi ding uh. Toupa Pathian in a pu David mangtutphah a pedia,

³³ Jakob suante tung ah tangtawn in a vai a hawm dia, a gam in bei ni a neikei ding hi” a chi hi.

³⁴ Huan Mari in angel kiang ah, “Hiai bangchi’n a hithei dia? Pasal lah neilou ing a” a chi hi.

³⁵ Huan angel in a dawng a, a kiang ah, “Kha Siangthou na tung ah a hongtung ding a, Tungnungpen thilhihtheihna in a hon liahkhum ding, huaiziak in misiangthou hong piangding leng, siangthou Pathian Tapa, chih in a om ding a chi hi.

³⁶ Ngai in, na sanggamnu Elizabeth in leng a teknung in tapa a paita; a ching a chih uh, tu kha a kha gukna ahita hi.

³⁷ Pathian thupawt himhim thil hitheilou a omkei hi” a chi hi.

³⁸ Mari in, “Ngai in, Toupa sikhanu ka hi, na thu bangzel in ka tung ah tung hen” a chi hi. Huan angel in a paisanta hi.

Mari In Elizabeth A Vehna

³⁹ Huailai in Mari a thou a, singtang ah, Judia gam a khua khat ah a hoh pah hi.

⁴⁰ Zakariah inn ah a lut a, Elizabeth chibai a buk hi.

⁴¹ Huan hichi ahia, Mari in Elizabeth chibai a buktak in, asung a naungek a kitawm a; Elizabeth Kha Siangthou in a hong dimta hi; aw ngaihtak in a kikou hi:

⁴² “Nang numei sapsap din na hampha hi, na gilgah leng a hampha hi.

⁴³ Ka Toupa nu ka kiang a na hong bangchidan ahia awi?

⁴⁴ Ngai in, n’on chibai buk husa ka bil a a luttak in, a kipah ziak in ka sung a naungek a kitawm hi.

⁴⁵ A gingtanu leng a hampha hi, a kiang a Toupa thugen tangtung ding a hih ziak in” a chi hi.

Mari Phatna La

⁴⁶ Huan Mari in: “Ka nuntakna in Toupa a pahtawi e,

⁴⁷ Ka kha leng ka Hondampa Pathian tung ah a kipak mahmah a.

⁴⁸ A sikhanu namtom dan a mu a, a hehpih a; ngai in, tu nungsiah khang tengteng in hampha a honchi ding uh.

⁴⁹ Amah Mi hat in ka tung ah thil thupitak hon hihsak a, a min leng a siangthou hi.

⁵⁰ A laudansiamte khang nawn tan in a hehpih zel hi.

⁵¹ A ban in a thahatdan a ensak a, mi kisatheite a lunggelna uh a hihdalhta hi.

⁵² A mangtutphah ua tu kumpipate a kaikhia a, namtomte a pahtawita hi.

⁵³ Gilkial te thil hoih in a hihvah a, mihaute khutvuak in a paimang sakta hi.

⁵⁴ A sikha Israel taksap awng a huta a, a zahngaihna theihgigena ding in.

⁵⁵ I pipute Abraham leh a suante kiang a tangtawn thuchiam a gen bang ahi.”

⁵⁶ Mari kha thum vel a kiang uah a om a, a inn ah a kiknawnta hi.

Baptispa Johan Pianna

⁵⁷ Huan Elizabeth nauneih a hong hunta a; huchi in tapa a hon neita hi.

⁵⁸ A vengte leh a sanggamte’n Toupa’n a hehpih mahmah chih a naza ua, a kipahpih uhi.

⁵⁹ Huan hichi ahi a, a ni giat ni’n naungek zeksum ding in a hongpai ua; a min ding in a pa min mah Zakariah sak a tum uhi.

⁶⁰ A nun, “Hilou e, Johan sak ding ahi” a chi a, a dawng hi.

⁶¹ A nu kiang ah, “Na sanggamte lak ah hiai min pu kuamah a omkei uhi, a chi uhi.

⁶² Huan a pa kiang ah chiamtehna bawl in, a min ding in bang sa le hang na deih a? a chi uhi.

⁶³ Huan laigelhna pek a ngen a, a min Johan ahi” chi in a gelh hi.

⁶⁴ Avek un lamdang a sa mahmah uhi. Thakhat in a kam hong kihong in a lei a hong kiphel a, Pathian phat in a hong paukheta hi.

⁶⁵ A kim ua omte tengteng in a lauta ua; huchi in huai thute Judia gam singtang tengteng ah a thangta hi.

⁶⁶ A za peuhmah in, a lungtang un a vei chiat ua, “Huai naungek bangchi phet a honghi diam aw?” a chi uhi. Huan Toupa khut in amah a panpih hi.

Zakariah Thugenkholhna

⁶⁷ Huan a pa Zakariah, Kha Siangthou in a dim a, a genkhol a,

⁶⁸ “Toupa Israel Pathian phat in om hen, a mite a hong veh a, tatna a bawlsak hi.

⁶⁹ A sikha David inkuante lak ah hotdamna ki a hon bawlsak takziak in;

⁷⁰ Tanglai a pan a zawlnei siangthoute kam a a gen bang in.

⁷¹ I doute lak leh hon haw tengteng lak a hotdam a i om ding thu,

⁷² I pipute kiang a a chiam zahngaihna tangtung sak ding leh a thukhun siangthou theigige ding in.

⁷³ I pu Abraham kiang a kichiam a,

⁷⁴ I doute lak a a hon humbit a, lau lou a a na i sepna ding in.

⁷⁵ I damsung teng a a mitmuh a siangthou leh diktattak a omna ding in.

⁷⁶ Ahi, Bawi, nang zaw Tungnungpen Zawlnei a honchi ding ua; a lampite bawlkhol ding in Toupa ma ah na pai ding hi.

⁷⁷ A khelhnate uh ngaihdamna dia a mite kiang a hotdamna theihna pe din.

⁷⁸ I Pathian lungtang a hehpihna ziak in, huchi a tunglam a kipan i tung a ni a tan chiang a,

⁷⁹ Miallak leh sihna lim a tute tanvak ding leh khamuanna lampi a i khete kalsuan sak ding in,” a chi hi.

⁸⁰ Huan naungek a hong khanglian deuhdeuh a, a khalam a honghat hiaihiai a, Israelte kiang a a hong kilak masiah gamdai ah a om gige hi.