LEVITIKAS 1 - Pathian Laisiangthou (BSI)

Haltum Thillatte

¹ Toupa’n Mosi a sam a, Kihoupihna puanin apan a houpih hi:

² Israel suante houpih inla, a kiang uah, Na lak ua kuapeuh in thillat Toupa kiang a na lat un, gan, bawnghon leh belamhon lak a te, na lat ding uh ahi.

³ A thillat pen bawnghon lak a te haltum thillat ahihleh a pa, gensiatbei a lat ding ahi. Amah Toupa ma a pom a hihtheihna ding in Kihoupihna puanin kongpi bul ah a lan ding ahi.

⁴ Haltum thillat lu tung ah a khut a koih dia; huchi in amah ading in lemna bawlna dia pomsak ahi ding.

⁵ Toupa ma ah bawngpa a gou dia; Aron tapa, siampute’n a sisan a lan ding ua, Kihoupihna puanin kongpi bul a maitam sisan in a theh ding uhi.

⁶ Haltum thillat vun a lip dia, a sem nen ding ahi.

⁷ Siampu Aron tapate’n maitam ah mei a koih ding ua, mei tung ah sing a chiangkhawm ding uhi.

⁸ Aron tapa siampute’n sabakte, a lute leh a thaute maitam a mei tung ah sing ah kilawm tak in a koih ding uhi.

⁹ A sungkuate leh a khete tui in a sil ding ua; siampu in Toupa adia gimlimtak, mei a lat haltum thillat ding in a pum in maitam ah a hal ding ahi.

¹⁰ A thillat, haltum thillat ding a ganhon lak a te, belam hiam, kel hiam ahihleh a pa, gensiatbei a lan ding ahi.

¹¹ Maitam sik, mallam pang ah Toupa ma ah a gou dia; Aron tapa, siampute’n maitam kimvel in sisan a theh ding uhi.

¹² A sem ding a, a lu toh, a thau toh; siampu in maitam tung a meitung a sing tung ah a koihhoih ding hi.

¹³ A sungkuate leh a khete tui in a sil dia; a pum in siampu in a lan dia, maitam ah a hal ding hi. Toupa adia gimlim tak, mei a lat haltum thillat ahi.

¹⁴ Toupa adia thillat vasa lam haltum thillat ahihleh a thillat ah vakhute hiam, vapal noute hiam a lan ding ahi.

¹⁵ Siampu in maitam ah a hontawi dia, a lu a hektan dia, maitam ah a hal ding. A sisan maitam pang ah a tak kangsak ding ahi.

¹⁶ A gongkholh a mul toh a pai dia, maitam kiang, suahlam pang a meivu koihna mun ah a pai ding hi.

¹⁷ A khate a bottol dia, a tak botzak lou in siampu in maitam a mei tung ah a hal ding; huai Toupa adia gimlimtak, mei a lat haltum thillat ahi.