KOLOSATE 1 - Pathian Laisiangthou (BSI)

Chibaibukna

¹ Paul, Pathian deihdana Khrist Jesu sawltak leh i unaupa Timothi in,

² Kolossa khua a Khrist a misiangthoute leh unau muanhuaite kiang ah: Pathian i Pa kiang a kipan hehpihna leh lemna na kiang uah om hen.

Kipahthugenna Leh Thumna

³ Nou ading a thum gige in Pathian i Toupa Jesu Khrist Pa kiang ah kipahthu ka gen uhi.

⁴ Khrist Jesu na gindan uh leh misiangthou tengteng tung a itna na neihdan uh ka zaktak ziak un.

⁵ Huai bel nou ading a lametna van a koihkholha a om ziak ahi. Huai lametna tanchin mah tuma in, Tanchinhoih thutak na zata uhi.

⁶ Huai Tanchinhoih tuh khovel tengteng ah gaha a khan zel mah bang in na kiang uh hongtung hi, Pathian hehpihna na ngaihkhiak ua na zak ni ua kipan in, noumau ah leng gah in a khangzel hi.

⁷ Huchibang in Epaphra i sikha hihpih ngaihtak lak a na zil bang un, amah kou sik in Khrist nasempa muanhuai ahi.

⁸ Aman Kha a na itna uh a honhilh hi.

⁹ Huaiziak in ka zak ni ua kipan kou leng nou adia thum leh nget ka tawpkei uhi; huchi a khalam pilna leh theihna tengteng a a deihlam theihna a hihdim a na hongom theihna ding un.

¹⁰ Huan nasep hoih chiteng a gaha, Pathian theihna a khang a, Amah kipahlam a Toupa adia kilawm a na hin theihna ding un.

¹¹ Kipahna toh kithuah thuakhatna leh kuhkalna nei ding in, a hatna thupi bangzel a hihhat in hongom un.

¹² Vak a misiangthoute gouluahpih dia hon chingsak Pa kiang a kipahthu gen in.

¹³ Aman mial thuneihna lak a kipan hon suaktasak in, A Tapa ittak gam ah hon kaisakta hi.

¹⁴ Amah ah i tatkhiakna leh khelhnate ngaihdamna i mu uhi.

Khrist Tungnunna

¹⁵ Amah muhtheihlouh Pathian batpih, thilsiam tengteng a piang masapen ahi.

¹⁶ Amah ah bangkim siam ahi a, van a omte, lei a omte toh, muhtheihte, muhtheihlouhte toh, mangtutphahte, thuneihnate; bangkim amah siam ahi, amah ading maha siam ahi.

¹⁷ Huan amah zaw bangteng omma in leng a om hi, amah ah bangtenga dingkhawm chiat uhi.

¹⁸ Amah tuh pumpi, saptuam lutang ahi a; bangkim a tungnungpen a hong hihtheihna ding in a bulpi, misi lak a kipan a piang masapen ahi.

¹⁹ Amah ah Pathian tangchinna tengteng a om Pa deihlam tak ahi.

²⁰ A Kros sisan a lemna na bawl in amah ah bangkim amah toh a kilemsak hi; amah ngei ah lei a thil omte leh van a thil omte leng amah toh a kilemsakta hi.

²¹ Huan nou tuma lam in na lungsim uah a melma na hi ua, na thilhih gilou ua amah a kipan a khen a om na hi uhi, himahleh tuin aman amah toh hon kilemsakta hi:

²² A sihna in a pumpi ah amah toh noute a hon kilemsakta hi, a ma a siangthou, gensiatbei leh mawhsaktheihlouh a a hon dinsak theihna ding in,

²³ Kingakna nei a kiptak a om a, Tanchinhoih na zak ua lametna a kipan a suanmang a omlou a, ginna a na om gige peuhmah uleh; huai Tanchinhoih van nuai a thilsiam tengteng lak a tangkoupih ahi a; kei Paul leng huai nasem dia bawl ka hi.

Paul Sepgimna

²⁴ Nou ziak a tu a ka gimthuaknate ah ka kipak hi; huan a pumpi ziak a Khrist in a gimthuaknate ban zomzel ka hi: a pumpi tuh Saptuam ahi.

²⁵ Nou ading a Pathian nasepna kei kiang a piak a om bangzel in huai saptuam nasempa ka hong hita a, Pathian thu bukimtak a theisak ding in.

²⁶ Huai Pathian thu tuh tangtawn leh akhang akhanga kipan a thuguk kisel ahi; tun bel misiangthoute kiang ah latsak in a omta hi.

²⁷ Amau kiang ah, Jentelte lak a huai thuguk thupina hauhsakna tamdan Pathian in theihsak a ut him ahi; huai thuguk tuh Khrist noumau a om, thupina lametna pen ahi:

²⁸ Michih Khrist a hoihkim a ka piak theihna ding un michih hilh in, pilna chiteng a zilsakin, a tanchin ka gen zel uhi.

²⁹ Huchibang ding in nakpitak a keimah a a sepsak thahatna tengteng zang in theihtawp in ka semzel hi.