JONAH 1 - Pathian Laisiangthou (BSI)

Ninevi A Jonah Sawlna

¹ Amittai tapa Jonah kiang ah Toupa thu a hongtung hi.

² “Thou inla, Ninevi khua, khopi thupitak ah hoh inla, a tungthu ki koupih in; a gitlouhna uh ka ma ah a hong tungtouta hi” a chi hi.

Jonah Thumanglou A Taisiatna

³ Himahleh Jonah bel Toupa ma a kipan Tarsis ah taimang ding in a thou a; Joppa khua ah a hohsuk hi, Tarsis zuan ding long a mu a; huchi in, a tuanman pia in, Toupa ma a kipan Tarsis zuan dingte toh ton ding in long ah a lutsuk hi.

⁴ Himahleh Toupa’n huih hat mahmah tuipi ah a nungsak a, tuipi ah huihpi hat mahmah a nung hi, huchi in, long tamzak ding bang in a omta hi.

⁵ Long mite a lau ua, amau pathian chiat a sam ua; long zanna ding in long sung a vante tuipi ah a paikhia uhi. Jonah bel long sunggil pen ah na lutsuk pah a, huai ah lum in, a na ihmu hithit hi.

⁶ Huchi in longheutu a kiang ah a hongpai a, “Aw nang ihmu, bangchidan ahia? Thou inla, na Pathian sam in, Pathian in, i manlouhna ding in a hon ngaihtuah khamawh dia hiam” a chi hi.

⁷ Huan khai, “Hiai thil hoihlou i tung ua hongom kua ziak ahia chih i theihna ding in, ai i san ding uh” chi in a kihou uhi. Huchi in, ai a san ua, aisan Jonah tung ah a tuta hi.

⁸ Huchi in a kiang ah, “Hiai thil hoihlou i tung ua om kua ziak ahia, honhilh in, k’on ngen uh; na nasep bang ahia? Koi a kipan a hong na hia? Koi gammi na hia? Bang nam mi na hia?” a chi uhi.

⁹ Aman a kiang uah, “Hebru mi ka hi; tuipi leh gam bawlpa Toupa, van Pathian ka lau ahi” a chi hi.

¹⁰ Huchi in mite’n a kihta mahmah ua, a kiang ah, “Bangdia hiai bang hih na hia?” a chi ua a hilhkhitsa a hih ziak in mite’n lah Toupa ma a kipan a taimang ahi chih a thei uhi.

Long Apat Jonah Paihkhiakna

¹¹ Huchi in a kiang ah, “Kou dia tuipi a kihoh louhna ding in na tung ah bang ka hih ding ua?” a chi ua, tuipi lah a kihot sang hulhul hi.

¹² Aman a kiang uah, “Hon domkang unla, tuipi ah hon lawnkhia un; huchi in tuipi nou ading in a kihot nawn kei ding; kei ziak in na tung uah hiai huihpi thupitak a nung ahi chih ka thei hi” a chi hi.

¹³ Himahleh mite’n gam a kik ding in nakpi’n long a kal ua; himahleh a hithei kei: tuipi lah a tung uah a nak kihoh semsem hi.

¹⁴ Huaiziak in Toupa a sam ua, “Aw Toupa, hiai mipa hinna ziak in hon hihmang kenla, mi hoih sisan mawh ka tung uah nga mahmah lou ding in nakpitak in k’on ngen uhi: Toupa, hiai lah nang na deih bang a na hih ahi ngal a” chi uhi.

¹⁵ Huchi in Jonah a domkang ua, tuipi ah a lawnkheta uhi: huchi in tuipi kihot phul vonvon a daita hi.

¹⁶ Huchi in, mite’n Toupa nakpitak in a lau ua; Toupa kiang ah kithoihna a lan ua, thu a chiam uhi.

¹⁷ Toupa’n Jonah valh ding in nga liantak a nasep khin a; huai nga gilsung ah Jonah ni thum leh zan thum a om hi.