JOEL 1 - Pathian Laisiangthou (BSI)

Khau In Gam Hihsiatna

¹ Pethuel tapa Joel kiang ah Toupa thu a hongtung hi:

² Putekte aw, hiai za un: hiai, nou hunlai leh na pute uh hunlai in a omkha ngeita ahia?

³ Huai pen na tate uh hilh unla, na tate un amau tate hilh uhenla, a ta nawnte un suan dang hilhsawn zel uhen.

⁴ Singnget khau in a nek bang teng khauhon in a ne a, khauhon in a nek bang teng ka chita ngal a a ne a; khaukhup in a nek bang teng khaupe in a nekhinta hi.

⁵ Khamte aw, halh unla kap un; uain dawn tengteng aw, a uain khum ziak in kap vongvong un; na kam ua kipan lah uain lakmang ahita ngal a.

⁶ Nam hat mahmah, simsenglouh in ka gam a hong douta uhi, humpinelkai liante ha bang in a hiam hi.

⁷ Ka grepgui a hih sia ua ka theipi sing hawng a kheuh ua, a kheuh siangvek a, a paimang a; a hiangte a kiat ngou vek hi.

⁸ Nungak in, saiip puanteng a, a hoihlai pasal a sun bang in kap vongvong un.

⁹ Tangbuang latte, dawn ding latte Toupa inn a kipan hihman ahi a; siampu Toupa nasemte a lungkham uhi.

¹⁰ Lou hihsiat ahi a, gam a lungkham a; buh hihsiat ahi a, uain thak a kang a, sathau a ginata kei hi.

¹¹ Aw, nou louneimite aw, sun unla; aw, nou grepgui kemmite aw, huitbuh leh barli buh ziak in dah in mau ekek un; lou a buhlak ding a mangthang vekta hi.

¹² Grepgui a vuai a, theipi kung a vuai a; theibuhfai zung, tum leh apple theikung, lou a sing tengteng leng a vulta hi: mihing tate lak a kipahna lah a vuaimangta ngal a.

Kisik Ding a Sapna

¹³ Nou siampute aw, saiip puan teng unla kap un; nou maitam nasemmite aw, chiau vongvong un; nou ka Pathian na semmite aw, hongpai unla, saiip puan silh in zankhua in lum un: na Pathian inn ua pan tangbuang lat leh dawn ding lat kham ahita ngal a.

¹⁴ Anngawl hun tang siangthou in, khawmpi taksuak bawl unla, Toupa na Pathian inn ah putekte leh hiai gam a teng mi tengteng pikhawm unla, Toupa sam un.

¹⁵ Huai ni a tung a gik hi: Toupa ni lah a nai ngal a, Bangkim hihtheipa a kipan manthatna a hongtung ding hi.

¹⁶ Ka mit muh in nekding hihman ahi ka hia, ahi, i nopna leh i kipahna i Pathian inn a kipan hihman ahi ka hia?

¹⁷ Chite leikhal nuai ah a muat a; pangte lah a kigawp a, buh innte phel in a om a, a buhte a vuaita uhi.

¹⁸ Gante nak thum hinatel u e! bawnghonte a buai zak ua, loupa hing mun a neih louh ziak un; ahi, belamhonte a segawp uhi.

¹⁹ Aw, Toupa k’on sam hi, mei in gamdai gam loupa mun a kangsiangta a, meikuang in gam a sing tengteng a kang siangta hi.

²⁰ Ahi, gamsate nang honngai in a nak huhu ua; luitate a kangtat a, mei in gamdai gam loupa mun a kang siangta hi.