EKSODAS 6 - Pathian Laisiangthou (BSI)

¹ Toupa’n Mosi kiang ah, “Tuin Pharo kiang a bang ahia ka hih ding na mu ding. Khut thahat in amau a paisak dia, khut thahat in amau a gam apan a hawlkhe ding ahi ngal a” a chi hi.

Mosi Pathian In A Sam

² Pathian in Mosi kiang ah thu a gen a, a kiang ah, “Toupa ka hi.

³ Thilbangkim hihthei Pathian min in Abraham kiang ah, Isak kiang ah leh Jakob kiang ah ka kilakta. Himahleh ka min JEHOVAH in a lak ua theih ka hi kei.

⁴ Amau Kanan gam, mikhual a a omna gam uh, a khualzinna gam uh, pe ding in amau toh ka thukhun leng ka hihkipta hi.

⁵ Aiguptate’n koltanna a, a tansak un, Israel suante maunate leng ka zata a, ka thukhun ka theigige hi.

⁶ Huaiziak in Israel suante kiang ah, Toupa ka hi, chih gen inla, Aiguptate puakgik nuai apan k’on pikhe dia, na koltanna ua pan k’on suaktasak ding, banzak in leh vaihawmna thupite toh ka hontan ding hi.

⁷ Mipite ading in ka hong kilak dia, nou ading in Pathian ka hi ding. Huchi in Aiguptate puakgikte nuai apan hon lakhepa Toupa na Pathian uh ka hi, chih na thei ding uhi.

⁸ Gam tungtang thu Abraham, Isak leh Jakob kiang a pedia ka chiam, gamsung ah k’on tun ding. Huchi in, gouluah ding in k’on pe ding, Kei Toupa ka hi” a chi hi.

⁹ Mosi in Israel suante kiang ah huchibang in thu a genta. Himahleh lungsim dahna ziak leh koltanna haksatna ziak in Mosi a ngaikheta kei uhi.

¹⁰ Toupa’n Mosi kiang ah thu a gen a;

¹¹ “Lut in, a gam apan Israel suante a paikhiak sakna ding in Pharo kiang ah thu gen in” a chi hi.

¹² Mosi in Toupa ma ah thu a genta a, “Ngai in, Israel suante’n hon ngaihkhiak kei ua leh kei muk sumlouh, bangchi’n Pharo in hon ngaikhe dia?” a chi hi.

¹³ Huchi in Toupa’n Mosi kiang leh Aron kiang ah thu a gen a, Aigupta gam apan Israel suante pikhe ding in Israel suante lam leh Aigupta kumpipa lam ah amau thu a peta hi.

Mosi Leh Aron Inkuante Chiamtehna

¹⁴ Hiaite a suangtute inn a kipan a lupente ahi uhi: Reuben Israel tapa masa pen; Hanok leh Pallu, Hezron leh Karmi. Hiaite Reuben inkawte ahi uhi.

¹⁵ Simeon tapate: Jemuel, Jamin, Ohad, Jakin, Zohar leh Kanan numei tapa Shaul. Hiaite Simeon inkawte ahi uhi.

¹⁶ A khang uh dungzui in hiaite Levi tapate min ahi: Gershon, Kohath leh Merari. Levi damsung kumte kum za leh sawmthum leh sagih ahi.

¹⁷ Gershon tapate, a inkaw dungzui un, Libni leh Shimei.

¹⁸ Kohath tapate: Amram, Izhar, Hebron leh Uzziel. Kohath damsung kumte kum za leh sawmthum leh thum ahi.

¹⁹ Merari tapate: Mahali leh Musi. A khang uh dungzui in hiaite Levi inkawte ahi uhi.

²⁰ Amram in a pa sanggamnu Jokebed zi in a nei hi. Aman Aron leh Mosi a neihsak hi. Amram damsung kumte kum za leh sawmthum leh sagih ahi.

²¹ Izhar tapate: Korah, Nepheg leh Zikri.

²² Uzziel tapate: Misael, Elzaphan leh Zithri.

²³ Aron in Amminadab tanu, Nahson sanggamnu, Eliseba zi in a nei a, Nadab, Abihu, Eleazar, leh Ithamar a neihsak hi.

²⁴ Korah tapate: Assir, Elkanah leh Abiasaph. Hiaite Korah inkawte ahi uhi.

²⁵ Aron tapa Eleazar in Putiel tanute lak a khat zi in a nei a, Phinehas a neihsak hi. Hiaite Levi inkuan suangtute inn a kipan a lupente ahi uhi.

²⁶ Hiaite Toupa’n Aron leh Mosi kiang a a nam uh dungzui a Aigupta gam apan Israel suante hon pikhia un, a chihte ahi.

²⁷ Hiaite Aigupta kumpipa Pharo kiang a Aigupta apan Israel suante pikhe dia thugentute ahi uhi. Hiaite Mosi leh Aron mah ahi uhi.

Mosi Leh Aron Kiang a Pathian Thupiak

²⁸ Hichi ahi a, Aigupta gam a Mosi kiang a Toupa’n thu a gen ni’n a kiang ah,

²⁹ “Kei Toupa ka hi. Na kiang a ka gen tengteng Aigupta kumpipa Pharo kiang ah gen in” a chi hi.

³⁰ Himahleh Mosi in Toupa ma ah, “Ngai in, muk sumlouh ka hi a, bangchi’n Pharo in a hon ngaikhe dia?” a chi hi.