EKSODAS 5 - Pathian Laisiangthou (BSI)

Mosi Leh Aron Aigupta Kumpipa Pharo Ma Ah

¹ Huan, huai nung in Mosi leh Aron a lut ua, “Hichibang in Israelte Toupa Pathian in a chi. Gamdai a kei adia Ankuangluina a bawl theihna ding un, ka mite paisak in” chi’n, Pharo a hilh uhi.

² Pharo in, “Israelte paisak dia a aw ka man ding, Toupa kua ahia? Hiai Toupa ka theikei, Israelte leng ka paisak kei ding” a chi hi.

³ Huchi in amau, “Hebrute Pathian in a hon kimuhpih a; gamdai ah ni thum lam ah, hon paisak in, k’on ngen uhi. Toupa ka Pathian kiang ah hon kithoihsak in. Hi hiam, namsau hiam in a hon gawt kha ding hi” a chi uhi.

⁴ Aigupta kumpipa’n a kiang uah, “Bangdia Mosi leh Aron, noute’n nna nasep ua mite khawl sak na hi ua? Na puakgikte uh pua un” a chi hi.

⁵ Pharo in, “Ngai un, gam a mite tuin a tam ua, a puakgik ua pan na khawlsak uhi” a chi hi.

⁶ Pharo in huai ni mah in mite nasem heutute leh upate thu a pia hi.

⁷ “Tuma siah a bang in teklei bawlna ding in mite pawl na pe nawn kei ding uhi. Kuan uhenla, pawl va kilak uhen.

⁸ Tuma siah a teklei bawlsa tengteng uh, a tung uah na koih ding a; huai apan in bangmah na kiamsak kei ding uhi. A tha uh a dah kha dia; huchi in kap in, ka Pathian kiang uah hon paisak inla, hon va kithoihsakin, a chi kha ding uhi.

⁹ Nna tamsem a tung uah guan unla, a sepgim theihna ding un; thu ginalou limsak kei uhen” a chi hi.

¹⁰ Mite nasem heutute a paikhia ua, a upate u toh, mite kiang ah thu a gen ua, “Pharo in pawl a honpe kei ding,

¹¹ ‘Nou kuan unla, na muhtheih theihna uah pawl kilak un.’ Himahleh nna nasep uah bangmah kiamsak ahi kei ding” a chi uhi.

¹² Mite pawl hilou in buhbul lakhawm ding in Aigupta gam teng ah a vak zakta uhi.

¹³ Nasem heutute’n amau a nawh ua, nna nasep uh zou un, na niteng sep dingte uh, pawl a omlai in, a chi uhi.

¹⁴ Israel suan upate, Pharo nasem heutute a tung ua a koihte un, a vua ua, bangdia tuma siah a bang a zan leh tuni a na teklei bawl uh zoulou na hi ua? chi’n, a phutluih uhi.

¹⁵ Huaitak in Israel suan upate a hong ua, Pharo kiang ah a kap ua, “Bangdia na sikhate hichi bawl tel na hia?

¹⁶ Na sikhate pawl piak ka hi kei ua, amau lah ka kiang uah, teklei bawl un, a chi uhi. Ngai in, na sikhate vuak in ka om ua, a mawh na mite ahi uhi” a chi uhi.

¹⁷ Himahleh aman, “Thadah na hi uh, thadah na hi uh. Huaiziak in, hon paisak inla, Toupa kiang ah hon va kithoih sak un, na chi uhi.

¹⁸ Huaiziak in kuan unla; nna vasem un. Pawl a hon kipe kei dia, himahleh teklei bikhiah zah na piakkhiak ding uh ahi” a chi hi.

¹⁹ Na niteng nasep ua na tekleite ua pan bangmah na kiam sak ding uh ahi kei, a kichih nung Israel suan upate’n thusia om a hih dan a theita uhi.

²⁰ Pharo apan a hong paikhiak un lampi ading Mosi leh Aron a kituahpih uhi.

²¹ A kiang uah, “Toupa’n nou hon en in vaihawm hen. Pharo mit leh a sikhate mit in ka gimnam uh kihhuai in na bawl ua, kou honthat dia a khut ua namsau na koih tak ziak in” a chi uhi.

Mosi, Pathian Kiang ah A Phun

²² Toupa kiang ah Mosi a kiknawn a, “Toupa, bangdia hiai mite hichibang a gilou suaksak na hia? Bangdia kei honsawl na hia?

²³ Na min a thu gen dia Pharo kiang a ka va hoh nungsiah lah, aman hiai mite tung ah gilou a bawl ngal a. Na mite lah na pikhe hetkei” a chi hi.