EKSODAS 4 - Pathian Laisiangthou (BSI)

Pathian In Mosi Thillamdang Hihtheihna A Pia

¹ Huan, Mosi in a dawng a, “A hina a, ngai in, a hon umkei ding ua, ka aw leng a ngaikhe sam kei ding uhi. Toupa na kiang ah a kilakkei, a chih ding ziak un” a chi hi.

² Toupa’n a kiang ah, “Na khut a bang ahia?” a chi a; aman, “Chiang” a chi hi.

³ Aman, “Lei ah khia in” a chi a; lei ah a khia a, gul a hongsuak a; Mosi huai apan a taikheta hi.

⁴ Toupa’n Mosi kiang ah, “Na khutzan inla, gul a mei in la in” a chi hi. A khut a zan a, gul a mei in a manta a, a khut ah chiang a hongsuak nawn hi.

⁵ A pipute uh Toupa Pathian, Abraham Pathian, Isak Pathian leh Jakob Pathian, na kiang ah a kilak chih a gintakna ding un“ a chi hi.

⁶ Toupa’n a kiang ah, “Tuin na khut na ang ah koih in” a chi nawn hi. A khut a ang ah a koih a, a zankhiak tak in, ngai in, a khut vuk bang in a phakta hi.

⁷ “Aman na khut na ang ah koihnawn in” a chi hi. A khut a ang ah a koihnawn a, a ang apan a lakhia a, ngai in, a khut khatlam bang a hongsuak nawn hi.

⁸ “Hichi ahi dia, a hon gintak kei ua, chiamtehna khatna aw leng a ngaihkhiak sam kei uleh, chiamtehna nanung aw a gintak ding uh ahi ding hi.

⁹ Hichi a honghi dia, hiai chiamtehna nihte a gintak kei lai ua, na aw leng a ngaihkhiak sam kei uleh, lui apan tui na la dia, gamkeu ah na sung ding. Lui apan na tui lakkhiak gamkeu ah sisan a honghi ding” a chi hi.

¹⁰ Mosi in Toupa kiang ah, “Aw Toupa, mi dangnal ka hi kei, chiklai mah in, na sikha kiang a thu na gen nungsang in leng mi dangawk leh pau zekai ka hizaw hi” a chi hi.

¹¹ Toupa’n a kiang ah, “Mihing kam bawl kua ahia? Ahihkeileh pautheiloute, bengngongte, muhnate leh mittawte kua bawl ahia? Kei Toupa’n ka bawl ahi kei maw?

¹² Huaiziak in, tuin kuan inla, na kam ka ompih dia, na gen ding k’on hilh ding” a chi hi.

¹³ Aman, “Aw Toupa, hehpih in midang sawl in, na sawl dingpa khut in, k’on ngen hi” a chi hi.

¹⁴ Mosi tung ah Toupa hehna a souta a, “Aron, na unaupa a omkei maw? Hoihtak in thu a genthei, chih ka thei. Huan, ngai in, nang kimuhpih ding in a hongpaikhia a, a honmuh chiang in a lungtang a kipak ding hi.

¹⁵ A kiang ah thu na gen dia, a kam ah thute na guang ding. Na kam ka ompih dia, na hih ding k’on hilh ding hi.

¹⁶ Amah mite kiang ah na thugenpa ahi dia; amah nang adia kam tang ahi ding. Nang amah ading in Pathian tang na hi ding hi.

¹⁷ Chiamtehnate na hihna ding in, na khut in hiai chiang na tawi ding ahi” a chi hi.

Mosi Aigupta Ah A Kiknawn

¹⁸ Mosi a kisa a, a sungpa Jethro kiang ah a kik a, a kiang ah, “K’on ngen hi. Hon paisak inla, Aigupta gam a om ka unaute kiang ah ka kik ding, a damlai u hiam ka va thei ding” a chi hi. Jethro in Mosi kiang ah, “Damtak in va hoh in” a chi hi.

¹⁹ Toupa’n Midian gam a Mosi kiang ah, “Pai inla, Aigupta gam ah kiknawn in. Thah hon tum mi teng lah a sita ngal ua” a chi hi.

²⁰ Mosi in a zi leh a tate a pi a, sabiltung tung ah a tuangsak a, Aigupta gam ah a kiknawnta hi. Mosi in a khut in Pathian chiang a tawi hi.

²¹ Toupa’n Mosi kiang ah, “Aigupta gam a kiknawn dia na kuan chiang in, na khut a ka koih huai thillamdangte tengteng Pharo ma ah hih ngeingei in. Himahleh a lungtang ka khauhsak dia, huchi in mite a paisak kei ding,” a chi hi.

²² Pharo kiang ah,“ Toupa’n Israel ka tapa ahi, ka ta masapen pen, a chi hi.

²³ k’on chi ahi, na a hon sepsak theihna ding in, ka tapa paisak in. Paisak na nial leh ngai in, na tapa ka that ding, na ta masapen mahmah, na chi ding hi.”

²⁴ Lampi a khualbuk ah hichi a hong hita, Toupa’n amah a na tuak a, thah ding in a zongta hi.

²⁵ Huchihlai in Zipporah in suang hiam a la a, a tapa zekmuk vun a atkhia a, a khebul ah a khia a, “Kei ading in sikai pasal na hi mahmah hi” a chi hi.

²⁶ Huchi in amah a paisak hi. Zekvun ziak in “Sisan kai pasal na hi” a chi hi.

²⁷ Toupa’n Aron kiang ah, “Mosi tuak ding in gamdai ah hoh in” a chi hi. A hohta a, Pathian tang ah amah a tuak a, a tawpta hi.

²⁸ Mosi in amah sawl Toupa thu tengteng leh amah a piak chiamtehna tengteng toh Aron a hilh hi.

²⁹ Mosi leh Aron a paita ua; Israel suan upate tengteng a kaikhawm vek uhi.

³⁰ Mosi kiang a Toupa’n thu a gen tengteng leh mite mitmuh a chiamtehna a hih tengteng Aron in a genta hi.

³¹ Huchi in mite’n a gingta ua; Toupa’n Israel suante a hongveh a, a gimna uh a muta, chih a zaktak un, a lu uh kunsak in a beta uhi.