EKSODAS 3 - Pathian Laisiangthou (BSI)

Pathian In Mosi A Sam

¹ Mosi in a sungpa, Midian siampu, Jethro ganhon a ching hi. Ganhon gamdai nunglam a pi in, Pathian tang, Horeb pha in, a hongpai hi.

² Pawn lak apan meikuang in a kiang ah Toupa Angel a hong kilak hi. A en a, ngai in, mei in pawn a kuang a, himahleh pawn a kangkei hi.

³ Mosi in, “Ka kihei dia, hiai thilmuh thupi, bangdia pawn kanglou ahia, ka en ding” a chi hi.

⁴ Huchi a en dia a kihei Toupa’n a muh in pawn apan amah a sam a, “Mosi, Mosi” a chi hi. Aman, “Hiai ah ka om” a chi hi.

⁵ Aman, “Hiai mun hon naihken. Na khepek apan na khedapte suah in. Na dinna mun lei siangthou ahi” a chi hi.

⁶ Hiai a chilai a, “Na Pa Pathian ka hi, Abraham Pathian, Isak Pathian leh Jakob Pathian.” Mosi in Pathian a et ngamlouh ziak in a mai a sel hi.

⁷ Toupa’n “Aigupta gam a ka mite thuakgimna ka mu a, a tung ua nasem heutute ziak a a kah uh ka zata a, a dahnate uh ka thei hi, a chi hi.

⁸ Aiguptate khut apan amau pikhe ding leh huai gam apan gam hoih, za, bawngnawi leh khuaizu a luanggam tundia hong paisuk ka hi; Kanante, Hitte, Amorte, Perizte, Hivte leh Jebuste gam ah.

⁹ Huaiziak in tuin, ngai in, Israel suante kah thawm ka kiang a hongtungta. Aiguptate’n amau a nuaisiah uh leng ka mu hi.

¹⁰ Huaiziak in, tuin kisa in, Pharo kiang ah k’on sawl ding, Aigupta gam apan Israel suante, ka mite n’on pikhiak theihna ding in” a chi hi.

¹¹ Mosi in Pathian kiang ah, “Pharo kiang a hoh a, Aigupta gam apan Israel suante pikhe ding, kei kua ka hia?” a chi hi.

¹² Aman, “Na kiang ah ka om ngeingei ding, k’on sawl chih, hiai nang ading in a kitheina ahi ding. Aigupta gam apan mite n’on pikhiak khit chiang in, hiai tangtung ah Pathian nna nasem ding uh” a chi hi.

¹³ Mosi in Pathian kiang ah, “Ngai in, Israel suante kiang a ka hong a, a kiang ua, hichia ka chih chiang in, na pipute uh Pathian in na kiang uah a honsawl, amau huchi in ka kiang ah a chi ding uh, A min bang ahia? A kiang uah bang ka chi dia?” a chi hi.

¹⁴ Pathian in Mosi kiang ah, “KA HIH KA HI” a chi hi. Huchibang in Israel suante kiang ah na vagen ding, “KA HIH in na kiang uah a honsawl hi” a chi hi.

¹⁵ Pathian in Mosi kiang ah huchi in a chih behlap lai hi. “Israel suante Pathian, Abraham Pathian, Isak Pathian leh Jakob Pathian in na kiang uah a honsawl. Hiai ka min ahi gige a, suan tengteng tan a kei theihgigena ahi.

¹⁶ Kuan inla, Israel upate kaikhawm inla, a kiang uah hichi’n chi in. ‘Na pipute uh Toupa Pathian, Abraham Pathian, Isak Pathian leh Jakob Pathian ka kiang ah a hong kilak a, hichi’n a chi, Ka hongveh petmah a, Aigupta gam a na tung ua hih a omte ka muta hi.

¹⁷ Hichi in ka chita, Aigupta gimna apan Kanante, Hitte, Amorte, Perizte, Hivte leh Jebuste gam, bawngnawi leh khuaizu luanna ah k’on pilut ding’.

¹⁸ Na aw a ngaikhe ding uhi. Huchi in na kuan dia, nang leh Israel upate, Aigupta kumpipa kiang ah na hoh ding ua, a kiang ah hichibang in na chi ding uhi. ‘Hebrute Toupa Pathian in hon kimuhpih a, tuin, ka hon ngen uhi, hon paisak in, gamdai a ni thum lam a Toupa ka Pathian uh kiang a ka kithoih theihna ding un.’

¹⁹ Ahi a, Aigupta kumpipa’n a hon paisak kei ding, ban thahatna toh lou in chih ka theitel hi.

²⁰ Ka ban ka zak dia, a lak ua ka hih ding ka thillamdang tengteng in Aigupta gam ka gawt ding. Huai nung in a hon paisak ding hi.

²¹ Aiguptate mitmuh in hiai mite deihsakna ka pe ding. Huchi in hichi ahi dia, na pai chiang un a khutvuak in na pai kei ding uhi.

²² Numei teng in invengte leh a inn a khualtamte apan dangka suangmantamte, dangkaeng suangmantamte leh puansilhte a leitawi ding. Huchi in huaite na tapate uh na silhsak ding ua, na tanute uh na silhsak ding uhi. Huchi in Aiguptate na lok ding uhi.”