DANIEL 8 - Pathian Laisiangthou (BSI)

Daniel In Belamtal Leh Keltal Muhna

¹ Kumpipa Belshazzar vaihawm kum thum kum in, kei, Daniel kiang ah a tung a pen mah a hong kilat khitnung in mengmuhna ka kiang ah hong kilang nawn hi.

² Ka mengmuhna ah hichi ahi a, Elam bial a Susan inpi ah ka om a; huan mengmuhna in Ulai lui kiang ah om in ka mu hi.

³ Huchi in ka dak leh ngai in, huai luigei ah belamtal khat ki nih nei ading hi, a ki nihte a sau uhi. Himahleh khat sang in a dang pen a sau zaw a, a sau zaw a a pou nanung pen ahi.

⁴ Tua Belamtal in a ki a si ding in tumlam, mallam, leh simlam nawt in ka mu hi; a ma ah sate ading theikei ua, a khut a kipan suaktasak thei leng kuamah a omkei uhi; himahleh amah deihlam in a hih a a hong thupi hi.

⁵ Huchi a ka ngaihtuah lai in, ngai in, lei pumpi tawnsuak in tumlam a kipan in keltal khat lei sukhalou in a hongpai a, huai kel in a mitte kikal ah ki minthang khat a nei hi.

⁶ Belamtal ki nih nei lui malam ading a ka muh kiang ah a hongpai a, a thilhihtheihna toh heh in amah a delhta hi.

⁷ Belamtal kiang chin ah a hongpai ka mu a, a tung ah nakpi’n a thangpaita a, belamtal a boh a, a ki nihte a hihtan a; huchi in belamtal in amah a dinna ding thahatna a neita kei hi; Lei ah a sipuk a, amah a chil a; a khut a kipan belamtal suakta sak ding kuamah a omkei hi.

⁸ Keltal nakpi mahmah in a kiliansakta a: huchi a a hatlai in, huai ki thupi a kitan a; a mun ah ki li minthang vanhuih lite lam ah a hong suakkhe tou uhi.

⁹ Huan huai kite lak a ki neu thupi mahmah khat, simlam, suahlam, leh gam kilawm lam nga in a hong khangkhia hi.

¹⁰ Huchi in van sepaihte bang hial in a hong thupi mahmah a; aksi honte lak a khenkhatte lei ah a pai khesuk a, amau a chil hi.

¹¹ Ahi, van sepaihte Toupa tung nangawn ah a kiliansak a; amah a kipan in niteng haltum thillat a lamang a, a Mun Siangthou a pai khesuk hi.

¹² Huan tatlekna ziak in haltum thillatte toh van sepaihte amah kiang ah piak in a om ua; huchi in thutak lei ah a paikhia a, a sep leh bawlte ah a lohching hi.

¹³ Huchi in misiangthou khat in misiangthou dang khat kiang ah “Hiai mengmuhna a kimu tatlekna mulkimhuai in niteng haltum thillat bang tan luahtou ding a, mun siangthoupen leh van sepaihte a khenuai a bang tan nuaisiah a omsak ding ahia” a chih ka za hi.

¹⁴ Huan aman ka kiang ah, “Nitaklam leh zinglam sang nih leh za thum sung tan in; huai chiang in munsiangthoupen silsiang ahi ding hi” a chi hi.

Gabriel In Mengmuhte A Hilhchian

¹⁵ Huan hichi ahi a, kei, Daniel in ka mengmuh lai in, theihchet ka na tum a; huchi in ka ma ah mihing kibatpih bang a hongding hi.

¹⁶ Huan Ulai luipiau kikal ah, mihing aw kikou a, “Gabriel, hiai mipa mengmuhna theichiansak in” a chih ka za hi.

¹⁷ Huchibang in ka dinna mun naih in a hongpai a; huchi a a hongpai lai in, ka lauta a, ka mai in lei ka si hi: himahleh aman ka kiang ah, “Aw mihing tapa, mengmuh lah huntawp ading ahi a, theisiam in” a chi hi.

¹⁸ Huan kei a hon houpih lai in, leilam nga in nakpitak in ka ihmu ta a: himahleh a honkhoih a, a hon dingtang sak hi.

¹⁹ Huan aman, “Ngai in, thangpaihna huntawp lam a bang ahia hongom ding k’on theisak ding: huntawp sehsa ading lah ahi ngal a, a chi hi.

²⁰ Belamtal na muh ki nih nei, Media leh Persia kumpipate ahi uh.

²¹ Huan huai keltal huham Grik kumpipa ahi: a mitte kikal a om ki thupi kumpipa khatna ahi.

²² Huan a kitan pen munluah ki lite ahihleh, huai nam a kipan in gam li hong dingkhe dingte ahi ua; himahleh amau bang in thilhihtheihna a neikei ding uhi.

²³ Huan a gam vaihawm huntawpna uah, talekmite a honghat mahmah chiang un, kumpipa lauhuai melpu, zuau a zekhem siam khat ading khe ding hi.

²⁴ Huchi in a thilhihtheina a hat dia, himahleh amah mah thilhihtheihna hilou in; siatna lamdangtak a tun dia, a thilhih khempeuh a lohching ding hi: huchi in mi hatte leh misiangthoute a hihse gawp ding hi.

²⁵ Huan amah danzui in zekhemna nasep ah a lohching zel ding hi: huan a lungtang a kiliansak ding a, mitampite bit a kisaklai un a hihse ding a; kumpipate Kumpipa dou ding in a kisa ding; himahleh mihing khut hilou in hihkhap in a om ding hi.

²⁶ Huan nitaklamte leh zingsang lam toh kisai mengmuhna kigen a dik ahi; himahleh a hongtung ding ni tampi ading a hihlai ziak in hiai mengmuhna khak bikbek in” a chi hi.

²⁷ Huchi in kei Daniel ka sibup a; ni bangzah hiam ka china hi; ka thou a, kumpipa nna ka sem a hiai mengmuhna lamdang ka sa hi, himahleh kuamah in a theisiam kei hi.