DANIEL 7 - Pathian Laisiangthou (BSI)

Daniel Mengmuhnate ( 7.1—12.13 ) Daniel In Gamsa Lite a Muhna

¹ Babulon kumpipa Belshazzar kum khatna kum in Daniel in a lupna tung a lup lai in mang a nei a, a lungsim ah mengmuh hong kilang a, mang tuh a gelh a a thute a kim in a gen hi.

² Daniel in thu a gen a, “Zan a ka mengmuhna ah, ngai in, van huih lite tuipi thupi tung ah a hong nungkhia uh ka mu hi.

³ Huan tuipi a kipan sa thupi li, kibang lou chiat a hongpai tou ua

⁴ A khatna humpinelkai a bang a, muvanlai kha a nei hi; huchi a ka et lai in a khate bohkhiak in a om ua; lei a kipan phottouh a mihing bang a khe nih a dinsak a om in; mihing lungsim a kiang a piak in a om hi.

⁵ Huan ngai in, sa dang, a nihna, vompi bang, a pang langkhat tung ah photkang in a om a; a kam sung ah a hate kikal ah nakguh thum a om a; hichibang in a kiang ah hilh in a om a, “Thou inla, sa tampi negai in” chi in.

⁶ Hiai khit in ka en a, huan ngai in, sa dang khat, gialbem bang, a nungzang a vasa bang a kha li nei ka mu hi. Huai gamsa in lu li a nei a; a kiang ah thuneihna piak in a om hi.

⁷ Hiai khit in, zan mengmuhna in ka mu a, ngai in sa lina, lauhuai leh thilhihthei, nakpi mahmah a hat; sik ha lianpite nei in a negai in a botnen a; a omlaite a khe in a chil hi. A ma a gamsa om tengteng toh a kibang kei hi; ki sawm a nei hi.

⁸ Kite ka ngaihtuah lai in, a lak uah ki dang a neu khat hongpou khia a, huai ma ah huai ki masa thumte a zung ua bohkhiak in a om uhi, hiai kineu ah mit, mihing mit bang, leh kam thil thupite gen a omta hi.

Tangtawn a Om Gigepa Muhna

⁹ Huchi a ka et lai in, mangtutphah a hong kikoih a, mi khat Tangtawn a om gige a tung ah a tuta hi; a puansilh vuk bang in a ngou a, samul siang bang in a lu a sam a ngou hi; huai mangtutphah meikuang zuazua ahi a, huai a kangtalai khete meikuang lai bang ahi.

¹⁰ Meikuang luipi hongpawt a a ma a kipan hong paikhia a, a sang a sangte’n amah na a sepsak uhi; a ma ah sang sawm mun sang sawm ading ua: vaihawmna a tungkhia ua, laibute a hong uhi.

¹¹ Huai ki in a thugen thupite ziak in ka en nilouh hi. Huchi a ka et lai in, huai gamsa thah in a om a; a pumpi hihsiat in a om a; meikuang a a paih dong uh ka en gige hi.

¹² Huan sa dangte ahihleh a thuneihna uh lakmang in a om a: hunseh khat leh hun khat tan a hinna uh hihsau in a om hi.

¹³ Zan mengmuhna in ka mu a, ngai in, van meipite toh mi khat mihing tapa toh kibang a hongpai a, nite tang a tuan kiang mahmah ah a hong a, amah a ma chin ah a honpi uhi.

¹⁴ Huan thuneihna, thupina leh gam piak in a om a; huchi a mi tengteng, namte, leh paute’n amah na a sepsak theihna ding un: a thuneihna tangtawn thuneihna ahi a, a mang kei ding, a gam hihsiat in a omkei ding hi.

Mengmuhnate Hilhchet Ahi Uh

¹⁵ Kei Daniel ahihleh ka sung ah ka lungsim a dah a, ka lutang mengmuh in kei a hon patausak hi.

¹⁶ A kiang nai a dingte lak a khat kiang ka zuan a, hiai tengteng thu ah thutak amah ka dongta hi. Huchi in huai thilte hilhchetna ka kiang ah a hon theisakta hi.

¹⁷ Hiai gamsa thupi lite etsak bel lei a hong dingkhe ding kumpipa lite ahi uhi.

¹⁸ Himahleh Tungnungpen misiangthoute’n gam a tang ding ua, tangtawn, tangtawn in, gam a neiden ding uhi, a chi hi.

¹⁹ Huchi in sa lina, amaute tengteng toh kibang lou, kihtakhuai mahmah, a hate sik hi a, a chinte dal, nekhin a, botnen a, a omlaite a khepek a chil tungtang thutak theih ka ut hi.

²⁰ Huan ki sawm a lu zang a omte lak ah ki dang khat hong poukhia a, huai ma a ki thumte a pukna; huai ki mitte nei leh kam nei a thil thupite gen a, a latdan a lawite sang a hat tuakzaw pen tanchin ka thei nuam hi.

²¹ Huchi a ka et leh huai ki in misiangthoute dou in, gal a bawl a,

²² Nite Tang a tuan in Tungnungpen misiangthoute gum in thu a khen a, amau lalgam a neih masiah ua ding in amaute a zouta hi.

²³ Huchi in Sa lina pen leitung ah gam lina ahi ding a, huai gam tengteng toh a kibang kei ding a, lei pumpi a gai ding a, a sikden dia, a botnen ding a chi hi.

²⁴ Huan ki sawmte ahihleh, hiai gam a kipan in kumpipa sawm a hong dingkhe dingte ahi ua: amau nung in a dang khat; amasa toh a kibang kei ding a, aman kumpipa thumte a zou ding hi.

²⁵ Tungnungpen dem in a gense ding a, misiangthoute a nuaisiah ding hi: hunte leh dan khen ding a ngaihtuah dia; hun khat leh hunte leh hun kim khat bei masiah misiangthoute a khut a piak in a om ding uhi.

²⁶ Huaite zoh in vaihawmna a om ding a, a thuneihna lakmang ahi ding a, a tawptan a hihgawp ding leh suksiat in a om ding hi.

²⁷ Huan leitung gam leh thuneihna leh van nuai pumpi nuai a gamte thupina, Tungnungpen misiangthoute kiang ah piak in a om ding: a gam tangtawn gam ahi a, a vaihawmnate’n amah na a sepsak un a thu a mang ding uhi.

²⁸ Hiai ah thu leh la tawpna a om hi. Kei Daniel ahihleh ka ngaihtuahnate’n nakpi’n hon hihbuai a, kei ah ka mel a mual hi; himahleh ka lungtang in huai thu ka kem khinkhian hi.